1 Kɔlɛntiɛ́ŋ 8
8
Mɔlɔk ɔmɔ́ béŋené gá bagɔdányá bá gus
1Nɛ́nuán diánɔn buóny bá mɔlɔ́k móloninó agá manyam béŋené gá bagɔdányá bá gus. Búnyɛ́ nɔ́, nuguɔ́yɔ ká, basuá bem dɛnyɛ na gɔlɛns. Gɔlɛns uguány guála ká mɔnd bíbúlígenyi. Buanda bugúnínenyé beédéb búbúnyá ɛlɛ́ga. 2Mɔnd mábɛ́dága ká ugɔ́lɛnsan buanda, umányɛ udɛlɛnsɛ anɛ́ mɔnd biananá ká úlɛnsan. 3Mɔnd mébíléne Gɔdányá, Gɔdányá gɔ́lɛnsaan wɔ́. 4Kányɛ gúnyá ká dinyɛ bágúnyánan mɔlɔ́k móloninó agá manyam béŋené gá bagɔdányá bá gus e? Digúlɛnsaan bese na bese ká bagɔdányá bá gus dɛ́bá ta buanda, diond dɛlɛnsan ká Gɔdányá nyɛ táŋ omoom, omodió dɛbá. 5Búnyɛ́ nɔ́ ká bómodió guɔ́yɔ́ ká bagɔdányá nyɛ egegus ta ugumuana. Búnyɛ meliŋítas, ɔgɔbɔ́ bagɔdányá nyɛ giod, bagɔn giod. 6Ta anɛ́ búnyá anaány, basuá digúlɛnsaan ká Gɔdányá nyɛ táŋ omoom, unyɛ Sié wasɔ umáalɔ́ŋá manda mem uwond uwadɛ́lɔ́ŋa basuá sɔ́n ká dɛ́bá bág, diond dɛlɛnsan ká Ɔgúnɔ́ wasɔ nyɛ táŋ omoom, uwɔ́ unyá Yésu Kilíse, buanda gidigid guúlenin agág gá ɔmbɔ́g, uwɔ́ udɛ́fánaná gusɔ́d.
7Saá band gidigid gɔg bálɛnsaná meliŋítas amaány, bómodió águbá bafɛ́lan gá gúbísógólonyi bagɔdányá bá gus. Bámányánan mɔlɔk móloninó agá manyam ɔmɔ́ béŋené gá bagɔdányá bá gus, bágúbɛ́dɛ́ga ká bámábɛ́nán agá gual gɔ́b gá nsua. Bádɛ́bá bágúnínán agá guádáb, báguánan anɛ mɔlɔk amaány guágan bɔ́ biíle. 8Bunyán digúdɛ́sɛdaan na Gɔdányá. Ta dinyánan, ta didinyánán, búdigúdiélenyi ta buanda, búdídiɔ́yɛ́kɔ́nɛ́n sɔ́n ta buanda. 9Banuá nugúlɛnsaan ká nunyɛ bágúnyánan buanda gidigid ubú nubílénené. Nubɛ́nyáŋanyaŋ gá buanda ubú nualaná ká band bámaányá bádɛ́gɔ́nɛn agá guádáb diál gɛfal. 10Gágual ká, mɔnd udiábá agúnínán agá guádáb máguán aŋuá alɛnsaná meliŋítas ilukié agá ɔnyɛb wá bagɔdányá bá gus anyánan mɔlɔ́k móloninó agá manyam béŋené bagɔdányá bá gus. Guguán uguány digegúdídigin mɔnd uwaány ká únyánan mɔlɔ́k amaány sɔ́n e? 11Gɔlɛns gɔ́w uguány nyɛ ɔduɔ́ wá buóny wa gunyím gá sɔ́gɔ́ udiábá ná guádáb gugúnínan, búbú e Kilíse megú gág góbusió! 12Gɛsɛgɛl ɛgɛ́ nualaná belimen bán báguádáb nɛnamá ná bɔbɛ iniány, nugígíyenyi bɔ́ ɛdɛm, Kilíse nualaná wɔ́ bú. 13Buád buanda, ɔ́gɔ manyán gɔ́ban na endimen wám wa guádáb agá gɛnana, yeen gunyánan bulɔ́k busió bum, ká ndɛbaán nobusió na gunenenyi wɔ́.
လက္ရွိေရြးခ်ယ္ထားမွု
1 Kɔlɛntiɛ́ŋ 8: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ