Aˍmoˆ li‸ 3
3
1Iˉsaˍreˍlaˆ chaw teˇ hpaˍ-oˬ, nawˬ hui hta‸ Eˇjiˇtu‸ mvuhˇmiˬ hkʼaw lo shiˍ tawˆ laˇ shehˍ hpaˇ Gʼuiˬsha nawˬ hui awˬ lawn hkʼaˬ hkʼe kʼoˆ taˍ ve hta‸ na sheˍ. 2Miˬguiˬ hkʼoˆ chehˇ ve awˬ nu ve chaw ceuˬ teˇ hpaˍ a‸ kehˉ, nawˬ hui hta‸ ngaˬ hkʼa deh‸ shiˍ taˍ leh, ha‸ shaˉ laˇ chehˇ ve yoˬ. Chi hta‸ pa taw, nawˬ hui ve venˇbaˆ hkʼa peu-eˬ awˬ pon, ngaˬ nawˬ hui hta‸ ciˍ yanˍ laˇ tuˬ ve yoˬ.
Tcuh kaˍ paˍ hui ve kanˉ
3Chaw nyiˇ gʼaˇ hkʼa deh‸ maˇ jehˬ da‸ taˉ leh teˇ geh kʼai hpeh‸-aw laˇ.
4Laˇ caˬ shiˉ lehˬ, caˇ tuˬ maˇ mawˬ sheˍ ve ceh ceh, heh puiˉ hkʼaw lo kuˬ toˇ chehˇ-aw laˇ.
Haˉ kʼoˍ hkʼaw chehˇ taˍ ve laˇ caˬ shiˉ-ehˉ lehˬ, teˇ ceuˬ ceuˬ hta‸ maˇ yuˬ gʼa sheˍ ve ceh ceh kuˬ chehˇ-aw laˇ.
5Va maˇ htaw taˍ ve kʼo, ngaˆ ehˉ teˇ hkeh va oˇ ve hta‸ yaw hpeh‸-aw laˇ.
Va hkʼaw lo teˇ ceuˬ ceuˬ maˇ lo‸-e ve kʼo, va oˇ ve penˇ hpeh‸ tuˬ laˇ.
6Ma‸ bawˆ tuˬ behˬ heh ma meuˆ ve teˇ yanˇ, venˇ hkʼaw chehˇ taˍ ve chaw yaˇ teˇ hpaˍ maˇ kawˆ tuˬ ve leh laˇ.
Gʼuiˬsha a loˍ maˇ cawˇ ve kʼo, venˇ teˇ maˬ maˬ awˬ hkʼoˆ lo kawˆ tuˬ dawˇ haˍ tuˬ ve awˬ ceuˬ gaˬ la hpeh‸ tuˬ laˇ.
7Gʼuiˬsha lehˬ yawˇ te tuˬ ve kanˉ hkʼaˇ teˇ hpaˍ yawˇ ve awˬ ceˬ tcuh kaˍ paˍ teˇ hpaˍ hta‸ maˇ hpeu‸ maˍ piˇ sheˍ ve ceh ceh, yawˇ teˇ ceuˬ ka‸ te tuˬ ve maˇ heˆ.
8Laˇ caˬ shiˉ kuˬ ve teˇ yanˇ, maˇ kawˆ ve chaw a shu teˇ gʼaˇ cawˬ le.
Gʼuiˬsha tawˇ yaw ve teˇ yanˇ, yawˇ ve tawˇ shu hta‸ maˇ kʼaoˍ maˍ piˇ leh a shu teˇ gʼaˇ chehˇ hpeh‸ tuˬ le.
Saˍmaˍriˆ mvuhˇmiˬ gʼa luˬ kʼai tuˬ
9Eˇjiˇtu‸ leh Aˍshaˍdawˆ mvuhˇmiˬ hkʼaw cawˬ ve hawˉ yehˬ teˇ hpaˍ hkʼaw chehˇ ve chaw hui hta‸ chi hkʼe kʼoˆ piˇ-oˆ. Saˍmaˍriˆ venˇ hkʼaw teˇ geh hpawnˬ laˬ leh, venˇ oˇ ve hkʼaˬ ma cha‸ chiˆ jaˇ ve leh, hkʼaˬ ma haiˬ jaˇ ve hta‸ nyi-o, teh‸ kʼoˆ piˇ-oˆ.
10Gʼuiˬsha kʼoˆ ve, Chaw oˇ ve teˇ hpaˍ lehˬ shu ve mawˇ jeˬ hta‸ hiˉ yuˬ lu yuˬ veu laˇ leh, a shu yawˇ ve yehˬ lonˉ hkʼaw shaw hpoˆ taˍ ve yoˬ. Yawˇ hui lehˬ, hteˇ ve cawˇ ve kanˉ hta‸ te hkawˇ maˇ shiˍ. 11Chi hta‸ pa taw, canˇ paˍ teˇ hpaˍ yawˇ hui ve mvuhˇmiˬ hta‸ caw hoˆ taˍ leh, yawˇ hui ve venˇ teˇ hpaˍ leh yawˇ hui ve yehˬ lonˉ teˇ hpaˍ hta‸ te luˬ te sheˆ piˇ tuˬ yoˬ, teh‸ kʼoˆ ve yoˬ.
12Gʼuiˬsha kʼoˆ ve, Yawˬ hawˉ shehˍ hpaˇ teˇ gʼaˇ lehˬ, laˇ caˬ shiˉ che‸ caˇ peuˬ ve yawˬ ehˉ hkui sheh nyiˇ paˉ leh naˍ paw teˇ maˬ hta‸ ceh tiˉ gʼa kʼaw‸ mawˬ ve hkʼe, awˬ me‸ awˬ hponˇ hta‸ ha‸ ve Saˍmaˍriˆ chaw a ciˉ ceh tiˉ gʼa te‸ chehˇ taˉ tuˬ yoˬ. 13Chi beu‸ na yuˬ leh, Yaˍkoˆ ve awˬ ceuˬ awˬ hkʼaˇ teˇ hpaˍ hta‸ shaˍ ti‸ piˇ-oˆ. 14Iˉsaˍreˍlaˆ chaw hui hta‸ ngaˬ ciˍ yanˍ piˇ ve teˇ nyi htaˇ, Beˍteˍlaˆ venˇ hkʼaw cawˬ ve tuˉ tanˇ kuiˬ teˇ hpaˍ hta‸ htawˇ ngaˬ te luˬ piˇ tuˬ yoˬ. Tuˉ tanˇ kuiˬ oˇ ve teˇ hpaˍ hta‸ miˬ chaˇ hkʼoˆ lo ngaˬ yuˬ baˬ tuˬ yoˬ. 15Mvuhˇ kaˆ htaˇ leh mvuhˇ goˇ htaˇ chehˇ tuˬ te taˍ ve yehˬ teˇ hpaˍ hta‸ htawˇ ngaˬ te luˬ piˇ tuˬ yoˬ. Haw ciˬ yuˬ leh nyi sha tuˬ te taˍ ve yehˬ teˇ hpaˍ htawˇ luˬ kʼai sheˆ kʼai leh, uiˍ jaˇ ve yehˬ teˇ yehˬ le le htawˇ luˬ kʼai tuˬ yoˬ, teh‸ Gʼuiˬsha kʼoˆ ve yoˬ.
လက္ရွိေရြးခ်ယ္ထားမွု
Aˍmoˆ li‸ 3: LHBE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Lahu Bible Edited © Thailand Bible Society and Bible Society of Myanmar, 2010, 2020.