Roomi 13
13
Akka ukkumampaya mankisteetati ajajama parpaaccisnitto
1Hupna ukkumeeta piisa qoota heenna Waaqatin teyanno malla, ukkumampaya amma ca ka Waaqan shuumamen malla, nama piisa ukkumampaya a mukissa qara caati ajajama isha faani. 2Semmalla nama ukkumampayta toorro piisa, ajaja Waaqa'e toorri. Nama ajajammi in kinnin piisa ka isqara'e qitaateta firteeta' qeenni. 3Mukissampaya, orra wa neeqa' koono fuurinni diisheey, orra a wa paxaara' koono fuurinni in caan. Hela akka a ukkumampayta a' fuurrin i''heenta? Asseeyye, wa paxaara' kode kalata isha qara teytaay. 4Ha ukkumampayta akka wa paxaara ke' kodo'e, orxayta Waaqa' kodde ka shuumame; ukkumampayta patta koraateta hidanni in cooy, oton wa neeqa'e pora kooniiyyi fuure. Isha orra a wa neeqa' koono qatta'aanne ka haalota Waaqa akkissaanne Waaqa kela koda kooni. 5Semmalla ukkumampaya a mankisteetati ajajama ishin faani. Wa malla ajajamtane' nefo qoota miira Waaqa' fuurrittan patta mallanne ma, qoota karittaayshin ishin qootinno kuli malla kodda parpaaccisni.
6Wa amalla kipira daannittane nefo semmallaaw ukkumampaya wa malla kodoose qara caane, Waaqa kela koda kodeeta malla. 7Semmalla wa ukkumampayta' kodama parpaaccisna piisa koda. A kipira parpaaccisno'e, kipira daasha ka a qarata parpaaccisno'e, qarata daasha ka a fuurama isha parpaaccisno tura fuura ka a ulfeena isha parpaaccisno ulfeessa. #Maati 22:21; Maari 12:17; Luqa 20:25
Qoota oli jaalattaati desa
8Kuurase a oli jaalatta ishin qara kinnaatta parpaaccisno maliiyyi, kuura nama takka nefo ishin qara in kinnaannin; nama a nama jaalanno seera immakni. 9Ajajaddasene' kiina'e, “In dahalan taaki in dahalsadan in ishshan, in hatan, wa nama pila takkan' nefo in xajeelan” Ka ajajadda ata hase kuli, ajajoose takka kiino “Akka mattaayti' mina nama jaalado” Karopaaw qapammi. #ooreta 5:17-19; 21; Lewi 19:18 10Nama a nama jaalanno piisa, namase a jaalanno qara'e wa neeqa' kooni in co. Semmalla nama nama jaalanno piisa, seera immakni kideeta.
11Semmalla, saateta a oppa mukittaappa impastan, amma akkima kayte upnaada; eta an turan oppa amanne kapaayye, kuyyaata an oppaayye dinno a qaran qapto'e ino kapopa dehaatte. 12Halkeetta tarpa qara kitta, kuyyaata ka dehaatteey, semmalla koda tukkanta kara kodammo alle' diinna ka mehadda oranna a la'ayta' hidanna. 13Ka kirpa amala dape ka maashsha ka sharmuutuma ka pora oli tititta ka oli shiishsha ka yootanne in koddinin; ma akka orra a la'ayta kuyyaata oppa kalo mina'e qalpeeta a paxaaratin kallaanna. 14Semmalla Poqalla Yesuusi Kiristoosi uwwisada diisheey, xajeelta dakintaayshina immaka an dikadan.
လက်ရှိရွေးချယ်ထားမှု
Roomi 13: MaQu
အရောင်မှတ်ချက်
ကူးယူ
နှိုင်းယှဉ်
မျှဝေရန်
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ