Aˍmoˆ li‸ 5
5
Venˇbaˆ dawˇ hpfuhˆ tuˬ kuˬ hkawˇ
1Iˉsaˍreˍlaˆ chaw hui-oˬ, nawˬ hui awˬ pon ngaˬ dawˇ haˍ ve kʼa muiˬ hkawˇ kʼa maˍ laˇ shaˍ.
2Iˉsaˍreˍlaˆ lehˬ paiˍ taˍ peuˬ.
Yawˇ lehˬ teˇ pawˆ ka‸ kʼaw‸ tu la gaˬ tuˬ ve maˇ heˆ.
Yawˇ lehˬ miˬ chaˇ hkʼoˆ lo chiˇ baˬ taˍ ve hta‸ gʼa hkanˍ leh,
chaw teˇ gʼaˇ ka‸ yawˇ hta‸ cawˍ tu piˇ tuˬ ve maˇ heˆ.
3Gʼuiˬsha kʼoˆ ve, Iˉsaˍreˍlaˆ mvuhˇmiˬ hkʼaw cawˬ ve venˇ teˇ venˇ lehˬ, ma‸ yaˇ teˇ hinˉ gʼaˇ hta‸ hpehˇ tawˆ-e leh, ma‸ yaˇ teˇ ha gʼaˇ ceh tiˉ kʼaw‸ kʼaw‸ la ve yoˬ. Awˬ nu ve venˇ teˇ venˇ lehˬ ma‸ yaˇ teˇ ha gʼaˇ hpehˇ tawˆ-e leh, ma‸ yaˇ teˇ chi gʼaˇ ceh kʼaw‸ kʼaw‸ la ve yoˬ, teh‸ kʼoˆ ve yoˬ.
4Gʼuiˬsha Iˉsaˍreˍlaˆ chaw hui hta‸ kʼoˆ piˇ ve, Ngaˬ geh laˬ-o‸. Oˇ hkʼe te ve kʼo, nawˬ hui gʼa te‸ chehˇ tuˬ yoˬ. 5Oˉ kʼoˍ ca pui tuˬ, Beˍraˍsheˍbaˆ venˇ lo taˇ kʼai. Beˍteˍlaˆ venˇ lo kʼai leh ngaˬ hta‸ hpuˇ da‸ tuˬ taˇ ca. Awˬ lawn kʼo, Beˍteˍlaˆ venˇ lehˬ hkʼe leˇ hpeh‸ ve yoˬ. Giˇlaˍgaˍ venˇ lo htawˇ taˇ kʼai. Awˬ lawn kʼo, venˇ yaˇ oˇ ve teˇ hpaˍ lehˬ, shu mvuhˇmiˬ lo hpeh kʼai ve hta‸ gʼa hkanˍ tuˬ yoˬ, teh‸ kʼoˆ ve yoˬ.
6Gʼuiˬsha geh kʼai-o. Oˇ hkʼe te ve kʼo, nawˬ hui gʼa te‸ chehˇ tuˬ yoˬ. Nawˬ hui oˇ hkʼe maˇ te ve kʼo, yawˇ lehˬ aˬ miˍ hkʼa shuˍ Iˉsaˍreˍlaˆ chaw hui hta‸ to‸ baˬ piˇ tuˬ yoˬ. Beˍteˍlaˆ venˇ hkʼaw chehˇ ve chaw hui hta‸ htawˇ, aˬ miˍ to‸ baˬ piˇ tuˬ yoˬ. Chaw teˇ gʼaˇ ka‸ aˬ miˍ oˇ ve hta‸ shiˉ pehˍ gʼa tuˬ ve maˇ heˆ. 7Hteˇ ve cawˇ ve awˬ hkʼaw lo suhˉ maˇ jehˬ leh, haˍ ve gʼawˇ ve chaw hui hta‸ heˍ caˇ chehˇ ve nawˬ hui teˇ hpaˍ luˬ kuiˬ sheˆ kuiˬ lo gʼa gaˬ tuˬ yoˬ.
8Gʼuiˬsha lehˬ, meu‸ keu shiˍ teˇ hpaˍ hta‸ te hpanˍ taˍ ve yoˬ.
Hkiˇmaˆ leh Hkaˍtiˇlaˆ teh‸ kʼoˆ ve awˬ gʼeuˆ ba da‸ jaˇ ve meu‸ keu shiˍ teˇ hpaˍ hta‸ htawˇ, yawˇ te hpanˍ taˍ ve yoˬ.
Naˆ ho‸ ve hta‸ yawˇ mvuhˇ law‸ kʼaw kʼaw‸ hpeh‸ la piˇ leh,
mvuhˇ law‸ kʼaw hta‸ mvuhˇ hpeu‸ kʼaw‸ hpeh‸ la piˇ ve yoˬ.
Laˇ tsuhˇ gʼuiˬ hkʼaw cawˬ ve iˉ kaˆ hta‸ yawˇ kuˬ yuˬ leh,
miˬguiˬ hkʼoˆ lo ngeuˍ baˬ ve yoˬ. Yawˇ ve awˬ meh lehˬ,
Jawˇmawˇ hpeh‸ ve yoˬ.
9Yeˬ jaˇ ve ta‸ yehˬ leh awˬ gʼaˇ uiˍ ve chaw teˇ hpaˍ hta‸ yawˇ te luˬ piˇ ve yoˬ.
10Nawˬ hui lehˬ, maˇ hteˇ maˇ cawˇ ve awˬ ceuˬ hta‸ ha‸ leh, suhˉ jehˬ kuiˬ lo hteˇ ve cawˇ ve tawˇ hta‸ yaw ve chaw hui hta‸ canˇ ve yoˬ. 11Nawˬ hui lehˬ, haˍ ve gʼawˇ ve chaw hui hta‸ fawˉ mehˍ leh, yawˇ hui ve caˬ shiˍ hta‸ hiˉ yuˬ luˬ yuˬ ve yoˬ. Chi hta‸ pa taw, nawˬ hui lehˬ haˉ pui shiˍ yuˬ te taˍ ve da‸ jaˇ ve yehˬ hkʼaw gʼa chehˇ tuˬ ve maˇ heˆ. Nawˬ hui ve nyi sha jaˇ ve a pehˉ meuˇ hko hkʼaw cawˬ ve a pehˉ meuˇ gʼuiˬ hta‸ htawˇ gʼa dawˬ tuˬ ve maˇ heˆ. 12Nawˬ hui ve venˇbaˆ hkʼaˬ ma kawˆ tuˬ uiˍ jaˇ ve leh, nawˬ hui venˇbaˆ hkʼaˬ ma te taˍ peuˬ ve hta‸ ngaˬ shiˍ chehˇ ve yoˬ. Nawˬ hui lehˬ, da‸ ve chaw teˇ hpaˍ hta‸ ciˍ yanˍ piˇ leh, la‸ shawnˍ yuˬ caˇ chehˇ ve yoˬ. Haˍ ve gʼawˇ ve chaw teˇ hpaˍ suhˉ jehˬ kuiˬ lo shonˇ kʼai tuˬ nawˬ hui te piˇ chehˇ ve yoˬ. 13Haiˬ ve awˬ yanˇ hkʼaw ta‸ iˉ gawˬ lehˍ chehˇ taˍ ve lehˬ da‸ jaˇ tehˬ ve yoˬ.
14Nawˬ hui a sha‸ gʼa te‸ chehˇ tuˬ, haiˬ ve kanˉ hta‸ jaw kʼai leh, da‸ ve kanˉ hta‸ te-o. Oˇ hkʼe te ve kʼo, nawˬ hui kʼoˆ ve hkʼe kanˇ paˆ uiˍ ve Jawˇmawˇ Gʼuiˬsha nawˬ hui geh chehˇ tuˬ yoˬ. 15Haiˬ ve awˬ ceuˬ hta‸ canˇ leh, da‸ ve awˬ ceuˬ hta‸ ha‸-o‸. Suhˉ jehˬ kuiˬ shaˉ nanˉ hkʼaw hteˇ ve cawˇ ve awˬ ceuˬ cawˬ la hpeh‸ tuˬ te-o. Oˇ hkʼe te ve kʼo, mvuhˇmiˬ chi hkʼaw chehˇ taˍ sheˍ ve chaw hui hta‸ Gʼuiˬsha ha kʼaˉ laˇ tuˬ leh naˍ maˇ shiˍ.
16Chi hta‸ pa taw, kanˇ paˆ uiˍ ve Jawˇmawˇ Gʼuiˬsha kʼoˆ ve, Venˇ hkʼaw lo hkʼanˇ ve awˬ hkawˇ leh kuˬ hawˬ ve awˬ hkawˇ tawˆ la tuˬ yoˬ. Awˬ hpfuhˇ piˇ leh paˆ hawˬ tcuh ve chaw hui geh teˇ geh, muiˬ caˇ paˍ hui hta‸ htawˇ shu kuˬ yuˬ leh paˆ hawˬ tcuh tuˬ yoˬ. 17A pehˉ meuˇ hko teˇ hpaˍ awˬ hkʼaw lo htawˇ, dawˇ haˍ leh kuˬ hawˬ ve awˬ hkawˇ tawˆ la tuˬ yoˬ. Awˬ ceuˬ chi teˇ hpaˍ hpeh‸ la tuˬ yoˬ. Awˬ lawn kʼo, nawˬ hui hta‸ ciˍ yanˍ piˇ tuˬ ngaˬ laˬ chehˇ ve yoˬ, teh‸ Gʼuiˬsha kʼoˆ ve yoˬ.
18Gʼuiˬsha ve awˬ nyi hta‸ law nyi chehˇ ve nawˬ hui teˇ hpaˍ lehˬ, hkʼaˬ ma kawˆ tuˬ dawˇ haˍ tuˬ uiˍ jaˇ ve le. Awˬ nyi oˇ ve nawˬ hui hta‸ aˬ hto‸ ma da‸ ve awˬ bon te laˇ gʼa tuˬ le. Awˬ nyi oˇ ve lehˬ, awˬ gʼeuˆ ba lehˍ cawˬ tuˬ ve maˇ heˆ. Naˆ ho‸ ve awˬ nyi hpeh‸ tuˬ yoˬ. 19Awˬ nyi oˇ ve lehˬ, laˇ caˬ shiˉ hta‸ gʼuiˇ hpaw-e leh yehˬ miˉ tawˍ hta‸ hpuˇ da‸ ve chaw hkʼe hpeh‸ tuˬ yoˬ. Maˇ heˆ kʼo, aˉ hkʼaw kʼo‸-e leh gʼo‸ pa hta‸ ca ngeh taˍ htaˇ vuiˬ htawˆ ve hta‸ gʼa hkanˍ ve chaw hkʼe hpeh‸ tuˬ yoˬ. 20Gʼuiˬsha ve awˬ nyi lehˬ, awˬ gʼeuˆ ba lehˍ cawˬ tuˬ ve maˇ heˆ. Naˆ ho‸ ve awˬ nyi hpeh‸ tuˬ yoˬ. Awˬ nyi oˇ ve lehˬ naˆ ho‸ jaˇ leh, awˬ gʼeuˆ a ciˉ ka‸ maˇ cawˬ.
21Gʼuiˬsha kʼoˆ ve, Nawˬ hui te chehˇ ve bon pawehˇ teˇ hpaˍ hta‸ ngaˬ canˇ ve yoˬ. Oˇ ve teˇ hpaˍ hta‸ ngaˬ a ciˉ ka‸ maˇ nyi gaˇ. 22Nawˬ hui ngaˬ geh tuˉ tanˇ tuˬ yuˬ laˬ ve htawˇ, tuˉ tanˇ tuˬ oˇ ve teˇ hpaˍ hta‸ ngaˬ ha‸ yuˬ tuˬ ve maˇ heˆ. Nawˬ hui hkʼa deh‸ caˍ chu taˍ ve to nuˇ to shaˆ teˇ hpaˍ hta‸ htawˇ, ngaˬ ha‸ yuˬ laˇ tuˬ ve maˇ heˆ. 23Nawˬ hui duiˆ-ehˍ shaˇ-ehˍ te kʼa chehˇ ve kʼa muiˬ hkawˇ teˇ hpaˍ hta‸ jehˇ taˍ-o‸. Nawˬ hui ve tinˍ hteˆ hkawˇ hta‸ htawˇ, ngaˬ maˇ na gaˇ. 24Hteˇ ve cawˇ ve teˇ ceuˬ, teˇ pawˆ ka‸ maˇ fiˍ kʼai puiˉ ve iˉ kaˆ lawˬ hkʼa shuˍ ya‸ la chehˇ piˇ-oˆ.
25Iˉsaˍreˍlaˆ chaw teˇ hpaˍ-oˬ, nawˬ hui heh puiˉ hkʼaw lo awˇ chi hkʼaw‸ te toˇ chehˇ htaˇ, nawˬ hui ngaˬ geh tuˉ tanˇ tuˬ teˇ ceuˬ ceuˬ yuˬ veu laˇ tuˬ maˇ kʼoˆ piˇ taˍ. 26Chi hta‸ pa taw, chi beu‸ nawˬ hui hkʼaˇ nawˬ hui te taˍ ve meu‸ keu shiˍ gʼuiˬsha, Saˍkuˆ leh Hkiˇgʼonˍ hta‸ nawˬ hui gʼa pfuhˇ kʼai tuˬ yoˬ. 27Ngaˬ nawˬ hui hta‸ Daˍmaˍsehˆ venˇ oˇ paˉ hpawˇ lo cawˬ ve mvuhˇmiˬ lo shiˍ kʼai laˇ tuˬ yoˬ, teh‸ kanˇ paˆ uiˍ ve Jawˇmawˇ Gʼuiˬsha kʼoˆ ve yoˬ.
လက္ရွိေရြးခ်ယ္ထားမွု
Aˍmoˆ li‸ 5: LHBE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Lahu Bible Edited © Thailand Bible Society and Bible Society of Myanmar, 2010, 2020.