1 Kɔlɛntiɛ́ŋ 10
10
Nudigúmesi bágɔdányá bányá duánan duánan
1Belimen, nguámba ká nubɛ́dágɛ́d buanda búmáamɛ́n besié bás agá gigúl gá Moyíso. Nugánd mabɔ́gaán bɔ́ bɔ́bɔ́ gidigid, abáyɔ́gaan manaŋá abɔ́sa wa obólodod. 2Búmabá anɛ bɔ́bɔ́ bem beseduenen bɔ́ agá nugánd na agá manáŋ abɔ́sa wa obólódod ɔlɔŋ na Moyíso. 3Bɔ́bɔ́ bem abányá manyán mómóolónín aga Gɔdányá, 4bɔ́bɔ́ bem abábɔ́wá sɔ́n madɛ́ga ɔmɔ́ Gɔdányá méeŋín bɔ́, obónd abábúwánan madɛ́ga mámáamaán agá gɛdány. Gɛdány igiány ɛgɛ́ Gɔdányá méeŋín bɔ́ mabá Kilíse. Gímabá gíládaan bɔ́. 5Ta nɔ́, giod ɔgɔ́b gá ɔlɔŋ dimanda anɛ́ Gɔdányá bílénené, buád buanda béméeguénén giod agá gɛsɛɛ́sɛ. 6Manda amaány mámáabiálá gúdɛ́fánan bulinsi ká didiánd gúbíléne guála Gɔdányá ɔduɔ́ gulal niáŋ ná besié bás. 7Nudiánd gúgúmenyi bagɔdányá bá gus anɛ gɛdam ɔgɔ́b gá ɔlɔŋ máalá. Anɛ́ búnyá buɔ́ŋɔ́n ká: Band ebélukumen gá ɔnyɔ́ na nɛfuá, agá gélem ány, abáyayan. 8Dɛdɛɛ́b gá gúbídɔ́bɔ niaŋ ná gɛdám ɔgɔ́b gá ɔlɔŋ mɔɔ́bídɔ́bɔ́, guám anɛ́ Gɔdányá mɔɔ́n dɔns nitín na dúdadɔ dá band gá buɔ́s búmoom. 9Didiágán Ɔgúnɔ́ agá yɔɔ́bɛ́dɛn gɔɔ́gɔ anɛ́ gɛdam ɔgɔ́b gá ɔlɔŋ máalá guám anɛ́, Gɔdányá máadɔ́m inyɔ́k isiádánan bɔ́, ebéguénen. 10Gá guamaná, nudɛbɛ́sɔ́sɔ́lá niaŋ ná gɛdám gá band ɔgɔ́b gá ɔlɔŋ máalá, guám anɛ́ Gɔdányá máadɔ́m ɛngɛlɛs yaga ya nigú, iyɔsiɔ́nɔ́ bɔ́. 11Manda amaány mámáabiálán besié bás gúdɛ́fánan bulinsi ká didialá anɛ bɔ́bɔ́. Mɔ́mɔbiɔ́ŋɔ́ ká médífúnyifunyi basuá dɛnyá bɔgɔ́s gá mɔɔ́s mégúsúgúdenyi.
12Nsí gɔ́g ewe ubɛ́dáganá ká unyɛ osi bínyáŋanyaŋ ká udɛguá. 13Muɔɔ́bɛ́dɛ́n gidigid umú núnyá gulumenen na mɔ́ nyɛ muɔɔ́bɛ́dɛ́n muámanɛná mɔnd gidigid. Gɔdányá nyɛ na nuládád; udɛgatɛɛ́n ká buanda búdɔ́mbaná magɛ́nda mán nuámɛ́n. Yɔɔ́bɛ́dɛn mégedi gunúgɔ́gɛ́d, Gɔdányá genuéŋin bugaga ká nuámɛ́nɛn, nuónd nuɔ́mínɔɔn.
Nɛlad dɛbá na biád bá biliíndié
14Buád buanda belimen bám bá ɛlɛ́ga, énudúm bagɔdányá bá gus gélem púm púm. 15Nunyɛ band bá nsiŋi, buád buanda nnúgálaná ana; Ánusɔ́ŋɔ́n banuá muát. 16Gɛsɛgɛl basuá bem dɛbɔ́wánaná endeŋe wá magɛ́b uwɔ́ diéŋené Gɔdányá giod gá bese, saá dinyɛ na niaf agá manɔŋ má Kilíse e? Gɛsɛgɛl basuá beem diafaná dinyánan gɛnyɔga, saá dinyɛ na niaf agá nuɔ́l ná Kilíse e? 17Anyɛ́ gɛnyɔka ɛgɛ́ diafaná diond dinyánan nyá táŋ gímoom, búgúdíyenyi ká dinyɛ basuá bem nuɔ́l táŋ númoom. 18Ánɔbɛ́dágɛ́d baan bá Ísalayɛ́la ebe bányánaná mɔlɔ́k má manyam ɔmɔ́ bésígené agá gɛdál gá bɛfuafua, bádɛ́bá agá nɛlad na gɛdál gá bɛfuafua igiány e? 19Nguámba gunuófún ká, na bagɔdányá bá gus, na mɔlɔ́k béŋené bagɔdányá bá gus nyɛ na mfí e? 20Ágó! Ubú yámbaná gunuɔ́yɛdɛn nyɛ ká, gigúl band bádiálɛnsáná Gɔdányá sigené manyam má bibiág, béguéŋen mɔ́ gá biád bá bíliíndié, saá gá Gɔdányá. Ndɛguámbá ká banuá núbɛ́lád na biád bá biliíndié. 21Nudɛ́bá bágual nubúwanan endeŋe wá Ɔgúnɔ́, agá gélem nuabúwánán endeŋe wá biád bá biliíndié. Nudɛ́bá bágual nubá gɛsɛgɛl gímoom ilukié agá tébélé wa Ɔgúnɔ́ na uwa biád bá biliíndié. 22Búdɛ́bá bese ká diámba ká Ɔgúnɔ́ diɔ́bɛ́n ilób. Uwɔ́ unyɛ na bugaga udɛ́dɔ́mbaan.
Alá buanda gidigid gá nugúm ná Gɔdányá
23Gɛdám agán gá gadágadá guɔ́yɔ ká: «Dinyɛ báguala buanda ubú dibílénené.» Saá buanda gidigid gɔg búnyá bese gás góbusió. «Dinyɛ báguala buanda ubú dibílénené». Búnyɛ́ nɔ́, saá buanda gidigid gɔg búdúgúnené beédéb ká bágɔ́nɛ́n agá guádáb. 24Nsí mɔnd gidigid ála buanda búnyá bégúdúgún sɔ́gɔ́, udiálá ubú búnyá bágual búdúgún wɔ́ ɔwɔ́ eŋényé. 25Nunyɛ bágual nunyánan mɔlɔ́k gidigid béduénené agá nionyi kandɛ ɛŋágɛ́nɛ́ná agá ɔdɛm ta ɔ́gɔ ká niílín ná mɔ́. 26Gágual ká búnyɛ́ buɔ́ŋɔ́n ká: Gus gidigid na manda gidigid mányá kɔ́ guɔ́bɔnɛn Ɔgúnɔ́. 27Ewe udiábá eŋédéb mágɔbɛ́lɛ́gɛn gá ɔnyɔ́ ond ádáb, nyánán buanda gidigid ubú báguafɛ́naná kɔ́, kandɛ ɛŋágɛ́nɛ́ná agá ɔdɛm. 28Mɔnd máal gɔ́w gɔg ká: «Bulɔ́k ebue nyɛ bulɔ́k béseéguéŋin bá bagɔdányá bá gus», adinyá, gágual ká agagɔ́sɛŋɛn ɔdɛm wá mɔnd useégugubiés. 29Aya nguɔ́yɔ ɔdɛm wá sɔ́gɔ usɔɔ́guguɔyɛdɛn, saá wɔ́w wa muát. Ta anaány góbusió bágiág ɛŋágɛ́nɛ́n inyá agá ɔdɛm wá sɔ́gɔ omodió éngélenyé gá bufilí bám e? 30Íméŋeen Gɔdányá giod gá bese gá manyán, góbusió bá giág bɔ́gɔgúnúŋɔ́bɔnɛn bɔbɛ gá mɔ́ e? 31Nguɔ́yɔ ká, númányánan, nubúwánan, ta nuala giág gímodió, ánualá bú gá nugúm ná Gɔdányá. 32Nudiál buanda búnyá ká búnéni band ta bábá Beyúdɛn, ta bádiál Beyúdɛn, ta giɔ́b gá beédéb. 33Anaány yaŋuá mbɛ́gɛ́ndɛ́naná ká mbá bese na band gidigid gá buanda gidigid. Ndɛguámba bese wám gusúg, nguámba ubú búnyá bese góbusió bá band gidigid ɔbɔ́ ínyá guamba ká bábia gisódio.
လက္ရွိေရြးခ်ယ္ထားမွု
1 Kɔlɛntiɛ́ŋ 10: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ