လုကာကျမ်း 18

အခန်း (၁၈)

မုဆိုးမနှင့်တရားသူကြီးပုံဥပမာ

1ထို့နောက် ဟဇရသ်အီစာသည် “ဆွဟာဗီ” တပည့်တော်တို့အား အဘယ်အခါမျှစိတ်အားမလျော့ဘဲ အခါခပ်သိမ်း “ဒိုအာ” ဆုတောင်းသင့်ကြောင်း ပုံဥပမာဆောင်၍သွန်သင်တော်မူ၏။ 2အီစာက “မြို့တစ်မြို့၌အလ္လာဟ်အရှင်မြတ်ကိုမကြောက်၊ လူမျက်နှာကိုလည်းမထောက်သော တရားသူကြီးတစ်ယောက်ရှိ၏။ 3ထိုမြို့မှာပင်မုဆိုးမတစ်ယောက်ရှိ၏။ သူသည် တရားသူကြီး၏ထံသို့အကြိမ်ကြိမ်လာ၍ ကျွန်မ၏တရားတွေ့ဘက်အပေါ်တွင် အနိုင်ရအောင်တရားမျှတစွာ စီရင်ပေးတော်မူပါဟု လျှောက်ထား၏။

4တရားသူကြီးသည် အတန်ကြာမျှမုဆိုးမ၏ လျှောက်ထားချက်ကို ငြင်းဆန်နေခဲ့၏။ ထို့နောက် ‘ငါသည်အလ္လာဟ်အရှင်မြတ်ကိုမကြောက်၊ လူမျက်နှာကိုမထောက်တတ်။ 5သို့သော်လည်း ဤမုဆိုးမသည် ငါ့ကိုနှောင့်ယှက်လှသည်ဖြစ်၍ သူ့အားတရားမျှတမှုရှိစေရန် ငါသူ့အမှုကိုစီရင်မည်။ သို့မဟုတ်လျှင် သူသည်ငါ့ကိုဆက်လက်နှောင့်ယှက်သဖြင့် နောက်ဆုံး၌ငါ့အားပင်ပန်းစေမည်’ ဟု စိတ်ထဲ၌အကြံရှိ၏” ဟုမိန့်တော်မူ၏။

6ကိုယ်တော်က “ဤမတရားသောတရားသူကြီးပြောပုံကို မှတ်သားကြလော့။ 7ရွေးကောက်တော်မူသောသူတို့သည် နေ့ညမပြတ်ဟစ်အော် တောင်းလျှောက်နေကြလျှင် အလ္လာဟ်အရှင်မြတ်သည် တရားသဖြင့်ဖြစ်စေရန် စီရင်တော်မမူဘဲနေမည်လော။ အရှင်မြတ်သည်ထိုသူတို့အား ကူညီမစရန်နှောင့်နှေးတော်မူမည်လော။ 8သင်တို့အားငါဆိုသည်ကားအရှင်မြတ်သည် ထိုသူတို့အတွက်တရားသဖြင့်ဖြစ်စေရန် အလျင်အမြန် စီရင်တော်မူလိမ့်မည်။ သို့ရာတွင် လူ့သားကြွလာတော်မူသောအခါ၌ဤ ‘ဒွန္နယာ’ လောကတွင် ‘အီမာန်’ ယုံကြည်ခြင်းကိုတွေ့ရပါမည်လော” ဟု မိန့်တော်မူ၏။

ဖာရိစီးစ်နှင့်အခွန်ကောက်သူပုံဥပမာ

9မိမိတို့ကိုယ်ကို သူတော်ကောင်းဟုယုံကြည်ကာ သူတစ်ပါးတို့ကို အထင်အမြင်သေးတတ်သူ လူအချို့တို့အားဟဇရသ်အီစာသည် ပုံဥပမာကိုဆောင်၍၊ 10“လူနှစ်ယောက်သည် ‘ဒိုအာ’ ဆုတောင်းရန် ဗိုင် (က်) တွလ်မုကာဒွတ်စ်” ဝတ်ဗိမာန်တော်သို့သွားကြ၏။ တစ်ယောက်ကဖာရိစီးစ်၊ အခြားတစ်ယောက်က အခွန်ကောက်သဖြစ်၏။ 11ဖာရိစီးစ်သည်တစ်ယောက်တည်းရပ်လျက် “အို” အလ္လာဟ်အရှင်မြတ်၊ အကျွန်ုပ်သည် အခြားသူများကဲ့သို့လုယက်သောသူ၊ ယုတ်ညံ့ဆိုးသွမ်းသူ၊ “ဇိနာ” သူ့မယားကိုပြစ်မှားသူမဟုတ်သည့်အပြင် ဤအခွန်ကောက်သူကဲ့သို့ပင်မဟုတ်သောကြောင့် အရှင်မြတ်၏ကျေးဇူးတော်ကိုချီးမွမ်းပါ၏ဟု ပြောဆိုကာ “ဒိုအာ” ဆုတောင်းနေ၏။ 12အကျွန်ုပ်သည်ရက်သတ္တပတ်တစ်ပတ်လျှင် နှစ်ကြိမ်တိုင်တိုင်ရိုဇာထားပါ၏။ ရရှိသမျှဥစ္စာပစ္စည်း၏ဆယ်ဖို့တစ်ဖို့ကိုလှူပါ၏ဟု “ဒိုအာ” ဆုတောင်း၏။#18:12 ဓမ္မဟောင်း “ရှရီယသ်” ဥပဒေများက ဂျူးတစ်ဦးသည် အပြစ်ဖြေရာနေ့တွင် တစ်နှစ်တွင် တစ်ရက်သာ “ရိုဇာ” အစာရှောင်ရန် လိုအပ်သည် (ဝတ်ပြု၊ ၁၆:၂၉)။ ထို့အပြင်၊ ဂျူးလူမျိုးများသည် မိမိတို့လယ်မှရရှိသော ဆယ်ပုံတစ်ပုံအား အလ္လာဟ်အရှင်မြတ်သခင်အား ပေးဆောင်ရမည် (တရားဟော၊ ၁၄: ၂၂)။

13သို့ရာတွင် အခွန်ကောက်သူမူကားအဝေးတွင်ရပ်လျက် ကောင်းကင်သို့မော်၍မျှပင်မကြည့်ဝံ့ဘဲ “အို” အလ္လာဟ်အရှင်မြတ်၊ “ဂုနာဟ်” အပြစ်ကျူးလွန်သူအကျွန်ုပ်အား “ရဟ်မသ်” ကရုဏာထားတော်မူပါ ဟု ရင်ဘတ်ကိုတီးခတ်လျက် ဒိုအာတောင်းလေ၏။

14သင်တို့အားငါဆိုသည်ကား ဤသူသည်ဂုနာဟ်ကင်းလွတ်လျက်အိမ်သို့ပြန်သွား၏။ ဖာရိစီးစစ်မူကား ထိုသို့မဟုတ်။ အဘယ်ကြောင့်ဆိုသော် မိမိကိုယ်ကိုချီးမြှောက်သူသည် နှိမ့်ချခြင်းခံရလိမ့်မည်။ မိမိကိုယ်ကိုနှိမ့်ချသူသည် ချီးမြှောက်ခြင်းခံရလိမ့်မည် ဟု မိန့်တော်မူ၏။

ကလေးသူငယ်များနှင့်ဟဇရသ်အီစာ

(မဿဲ၊ ၁၉:၁၃-၁၅။ မာကု၊ ၁၀:၁၃-၁၆)

15လက်တော်ဖြင့်တို့ထိတော်မူစေရန် လူအချို့တို့သည် မိမိတို့၏ကလေးငယ်များကို အထံတော်သို့ခေါ်ဆောင်ခဲ့ကြသည်ကို “ဆွာဟာဗီ” တပည့်တော်တို့မြင်လျှင် ထိုသူတို့အားအပြစ်တင်ကြ၏။ 16သို့ရာတွင် ဟဇရသ်အီစာသည် “ကလေးတို့ကိုခေါ်လျက် ကလေးသူငယ်တို့ငါ့ထံသို့လာကြပါစေ။ မဆီးတားကြနှင့်၊ အဘယ်ကြောင့်ဆိုသော် အလ္လာဟ်အရှင်မြတ်၏နိုင်ငံတော်သည် ထိုသို့သောသူတို့၏နိုင်ငံဖြစ်၏။ 17အမှန်အကန်သင်တို့အားငါဆိုသည်ကား ကလေးသူငယ်ကဲ့သို့ အလ္လာဟ်အရှင်မြတ်၏နိုင်ငံတော်ကိုမခံမယူလျှင် အလ္လာဟ်အရှင်မြတ်၏နိုင်ငံတော်သို့ဝင်ရလိမ့်မည်မဟုတ်” ဟု မိန့်တော်မူ၏။

ဥစ္စာကြွယ်ဝသူ

(မဿဲ၊ ၁၉:၁၆-၃၀။ မာကု၊ ၁၀:၁၇-၃၁)

18အရာရှိတစ်ယောက်က “ကောင်းမြတ်တော်မူသောဆရာ၊ ထာဝရအသက် ကိုရအံ့သောငှာအကျွန်ုပ်သည် အဘယ်အရာကိုပြုရပါမည်နည်း” ဟုအီစာအားမေးလျှောက်၏။

19ဟဇရသ်အီစာက “သင်သည်အဘယ်ကြောင့် ငါ့ကိုကောင်းမြတ်သည်ဟုခေါ်သနည်း။ အလ္လာဟ်အရှင်မြတ်မှတစ်ပါးကောင်းမြတ်သူတစ်စုံတစ်ယောက်မျှမရှိ။ 20သင်သည် ပညတ်တော်တို့ကိုသိသည်မဟုတ်လော။ ‘ဇိနာ’ သူ့မယားကိုပြစ်မှားခြင်းမပြုနှင့်။ လူအသက်ကိုမသတ်နှင့်။ သူ့ဥစ္စာကိုမခိုးနှင့်။ မမှန်သောသက်သေကိုမခံနှင့်။ မိဘကိုရိုသေသမှုပြုလော့” ဟု မိန့်တော်မူ၏။

21ထိုသူက “ဤပညတ်တော်များကို အကျွန်ုပ်သည်ငယ်စဉ်မှစ၍စောင့်ထိန်းခဲ့ပါပြီ” ဟု လျှောက်၏။

22ထိုစကားကိုကြားတော်မူလျှင် ဟဇရသ်အီစာက “သင်သည်ပြုလုပ်ရန်တစ်ခုလိုသေး၏။ သင့်ဥစ္စာရှိသမျှကိုရောင်း၍ ဆင်းရဲသူတို့အားပေးကမ်းစွန့်ကြဲလော့။ ဤသို့ပြုလျှင်သင်သည် ‘ဂျန္နသ်’ ရွှေမြို့တော်တွင်ဘဏ္ဍာကိုရလိမ့်မည်။ ထိုနောက်လာ၍ငါ့နောက်သို့လိုက်လော့” ဟု မိန့်တော်မူ၏။

23ထိုသူကား ဥစ္စာများစွာကြွယ်ဝသူဖြစ်သဖြင့် အီစာ၏စကားကိုကြားသောအခါအလွန်ပင်စိတ်ညှိုးငယ်သွားလေ၏။ 24ထိုသို့ထိုသူစိတ်မပျော်သည်ကို ဟဇရသ်အီစာမြင်တော်မူလျှင် “ဥစ္စာကြွယ်ဝသူများသည်အလ္လာဟ်အရှင်မြတ်၏နိုင်ငံတော်သို့ဝင်ရန်ခက်လှ၏။ 25ဥစ္စာကြွယ်ဝသူသည် အလ္လာဟ်အရှင်မြတ်၏နိုင်ငံတော်သို့ဝင်ရခြင်းထက် ကုလားအုပ်သည်အပ်နဖားကိုလျှိုဝင်ခြင်းသည် ပို၍လွယ်ကူ၏” ဟု မိန့်တော်မူ၏။

26ထိုစကားကိုကြားသောသူတို့က “ဤသို့ဖြစ်ပါမူအဘယ်သူသည် ကယ်တင်ခြင်းကိုရနိုင်ပါမည်နည်း” ဟု မေးလျှောက်ကြ၏။

27အီစာက “လူတို့မတတ်နိုင်သောအရာကို အလ္လာဟ်အရှင်မြတ်တတ်နိုင်တော်မူသည်” ဟု မိန့်တော်မူ၏။

28ပေတရုက “အကျွန်ုပ်တို့သည်မိမိတို့၏အိုးအိမ်ကိုစွန့်၍ သခင်၏နောက်တော်သို့လိုက်ခဲ့ကြပါပြီ” ဟုလျှောက်၏။

29အီစာက “အမှန်အကန်သင်တို့အားငါဆိုသည်ကား အလ္လာဟ်အရှင်မြတ်၏နိုင်ငံတော်အတွက်မိမိ၏အိမ်ကိုဖြစ်စေ၊ ဇနီးကိုဖြစ်စေ၊ ညီအစ်ကိုဖြစ်စေ၊ မိဘဖြစ်စေ၊ သားသမီးဖြစ်စေစွန့်သောသူသည်၊ 30ဤဘဝ၌အဆပေါင်းများစွာသော ‘ဆဝါးဗ်’ အကျိုး ခံစားရသည်သာမက ‘အာဟီရသ်’ နောင်ဘဝ၌လည်း ထာဝရအသက်ကိုရလိမ့်မည်” ဟု မိန့်တော်မူ၏။

အသေသတ်ခြင်းခံတော်မူရမည့်အကြောင်း တတိယအကြိမ်ဖော်ပြတော်မူခြင်း

(မဿဲ၊ ၂၀:၁၇-၁၉။ မာကု၊ ၁၀:၃၂-၃၄)

31ဟဇရသ်အီစာသည် တစ်ဆယ့်နှစ်ပါးသော “ဆွဟာဗီ” တပည့်တော်တို့ကိုခေါ်တော်မူပြီးလျှင် “နားထောင်ကြလော့။ ငါတို့သည်ဂျေရုဆလာမ်မြို့သို့ခရီးပြုလျက်ရှိကြ၏။ လူ့သားအကြောင်းနှင့်ပတ်သက်၍ နဗီတမန်တော်များရေးသားဖော်ပြခဲ့သည့်အမှုအရာအလုံးစုံတို့သည်ပြည့်စုံရလိမ့်မည်။ 32အကြောင်းမူကား လူ့သားကိုလူမျိုးခြားတို့၏လက်သို့အပ်နှံကြလိမ့်မည်။ သူ့ကိုပြောင်လှောင်စော်ကား၍ တံတွေးနှင့်ထွေးကြလိမ့်မည်။ 33ကြိမ်ဒဏ်ပေး၍အသေသတ်ကြလိမ့်မည်။ ထိုနောက်သုံးရက်မြောက်သောနေ့၌ လူသားသည် သေခြင်းမှရှင်ပြန်ထမြောက်တော်မူလိမ့်မည်” ဟု မိန့်တော်မူ၏။

34သို့ရာတွင် “ဆွဟာဗီ” တပည့်တို့သည် အီစာ၏စကားတစ်ခွန်းကိုမျှ နားမလည်ကြ။ ထိုစကားများ၏အနက်အဓိပ္ပာယ်သည် ကွယ်ဝှက်လျက်နေသဖြင့် အီစာ၏မိန့်တော်မူချက်ကို နားမလည်ကြ။

မျက်မမြင်သူတောင်းစားကို မျက်စိမြင်စေတော်မူခြင်း

(မဿဲ၊ ၂၀:၂၉-၃၄။ မာကု၊ ၁၀:၄၆-၅၂)

35အီစာသည် ယေရိခေါမြို့ အနီးသို့ ရောက်တော်မူသောအခါ မျက်မမြင်တစ်ဦးသည် လမ်းဘေးမှာထိုင်၍တောင်းစားလျက်နေ၏။ 36သူသည် လူပရိသတ်များဖြတ်သွားကြသံကိုကြားလျှင် ဖြစ်ပျက်နေသောအကြောင်းအရင်းကို စုံစမ်းမေးမြန်း၏။ 37လူတို့က နာဇရသ်မြို့သား အီစာကြွလာတော်မူလျက်ရှိကြောင်းပြောကြ၏။

38ထိုသူက “ဒါဝူဒ်၏သားတော်အီစာ၊ အကျွန်ုပ်ကို ‘ရဟ်မသ်’ သနားတော်မူပါ” ဟု ဟစ်အော်၏။

39ရှေ့တွင်ရှိသည့်လူများကသူ့အား တိတ်တိတ်နေရန် ငေါက်ငမ်းပြောဆိုကြ၏။ သို့သော်လည်း သူသည် “ဒါဝူဒ်၏သားတော်အီစာ၊ အကျွန်ုပ်ကို ‘ရဟ်မသ်’ သနားတော်မူပါ” ဟု ပို၍ပင်ဟစ်အော်လေ၏။

40သို့ဖြစ်၍ ဟဇရသ်အီစာသည် ရပ်တန့်တော်မူလျက် ထိုသူအားခေါ်ခဲ့ပါ ဟု မိန့်တော်မူ၏။ ထိုသူသည်အနီးသို့ရောက်လျှင်၊ 41အီစာက “သင့်အတွက်အဘယ်အရာကိုပြုစေလိုသနည်း” ဟု မေးတော်မူ၏။

မျက်မမြင်က “သခင်၊ အကျွန်ုပ်အားမျက်စိပြန်မြင်စေတော်မူပါ” ဟု လျှောက်၏။

42ဟဇရသ်အီစာက “မျက်စိပြန်မြင်စေ။ သင်၏ ‘အီမာန်’ ယုံကြည်ခြင်းသည် သင့်ကိုကယ်မပြီ” ဟု မိန့်တော်မူ၏။ 43ထိုခဏ၌သူသည် မျက်စိပြန်မြင်လာ၏။ ထို့နောက် အလ္လာဟ်အရှင်မြတ်၏ဂုဏ်တော်ကိုချီးမွမ်းလျက် အီစာ၏နောက်သို့လိုက်လေ၏။ ထိုအခြင်းအရာကိုမြင်လျှင် လူအပေါင်းတို့သည်အလ္လာဟ်အရှင်မြတ်၏ဂုဏ်တော်ကို ချီးမွမ်းကြ၏။

လက်ရှိရွေးချယ်ထားမှု

လုကာကျမ်း 18: MBe

အရောင်မှတ်ချက်

ကူးယူ

နှိုင်းယှဉ်

မျှဝေရန်

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

Musselmani Burmese Bible by Beyond Translation is licensed under Creative Commons Attribution-ShareAlike 4.0 License.

လုကာကျမ်းအင်ဂျီလ်ကျမ်းတော်မြတ် အကြောင်းကို ပို၍ သင်ယူပါ။