1 Kɔlɛntiɛ́ŋ 9
9
Edúmeb guála buól wond unyánan agág gá buol búbɛ́muát e?
1Ndɛbá filí e? Ndɛbá edúmeb e? Mmáan Yésu Ɔgúnɔ́ wasɔ. Nuganyɛ beédéb inen góbusió bá buól bá Ɔgúnɔ́ ubú mmáalá agán gá gadágadá. 2Ta gubá ká bómodió gúmbɛ́sáŋɔ́na ká ndɛbá edúmeb, agá giáy gɛ́nɔ́lɛ́ŋaná banuá, inyɛ edúmeb cá cá cá. Anɛ́ búnyá ká nunyɛ babɛ́ladán na Ɔgúnɔ́, nunyɛ banuá bámuát bulinsi búdíyenyé ká inyɛ edúmeb. 3Bugél bám ogóbusió bá band bɔ́nsɔ́mɔnɔ́ nyɛ ká: 4Ndɛgúsɛgɛmanan ká ndáŋáb manyán na buanda bá gubúwa gá buol ubú yalaná e? 5Ndigúsɛgɛmanan gubia agánd eŋédéb wagual ká wúndílígen gám gá ɛŋɛnd gɔɔ́gɔ anɛ́ bedúméb bómodió anɛ Piéle na belimen bá Ɔgúnɔ́ álaná e? 6Basuá béŋényé nam na Balanábas dɛbiánaná ká diála buól na ɛmbɔ́g saás ká dɛ́sɔ́dɔɔn e? 7Búnyɛ́ ayaá isia ínuananá bide dɛgɔ́dáŋábá bɛnama bágual ká ísɔ́dɔɔn kɔ́ e? Ány mɔnd a unyá báguala buól agág gá gisién, guog máal gúgányɛ kɔ́, udinyá buanda bá gisién igiány e? Ɔ́gɔ ká, ogiíg bɛdɔ́mbá unúm unyá wágual ugɛ́ga bɛ́, udɛkámɛ́d ambána yá bɛ́ ká úbúwa mabána e? 8Ngúgɔ́lɔn bulinsi gá buóny ubú yɔyɔnɔ́ ká, saá ɛmbɛ́dágɛ́dɛ́n ɛsɛ́ band máagaán gusúg, bisele bá Gɔdányá guɔ́yɔ nɔ́ sɔ́n. 9Búnyɛ́ buɔ́ŋɔ́n agá bisele bá Moyíso ká: Adiág búlúke gɛbɔs gigúl ɛgɛ́ búdánaná nsamɔ. Gɔdányá guágɛ́nan na mélúke e? 10Gás góbusió ugálaná bú anaány. Búnyɛ́ buɔ́ŋɔ́n anaány gágual ká, ewe wálaná buól gúbianan ká wágaan ɔdɛm ká ugabia nág niaf gɔɔ́gɔ anɛ́ ewe sɔ́n umadaná nkene. 11Dígubuenen manda móloninó agá Ɛsámba yá Mefúny gadágadá wanɔ gɔɔ́gɔ́ anɛ́ báfámaná imbu agá gisién. Búdɛ́bá bese nɔ́ ká nudɛ́fá manda móloninó egegus e? 12Ɔ́gɔ band bómodió gúbianan bugaga bógúbióyonyi na manda ɔmɔ́ nuéŋené bɔ́, saá basuá dɛbiananá ká dɛ́bia mɔ́ gudúmbídenyi e? Basuá dɛ́dɛɛ́gual nɔ́. Diguɔ́mínɔn na gubá uguány ká didiágɛ́n Ndág ya Nsɔ́m ya Kilíse nŋɛ́mb.
13Nugúlɛnsaan bese na bese ká manda ɔmɔ́ band ólonó na mɔ́ agá ɔnyɛb wá Gɔdányá, mɔ́mɔ́ band bálaná buól agá ɔnyɛb uwaány bióyonyó na mɔ́. Anaány sɔ́n band básɔ́mbaná bidúg bá bibiág agá bɛdál bá bɛfuafua gó busió bá bɔsɔ́gɔ́ biananá andáŋáb agá bidúg ibiány. 14Nɛnama nímoom Ɔgúnɔ́ máasɔ́mb ká ebe bédúmbenyé Ndág ya Nsɔ́m, manyán mɔ́b gúbianan ká mámɛ́n agá buol ubú bálana. 15Ndɛɛ́gudáŋáb ta buanda búmoom agá manda amányɛ. Dulia edue inuɔ́ŋɔnɔ́ dɛbá góbusió bágual ká númfá buanda. Bese ngú! Ta mɔnd udigeéli nɛɛ́m nám ná gubá agá ɛyayɔ! 16Ndɛbá na nŋili yagual ká mbiɔ́yɔ góbusió bá Ndág ya Nsɔ́m ɛyɛ́ ndúmbenyé. Ngúbianan ká ndúmbenyi yɛ́ gágual ká, Gɔdányá umáandɔ́gɛ́n yɛ́. Mahan nam mmáal ndidúmbényí Ndág ya Nsɔ́m. 17Búbá ká yaŋuá muát mmáabɛ́sɔ́mbɛ́n ká yála buól ubuány, gesi bágɔ́ŋnamaan. Anɛ́ búnyá ká bámandɔ́gɛ́n bú, kánɛ mfuógonyó ubú bámáandɔ́gɛ́n. 18Bɛnama bám gɔg nyɛ giág e? Bínyɛ́ ká, ndúmbenyi Ndág ya Nsɔ́m gile gile, ndɛdáŋáb ta buanda agá manda ɔmɔ́ Ndág ya Nsɔ́m ámfánaná bugaga bágual ká ndáŋáb.
19Inyɛ filí, ndɛbá giɔ́l gá mɔnd, ta anaány, ngubióndi giɔ́l gá band gidigid, ká ngɔ́gɔɔn Yésu Kilíse band giod. 20Anyɛ́ imáabá na Beyúdɛn, imɔsɔ́dɔɔ́n anɛ yúdɛn ká ngɔ́gɔ bɔ́ ta anɛ́ bisele bá Moyíso dɛɛ́mbiananá. Gigúl inyá gadágadá wa band báládaná bisele ibiány, nguála anɛ bɔ́bɔ́ ká ngɔ́gɔ bɔ́. 21Nɛnama nímoom gigúl inyá na ebe bádiábá Beyúdɛn, bádiábiánaná bisele bá Moyíso, ngúsɔ́dɔɔn anɛ bɔ́bɔ́, ndɛgɔ́lɔɔ́n gɛsɛgɛl na bisele ibiány ká ngɔ́gɔ bɔ́. Ndimɔ́yɛd ká, ndɛguládaan bisele bá Gɔdányá, saá anaány, ngúládaan bɛ́ gágual ká nguála Kilíse nŋɔ́bɛnɔ. 22Ímábá na ebe bádiábá bágúnínán agá guádáb, ngúsɔ́dɔɔn yaŋuá sɔ́n anyɛ ndɛbá agúnínán ká ngɔ́gɔ bɔ́. Ta band bá nanyá, gigúl inyá gadágadá wɔbɔ, ngúlɔbɔn anɛ bɔ́bɔ́, yála buanda gidigid ubú ɛ́lɛnsaná ká ndúgún gɛdam gá band ká bádáb. 23Nguála ubuány gidigid ká Ndág ya Nsɔ́m ábaan kɔɔ́m gidigid, na ká, agá gusúgúdenyi, mbia niaf agá bese ɔwɔ́ Ndág ya Nsɔ́m ɔ́yɔnɔ́.
24Nugúlɛnsaan ká band mála giseŋenye gá ɔdɛ́d, bɔ́bɔ́ bem bégúdíne, gɔɔ́gɔ ewe umanɔ́yág, ɔwɔ́ unyá na bɛnama. Énudíne ká núyág, núbia bɛnama. 25Band bálaná biseŋenye bá ɔdɛd guákɛn gugɔ́lɔɔn meyú má gufɔ́nɔfɔn bese na bese ká báyág, báguála nɔ́ ká bábia bɛnama bɛ́sɛ́ŋɛsɛŋá fiaŋ. Basuá, dɛguála nɔ́ ká dɛ́bia bɛnama bídiásɛŋɛ́sɛ́ŋá. 26Buád buanda gigúl igí ndínené, ndigúdíne ká kɔɔ́m mábal, ta gigúl yétenyé bibúm, ndiguétenyi bɛ́ agá gɔdɔ. 27Ngúbífánan meyú agám gá nuɔ́l bese na bese ká íméndígenyi nú. Kandɛ nɔ́, ala yaŋuá uwɔ́ inyá gudúmbenyinyi bɔsɔ́gɔ́ Ndág ya Nsɔ́m, ndialá agá ɔlɔŋ.
လက္ရွိေရြးခ်ယ္ထားမွု
1 Kɔlɛntiɛ́ŋ 9: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ