1 Kɔlɛntiɛ́ŋ 7
7
Nŋondíny gá nŋófúny sɛ́lɛ́ŋana gigiŋ
1Dɛɛ́b nɛ́nuán gá ɛduá só moóny ɛsɛ́ numóoŋófún agá mbɔbɔnɔ numɔ́ɔŋɔ́ŋɛ́n. Búnyɛ́ bese ká anɔ́mandɔ dibísid agánd. 2Ta anɛ́ búnyá anaány, anɛ́ ɔnsɔŋɔn saáguman gulamb, búnyɛ́ bese ká anɔ́mandɔ gidigid bia agány waga, agánd gidigid bia ɔnɛ́m waga. 3Anɔ́mandɔ gúbianan ká úfuógonyi masɔ́m má nɛbɛ́d na agány waga, agány uwɔ́ sɔ́n ufuógonyi masɔ́m má nɛbɛd na ɔnɛ́m waga. 4Agánd dɛgúbianan ká wála na nuɔ́l nág anɛ́ ubílénené, nuɔ́l nág nyɛ́ ná ɔnɛ́m waga, ta ɔnɛ́m udɛ́gúbianan ká wála na nuɔ́l nág anɛ́ ubílénene, nuɔ́l nág nyɛ́ ná agány waga. 5Na agány na ɔnɛ́m dɛgɔ́bianan beén gusɔŋɔnɛn, asiá bɔ́sɔɔ́bɔ́n ká baál gutɛɛ́n gá mɔɔn wá gɛsɛgɛl ká bóbísógólonyi. Agá gélem ány, bónd gá ɔnsɔŋɔn. Númén nudiála anaány, nudɛbá bégúméndígenyi duɔ́l dán, ány Sátan bia nŋili yá gual ká únuɔ́bɛ́dɔn. 6Ubú ínuɔ́yɔnɔ́ ebué dɛbá gɛgɔ́da. Búmánɛ́g ká nuála nɔ́, búnyɛ́ bese. 7Nguámbá gesí banɔ́mandɔ gidigid bá anɛ yaŋuá, mɔnd gidigid gɔg nyɛ na ugág gúbá ugú Gɔdányá méeŋín wɔ́, ewe na ugág gúbá, ewúné na ugág gúbá.
8Kánɛ́ yɔyɔnɔ́ band bádiábá na bagánd na bisi ká búnyɛ́ bese ká bɔ́lɔb anɛ yaŋuá. 9Bámaál bɔ́diɔ́dɔɔ́n guméndígenyi duɔ́l dɔ́b, nsɛ́ bébígíŋe. Búnyɛ́ bese ká mɔnd bígíŋ na ká ɛlɛ́nd ɔɔ́n wɔ́. 10Beédéb bányá begiŋén, nguɔ́yɔ gɔ́b ká: Agánd dɛ́biádɔ́n ɔnɛ́m. Saá yaŋuá yɔyɔnɔ́, Ɔgúnɔ́ wɔyɔnɔ́. 11Bumoól ká, umádɔ́gán na ɔnɛ́m, udɛɛ́bɛ gá gigiŋ gíndodi. Agá ɔnɛ́m waga gusúg agánd uwaány biananá wónd ká bábídábɔ́n. Anɔ́mandɔ sɔ́n dɛgúbianan ká wémi agány waga. 12Agá giáy gá bigiŋ binyá, ewe eŋédéb, ewúné gɛndiádábá, yaŋuá muát yɔyɔnɔ́, saá Ɔgúnɔ́: Eŋédéb anɔ́mandɔ mábianan agánd unyá gɛndiádábá wadábaná ká bábaan nobusió na gusɔ́dɔɔn ɔlɔŋ, mɔnd uwaány diémí agánd uwaány. 13Eŋédéb agánd mábianan ɔnɛ́m unyá gɛndiádábá wadábaná ká bábaan nobusió na gusɔ́dɔɔn ɔlɔŋ, agánd uwaány dién ɔnɛ́m waga. 14Búnyɛ́ ká, ɔnɛ́m udiábá eŋédéb nyɛ egúy na Gɔdányá gágual ká agány nyɛ eŋédéb, anaány sɔ́n agánd udiábá eŋédéb nyá egúy na Gɔdányá gágual ká ɔnɛ́m waga nyɛ eŋédéb. Kand nɔ́, baan bɔ́b gabá anɛ bányɛ́ baádɔ́nán na Gɔdányá, búbú é, bányɛ́ egúy naga. 15Ewe udiábá eŋédéb mámba gusasɛd gigiŋ, nsɛ́ úsásɛd. Umádɔ́gan naga, eŋédéb uménúsién uwɔ́ eŋényé ta ubá agánd ta anɔ́mandɔ, uganyɛ filí. Gágual ká Gɔdányá manɔ́bɛ́lɛ́gɛ́n ká núsɔ́dɔɔn agá bumben. 16Kánɛ́ nguófonó aŋuá ányá agánd eŋédéb ká: Agánd eŋédéb, aŋuá adɛgɔ́lɛnsan ká, ala Gɔdányá gosódi ɔnɛ́m wɔ́w gɔ́w gá busió e? Ɔnɛ́m eŋédéb, aŋuá sɔ́n adɛgɔ́lɛnsan ká, ala Gɔdányá gosódi agány wɔ́w gɔ́w gá busió e?
Nsí sig mɔnd a lɔ́bɛn agá edény uwɔ́ Gɔdányá máafá wɔ́
17Gigúl ɛgɛ́ Gɔdányá máanɔ́bɛ́lán, numábá nusɔ́dɔɔn agá edény uwɔ́ Ɔgúnɔ́ máanɔ́fa. Mɔnd gidigid gubianan ká úsɔ́dɔ́n agá edény uwaány, bubɔ́ mfúnyifúnyé agá biɔ́b bá beédéb gidigid. 18Gigúl Gɔdányá máagɔbɛ́lɛ́gɛ́n, amabá ábiánsán e? Lɔ́b nɔ́! Ɔ́gɔ amabá na gisud gigúl Gɔdányá máagɔbɛ́lgɛ́n, adɛbiáns! 19Ta abá aŋansan gúmén kand guansa, buóny dɛbá. Mband buanda búnyá kɔ́ nyɛ gɔɔ́gɔ gufuógonyi bisele bá Gɔdányá. 20Nsɛ́ sig mɔnd a lɔ́bɛn agá edény uwɔ́ úmáabá gá wɔ́ anɛ́ Gɔdányá máabɛ́lɛ́gɛ́n wɔ́. 21Amabá giɔ́l gigúl Gɔdányá máagɔbɛ́lɛ́gɛ́n e? Adiágɛ́naán. Ámábia gɔg nŋili yá gual ká aám gá buɔ́l, odibiógi yɛ́. 22Gágual ká giɔ́l ɛgɛ́ Ɔgúnɔ́ saágɔbɛ́lɛ́gɛn dɛgábá gá buɔ́l. Gígányɛ mɔnd wa Ɔgúnɔ́. Ewe udiábá giɔ́l ɛgɛ́ Kilíse saágɔbɛ́lɛ́gɛn, uganyɛ giɔ́l gá Kilíse. 23Gɔdányá méeŋín bɛnama giod ká únuáŋɔ́n. Nudɛɛ́y biɔ́l bá ɛmbɛ́dágɛ́dɛ́n sá band bá gus. 24Belimen, ogóbusió bá Gɔdányá, nsɛ́ sig mɔnd a bá agá edény wág uwɔ́ umáabá gá wɔ́ gigúl bámáabɛ́lɛ́gɛ́n wɔ́.
Buóny bá ebe bádiábá agá bigiŋ
25Ubú ngogúnuóndinyi gá nŋofúny yanɔ agá giáy gɛ́lɛ́ŋaná ebe bádiábá agá bigiŋ, ndɛmɔ́ɔb bú agá niíd na Ɔgúnɔ́. Nnuɔ́yɛdɛn yam mbɛ́dágɛ́dɛ́n, yaŋuá uwɔ́ Ɔgúnɔ́ óndonyó ɔdɛm gám gágual ká umaŋán gɔsɔ́g. 26Na guɔbɛ́g gúnyá giod nɛ́nuán, yaŋuá ngɔ́bɛ́dágá ká, sig mɔnd a lɔb agág gá edény. 27Ɔ́gɔ agúbianan agány wɔ́w, adɛkɔ́ŋɛ́d wɔ́. Ɔ́gɔ adɛbá na agány, adiambɛ́d nŋili yá gugiŋ. 28Émegiŋ búdɛ́bá gɛfal. Ɔmbúlɔ mégiŋ búdɛ́bá gɛ́fal. Ebe gɔg bányá begiŋén gɔɔ́bɛ́gɔn giod, búbú yambaná ká guɔ́bɛ́g uguány dɛnuámɛ́n.
29Belimen, nguɔ́yɔ ká oo: Gɛsɛgɛl dɛbá nsɔ́b. Gubányɛg nɛ́nuán, nsɛ́ ebe bányá begiŋén bá anɛ bádɛbá begiŋén. 30Nsí ebe bábáŋaná sɔ́dɔɔn anyɛ bádɛgɔ́baŋa, ebe bábálaganá ála anɛ bádɛgɔ́balaga, ebe bɔ́ndɔnɔ́ ála anɛ bádigúbianan, 31ebe bábiananá andáŋáb wá manda má gus egue, bɔ́lɔ́bɔn anyɛ bádigúdáŋába. Gágual ká, gus anɛ́ gúnyá, gúdigelíkíd. 32Ndiguámbá ká núbá na nŋágɛ́nɛn. Ewe udiábá egiŋén guágan ɔdɛm wág gá manda má Ɔgúnɔ́, wamba nŋili yá gual ká úsímaan Ɔgúnɔ́. 33Ewe gɔg unyá egiŋen guágan ɔdɛm wág gá manda má gus, wond wamba nŋili yá gual ká úsímaan agány waga. 34Anaány ɔdɛm wág nyá biáfá biáfá. Babɔ́la na bagánd bádiábá begiŋen guágaan ɛdɛ́m sɔ́b gá buól bá Ɔgúnɔ́. Báguámba ká gesi bábá bá Ɔgúnɔ́ busió bum. Agánd unyá gá gigiŋ gúmeny guágɛ́naan na manda má gus, wamba nŋili yá gusɛmaan ɔnɛ́m waga. 35Búnyɛ́ góbusió bá bese wanɔ, búdɛ́bá ká ngúnúdámbá, búnyɛ́ gɔɔ́gɔ ká nuála manda anɛ́ buófonó, nubíláma Ɔgúnɔ́ uwɔ́ eŋényé.
36Giɔ́mf gá mɔnd mábɛ́dágɛd ká úmén udigiŋi giɔŋinɔ gág umáal gɛ́ bɔbɛ, wond waán ká ugúbíléne giɔŋinɔ gág igiány giod, búguófon ká bébígiŋ, nsɛ́ bébígiŋ anɛ ubílénené, udimaál gɛfal. 37Ewe gɔg usaágusɔ́mb agág gá ɔdɛm kand gɛgɔ́da ká udigiŋí giɔŋinɔ, wond wadɛgɛn nuɔ́l nág ká udɛlɛnsɛ giɔŋɛnɔ gág, uguála bese. 38Buóny nyɛ ká, ewe uménúgiŋi agánd guála bese, ewe sɔ́n uménuén udigiŋi agánd maál bese gudúmbídenyi.
39Agánd uwɔ́ ɔnɛ́m wága mányaná gusɔ́dɔɔn dɛgúbianan ká wɔ́sɔ́dɔɔ́n na ɔnɛ́m wá sɔ́gɔ́ ondodi. Ɔnɛ́m waga mégú, agánd uwaány nyɛ wegubígíŋ na mɔnd uwɔ́ úbílénené. Búguófon gɔg ká mɔnd uwaány bá eŋédéb. 40Gá ugám, agánd uwaány mɔ́lɔb kand gɔb gá gigiŋ, ugabá agá ɛyayɔ. Ngɔ́lɛnsan ká yaŋuá sɔ́n inyɛ na Ɛsámb yá Mefúny yá Gɔdányá.
လက္ရွိေရြးခ်ယ္ထားမွု
1 Kɔlɛntiɛ́ŋ 7: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ