လုကာကျမ်း 19

အခန်း (၁၉)

ဟဇရသ်အီစာနှင့်ဇက္ခဲ

1ဟဇရသ်အီစာသည် ယေရိခေါမြို့ကိုဖြတ်၍ကြွတော်မူ၏။ 2ထိုအရပ်တွင် ဇက္ခဲအမည်ရှိသောအကောက်ခွန်မှူးတစ်ယောက်ရှိ၏။ သူသည်ချမ်းသာကြွယ်ဝသူဖြစ်၏။ 3ဟဇရသ်အီစာကား အဘယ်သူဖြစ်သည်ကို တွေ့မြင်လိုသဖြင့် ကြိုးစား၍ကြည့်၏။ သို့ရာတွင်အရပ်ပုသူဖြစ်သည့်အလျောက် လူပရိသတ်များကွယ်လျက်နေသဖြင့် သူသည်အီစာကိုမမြင်နိုင်။ 4ထို့ကြောင့်သူသည် အီစာကိုတွေ့မြင်နိုင်ရန် ကြွတော်မူမည့်လမ်းအတိုင်း ရှေ့သို့ပြေး၍ သဖန်းပိုးစာပင်ပေါ်ကိုတက်၏။

5အီစာသည် ထိုနေရာသို့ရောက်သောအခါ မော်၍ကြည့်တော်မူပြီးလျှင် “ဇက္ခဲ၊ အမြန်ဆင်းခဲ့လော့။ ယနေ့သင်၏အိမ်တွင်ငါတည်းခိုမည်” ဟု မိန့်တော်မူ၏။ 6ထို့နောက် ဇက္ခဲသည် သစ်ပင်ပေါ်မှအမြန်ဆင်း၍အီစာအား ဝမ်းမြောက်စွာကြိုဆို၏။

7ဤအရာကိုမြင်သောအခါလူတို့က “ထိုသူသည် အပြစ်ဒုစရိုက်ကျူးလွန်သူ တစ်ယောက်၏အိမ်တွင်တည်းခိုရန် သွားလေပြီတကား” ဟု ညည်းညူကြ၏။

8ထို့နောက် ဇက္ခဲသည်ရပ်လျက်အရှင်အီစာအား “သခင်၊ အကျွန်ုပ်၏ဥစ္စာပစ္စည်းတစ်ဝက်ကို ဆင်းရဲသူတို့အား ပေးကမ်းပါမည်။ အကယ်၍ အကျွန်ုပ်သည်လူတစ်စုံတစ်ယောက်ထံမှ မတရားတောင်းယူထားမိသော ငွေရှိပါလျှင်ထိုငွေ၏ လေးဆကိုပြန်၍ပေးပါမည်” ဟု လျှောက်၏။

9ဟဇရသ်အီစာက “ဤသူသည်လည်းအီဗ်ရာဟိမ်၏သား ‘အွမ္မသ်’ ဖြစ်သဖြင့် ကယ်တင်ခြင်းကျေးဇူးသည်ယနေ့ပင် ဤအိမ်ပေါ်သို့သက်ရောက်လေပြီ။ 10လူ့သားသည် ပျောက်ဆုံးသူများကိုရှာရန်နှင့် ကယ်တင်ရန်ကြွလာသည်” ဟု ဇက္ခဲအားမိန့်တော်မူ၏။

ရွှေဒင်္ဂါးပုံဥပမာ

(မဿဲ၊ ၂၅:၁၄-၃၀)

11ထိုအခါ ဂျေရုဆလာမ်မြို့အနီးသို့ ရောက်တော်မူ၍၊ အလ္လာဟ်အရှင်မြတ်၏နိုင်ငံတော်သည် ချက်ချင်းပေါ်ထွန်းမည်ဟု လူများထင်မှတ်သောကြောင့်၊ ထို့ကြောင့် ပရိသတ်အလယ်၌မိန့်တော်မူသော နောက်ထပ်ပုံဥပမာကား၊ 12“မင်းသားတစ်ပါးသည် ရှင်ဘုရင်အရာကိုခံယူ၍ပြန်လာရန် တိုင်းတစ်ပါးသို့သွား၏။ 13ခရီးမပြုမီ မိမိ၏အစေခံဆယ်ယောက်ကိုခေါ်ယူကာရွှေဒင်္ဂါးတစ်ပြားစီ#19:13 ရွှေဒင်္ဂါးတစ်ပြားစီ အလုပ်သမားတစ်ယောက်၏ရက်တစ်ရာ (၁၀၀) ၏ လုပ်အားခနှင့်ညီမျှသည်။ပေး၍ ‘ငါပြန်လာသည်အထိကုန်သွယ်လျက်နေကြလော့’ ဟုဆို၍ မှာထားလေ၏။

14သို့ရာတွင် သူ၏ပြည်သူပြည်သားတို့သည် သူ့ကိုမုန်းကြသဖြင့် ‘ထိုသူ၏အအုပ်အချုပ်ကိုငါတို့မခံလိုပါ’ ဟု စေတမန်များကိုသူ့နောက်သို့လွှတ်၍ အင်ပါယာဘုရင်ကြီးအား လျှောက်ထားစေ၏။

15ထိုသူကား ဘုရင်အရာကိုခံယူ၍ပြန်လာသောအခါ မိမိရင်းနှီးငွေပေးခဲ့သည့်အစေခံများသည် ကုန်သွယ်၍အမြတ်ငွေမည်မျှလောက်ရကြသည်ကိုသိလိုသဖြင့် သူသည်ချက်ချင်းပင် အစေခံများကိုဆင့်ခေါ်၏။

16ပထမအစေခံသည်လာ၍ ‘အရှင်၊ အရှင်ပေးခဲ့သည့်ရွှေဒင်္ဂါးတစ်ပြားဖြင့်အမြတ်ဆယ်ဆရပါသည်’ ဟုလျှောက်၏။

17မင်းကြီးက ‘ကောင်းလေစွ၊ သင်သည် အစေခံကောင်းတစ်ယောက်ဖြစ်ပေ၏။ သေးငယ်သောအမှုတွင်သစ္စာရှိသူဖြစ်သဖြင့် သင့်အားငါသည်မြို့ဆယ်မြို့ကိုအပိုင်စားပေး၏’ ဟု မိန့်တော်မူ၏။

18ထို့နောက် ဒုတိယအစေခံသည်လည်းလာ၍အရှင်၊ ‘အရှင်ပေးခဲ့သည့်ရွှေဒင်္ဂါးတစ်ပြားဖြင့်အမြတ်ငါးဆရပါသည်’ ဟုလျှောက်၏။

19မင်းကြီးက ‘ကောင်းလေစွ၊ သင့်အားလည်း မြို့ငါးမြို့ကိုအပိုင်စားပေး၏’ ဟု မိန့်တော်မူ၏။

20အခြားသောအစေခံသည်လာ၍ အရှင်၊ ‘အရှင်ပေးခဲ့သည့်ရွှေဒင်္ဂါးဤမှာရှိပါ၏။ ထိုငွေကိုအကျွန်ုပ်သည်အဝတ်ဖြင့်ထုပ်၍ သိမ်းဆည်းထားပါ၏။ 21အဘယ်ကြောင့်ဆိုသော် အရှင်သည်ခက်ထန်သူဖြစ်သဖြင့် အရှင့်အားအကျွန်ုပ်ကြောက်ရွံ့ပါ၏။ အရှင်သည်မိမိမပိုင်သည့်အရာကိုသိမ်းယူတတ်၍ မိမိမစိုက်မပျိုးသည့်အသီးအနှံကိုလည်း ရိတ်သိမ်းတတ်သည်ကို အကျွန်ုပ်သိပါ၏’ ဟုလျှောက်၏။

22မင်းကြီးက ‘ထိုအစေခံဆိုး၊ သင့်နှုတ်ထွက်စကားအတိုင်းသင့်ကိုငါစီရင်မည်။ ငါသည်ခက်ထန်သူဖြစ်၍ မိမိမပိုင်သည့်အရာကို သိမ်းယူတတ်သည်ကိုလည်းကောင်း၊ မိမိမစိုက်မပျိုးသည့်အသီးအနှံကို ရိတ်သိမ်းတတ်သည်ကိုလည်းကောင်းသိပါလျက်နှင့်၊ 23ငါပေးသည့်ငွေကိုငါပြန်လာချိန်တွင် အတိုးနှင့်တကွ ပြန်လည်ပေးဆပ်နိုင်ရန် အဘယ်ကြောင့်ဘဏ်တွင်အပ်နှံ၍ မထားသနည်းဟု’ မေးတော်မူ၏။

24အနီးတွင်ရပ်နေသူများအားမင်းကြီးက ‘ထိုသူထံမှရွှေဒင်္ဂါးကိုယူ၍ ရွှေဒင်္ဂါးဆယ်ပြားရှိသူအား ပေးကြလော့’ ဟုမိန့်တော်မူလျှင်၊

25သို့သော် လူတို့က ‘အရှင်၊ ထိုသူထံတွင်ရွှေဒင်္ဂါးဆယ်ပြားရှိပြီးဖြစ်ပါ၏’ ဟုလျှောက်ကြ၏။

26မင်းကြီးက ‘သင်တို့အားငါဆိုသည်ကား ရှိသူအားထပ်၍ပေးလိမ့်မည်။ အကြင်သူသည် ဆင်းရဲ၏။ မရှိသူထံမှ ရှိသမျှကိုပင်သိမ်းယူလိမ့်မည်။ 27ထိုမှတစ်ပါးငါ၏အအုပ်အချုပ်ကို မခံလိုသောငါ၏ရန်သူများအားခေါ်၍ ငါ၏ရှေ့မှောက်တွင်ကွပ်မျက်လော့’ ဟု စီရင်တော်မူသည်” ဟု မိန့်တော်မူ၏။

အောင်ပွဲအခမ်းအနားနှင့် ဂျေရုဆလာမ်မြို့ကိုဝင်တော်မူခြင်း

(မဿဲ၊ ၂၁:၁-၁၁။ မာကု၊ ၁၁:၁-၁၁။ ယာဟ်ယာ၊ ၁၂:၁၂-၁၉)

28ထိုသို့မိန့်တော်မူပြီးနောက် အီစာသည် ဂျေရုဆလာမ်မြို့သို့ “ဆွာဟာဗီ” တပည့်တော်တို့၏ရှေ့ကကြွတော်မူ၏။ 29ထို့နောက် သံလွင်အမည်ရှိသော တောင်အနီးရှိဗဲသ်ဖာဂေနှင့် ဗေသနိရွာများအနီးသို့ ရောက်တော်မူသောအခါ “ဆွာဟာဗီ” တပည့်တော်နှစ်ယောက်တို့အားစေလွှတ်၍၊ 30“သင်တို့ရှေ့တွင်ရှိသောရွာသို့သွားကြလော့။ ရွာကိုဝင်လျှင်ဝင်ချင်း မည်သူမျှမစီးဖူးသေးသောမြည်း#19:30 မြည်း မြည်းဆိုသည်မှာ ဂျူလူမျိုးများ စီးနင်း၍ ဝန်တင်ဆောင်ရာတွင် အသုံးပြုသည့် တိုတောင်းပြီး သေးငယ်သော တိရစ္ဆာန်ကို ရည်ညွှန်းသည်။ ကလေး တစ်ကောင်ချည်နှောင်လျက်ရှိသည်ကိုတွေ့လိမ့်မည်။ ကြိုးကိုဖြေ၍မြည်းကိုယူခဲ့လော့။ 31အကယ်၍လူတစ်စုံတစ်ယောက်က ‘သင်တို့အား အဘယ်ကြောင့်မြည်းကြိုးကိုဖြေသနည်း’ ဟုမေးလျှင်၊ ‘သခင် အလိုရှိသည်’ ဟုဖြေကြလော့” ဟု မှာကြားစေလွှတ်တော်မူ၏။

32ထို့ကြောင့် စေလွှတ်ခြင်းခံရသော “ဆွာဟာဗီ” တပည့်တော်နှစ်ဦးတို့သည်လည်းသွားကြသောအခါ အီစာမိန့်ကြားတော်မူသည့်အတိုင်း အရာခပ်သိမ်းကိုတွေ့မြင်ကြ၏။ 33သူတို့သည်မြည်းကြိုးကိုဖြေနေစဉ် မြည်းပိုင်ရှင်က “သင်တို့သည် အဘယ်ကြောင့်မြည်းကြိုးကိုဖြေသနည်း” ဟု မေး၏။

34“ဆွာဟာဗီ” တပည့်တော်နှစ်ဦးတို့က “သခင်အလိုရှိတော်မူသည်” ဟု ဖြေကြား၏။

35ထို့နောက် မြည်းကိုဟဇရသ်အီစာထံတော်သို့ ယူဆောင်ခဲ့ကြ၏။ မြည်း၏ကျောပေါ်မှာ မိမိတို့၏အဝတ်များ ကိုတင်ကာဟဇရသ်အီစာအား ထိုမြည်းကိုစီးစေရန်ကူညီကြ၏။ 36အီစာသည်မြည်းကိုစီး၍ခရီးသွားတော်မူစဉ် လူတို့သည် မိမိတို့၏အဝတ်များကိုလမ်းပေါ်မှာဖြန့်ခင်းကြ၏။

37ဂျေရုဆလာမ်မြို့ သို့အီစာချဉ်းကပ်လာစဉ် သံလွင်တောင်အဆင်းလမ်းတွင် “ဆွာဟာဗီ” တပည့်နောက်လိုက်ပရိသတ်ကြီးသည် မိမိတို့တွေ့မြင်ခဲ့ရသည့် “မုအ်ဂျ်ဇာ” အံ့ဩဖွယ်အမှုအရာအပေါင်းအတွက် ဝမ်းမြောက်ရွှင်လန်းလျက် အလ္လာဟ်အရှင်မြတ်၏ဂုဏ်တော်ကို အသံကျယ်စွာချီးမွမ်းကြ၏။

38ထိုသူတို့က “အလ္လာဟ်အရှင်မြတ်၏နာမတော်ဖြင့်ကြွလာသောဘုရင်သည် ‘မူဘာရဲက’ မင်္ဂလာရှိတော်မူစေသတည်း။

ကောင်းကင်တွင်ငြိမ်းချမ်းခြင်းရှိစေသတည်း။ ‘ဂျန္နသ်’ ကောင်းကင်အမြင့်မြတ်ဆုံးသောအရပ်၌ ‘ဂျလာလ်’ ဘုန်းကြီးတော်မူစေသတည်း” ဟု ကြွေးကြော်ကြ၏။

39ထိုအခါလူပရိသတ်အထဲမှ ဖာရိစီးစ်အချို့တို့က “ဆရာသခင်၊ ကိုယ်တော်၏ ‘ဆွာဟာဗီ’ တပည့်များအားတိတ်ဆိတ်စေရန်ဆုံးမတော်မူပါ” ဟု အီစာအားလျှောက်ထားကြ၏။

40သို့သော် အီစာက “သင်တို့အားငါဆိုသည်ကား ဤသူတို့တိတ်ဆိတ်စွာနေကြလျှင် ကျောက်ခဲများကကြွေးကြော်ကြလိမ့်မည်” ဟု မိန့်တော်မူ၏။

41အီစာသည် ဂျေရုဆလာမ်မြို့ အနီးသို့ရောက်၍ ထိုမြို့ကိုမြင်တော်မူလျှင်ငိုကြွေးတော်မူ၏။ 42အီစာက “မြို့တော်၊ သင်သည်ငြိမ်းချမ်းသာယာမှုကိုရစေသည့်လမ်းကို ယနေ့သိမြင်လျှင်မင်္ဂလာရှိ၏။ သို့ရာတွင်ထိုလမ်းကိုသင်သည်မသိမမြင်နိုင်စေရန် ဝှက်ထားလျက်ရှိ၏။ 43ရန်သူများသည်သင့်ပတ်လည်တွင်တပ်ချလျက် အဘက်ဘက်မှ ဝန်းရံပိတ်ဆို့နေသည့်အချိန်ကာလ ကျရောက်လာလိမ့်မည်။ 44သူတို့သည်သင့်ကိုလည်းကောင်း၊ သင်၏မြို့ရိုးအတွင်းရှိ သားသမီးအပေါင်းတို့ကိုလည်းကောင်း မြေပြင်နှင့်တစ်ညီတည်းဖြစ်စေရန် ဖျက်ဆီးသုတ်သင်ကြလိမ့်မည်။ ကျောက်တစ်ချပ်ပေါ် တစ်ချပ်မျှတင်၍နေလိမ့်မည်မဟုတ်။ အဘယ်ကြောင့်ဆိုသော် သင်သည်မိမိအားကယ်တင်ရန် အလ္လာဟ်ကြွလာသည့်အချိန်ကာလကို မသိမမြင်သောကြောင့်ဖြစ်၏” ဟု မိန့်တော်မူ၏။

“ဗိုင် (က်) တွလ်မုကာဒဲစ်” ဝတ်ဗိမာန်တော်သို့ကြွတော်မူခြင်း

(မဿဲ၊ ၂၁:၁၂-၁၇။ မာကု၊ ၁၁:၁၅-၁၉။ ယာဟ်ယာ၊ ၂:၁၃-၂၂)

45ထို့နောက် ဟဇရသ်အီစာသည် “ဗိုင် (က်) တွလ်မုကာဒဲစ်” ဝတ်ဗိမာန်တော်သို့ဝင်တော်မူ၍ ဝတ်ဗိမာန်တော် အတွင်းမှာရောင်းဝယ်နေသူ တို့ကိုစတင်နှင်ထုတ်တော်မူ၏။ 46အီစာက “ငါ၏အိမ်တော်#19:46 ငါ၏အိမ်တော် “ငါ၏အိမ်တော်” ဟူသောစကားလုံးသည်ဂျေရုဆလာမ်မြို့မှ ဝတ်ဗိမာန်တော်ကိုရည်ညွှန်းသည်။ (ဟေရှာယ၊ ၅၆:၇) သည်ဝတ်ပြုရာဝတ်ဗိမာန်တော်နှင့် ‘ဒိုအာ’ ဆုတောင်းရာအိမ်တော်ဖြစ်ရလိမ့်မည် ဟု ကျမ်းတော်မြတ်တွင်ရေးသားထားသည်။ သို့ရာတွင်သင်တို့သည်အိမ်တော်ကို ဓားပြခိုအောင်းသောနေရာဖြစ်စေကြပြီ” ဟုဆို၍မိန့်တော်မူ၏။

47အီစာသည်နေ့စဉ်နေ့တိုင်းဝတ်ဗိမာန်တော်၌ဟောပြောသွန်သင်တော်မူ၏။ “အီမာမ်” ရှေ့ဆောင်ချုပ်များနှင့် အာလဲမ်ကျမ်းတတ်ဆရာများနှင့် ယဟူဒီအကြီးအကဲများသည် အီစာကိုသတ်ရန် အခွင့်အလမ်းရှာလျက်နေကြ၏။ 48သို့ရာတွင် လူအပေါင်းတို့က အီစာ၏တရားစကားများကို အထူးအာရုံစိုက်၍နာယူနေကြသောကြောင့် အီစာအားသတ်နိုင်သောအခွင့်ကိုမတွေ့ရကြ။

လက်ရှိရွေးချယ်ထားမှု

လုကာကျမ်း 19: MBe

အရောင်မှတ်ချက်

ကူးယူ

နှိုင်းယှဉ်

မျှဝေရန်

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

Musselmani Burmese Bible by Beyond Translation is licensed under Creative Commons Attribution-ShareAlike 4.0 License.

လုကာကျမ်းအင်ဂျီလ်ကျမ်းတော်မြတ် အကြောင်းကို ပို၍ သင်ယူပါ။