San Lucas 6
6
Ri Jesús jare Rjaw uxnb'al ij
(Mt 12:1-8; Mr 2:23-28)
1Chpam jun uxnb'al ij, kwa'kat Jesús ptaq nk'aj tiko'n. Ni nk'aj udiscípulo, che jnam kib'in ruk', kiyitjin che uxulxik uwuch nk'aj triko ib'enaq. Tik'ri xiyok che u'anik utz ruk' k'ab' rech kiktijo. Echi' x'antaj utz che, xiktijo. 2Iy'o keb' uxib' chke nk'aj fariseo xikta chke, xikb'ij:
—¿Suche che ki'an chak chpam uxnb'al ij che ya'tal taj chpam qapxab' k'anik? —xiche chke.
3Ni Jesús xuk'ul uwuch ktzij, xub'ij chke:
—¿Le xa itom t k'ut su xu'on qari'jal David ujer ti xpi numik chke jnam kuk' nk'aj rich'il? ¿Le xa isk'im t uwuch wuj jachi tz'ib'tal wi su xik'ano? 4Re xok chpam nimlaj rchoch Dios, xuchap kaxlenwa che y'om chjuch Dios, tik'ri xutijo. Soq xuya chke rich'il. Ni nk'aj kaxlenwa le', xaq xaw nk'aj rajchak Dios ya'tal chke chpam qapxab' che o mow kiktijo,#Dt 6:13; 1S 21:1-6. —xche Jesús chke.
5Xub'ij chik chke:
—In, nAchi nuK'jol Dios, nRjaw uxnb'al ij, —xche chke.#6:5 Ya'tal che Qajaw Jesús kub'ij chke udiscípulo sutaq kik'ano chpam uxnb'al ij. Mt 12:8; Mr 2:28.
Ri Jesús xuknaj jun achi che xa uk'lom rib' u'ab'
(Mt 12:9-14; Mr 3:1-6)
6Xuriq jun chik uxnb'al ij, xok Jesús chpam rchoch Dios, kitjin che ktojxik mnaq. O jun achi chla' che xa uk'lom rib' jun u'ab' rech u'b'im. 7Nk'aj ajtojnel rech upxab' Dios soq rich'il nk'aj fariseo, kk'ak'lem Jesús we kuknaj nachi le' chpam uxnb'al ij, rech we jala', o mow kikkoj tzijtal chrij. Ke kkaj kkitzkuj umak.#6:7 Ujer kipxab' ke kub'ij che jun ot mow ku'on pachinchke chak chpam uxnb'al ij, miskini' rech jun utzil. 8Per ni Jesús rit'am chik su kiyitjin che uchomxik, ena xub'ij che nachi che uk'lom rib' u'ab':
—Katwa'ljoq, katitk'al chiquch, —xche che.
Nachi xwa'ljik, xitk'e' chikxo'l chla'. 9Tik'ri xub'ij Jesús chke nk'aj mnaq che kkaj kkitzkuj umak:
—O jun tzij kinta chiwe, ¿chinchke ya'talik che k'an chpam uxnb'al ij? ¿Le jare ya'talik che kqa'an jun utz, o jare ya'talik che kqa'an jun k'ax? ¿Le utz kto' jun chjuch kmik, o jare utz che kaya che kkamik mal ot jun kuto'o? —xche chke.
10Ri Jesús xyuka'yej kunjel nk'aj mnaq che kistum kib' chrij, ena xub'ij che nachi:
—Chilk'a uwuch na'ab', —xche che.
Ena xulik' uwuch nu'ab'. Xaq ruk', xik'choj nu'ab'. 11Per ni mnaq che kiktaqch'ij Jesús, mas xpi kiwal. Ena xikmaj utayik chikuch su kik'an che Jesús rech kiksach uwuch.
Ri Jesús xyuchay kab'aljuj (12) apóstol
(Mt 10:1-4; Mr 3:13-19)
12Echi' jala x'antjik, soq jare chi' x'e Jesús che u'anik uch'ab'al ruk' Dios chjuch jun jyub'. Jun a'ab' enter xch'aw ruk' Qajaw Dios chla'. 13Echi' xisqarik, xyusk'ij nk'aj mnaq che iyoknaq ruk' chpam uchak Dios. Tik'ri xyuchay kab'aljuj (12) chikxo'l, xub'ij apóstol chke. 14Jarewa kb'i':
Jun jare u Simón, (che Lu' kb'ix che rmal Jesús),
rich'il u Trix, che jare ucha' u Simón;
rich'il u Santiago,
u Wan,
u Pelipe,
u To'l;
15soq rich'il u Mte'y,
u Max,
rich'il jun chik Santiago che jare uk'jol u Alfeo;
soq rich'il jun chik Simón che zelote kb'ix che.
16Soq o u Judas iyachlal ruk' u Santiago; soq rich'il u Judas Iscariote (che xuk'ij Jesús pik'ab' nk'aj rajch'oj).
Ri Jesús ik'i mnaq xyutjoj che utzij Dios
(Mt 4:12-25; 5:1-12)
17Ri Jesús xqaj loq chujyub' kuk' nk'aj apóstol; xiqaj chjuch jun uwut'aj. Soq iy'o nk'aj chik rich'il chla', jnam kuk' nk'aj chik k'ilaj taq mnaq; nk'aj mnaqi', ipitnaq chpam nk'aj chik tinmit ukwent Judea, soq rich'il chpam un tinmit Jerusalén; soq xipi chpam keb' tinmit che iy'o chuchi' mar, jare un tinmit Tiro rich'il un tinmit Sidón. Ke xiyo'pan chla' rech kikta' su kub'ij Jesús, soq rech kyuknaj ruk' kyab'il. 18Soq xyuknaj chin nk'aj che kirqom k'ax rmal itzel taq espíritu. 19Kunjel mnaq kkaj kikchap koq Jesús, mal kiyik'choj kunjel chintaq kikchap koq, rmal nimlaj chu'ab' o ruk'.
20Ri Jesús xyuril nk'aj udiscípulo, xub'ij chke:
«Utz iwe ix ixpobre, mal ix'o pu'ab' Dios,
Re ku'on utzlaj atb'altzij pijlom y kuya na nimlaj utzil pijlom.
21Utz iwe ix chintaq kitij numik ile',
mal kixnojsax na.
Utz iwe ix chintaq kixo' chanim,
mal kixtzen na rmal ki'ktem.
22»Utz iwe ix ti xa k'ax kixkkil mnaq, we xa wmal wech in. Soq utz iwe ix ti xa kixkkesaj chikxo'l, rich'il ti xa kixkyo'o, soq rich'il ti kikb'ij chiwe che xa ixitzel taq mnaq. Utz iwe echi' jawa kiriqo wmal wech in, nAchi nuK'jol Dios. 23Mas kixki'ktoq echi' jala k'an chiwe, mal kiriq na jun nim tojb'aliwe chla' chkaj. Chna'taj chiwe che nk'aj mnaq che kik'an k'ax chiwe soq jala xik'an kti' kmam ke chke ajb'il utzij Dios ujer.
24Per t'ob' iwuch ix ixb'yom,
mal irqom chik kub'sb'al ik'u'x chi' chuchlew che kk'is na. Otchich jachi kiriq wi.
25T'ob' iwuch ix jumpa ixnojnaq chanim rmal utz kiriq chi' kib'ij ix,
mal kiriq na jun numik, kixnum na che su kraj Dios kuya chiwe.
T'ob' iwuch ix jumpa kixtzen chanim rmal ki'ktem,
mal kixo' na rmal b'is.
26T'ob' iwuch ix jumpa kikb'ij kunjel mnaq che ix'utzlaj taq mnaq.
Jala xikb'ij kti' kmam ke chke nk'aj mnaq che xkijluj kib' che ajb'il utzij Dios ujer».
Jala xub'ij Jesús chke nk'aj udiscípulo.
Ri Jesús xub'ij che nmister kqal'oj mnaq che iyajch'oj quk'
(Mt 5:38-48; 7:12)
27Ri Jesús soq xub'ij chke: «Ri ix che kixtjin che utatb'xik ntzij, kwaj kimb'ij jun tzij chiwe: chil'oj chintaq iyajch'oj iwuk'. Chi'na utzil chke chin xa k'ax kixkkilo. 28Chita utzil che Dios pkijlom mnaq che kikta k'ax pijlom ix. Chi'na ich'ab'al ruk' Dios rech kuya utzil pkijlom mnaq che xa kixkyo'o. 29We o jun katuch'ay che jun lado aplaj, chiy'a koq un chik lado chjuch rech katuch'ay chik chla'. We o jun kumaj achketa, soq chiy'a che kuk'am b'i ak'ton. 30Pachinchke mnaq che o nmister che, chiy'a che su kuta chawe; soq we o jun kumaj ub'itaqawe, mata chik che. 31Su kiwaj che kik'an mnaq chiwe, soq jala chi'na ix chke ke.
32»We xaw kil'oj mnaq che kixkil'oj ix, ¿su ri' ri utzil ki'an chjuch Dios? Otaj, mal soq jala kik'an mnaq che kikjom taj utzij Dios; kkil'oj kib' ke chikuch. 33We xaw ki'an utz kuk' mnaq che utz kik'an iwuk' ix, ¿su ri' ri utzil ki'ano? ¿Su tojb'aliwe kuya na Dios chiwe? Otaj, mal soq jala kik'an mnaq che kikjom taj utzij Dios. 34We ix kiya pqajik su o iwuk', per xaw chke mnaq che iwit'am che kikya uk'xel, ¿su ri' ri utzil ki'ano? ¿Su ri' tojb'aliwe kuya na Dios chiwe? Otaj, mal soq jala kik'an mnaq che kikjom taj utzij Dios; kikya chke nk'aj kich'il pqajik su o kuk' che kit'am che kikya uk'xel. 35Per ni ix, xani chil'oj mnaq che iyajch'oj iwuk', chi'na utzil chke kunjel jumpa mnaqi'. Chiy'a chke pqajik su o iwuk', per xa mita uk'xel chke. We jala ki'ano, nim tojb'aliwe kiriq na ruk' Dios, alnik che ix ixralk'al Qajaw Dios o chla' chkaj. Chi'na utz kuk' kunjel mnaq, mal utz Qajaw Dios kuk' mnaq che xa iyitzel mnaq soq kuk' nk'aj che kkityoxij taj che. 36Chil ik'u'x chke mnaq, jala peche ku'on iQaw nim u'ij chla' chkaj, che mas kel uk'u'x chke mnaq.
Mi'an atb'altzij pkijlom mnaq
(Mt 7:1-5)
37»Xa mi'an atb'altzij pkijlom mnaq, rech k'an t atb'altzij pijlom ix. Xa mikoj kmak mnaq, rech koksax t imak ix rmal Dios. Chikyu kmak mnaq, rech Dios kukuy imak ix. 38Chiy'a chke mnaq jumpa nmister chke, rech kya chiwi'x su ku'on nmister chiwe. Per nim kya na chiwe; kya na jun utzlaj pajb'al chpam jun ikuxtar che utz ut'okik upam, rech nim kuch'ijo, ast retal kichmewik. Su unmal sutaq'ik kisipaj ix chke mnaq, jala unmal kusipaj Dios chiwi'x». Jala xub'ij Jesús chke.
39Tik'ri xub'ij jun chik k'amb'al n'oj chke mnaq, xub'ij: «¿Xatb'a kikun jun potz' kuk'am ub'e jun chik potz'? ¿Le jnam t k'ut kitzaq b'i chpam jun jul we jala kik'ano? 40Ot jun mnaq che o ptojxik jare mas nim reqle'n chjuch rajtojnel. Per jun mnaq o ptojxik, we kk'is utojxik, xaq jnam kelik peche rajtojnel.
41»¿Suche che kaka'yej ch'inlaj mes o chpam uwuch nawachlal, peche katzkuj ch'inlaj umak unom? Ni at, kana' taj che nimlaj mak anom, peche jun kta'm o chpam awuch at. 42We kana' taj at un kta'm o chpam awuch, ¿su mow che jawa kab'ij che nawachlal: “Wachlal, chiy'a chwe kinwesaj ch'inlaj mes o chpam awuch”? katche che. Xa keb' aplaj ka'ano. Nab'e chawesaj un kta'm o chpam nawuch at, rech tik'ri katka'y che resxik ch'inlaj mes chpam uwuch nawachlal». Jala xub'ij Jesús chke mnaq.
Jun che', xa rmal uwuch kuya'o, k'alnik we utz o ustaj
(Mt 7:17-20; 12:34-35)
43«Jun mnaq jala peche jun che'. Ot jun utzlaj che' kuya uwuch che ustaj, mowni o jun che' che ustaj, kuya utzlaj taq uwuch. 44Jun che', xa rmal uwuch kuya'o, k'alnik we utz o ustaj. Jwi' k'ix ot uwuch kuya'o che prut higo ub'i'. Mowni kuya uwuch uvas jun k'ix che uwure tap ub'i'. Ot mow kmol prut chke nk'aj k'ix. 45Soq jala kuk' nk'aj mnaq. Jun utzlaj mnaq, jare utzlaj taq tzij kub'ij. Ku'on utz, rmal utzil o puk'u'x. Ni jun itzel mnaq, jare itzel taq tzij kub'ij, ku'on ustaj, rmal itzel o puk'u'x. Pikchi' mnaq kel loq wi runjel jumpa o pikk'u'x.
Ri Jesús xub'ij un k'amb'al n'oj chrij keb' utk'alb'al ja
(Mt 7:24-27)
46»¿Suche che kib'ij ix chwe: “Qajaw, Qajaw”, kixche chwe, tik'ri k'ut ki'an taj su kimb'ij chiwe? 47Kink'ut chiwuch chin ruk' kinjnamsaj jun mnaq che kpi wuk', kuta' su kimb'ij che, y ku'ono su kimb'ij. 48Re, jala peche jun achi xu'on jun rchoch. Nab'e xuk'ot ukulb'al un ja, naj xqajik xu'on che, ast retal xurqa ab'aj. Tik'ri xukoj utk'alb'al pujlom ab'aj. Echi' x'antaj un ja, xpi jun nimlaj jab', xinmir ja', xupxij rib' chrij un ja, per xikun taj xuslib'saj, mal pujlom ab'aj ykom wi. 49Per chin jun mnaq che kuta' su kimb'ij y ku'on taj, jala peche jun achi xu'on jun rchoch chuchlew, ot utk'alb'al xukojo. Echi' x'antaj un ja, xpi jun nimlaj jab', xinmir ja', xupxij rib' chrij un ja. Ena xiwlujik, runjel xsachtaj uwuch». Jala xub'ij Jesús chke.
လက္ရွိေရြးခ်ယ္ထားမွု
San Lucas 6: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global