လုကာကျမ်း 14
14
အခန်း (၁၄)
လူနာတစ်ဦးကိုရောဂါပျောက်စေတော်မူခြင်း
1“စဗသ်” ဥပုသ်နေ့တစ်နေ့၌ အီစာသည်အစားအစာ သုံးဆောင်တော်မူရန် ဖာရီစီးစ်အကြီးအကဲတစ်ဦး၏အိမ်သို့ ဝင်တော်မူ၏။ ထိုအခါအခြားသော ဖာရိစီးစ်များနှင့် ကျမ်းတတ်ဆရာများသည် အီစာကိုအပြစ်ရှာရန်သေချာစောင့်ကြည့်နေကြ၏။ 2အီစာ၏ရှေ့တွင်ရေဖျဉ်းနာစွဲသူလူတစ်ယောက်ရှိ၏။ 3အီစာက “စဗသ်နေ့၌အနာရောဂါကိုပျောက်ကင်းစေခြင်းသည် ဟလာလ်ဖြစ်သလော၊ သို့မဟုတ် မဖြစ်သလော” ဟု “အာလဲမ်” ကျမ်းတတ်ဆရာများနှင့် ဖာရိစီးစ်များအား မေးတော်မူ၏။ 4သို့ရာတွင်သူတို့သည် ဆိတ်ဆိတ်နေကြ၏။ အီစာသည်လူနာကိုခေါ်လျက် လက်ဖြင့်ကိုင်ပြီး ရောဂါကိုပျောက်ကင်းစေပြီးလျှင် သူ့အားထွက်သွားစေတော်မူ၏။
5အီစာက “သင်တို့အနက်အဘယ်သူသည် မိမိ၏သားဖြစ်စေ၊ နွားဖြစ်စေ စဗသ်နေ့၌ရေတွင်းထဲသို့ကျခဲ့သော် ချက်ချင်းမဆွဲမတင်ဘဲနေပါမည်နည်း” ဟု မေးတော်မူ၏။ 6သို့ရာတွင်သူတို့သည် အဘယ်သို့မျှအဖြေမပေးနိုင်ကြ။
7စားသောက်ပွဲသို့ ဖိတ်ခေါ်ထားသောသူတို့သည် အကောင်းဆုံးသောနေရာများကို ရွေးချယ်နေကြသည်ကို အီစာသိမြင်တော်မူလျှင် ထိုသူတို့အားပုံဥပမာတစ်ခုကို မိန့်ကြားတော်မူ၏။ 8အီစာက “သင်သည် ‘ဝလီမာ’ မင်္ဂလာဆောင်ပွဲသို့ဖိတ်ခေါ်ခြင်းခံရသောအခါ အကောင်းဆုံးသောနေရာတွင်မထိုင်နှင့်။ အကယ်၍ သင့်ထက်ဂုဏ်မြင့်သူတစ်ဦးအားလည်း ဖိတ်ခေါ်ထားခဲ့သော်၊ 9အကယ်၍ သင်တို့နှစ်ဦးစလုံးကို ဖိတ်ကြားခဲ့သောပွဲရှင်သည် ‘သင့်ထံသို့လာ၍ ဤသူအား သင်၏နေရာဖယ်ပေးလိုက်ပါ’ ဟု ဆိုပေလိမ့်မည်။ ထိုအခါသင်သည်အရှက်ရလျက် နိမ့်ကျသည့်နေရာတွင်ထိုင်ရလိမ့်မည်။ 10သို့ဖြစ်၍ သင်သည်ခေါ်ဖိတ်ခြင်းကိုခံရလျှင် ပွဲသို့သွား၍အနိမ့်ကျဆုံးသော နေရာတွင်ထိုင်လော့။ သို့မှသာ ပွဲရှင်သည်သင့်ထံလာ၍ ‘အဆွေသာ၍ကောင်းသောနေရာသို့ကြွပါ’ ဟု သင့်အားဆိုလိမ့်မည်။ ထိုအခါသင်သည် ဧည့်ပရိသတ်တို့၏ရှေ့တွင် ဂုဏ်အသရေရှိလိမ့်မည်။ 11မိမိကိုယ်ကိုချီးမြှောက်သူသည် နှိမ့်ချခြင်းကိုခံရလိမ့်မည်။ မိမိကိုယ်ကိုနှိမ့်ချသူသည် ချီးမြှောက်ခြင်းကိုခံရလိမ့်မည်” ဟု မိန့်တော်မူ၏။
12ထို့နောက်အီစာက အိမ်ရှင်အား “သင်သည်နံနက်စာသော်လည်းကောင်း၊ ညစာသော်လည်းကောင်း ကျွေးမွေးဧည့်ခံမည်ပြုသောအခါ မိတ်ဆွေများ၊ ညီအစ်ကိုများ၊ ဆွေမျိုးများ၊ ချမ်းသာကြွယ်ဝသောအိမ်နီးချင်းများအား မဖိတ်ခေါ်နှင့်။ ဖိတ်ခေါ်ခဲ့ပါမူ သူတို့သည်သင့်အား ပြန်ဖိတ်ခေါ်ပြီးလျှင် ကျေးဇူးဆပ်ကြလိမ့်မည်။ 13သို့ဖြစ်၍ကျွေးမွေးဧည့်ခံပွဲကိုကျင်းပသောအခါ ဆင်းရဲသူ၊ အင်္ဂါချို့တဲ့သူ၊ ခြေမစွမ်းသူ၊ မျက်မမြင်သူများကိုဖိတ်ခေါ်လော့။ 14ထိုသို့ခေါ်ဖိတ်လျှင် သင်သည်မင်္ဂလာရှိလိမ့်မည်။ အဘယ်ကြောင့်ဆိုသော် ထိုသူတို့သည် သင့်အားပြန်၍ ကျေးဇူးဆပ်နိုင်စွမ်း မရှိကြသောကြောင့်ဖြစ်သည်။ ဖြောင့်မတ်မှန်ကန်သူတို့ သေခြင်းမှပြန်လည်ထမြောက်ရာကာလ၌ သင်သည်ကျေးဇူးဆပ်ခြင်းကိုခံရလိမ့်မည်” ဟု မိန့်တော်မူ၏။
ကျွေးမွေးဧည့်ခံပွဲကြီး ပုံဥပမာ
(မဿဲ၊ ၂၂:၁-၁၀)
15အီစာနှင့်အတူထိုင်နေသူလူတစ်ယောက်သည် ထိုစကားတော်ကိုကြားလျှင် “အလ္လာဟ်အရှင်မြတ်၏နိုင်ငံတော် ‘ဂျန္နသ်’ ရှိပွဲတွင်ထိုင်ရမည့်သူသည် မင်္ဂလာရှိ၏” ဟု လျှောက်၏။
16အီစာကထိုသူအား “လူတစ်ယောက်သည် ကျွေးမွေးဧည့်ခံပွဲကြီးတစ်ရပ်ကိုကျင်းပရန် ဧည့်သည်အမြောက်အမြားကို ဖိတ်ကြား၏။ 17အချိန်ရောက်သောအခါမိမိဖိတ်ခေါ်ထားသူများ၏ထံသို့ အစေခံတစ်ယောက်ကိုစေလွှတ်၍ကြွကြပါ၊ ‘ယခုအားလုံးအသင့်ရှိပြီဖြစ်၍ ပွဲဆင်နွှဲရန် ကြွကြပါ’ ဟု ပြောကြားစေ၏။
18သူတို့အားလုံးတစ်ယောက်ပြီးတစ်ယောက် အကြောင်းပြချက်ပေးကြ၏။ ပထမလူကအကျွန်ုပ်သည် လယ်တစ်ကွက်ကို ဝယ်ထားသဖြင့်သွား၍ကြည့်ရပါမည်။ ‘အကျွန်ုပ်အားခွင့်လွှတ်ပါရန် တောင်းပန်ပါ၏’ ဟုဆို၏။
19အခြားတစ်ယောက်က အကျွန်ုပ်သည်နွားငါးရှဉ်းကိုဝယ်ထားသဖြင့် သွား၍စမ်းသပ်ရပါမည်။ ‘အကျွန်ုပ်အားခွင့်လွှတ်ပါရန်တောင်းပန်ပါ၏ဟု’ ဆို၏။
20အခြားတစ်ယောက်က အကျွန်ုပ်သည် လက်ထပ်ပြီးခါစဖြစ်သောကြောင့် မလာနိုင်ပါဟုဆို၏။
21အစေခံသည် မိမိ၏အရှင်ထံသို့ပြန်လာ၍ ထိုအကြောင်းများကိုလျှောက်လေ၏။ ထိုအခါအိမ်ရှင်သည်အမျက်ထွက်၍ ‘မြို့တွင်းရှိလမ်းမလမ်းကြားသို့အမြန်သွား၍ဆင်းရဲသူ၊ အင်္ဂါချို့တဲ့သူ၊ ခြေမစွမ်းသူ၊ မျက်မမြင်သူများကိုခေါ်ခဲ့လော့’ ဟု အစေခံအားစေခိုင်း၏။
22မကြာမီအစေခံပြန်ရောက်လာ၍ ‘အရှင်စေခိုင်းသည့်အတိုင်းဆောင်ရွက်ပြီးပါပြီ။ သို့ရာတွင် နေရာလပ်ရှိပါသေး’ သည်ဟုလျှောက်၏။
23ထို့နောက်အိမ်ရှင်က ‘ဤသို့ဆိုလျှင် မြို့ပြင်လမ်းမများနှင့် ကျေးလက်တောရွာလမ်းများကိုသွား၍ ငါ့အိမ်ပြည့်အောင် လူများကိုအနိုင်အထက်ခေါ်ခဲ့လော့။ 24သင့်အားငါဆိုသည်ကား ယခင်ကငါခေါ်ဖိတ်ထားသူတစ်ယောက်မျှ ငါ၏ကျွေးမွေးဧည့်ခံပွဲသို့မဝင်ရဟူ၍’ မိမိအစေခံကိုဆိုသည်” ဟု မိန့်တော်မူ၏။
“ဆွာဟာဗီ” တပည့်တော်ဖြစ်ရန်ပေးရမည့်အဖိုးအခ
(မဿဲ၊ ၁၀:၃၇-၃၈)
25လူအစုအဝေးအပေါင်းတို့သည် နောက်တော်သို့လိုက်ကြသည်ကို အီစာသည်လှည့်၍ ကြည့်တော်မူပြီးအခါ၊ 26“ငါ့ထံသို့လာသောသူသည် ကိုယ့်မိဘ၊ သားမယား၊ ညီအစ်ကိုမောင်နှမတို့ကိုဖြစ်စေ၊ မိမိအသက်ကိုပင်ဖြစ်စေ မမုန်းလျှင် ငါ၏ ‘ဆွာဟာဗီ’ တပည့်မဖြစ်နိုင်။ 27ထို့ကြောင့် မိမိလက်ဝါးကပ်တိုင်းကိုထမ်း၍ ငါ့နောက်သို့မလိုက်သောသူသည်ငါ၏ ‘ဆွာဟာဗီ’ တပည့်မဖြစ်နိုင်။
28သင်တို့အနက် အဘယ်သူသည်မျှော်စင်တစ်ခုကို တည်ဆောက်မည်ကြံပြီးနောက် မျှော်စင်ပြီးအောင်တည်ဆောက်ရန် မိမိ၌ငွေအလုံလောက်ရှိမရှိကိုသိရန် ဦးစွာထိုင်၍တွက်ချက်မကြည့်ဘဲ နေပါမည်နည်း။ 29ထိုသို့တွက်ချက်မကြည့်ဘဲမျှော်စင်ကိုအုတ်မြစ်ချ၍ အဆုံးမသတ်နိုင်လျှင် ကြည့်မြင်သူအပေါင်းတို့သည် ထိုသူအားပြောင်လှောင်ကြလိမ့်မည်။ 30‘ဤသူကား တည်ဆောက်မှုကိုအစပြု၏။ သို့ရာတွင် အဆုံးမသတ်နိုင်’ ဟုဆိုကြလိမ့်မည်။
31အခြားတစ်နည်းဆိုသော် အဘယ်မည်သောဘုရင်သည် အခြားဘုရင်တစ်ပါးနှင့် စစ်ပြိုင်ရန်ထွက်မည်ပြုသောအခါ မိမိ၏စစ်သည်တစ်သောင်းဖြင့် စစ်သည်နှစ်သောင်းနှင့်ချီလာသောဘုရင်အား ခုခံနိုင်ပါမည်လောဟု ဦးစွာထိုင်၍ မစဉ်းစားဘဲနေပါမည်လော။ 32အကယ်၍မခုခံနိုင်ပါလျှင် သူသည်စစ်ချီလာသောဘုရင် အဝေး၌ရှိနေသေးစဉ် သံတမန်များကိုစေလွှတ်၍ စစ်မဖြစ်ရန်ငြိမ်းရေးစကားကမ်းလှမ်းရပေလိမ့်မည်။ 33ထိုနည်းတူစွာ၊ သင်တို့၌ရှိသမျှတို့ကို စွန့်လွှတ်တော်မမူသောသူတို့သည် ငါ့၏ ‘ဆွာဟာဗီ’ တပည့်ဖြစ်ကြလိမ့်မည်မဟုတ်” ဟုမိန့်တော်မူ၏။
34“ဆားသည်ကောင်းပေ၏။ သို့ရာတွင် ဆားမှအငန်ကင်းပျောက်လျှင် အဘယ်သို့မျှငန်သောအရသာကိုပြန်၍မရနိုင်။ 35လယ်မြေအတွက်သော်လည်းကောင်း၊ မြေဩဇာအတွက်သော်လည်းကောင်း အသုံးမဝင်တော့ပေ။ ထို့ကြောင့် ထိုဆားကိုလူတို့စွန့်ပစ်လိုက်တတ်၏။
ကြားတတ်သောနားရှိသူသည်ကြားပါစေ” ဟု မိန့်တော်မူ၏။
လက်ရှိရွေးချယ်ထားမှု
လုကာကျမ်း 14: MBe
အရောင်မှတ်ချက်
ကူးယူ
နှိုင်းယှဉ်
မျှဝေရန်
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Musselmani Burmese Bible by Beyond Translation is licensed under Creative Commons Attribution-ShareAlike 4.0 License.
