Roomi 12
12
Waaqa kela koda koda'e atta kallaatta akka parpaaccisnitto
1Semmalla hellaanno a kiristaanatiiyyi, akka isi piisa kalisoota a caatta qapto ka qulqullaawte ka a Waaqa xasannitto' kootan ka dehassane'e maxxase a Waaqa diissampayta koddeetnnin ishin naappanni. Wossen a dehassa ishin parpaaccisnitta' nefo, Waaqa' koda kodeetase a dukaata a kara paxaarumta qapto. 2Heennaasene a Waaqa paxaara ka orra xasanna ka qaja in qapnini, akka upnaatta ettanissane'e; qalpeetaayshin haaraya' kodada, caattaayshin ka pursamo diisheey, kallaata a piisseti' pahato in kallaadan.
3Semaliiyyiiw ishina takka takkaayye akka amanteetase a Waaqa ishina' daashe kitto mina'e, naalumaan dikada diisheey, qoota mattaayshinati desa a ishina' parpaaccisnitto qaropa isi peepaanne an dikadanen kiini ka daassata Waaqa a ana' daasamten ishina' lelli. 4Dakintinno takka qudaayye meella lekaya ca, meella piisa ka matta mina' kodaaysho' qapan#Qoro 1ta 12:12; 5akkimoose mina'e, ino a leka, Kiristoosinni an dakinta takka; qootan meella a dakinta takka' koddine malla, meela piisa matta mina'e olkarandesa saare. 6Semmalla daassata ika lekayteeta a Waaqa ino' daashen koda koona. Daassatinno oton qaaleta Waaqa' salissaayye; akka amanteetinno kitto mina' qaaleta Waaqa' salinna#Qoro 1ta 12:4-11 . 7Oton daassatinnon orra kela koda kodeetaayye, kokkonnumaan koda koona; oton daassatinnon kollissaayye, japaanna ka kollinna; 8Oton daassatinnon dehaamaayye, dehaamma; oton daassatinnon orra' paata daassataayye, karitta piisan daanna; oton daassatinnon mukissaayye japaattaan mukinna. Oton daassatinnon nama suraysattaayye, xasan suraysanna.
9Jaalala a dukaata a oppa pappahanassa in kinnini qapnaada ka wa neeqa' needdada ka wa paxaara' koda' japaada. 10Ka jaalala a hellaa toollaatin oli jaalada ka oli ulfeessa'e olli' qaqqatta. 11A hapuran kupanna' kodda ka poqalla kela koda koda diisheey kokkonnumoosenen an diishan. 12Kippeetan xasooda. Ka makaroppa duupada ka awta piisa qinsada. 13Ka rakkootoppa hellaanno a kiristaana' qaarqaara ka a xaykuma' deena kuli teyyada.
14A ishin kamma pora daanna eepisa; ishootta eepisa diisheey, in jiijan#Maati 5:44; Luqa 6:28 . 15A xasoonna olli xasooda ka a pooyna ollii pooya. 16Ka dikatta takka' qara olli kaleetan kallaada ka isi kukuttissa kapaayye sekaada ka isi peepa alle' diisha ka teekolaya olliiyyi takkumtan kallaada. Ka issi in kidane “An upnampaya.” #12:16 “teekolaya olliiyyi moottuma” taaki “koda shashakka koda kodae owsada.” #phana 3:7
17Fuula nama piisa' tura wa a paxaara' koda diisheey, oto orra wa a neeqa ishin qara' koonooyye; ishina' kapa wa neeqa ishootta qara an kodan. 18Oton i'ishina' koddiniiyyi nama piisa olli nakaytan kallaatta'e, qindaayshinaayye desa wa parpaaccisna piisa koda. 19Moottadaayyooyye! Itaafamte ka kiini “A haalota pooyyino ka kuura haalota' oorinno ana kiini Waaqa Poqallaay” Ishina' miira Waaqa' diisha diisheey, mattaayshina' haalota an pooyyan#ooreta 32:35 . 20Semmalla, “A haalota pooyyito kapaayye, paarakaalaatti oto doxane, damshe ka oto deepodaneeyye, ikkishe. Oton sede' kooniiyyi apitta jeeratinni isha kupni.” #phana 25:21-22
21Semmalla wa neeqa wa a paxaaratin pute diisheey, wa neeqatinni in putaman.
လက်ရှိရွေးချယ်ထားမှု
Roomi 12: MaQu
အရောင်မှတ်ချက်
ကူးယူ
နှိုင်းယှဉ်
မျှဝေရန်
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ