လုကာကျမ်း 13

အခန်း (၁၃)

“သောင်ဗဟ်” ပြုနောင်တရခြင်းမရှိလျှင်သေကျေပျက်စီးရလိမ့်မည်

1ထိုအချိန်၌ လူအချို့တို့သည်အီစာ၏ထံတော်သို့လာ၍ ပိလတ်မင်းသတ်ဖြတ်လိုက်သည့်ဂါလိလဲအမျိုးသားများအကြောင်းကို လျှောက်ထားကြ၏။ ထိုသူတို့သည် သားကောင်များကိုကုရ်ဗာနီပြုနေစဉ် သတ်ဖြတ်ခြင်းကိုခံခဲ့ရကြ၏။ 2အီစာက “ထိုဂါလိလဲလူတို့သည် ယင်းသို့အသတ်ခံရသဖြင့် အခြားဂါလိလဲအမျိုးသားအပေါင်းတို့ထက် ပို၍ ‘ဂူနာဟ်’ အပြစ်ကျူးလွန်သူများဖြစ်သည်ဟု သင်တို့ထင်မှတ်ကြသလော။ 3သူတို့ကား ပို၍ ‘ဂူနာဟ်’ ကျူးလွန်သူများမဟုတ်ဟု သင်တို့အားငါဆို၏။ သို့ရာတွင် သင်တို့သည်လည်း ‘သောင်ဗဟ်’ ပြု နောင်တရခြင်းမရှိကြလျှင် ထိုသူတို့ကဲ့သို့ သေကျေပျက်စီးခြင်းခံ#13:3 သေကျေပျက်စီးခြင်း သေကျေပျက်စီးခြင်း ဟူသော စကားလုံးသည် ရုပ်ပိုင်းဆိုင်ရာသေခြင်း သို့မဟုတ် ဝိညာဉ်ရေးသေခြင်းကို ရည်ညွှန်းနိုင်သည်။ရလိမ့်မည်။ 4ရှိလောင်မျှော်စင်ပြိုကျသဖြင့် ပိ၍သေသူ လူတစ်ဆယ့်ရှစ်ယောက်တို့သည် အခြားဂျေရုဆလာမ်မြို့သူမြို့သားများထက်ပို၍ ‘ဂူနာဟ်’ အပြစ်ကျူးလွန်သူများဖြစ်သည်ဟု သင်တို့ထင်မှတ်ကြသလော။ 5သူတို့ကားပို၍ ‘ဂူနာဟ်’ အပြစ်ကျူးလွန်သူများမဟုတ်ဟု သင်တို့အားငါဆို၏။ သို့ရာတွင် သင်တို့သည်လည်း သောင်ဗဟ်မပြုကြလျှင် ထိုသူတို့ကဲ့သို့ သေကျေပျက်စီးရလိမ့်မည်” ဟု မိန့်တော်မူ၏။

6အီစာသည် လူအပေါင်းတို့အား ပုံဥပမာဆောင်၍ “လူတစ်ယောက်၏စပျစ်ဥယျာဉ်ထဲတွင် စိုက်ပျိုးထားသော သဖန်းပင်တစ်ပင်ရှိ၏။ ဥယျာဉ်ရှင်သည် သဖန်းပင်ကိုလာ၍ သဖန်းသီးရှာသော်လည်းမတွေ့။ 7ဥယျာဉ်ရှင်ကငါသည် ‘ဤသဖန်းပင်ကိုလာ၍ သဖန်းသီးရှာသည်မှာ သုံးနှစ်ရှိချေပြီ။ သို့ရာတွင် တစ်လုံးမျှမတွေ့။ ဤသဖန်းပင်ကိုခုတ်ပစ်လော့။ အဘယ်ကြောင့် မြေကိုအကျိုးမဲ့ဖြစ်စေမည်နည်း’ ဟု ဥယျာဉ်မှူးအားဆို၏။

8ဥယျာဉ်မှူးက သခင်၊ ‘ထိုအပင်ကိုဤတစ်နှစ်ထားပါဦး။ အပင်ရင်းပတ်လည်ကိုအကျွန်ုပ်တူးဆွ၍ မြေဩဇာထည့်ပါဦးမည်။ 9နောင်နှစ်ခါအသီးသီးလျှင် အလွန်ကောင်းပေလိမ့်မည်။ အကယ်၍အသီးမသီးခဲ့သော် ခုတ်ပစ်ပါ’ ဟုပြန်၍လျှောက်သည်” ဟု မိန့်တော်မူ၏။

မသန်စွမ်းသောအမျိုးသမီးကို “စဗသ်” ဥပုသ်နေ့၌ သန်စွမ်းစေတော်မူခြင်း

10“စဗသ်” ဥပုသ်နေ့တစ်နေ့၌ ဝတ်ကျောင်းတော်တွင် အီစာဟောပြောသွန်သင်လျက်နေတော်မူရာ၊ 11ဝတ်ကျောင်းတော်ထဲတွင်တစ်ဆယ့်ရှစ်နှစ်ပတ်လုံး “ဂျင်န်” နတ်ဆိုးပူးဝင်သဖြင့် မသန်စွမ်းဖြစ်လျက်နေသော အမျိုးသမီးတစ်ယောက်ရှိ၏။ သူသည်ကျောကုန်း၍မိမိ၏ခါးကိုလုံးဝမဆန့်နိုင်။ 12ဟဇရသ်အီစာသည် ထိုအမျိုးသမီးကိုမြင်သောအခါ အထံတော်သို့ခေါ်တော်မူလျက် “အသင်အမျိုးသမီး၊ သင့်ရောဂါပျောက်ပြီ” ဟု မိန့်တော်မူ၏။ 13သူ၏အပေါ်မှာ လက်တော်ကိုတင်တော်မူသဖြင့် သူမသည်ချက်ချင်းပင်ခါးဆန့်သွား၍ အလ္လာဟ်အရှင်မြတ်၏ ဂုဏ်တော်ကိုချီးမွမ်းလေ၏။

14ထိုအခါယင်းသို့ စဗသ်နေ့၌အနာရောဂါကို ဟဇရသ်အီစာပျောက်ကင်းစေတော်မူသဖြင့် ဝတ်ကျောင်းတော် မှူးသည်စိတ်ဆိုးလျက် “အလုပ်လုပ်အပ်သောရက်ခြောက်ရက်ရှိ၏။ ထိုရက်များတွင်လာ၍ရောဂါပျောက်အောင်အကုခံကြလော့။ စဗသ်နေ့၌မူကားလာ၍အကုမခံကြနှင့်” ဟု လူပရိသတ်တို့အားဆို၏။

15အီစာက “သူတော်ကောင်းယောင်ဆောင်သူတို့၊ သင်တို့ရှိသမျှသည် စဗသ်နေ့၌ သင်တို့၏မြည်းများ၊ နွားများအား တင်းကုတ်မှကြိုးကိုဖြေ၍ ရေတိုက်ရန်ခေါ်ဆောင်သွားတတ်ကြသည်မဟုတ်လော။ 16အီဗ်ရာဟိမ်၏ ‘သမီး’ အွမ္မသ်ဖြစ်သူ ဤအမျိုးသမီးသည် တစ်ဆယ့်ရှစ်နှစ်ပတ်လုံး ရှိုင်တွာန်၏ချည်နှောင်ခြင်းကိုခံခဲ့ရ၏။ သူ့အား စဗသ်နေ့၌ ထိုချည်နှောင်ခြင်းမှမလွှတ်အပ်သလော” ဟု မိန့်တော်မူ၏။

17ဤသို့မိန့်တော်မူလိုက်သောအခါ အီစာကိုရန်ဘက်ပြုသူများသည်အရှက်ရသွားကြ၏။ လူပရိသတ်အပေါင်းတို့သည်ကား အီစာပြုတော်မူသောအံဩဖွယ်ရာများကြောင့် ရွှင်လန်းဝမ်းမြောက်ကြ၏။

မုန်ညင်းစေ့ဥပမာ

(မဿဲ၊ ၁၃:၃၁-၃၂။ မာကု၊ ၄:၃၀-၃၂)

18ဟဇရသ်အီစာက “အလ္လာဟ်၏အုပ်စိုးတော်မူခြင်းသည် အဘယ်အရာနှင့်တူသနည်း။ အဘယ်အရာနှင့်နှိုင်းယှဉ်ရမည်နည်း။ 19အလ္လာဟ်အရှင်မြတ်၏အုပ်စိုးတော်မူခြင်းသည် ဤဖြစ်ပျက်ပုံနှင့်တူ၏။ မုန်ညင်းစေ့#13:19 မုန်ညင်းစေ့ ပါလက်စတိုင်းဒေသတွင်မုန်ညင်းပင်သည်အလွန်သေးငယ်သောအစေ့မှအမြင့်ဆယ်ပေခန့်အထိကြီးထွားပါသည်။ ကိုလူတစ်ယောက်သည်ယူ၍ မိမိ၏ဥယျာဉ်တွင်စိုက်၏။ ထိုအစေ့မှအပင်ပေါက်၍ကြီးမားလာသဖြင့် ထိုအပင်၏အကိုင်းအခက်များတွင် မိုးကောင်းကင်မှငှက်များသည် နားနေမှီခိုရကြ၏” ဟု မိန့်တော်မူ၏။

20တစ်ဖန်အီစာက “အလ္လာဟ်အရှင်မြတ်၏နိုင်ငံတော်ကို အုပ်စိုးတော်မူခြင်းကို ငါအဘယ်အရာနှင့်နှိုင်းယှဉ်ရမည်နည်း။ 21အလ္လာဟ်အရှင်မြတ်၏နိုင်ငံတော်ကို အုပ်စိုးတော်မူခြင်းသည် ဤဖြစ်ပျက်ပုံနှင့်တူ၏။ တဆေးကိုအမျိုးသမီးတစ်ယောက်သည်ယူပြီးလျှင် မုန့်ညက်အမြောက်အမြားတွင်ထည့်၍ မုန့်ညက်အားလုံးကိုဖောင်းကြွစေသည်” ဟု မိန့်တော်မူ၏။

ကျဉ်းမြောင်းသောတံခါးပေါက်

(မဿဲ၊ ၇:၁၃-၁၄၊ ၂၁-၂၃)

22ထို့နောက်အီစာသည် ဂျေရုဆလာမ်မြို့သို့ခရီးပြုတော်မူရာလမ်းတွင် လူထုပရိသတ်တို့ကို ဟောပြောသွန်သင်လျက် တစ်မြို့မှတစ်မြို့၊ တစ်ရွာမှတစ်ရွာကိုဖြတ်၍သွားတော်မူ၏။ 23လူတစ်ယောက်က “သခင်၊ ကယ်တင်ခြင်းခံရသူများသည်အရေအတွက်အားဖြင့် နည်းပါသလော”

ဟုမေးလျှောက်၏။ 24အီစာက “အိမ်တစ်အိမ်၏ ကျဉ်းမြောင်းသော တံခါးနှင့်တူသည့် အလ္လာဟ်အရှင်မြတ်၏ နိုင်ငံတော် အတွင်းသို့ ဝင်ရောက်နိုင်ရန်သင်တို့ အစွမ်းကုန်ကြိုးစားအားထုတ်ကြလော့။ အကြောင်းမူကား လူအများပင်ဝင်ရန်ကြိုးစားကြသော်လည်း ဝင်နိုင်စွမ်းရှိကြလိမ့်မည်မဟုတ် ဟုသင်တို့အားငါဆို၏။ 25အိမ်ရှင်သည်ထလျက်တံခါးကိုပိတ်လိုက်၍ သင်တို့သည်အိမ်ပြင်မှာရောက်ရှိနေရသောအဖြစ်နှင့် တွေ့ကြုံလိမ့်မည်။ ထိုအခါသင်တို့က ‘သခင်၊ အကျွန်ုပ်တို့အားတံခါးကိုဖွင့်ပေးတော်မူပါ’ ဟုဆို၍

တံခါးကိုခေါက်သော်လည်းအိမ်ရှင်က ‘သင်တို့အဘယ်မှလာသည်ကိုငါမသိ’ ဟုဆိုလိမ့်မည်။

26ထိုအခါသင်တို့က ‘အကျွန်ုပ်တို့သည်သခင်နှင့်အတူ စားသောက်ခဲ့သူများဖြစ်ပါ၏။ သခင်သည်အကျွန်ုပ်တို့၏မြို့ရွာတွင် ဟောပြောသွန်သင်ခဲ့ပါ၏’ ဟု လျှောက်ကြလိမ့်မည်။

27သို့သော်လည်းအိမ်ရှင်က ‘သင်တို့အဘယ်မှလာသည်ကိုငါမသိ။ ဆိုးညစ်သောသူတို့၊ ငါ့ထံမှထွက်သွားကြလော့’ ဟူ၍ပြန်ပြောလိမ့်မည်။

28သင်တို့သည် ဂျန္နသ်တွင်အီဗ်ရာဟိမ်၊ အစ္စဟာက်၊ ယအ်ကူးဗ်နှင့်နဗီတမန်တော်အပေါင်းတို့ အလ္လာဟ်အရှင်မြတ်၏နိုင်ငံတော်ရောက်ရှိကြသည်ကိုမြင်လျက် မိမိတို့ကိုယ်တိုင်ကမူဂျန္နသ်၏ပြင်ပသို့နှင်ထုတ်ခြင်းခံရကြသောအခါ ငိုကြွေးမြည်တမ်းခြင်း၊ အံသွားကြိတ်ခြင်းရှိကြလိမ့်မည်။ 29လူတို့သည်အရှေ့အနောက်တောင်မြောက်အရပ်လေးမျက်နှာမှ လာကြပြီးလျှင် အလ္လာဟ်အရှင်မြတ်၏နိုင်ငံတော် ‘ဂျန္နသ်’ ရှိပွဲတွင်ထိုင်ကြလိမ့်မည်။ 30ထိုအခါ၌ ယခုနောက်ဆုံးသို့ရောက်နေသောသူတို့သည် ရှေ့ဆုံးသို့ရောက်ကြလိမ့်မည်။ ယခုရှေ့ဆုံးသို့ရောက်နေသောသူတို့သည် နောက်ဆုံးသို့ရောက်ကြလိမ့်မည်” ဟု မိန့်တော်မူ၏။

ဂျေရုဆလာမ်မြို့အပေါ် ဟဇရသ်အီစာထားတော်မူသောမေတ္တာ

(မဿဲ၊ ၂၃:၃၇-၃၉)

31ထိုအချိန်၌ ဖာရိစီးစ်အချို့တို့သည်အီစာ၏ထံကိုလာပြီးလျှင် “ဤအရပ်မှထွက်ခွာ၍အခြားအရပ်သို့သွားတော်မူပါ။ အဘယ်ကြောင်းဆိုသောဟေရုဒ်မင်းသည်အရှင့်အားသတ်ရန်အကြံရှိပါ၏” ဟုလျှောက်ကြ၏။

32အီစာက “ငါသည်ယနေ့နှင့်နက်ဖြန်နေ့တို့၌ ညစ်ညမ်းသော ‘ဂျင်န်’ နတ်ဆိုးများကိုနှင်ထုတ်၍ အနာရောဂါများကိုပျောက်ကင်းစေမည်။ တတိယနေ့တွင်မူငါ၏အလုပ်ကိုအဆုံးသတ်မည် ဖြစ်ကြောင်းကိုထိုမြေခွေးအား ပြောကြလော့။ 33သို့ရာတွင် ယနေ့၊ နက်ဖြန်နေ့၊ နောက်တစ်နေ့၌ငါသည် ဂျေရုဆလာမ်မြို့သို့ခရီးပြုရဦးမည်။ အကြောင်းမူကား နဗီတမန်တော်ဟူသည် ဂျေရုဆလာမ်မြို့မှအပ အခြားအရပ်တွင်အသတ်ခံရန် မဖြစ်နိုင်” ဟုမိန့်တော်မူ၏။

34“အို ဂျေရုဆလာမ်မြို့သားတို့၊ ဂျေရုဆလာမ်မြို့သားတို့၊ သင်သည် နဗီတမန်တော် များကိုသတ်သည့်မြို့၊ သင်တို့ထံသို့ အလ္လာဟ်အရှင်မြတ်စေလွှတ်သောနဗီတမန်တော်များကို ခဲနှင့်ပေါက်သည့်မြို့၊ ကြက်မသည်ကြက်ကလေးများကိုမိမိ၏ အတောင်အောက်တွင်စုသိမ်းထားသကဲ့သို့ ငါသည်သင်၏သားသမီးများကို စုသိမ်းထားလိုသည်မှာ ကြိမ်ဖန်များလှလေပြီ။ သို့ရာတွင် သင်မူကားငါ့ကိုဤသို့မပြုစေလို။ 35ကြည့်ရှုလော့။ သင်တို့၏အိမ်သည်စွန့်ပစ်ခြင်းခံရလိမ့်မည်။ သင့်အားငါဆိုသည်ကား ‘အလ္လာဟ်အရှင်မြတ်၏နာမတော်ဖြင့်ကြွလာတော်မူသောသူသည် မင်္ဂလာရှိပါစေသတည်း’ ဟုသင်တို့မြွက်ဆိုရာနေ့မတိုင်မီ သင်တို့သည်ငါ့ကို မြင်ရလိမ့်မည်မဟုတ်” ဟု မိန့်တော်မူ၏။

လက်ရှိရွေးချယ်ထားမှု

လုကာကျမ်း 13: MBe

အရောင်မှတ်ချက်

ကူးယူ

နှိုင်းယှဉ်

မျှဝေရန်

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

Musselmani Burmese Bible by Beyond Translation is licensed under Creative Commons Attribution-ShareAlike 4.0 License.

လုကာကျမ်းအင်ဂျီလ်ကျမ်းတော်မြတ် အကြောင်းကို ပို၍ သင်ယူပါ။