Amatayo 2
2
Akaageni kubhoka Kuulabho
1Ayesu akabhelekwa ku chilambo cha ku Betelehemu, ku chilambo cha ku Yudea, gono muda Ahelode akibha Amwenye. Mala tu baada ja kubhelekwa kwabhe, bhandu bha kumanyanga ngani ja ndondwa kubhoka kuulabho bhakahikanga ku Yelusalemu, 2bhakakonyanga, “Bholi, abhi koji mwana jwaabhelikwe, Amwenye bha Bhayahudi? Tujilolite ndondwa jabhe kubhoka kuulabho, na tweenga tuhikite pambani kwaalumbalila.”
3Amwenye Ahelode pabhakajoha genego, akahechuka, jonojwe pamo na bhandu bhoa bhabhatamanga ku Yelusalemu. 4Amwenye Ahelode akaakemanga pamo akaakolo bha akaakung'i na bhabhajigana bhandu Malagilo ga Amusa, akaakonyanga, “Akilisito abhelikwe koji?”
5Na bhenabho bhakaajangula, “Mu chilambo cha ku Betelehemu, ja ku Yudea, kwa kubhee henela nga chiikajandikwa na alondohi bha Annoongo kubhee,
6‘Mwe chilambo cha ku Betelehemu
Mwenga ngabha mwachoko choko pakati ya hilambo hikolongwa ya ku Yudea, ligongo kwinu apakupitila chilongola jwapakwalongolea bhandu bhangu bha ku Isilaeli.’”
7Penapo Ahelode akaakemanga bhenibhala bhakumanyanga ngani ja ndondwa kwa kuchihiya na kwaakonyanga, muda chibhakajibhona ndondwa. 8Penapo akabhatuamanga bhajendange ku Betelehemu abhi kwaalobholelanga, “Nnyahulange nkaalolekeange maha ngani ya jono mwana. Na handa mumpatite, nnetelange ngani jabhe ili nanenga ngombole kujaula kwaachalila.”
9Pabhakajomolanga kwaajohanikia Amwenye, bhenibhala bhakumanyanga ngani ja ndondwa bhakajaula, na jela ndondwa chibhakajilola kuulabho jikaalongolela, na jikajema nnani ja penipala pabhabhile mwana. 10Pabhakajilola jene ndondwa, bhakaachukilanga muno. 11Pabhajingilanga nkati ja jenijela nyuumba, bhakaabhona mwana pamo na Amalia anyongo bhabhe, bhakatindibhala majugwa, bhakanchalila. Ngapena bhakajogolanga mihuko jabhenji na kwaapekea ngwahupa ja bunyu, ubhani na mahuta ga bei ngolongwa gakemitwa manemane.
12Na Annoongo akaakanikihanga mu agamii bhakotokubhujanga kwa Ahelode, nambo bhakabhujanga kwaachabhenji kupetela ndela jengi.
Kubhutukila ku Chilambo cha Misili
13Akaageni pabhakajaulanga, antumichi bha kunani kwa Annoongo akaabhokela Ayusufu mu agamii, akaalobholela, “Nnyimuke! Mwapetule mwana bhinu pamo na anyongo bhabhe ntilie ku Misili. Nkatamange konokwe mpaka pambakunnobholelanga, maana Ahelode apala kunkoma hojo mwana.” 14Henela, Ayusufu akajimuka kubhoka mulugono, akaapetula mwana jwabhe na anyongo bhabhe kwa muda gwa kilo, na bhenangota bhakajaulanga kuchilambo cha Misili. 15Bhakatama konokwe mpaka Ahelode pabhakajomoka. Ngani hejo jikatendeka ili lilobhe lya Hangwana kwa ndela ja akaalondohi likweele handa chibhalongile, “Ngankema mwana jwangu kubhoka kuchilambo cha Misili.”
Bhaana bhachoko bhatenda komekwa
16Ahelode chibhakahimanya yakubhee bhenibhala bhandu bhakumanyanga ngani ja ndondwa bhakibha bhatekwaatemba, akatumbala muno. Akalagia bhaana bhoa akaanalome mu chilambo cha ku Betelehemu na kubhandikila na penapo bhabhilinge na yaaka hibhele au pahi jabhe bhakomekwe. Akatenda henela kubhokana na muda chibhakagupata kuhimanya kubhoka kwa bhenibhala bhandu bhakumanyanga ndondwa. 17Henela nga henela chigakweela malobhe gagalobhwilike kwa ndela ja akaalondohi Ayelemia kubhee,
18“Mundu akajoahanika abhi kuguta konokwe kuchilambo cha Lama, nguto na majopelo gajingi. Alaheli atenda kuguta ligongo lya bhaana bhabhe, wala jwangapala mundu joajola ampembelee akotoke kuguta, kwa kubhee bhana bhabhe bhoa bhatekujomoka.”
Kubhuja kubhoka kuchilambo cha Misili
19Pabhakajomoka Ahelode, antumichi bha kunani kwa Annoongo akaabhokela Ayusufu mu agamii konokwe kuchilambo cha Misili, 20bhakaalobholela, “Nnyimuke! Mwaatole mwana bhinu pamo na anyongo bhabhe, mmuje kabhele kuchilambo cha Isilaeli, kwa kubhee bhenibhala jwakapala kwaakoma mwana bhatekujomoka.” 21Bahi, Ayusufu akajimuka, akampetula mwana jwabhe na anyongo bhabhe, na kubhujanga kuchilambo cha Isilaeli. 22Nambo Ayusufu pabhakajoha yakubhee Aakelao mwana jwabhe Ahelode, atenda kutabhala badala ja atati bhabhe chilambo cha Yudea, akajogopa kujaula konokwe. Na jonojwe baada ja kwaakanikiha mu agamii, akajaula kuchilambo cha Galilaya, 23na jonojwe akajaula kutama mu chilambo chichikemitwa Nazaleti. Kwa ndela heje nga chilikakweela lilobhe lilikalobholekwa na akaalondohi bha Annoongo, “Apakemwa Nnazaleti.”
လက်ရှိရွေးချယ်ထားမှု
Amatayo 2: NTNHBL
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
The New Testament in Ndondehamba Language ©The Word for the World International and Ndondehamba Language Translation, All rights reserved.
