2 Kɔlɛntiɛ́ŋ 4
4
1Gɔdányá agág gá ginɔg gá ɔdɛm umáadɛ́fá buol ubuány, buád buand masɔlɔ́gɔgɔ diádiádɛ́gáná. 2Dimene manda gidigid má niɔs na má ɔduɔ́ gɔnɔ́. Didigúnéŋe mɔnd, didigúnúgenyi sɔ́n gugál gá Gɔdányá. Meliŋítas gusúg didíyenyé band sáŋŋŋ, nɛnama nɛ́nyá ká band gidigid, agá eŋís yá Gɔdányá lɛns ɔgɔ́b gá ɛdɛm ká dinyɛ band bá busi. 3Ímábá Ndág ya Nsɔ́m didúmbenyé nyɛ na mbíne, búnyɛ gá ebe bábaná agá bunyím; 4bádiguádábán, gágual ká Gɔdányá wa gus egue mabɔ́gɛ́n nsiŋi sɔ́b na mbíne. Ulegeen bɔ́ ká bádián gise ɛgɛ́ Ndág ya Nsɔ́m ya nugúm ná Kilíse éŋené, agagá Gɔdányá bídíyenyé. 5Moóny málɛ́ŋaná Ɔgúnɔ́ Yésu Kilíse didúmbenyé, saá mádɛ́lɛ́ŋaná. Digúbɛ́gɔ́lɔɔn basuá muát anyɛ bél buól bán góbusió bá Yésu. 6Gágual ká Gɔdányá mɔyɛ́d ká: Nsɛ́ gise segenyi agá mbíne! Ɔwɔ́ muát umáal ká gise segenyi ɛdɛm saás. Umáan bese ká wéŋin gise ká gílínsi nugúm nág núségédené ogóbusió bá Kilíse.
7Basuá dɛbiananá bɔnɛ́m#4.7 Bɔnɛ́m aya dɛbá manda má gus egue, búnyɛ Ndág ya Nsɔ́m na gɔlɛns gá yɛ́. ubuány, dinyɛ anyɛ bɛsuá bá numa, ká band lɛns ká saá agasuá méŋeméŋe wa bugaga uwaány óloninó, aga Gɔdányá wúleniné. 8Didiguélúme na anama yá meyú gidigid ádiámanɛ́ná, ta anaány, diguámɛ́nanɛn, ta diákɛ́naan, ɛdɛm saás dɛbá sibuéŋídeny; 9ta bédísésenyi, anaány dɛguámba guɔyɛd ká Gɔdányá dɛbá nasɔ, ta bédínusenyi, bámabása bɔ́dídiɔ́n. 10Agá guɔ́bɛ́g, duɔ́l dás gúbaan nobusió na gudíyenyi nanyá nigú ná Yésu máabɛ́dɔ́mb, anaány ká gusɔ́d gág sɔ́n bídíye agás gá duɔ́l. 11Digúsɔ́dɔɔn, ta anaány, góbúsió bá Yésu, nigú dɛbá ayáyá nasɔ, anaány ká gusɔ́d gá Yésu bídíye sɔ́n agás gá duɔ́l dúgenúguénen. 12Anaány nigú díbítiólonyó, banuá gusɔ́d núbítiólonyi.
13Musámb má Imbɔbɔnɔ guɔ́yɔ ká: Nguádáb, buád buanda nnyá gugálɛ́d. Basuá sɔ́n agá nŋili imoom yá guádáb, digúgála gágual ká díguádáb. 14Digúlɛnsaan agá meliŋítas ká, Gɔdányá uméenyúgí Ɔgúnɔ́ Yésu aga ebeguén, gediényugi basuá sɔ́n na Yésu. Ugaal sɔ́n ká nasɔ nanɔ dɛ́bá agág gá masiá. 15Gán góbúsió manda eme gidigid diámanɛná, anaány ká bese wa Gɔdányá bísíd band giod gudúmbidenyi. Ány band giod géŋeen Gɔdányá nukany bónd bégúmenyi wɔ́.
Gusɔ́dɔɔn agá guádáb
16Buád buanda didiábá na masɔlɔ́gɔgɔ. Ta duɔ́l dás ságaan siɔ siɔ, ɛdɛm saás guóndoon bɛŋɛ́lɛŋɔ́sio mɔɔ́s mem. 17Mɔɔn wa guɔ́bɛ́g dibianáná nɛ́nuán nyɛ gá mɔɔn wá gɛsɛgɛl, gúdiguégen na méŋeméŋe wa nugúm ná medúg mem diganúbia. Mɔɔ́n wa guɔ́bɛ́g uwaány gúdɛ́dábɔ́na gá gɛsɛgɛl igiány. 18Dɛdɛguámba manda band ánaná, diguámba gɔg ɔmɔ́ bádiánáná. Ɔmɔ́ bánaná nyɛ gá mɔɔn wá gɛsɛgɛl, ɔmɔ́ bádiánáná gúgɛ́ga na bánamana.
လက္ရွိေရြးခ်ယ္ထားမွု
2 Kɔlɛntiɛ́ŋ 4: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ