Ịzakaraya 5
5
Etore Ọhụhịnọnyị: Iwe enee hira
1Ịzakaraya ộ rẹ kana eyi va hịrẹ di o re iwe ene hira 2Dị anggẹẹrị họ̀ ọ ka sị o re? Dị Ịzakaraya tụ́ ohi ka ọnị ô re iwe ene ee hira ịnị ahị. Iwe ọnọọ ọ gọdọ ahụ ohurẹẹwụ, dị ọ gana ahụ ẹwụrẹhị nị. 3Dị anggẹẹrị kà yọ ka ini iwe ọnọnị a chẹrẹ ozirenu ana a tụ́ hi avaba anẹhẹ. Akaha ọnya ịnị iwe ọnọọ a chẹrẹ ẹ ka Ohomorihi vaa wụ̀ ọza tụra ọza ene yi oyi. A rẹ chẹrẹ tụ́ ịnị akaha ọsa ka Ohomorihi vaa wụ̀ ọza tụra ọza ene cheeche dị a hị́ eku tụ́ ọ. 4Ẹnẹyịmavara Ochẹtẹẹngụ kà, ọnị vaa tụ́ ọ ahị hi ẹhẹ, dị ọ ngụ ịnị eehi oyi ọnịrị ọza ana hị́ eku uruku, dị ọ jị irehi ẹnịnị eburu.
Etore Ọhụhịmba: Ọnyẹnẹẹ ana ya ini uji
5Anggẹẹrị ana kà ịrẹyị yị Ịzakaraya ka, ọ kana eyi di o re ịsa ana jịnẹ tụ́ ẹhẹ. 6Dị Ịzakaraya họ̀ ọ use ka ịsị ọ vị? Dị anggẹẹrị tụ́ ọ ohi ka uji ana a sị mọ̄ ịsa yọ nị. Uji ọnọọ ọ jẹ yị ịvị avaba anẹhẹ nị 7Oku uji ọnọọ mẹ hụ, dị ọnyẹnẹẹ ọnya aanị yaayịtẹ tụ ịnị ịnẹ anị. 8Dị anggẹẹrị ka, ọnyẹnẹẹ ọnọnị vị ana jẹ yị ịsa ọhịmị. Dị ọ varẹma tụ́ ọ ụvọ ne ngụ uji ọnọọ di o ku ọ oku nị. 9Ịjọnọọ, dị Ịzakaraya kụ̀ra eyi hịrẹ tụ ẹba, di o re anyẹnẹẹ ẹẹva ene hira ka a na nị. Avaka ẹnịnị vị ana nyị ụkata anka avaka igongo avọọ. Ẹnịnị ẹ sị uji ọnọọ di e hira aa na nị. 10Dị Ịzakaraya họ̀ anggẹẹrị ene ee pè ka ịrẹyị ka ịzị ẹ sị uji ọnọọ a nọ? 11Dị anggẹẹrị tụ́ ọ ohi ka ẹtẹ Ịbabịrọnị ịzị a vaa dà irehi yọ. Ịjị ọ ta dà, dị a sị uji ọnọọ tụ́ ịzọọ dị aza aa hẹkẹ ẹ.
လက်ရှိရွေးချယ်ထားမှု
Ịzakaraya 5: EBTP
အရောင်မှတ်ချက်
ကူးယူ
နှိုင်းယှဉ်
မျှဝေရန်
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Ebira First Bible © Bible Society of Nigeria, 2014.