Aˍmoˆ li‸ 4
4
1Hkʼa deh‸ caˍ chu taˍ ve nuˇ ma peuˍ hta‸ shuˍ ve nawˬ hui Saˍmaˍriˆ yaˇ miˇ teˇ hpaˍ-oˬ, chi hta‸ na taˍ sheˍ. Nawˬ hui lehˬ, gʼaˇ nuˇ ve chaw hui hta‸ hkʼa mvuhˇ hkʼa na te piˇ leh, haˍ ve gʼawˇ ve chaw hui hta‸ fawˉ mehˍ piˇ chehˇ ve yoˬ. Nawˬ hui ve awˬ hpawˇ teˇ hpaˍ hta‸ htawˇ, nawˬ hui teˇ ceuˬ ceuˬ gʼa dawˬ tuˬ yuˬ veu laˇ tuˬ, tawˇ piˇ chehˇ ve yoˬ. 2Teˇnyi gaˬ kʼo, nawˬ hui lehˬ biˉ hta‸ yaw taˍ ve ngaˇ hkʼa shuˍ, shu gʼawˬ kʼai tuˬ yoˬ. 3Nawˬ hui lehˬ, lanˇ venˇ hkʼoˆ lo gʼawˬ kʼai leh ca‸ ce ve hta‸ gʼa hkanˍ tuˬ yoˬ, teh‸ da‸ kehˬ jaˇ ve Gʼuiˬsha ka ti‸ te taˍ peuˬ ve yoˬ.
Iˉsaˍreˍlaˆ chaw maˇ na yuˬ puiˉ
4Gʼuiˬsha kʼoˆ ve, Iˉsaˍreˍlaˆ chaw hui-oˬ, Beˍteˍlaˆ venˇ hkʼaw cawˬ ve da‸ kehˬ ve chehˇ kuiˬ lo kʼai leh, venˇbaˆ ca te loˬ. Giˇlaˍgaˍ venˇ lo kʼai leh, nawˬ hui nyi hkʼaˇ suh htaˇ hkʼa gaˬ venˇbaˆ ca te loˬ. Nawˬ hui ve to nuˇ to shaˆ teˇ hpaˍ hta‸ yuˬ laˬ leh, teˇ shawˉ le le tuˉ tanˇ loˬ. Shehˆ nyi teˇ pawˆ teˇ chi pun teˇ pun tanˇ piˇ loˬ. 5Gʼuiˬsha ve bon hta‸ chiˇ mvuh ve hkʼaw, nawˬ hui hkaoˍmonˇ teˇ hpaˍ yawˇ hta‸ tanˇ piˇ leh, nawˬ hui yuˬ laˬ ve awˬ nu ve tanˇ tuˬ teˇ hpaˍ awˬ lawn tawˇ uiˍ tawˇ mvuh yaw chehˇ-oˆ. Awˬ lawn kʼo, nawˬ hui chi hkʼe te gaˇ jaˇ ve yoˬ.
6Nawˬ hui caˇ tuˬ maˇ cawˬ tuˬ, nawˬ hui ve venˇ teˇ hpaˍ hkʼaw, meu‸ ve kaˆ ve awˬ ceuˬ gaˬ la piˇ shehˍ hpaˇ lehˬ ngaˬ hpeh‸ ve yoˬ. Ya‸ hkʼaˇ, nawˬ hui ngaˬ geh maˇ kʼaw‸ hpfuhˆ kʼaw‸ la. 7Nawˬ hui ti taˍ ve caˬ teˇ hpaˍ, mvuhˇ yeˬ gʼuiˬ hta‸ loˍ jaˇ chehˇ ve teˇ yanˇ, ngaˬ lehˬ mvuhˇ yeˬ hta‸ maˇ laˬ piˇ lawˬ. Venˇ teˇ venˇ awˬ hkʼoˆ lo ngaˬ mvuhˇ yeˬ laˬ piˇ ve htawˇ, awˬ nu ve teˇ venˇ awˬ hkʼoˆ lo ngaˬ mvuhˇ yeˬ maˇ laˬ piˇ lawˬ. Ti mi teˇ peˆ awˬ hkʼoˆ lo ngaˬ mvuhˇ yeˬ laˬ piˇ ve htawˇ, awˬ nu ve teˇ peˆ hta‸ ngaˬ goˇ kʼai piˇ lawˬ ve yoˬ. 8Iˉ kaˆ shiˉ leh gʼaˇ nuˇ jaˇ ve hkʼaw, venˇ laiˉ venˇ hkʼaw chehˇ ve chaw teˇ hpaˍ iˉ kaˆ gʼa dawˬ tuˬ awˬ nu ve venˇ lo kʼai ve yoˬ. Ya‸ hkʼaˇ, yawˇ hui oˇ kaˬ lo iˉ kaˆ hkʼa bvuhˆ maˇ gʼa dawˬ. Chi hkʼe hpeh‸ ve ka‸, nawˬ hui ngaˬ geh lo maˇ kʼaw‸ hpfuhˆ kʼaw‸ la.
9Nawˬ hui ve caˬ teˇ hpaˍ hta‸ goˇ kʼai piˇ tuˬ, haw jaˇ chiˆ jaˇ ve mvuhˇ haw hta‸ ngaˬ meuˆ laˬ piˇ lawˬ ve yoˬ. Paˉ ce‸ teˇ hpaˍ lehˬ nawˬ hui ve maˉ nawˆ cehˬ leh shaˍ lonˍ cehˬ teˇ hpaˍ hta‸ caˇ baˬ peuˬ ve yoˬ. Ya‸ hkʼaˇ, nawˬ hui ngaˬ geh maˇ kʼaw‸ hpfuhˆ kʼaw‸ la.
10Eˇjiˇtu‸ mvuhˇmiˬ hkʼoˆ lo gaˬ la jaw ve naˬ beuˬ, nawˬ hui awˬ hkʼoˆ lo htawˇ gaˬ la piˇ ve yoˬ. Nawˬ hui ve chaw haˉ paˍ teˇ hpaˍ hta‸ ma‸ bawˆ kuiˬ lo ngaˬ tiˇ pehˍ piˇ leh, nawˬ hui ve iˉ mvuhˇ teˇ hpaˍ hta‸ ngaˬ yuˬ kʼai ve yoˬ. Nawˬ hui ve fa la teˇ hpaˍ hkʼaw kuiˇ nuˬ jaˇ tuˬ ngaˬ te laˇ ve yoˬ. Ya‸ hkʼaˇ, nawˬ hui ngaˬ geh maˇ kʼaw‸ hpfuhˆ kʼaw‸ la.
11Sawˉdonˍ leh Gawˇmawˇra‸ venˇ hta‸ ngaˬ te luˬ piˇ ve hkʼe, nawˬ hui teˇ hpaˍ hpaˍ hta‸ ngaˬ te luˬ piˇ ve yoˬ. Nawˬ hui awˬ hkʼaw lo maˇ suh leh te‸ chehˇ taˉ ve chaw teˇ hpaˍ lehˬ, to‸ maˇ peuˬ leh cawˬ taˉ ve suhˆ hteh hkʼa shuˍ hpeh‸ ve yoˬ. Ya‸ hkʼaˇ, nawˬ hui ngaˬ geh maˇ kʼaw‸ hpfuhˆ kʼaw‸ la. 12Chi hta‸ pa taw, Iˉsaˍreˍlaˆ chaw hui-oˬ, ngaˬ nawˬ hui hta‸ ciˍ yanˍ laˇ tuˬ ve yoˬ. Ngaˬ nawˬ hui hta‸ chi hkʼe te laˇ tuˬ ve pa taw, ngaˬ suhˉ jehˬ ve hta‸ hkanˍ yuˬ tuˬ hkʼa deh‸ gu taˍ-o‸, teh‸ Gʼuiˬsha kʼoˆ ve yoˬ.
13Gʼuiˬsha lehˬ hkʼaw pui teˇ hpaˍ leh,
mvuhˇ haw hta‸ te hpanˍ taˍ ve yoˬ.
Chaw yaˇ hta‸ yawˇ ve dawˇ hkʼaˇ hpeu‸ maˍ piˇ taˍ ve yoˬ.
Yawˇ lehˬ, mvuhˇ law‸ kʼaw hta‸ mvuhˇ hpeu‸ kʼaw‸ hpeh‸ la piˇ leh,
miˬguiˬ hkʼa peu-eˬ awˬ hkʼoˆ yawˇ uˉ peunˍ chehˇ ve yoˬ.
Yawˇ ve awˬ meh lehˬ, Kanˇ paˆ uiˬ jaˇ ve Jawˇmawˇ Gʼuiˬsha hpeh‸ ve yoˬ.
လက္ရွိေရြးခ်ယ္ထားမွု
Aˍmoˆ li‸ 4: LHBE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Lahu Bible Edited © Thailand Bible Society and Bible Society of Myanmar, 2010, 2020.