2 Kɔlɛntiɛ́ŋ 5
5
1Digúlɛnsaan agá meliŋítas ká duɔ́l dás dúnyá anyɛ bɛmfána disɔ́dɔnɔ kɔ́ mágadagad, Gɔdányá gadífá duɔ́l dúnyá anyɛ duyá dá medúg mem ugumuana, Gɔdányá umáadábɔ́ná duyá uduány, saá mɔnd. 2Digúbísiege gágual ká diguámbá ká gesí dimábiá duɔ́l dás uduány dúnyá ugumuana fiaŋ fiaŋ. 3Agá meliŋítas, anyɛ́ diganúbia duɔ́l uduány, didigabá band bá kand duɔ́l dá imeku. 4Gɛsɛgɛl dimányá agá duɔ́l dás dá gus egue, diguɔ́tɔ anyɛ band bébídenyé ká bádɔɔ́n bɔ́ gɛnɔ́ gɛ́nɔ́naná bɔ́. Búdɛ́bá ká diguámba gugú ká diám agá duɔ́l dás. Diguámba gubia duɔ́l dá muana ká gusɔ́d gá medug mem nyɛɛ́n duɔ́l dúbiananá ká dúgú. 5Gɔdányá umáadɛ́dábɔ́n gá gusɔ́d uguány; uwadɛ́fá Ɛsámb yá Mefúny ká dɛ́lɛ́ns cácácá ká ugaal anyɛ́ umáadán. 6Kányɛ gɔ́g dɛbiananá bɛsɛgɛl gidigid giant gá mbɛ́dágɛ́dɛ́n diond dɛlɛnsaan cácácá ká gɛsɛgɛl dɛmányá agá duɔ́l edue, dinyɛ ayáyá na Ɔgúnɔ́. 7Giondiɔdɛ́mɔ́ giéndenyé gusɔ́d gás, saá manda diánaná na eŋís yás. 8Digúbianan giant gá mbɛ́dágɛ́dɛ́n, diond dibíléne ká diám agá duɔ́l dás gá guɔlɔbɔɔ́n agá masiá má Ɔgúnɔ́. 9Buanda diambaná dɔ́mbá dɔ́mba gual búnyɛ ká, diála buanda Gɔdányá bílénené ká diála, ta dilɔbɛn agá duɔ́l dás ɔ́gɔ ká diám. 10Digúbianan ká díbídíye agá nɛgál ná Kilíse basuá gidigid, anaány ká sig mɔnd a bia bɛnama gá manda má bese ɔ́gɔ má bɔbɛ́ umáalá egegus.
Gɛdábɔna na Gɔdányá
11Digúlɛnsaan gɔg buanda buámbaná guɔyɛd ká gudíne Ɔgúnɔ́. Buád buanda diambaná ká band ádábaan. Gɔdányá gɔ́dɛ́lɛ́nsaan bese na bese, ngúbɛ́dága ká banuá sɔ́n, nugúdɛ́lɛ́nsaan bese ná bese. 12Didiguánd guamba gubíkányá, digúnúdíyenyi nŋili ká nuɔ́bɔɔn bese nasɔ. Ány nugalɛns nanyá nubiananá ká nuóndinonyi band bábíkányaná gá manda málɛ́ŋanɛná agá eŋís, bádíbíkanyá gá mányá agá ɛdɛm. 13Ímábá búnyɛ meliŋítas ká denyɛ bieg, dinyɛ anaány góbúsió bá Gɔdányá. Ímábá nsiŋi dɛnyá na yɛ́, dinyɛ na yɛ́ gá bese wanɔ. 14Ɛlɛ́ga yá Kilíse gúdɛ́mányɛ́ganɛn basuá dɛlɛnsaná bese na bese ká mɔnd táŋ omoom uméegú gá band gidigid. Anaány gúnyá, band gidigid béméegú#5.14 Alɛ́ŋɛ́d: Sá 11.50; Lom 5.18; 6.11. 15Umegú gá band gidigid ká band bɔ́sɔ́dɔnɔ́ diánd gúsɔ́dɔɔn anyɛ́ bébílénené. Bɔ́sɔ́dɔɔn gɔg gá ewe uméegú uwond uwanyɔg gɔ́b góbusió.
16Buád buanda didiándáná gulɛ́ŋa band nɛnama ɛnɛ́ band bá gus lɛ́ŋaná. Ta anyɛ́ gúnyɛ ká dɛmalɛ́ŋá Kilíse agá medug mád eméné agá nɛnama ná band, dɛdɛguánd gulɛ́ŋa wɔ́ nɛ́nuán agá nɛnama iniány. 17Mɔnd mábá aladán na Kilíse, unyɛ gɛŋɛ́lɛŋɔ́siɔ gá gɛlɔŋalɔŋa, manda má nsuá dɛgábá sɔ́n, ɔmɔgɔ́s mágányá kɔ́. 18Gɔdányá ɔwɔ́ eŋényé walaná ká buanda gidigid bá anaány. Umadɔ́m Kilíse ká wéli mbɛlɛ imáabá nás na Gɔdányá, uwond uwadɛ́fá buol bɔ́guɔ́yɔɔn band nanyá bányá bágual ká mbɛlɛ diánd gúbá nɔbɔ na Gɔdányá. 19Anaány gúnyɛ ká, aga Kilíse Gɔdányá máadɔ́mbɛ́n ká ɔwɔ́ muát wéli mbɛlɛ, udɛmand gulɛ́ŋa sɔ́n bɛfal bɔ́b. Uwadɛ́dɔ́m ká diɔ́yɔɔn band gugál gá gɛdábɔna. 20Dinyɛ band Kilíse máadɔ́m, búnyɛ́ gɔɔ́gɔ anyɛ Gɔdányá muát ugálaná gán. Digúnúbísógólonyi agá ɔfɛ́n wá Kilíse ká nuádáb ká Gɔdányá dábɔ́n mbɛlɛ inyá nanɔ naga. 21Kilíse mabása udibiá gɛfal, ta anaány, Gɔdányá uwadálɛ́n wɔ́ bɛfal bás. Búmabiál anaány ká agá bulada dinyá naga, dɛbá agá eŋís yá Gɔdányá band bá ndényé.
လက္ရွိေရြးခ်ယ္ထားမွု
2 Kɔlɛntiɛ́ŋ 5: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ