1 Kɔlɛntiɛ́ŋ 14
14
Gugála agá ɔfɛ́n wá Gɔdányá ná gugála manamanyá má megélídié
1Ánubɛ́gɛ́ndɛ́naán ká núlɛ́ga bɔsɔ́gɔ́, nuágaan ɛdɛm sán sɔ́n gá gúbia ubú Ɛsámb yá Mefúny éŋeniné, menyí menyi gugála agá ɔfɛ́n wá Gɔdányá. 2Mɔnd mágála manamanyá má megélídié ɔmɔ́ band diálɛ́nsaná, ugúgála na Gɔdányá, saá na band bá gus gágual ká, bɔ́diguɔ́bɔɔn ubú wɔyɔnɔ́. Ɛsámb yá Mefúny ídídígené wɔ́ ká wɔ́yɔ meliŋítas mányá mɔsɛ́gɔn. 3Ibús yá Gɔdányá, íyɛ́ ígúgála gá bɔsɔ́gɔ́ band, yála ká giɔ́b óbógo agá guádáb, yéŋeen bɔ́ makányá, ífuogonyi band ɛdɛm. 4Mɔnd ugálaná manamanyá má megélídié ɔmɔ́ band diálɛ́nsáná, guóbógo uwɔ́ eŋényé. Ibús ígálaná agá ɔfɛ́n wá Gɔdányá guóbógonyi giɔ́b gá beédéb. 5Ngúbíléne ká banuá gidigid núgálá manamanyá má megélídié ɔmɔ́ band diálɛnsáná, ngúmeny gubíléné gɔg ká núbúse moóny agá ɔfɛ́n wá Gɔdányá. Ewe ubusené moóny agá ɔfɛ́n wá Gɔdányá gɔ́dɔ́mbaan sɔ́gɔ́ ugálaná manamanyá má megélídié asiá mɔnd sebúlún gugál gág uguány ká giɔ́b gá beédéb óbógo. 6Belimen bám bá guádáb, diɔ́yɛd ká mmoól gá gúsinúyɔ́l, nnúgálan na megélídié ɔmɔ́ núdiálɛnsáná, ndinúdíyé buanda ubú Gɔdányá seégundíyé saáŋ, ndinúlínsí meliŋítas, ndibusé moóny agá ɔfɛ́n wá Gɔdányá, ta buanda ndinúfúnyifúnyí, mménúdúgún gá giág ány e? 7Digɔ́l bulinsi gá bidɔ́ŋɛ́d bá mebín anɛ, na nselu na timbili: gugélídi gá bidɔ́ŋɛ́d ibiány maál bídiádɔ́gánán, nanyá mɔnd nyá wa gɔlɛns ká enselu ewuné údɔ́ŋɔnɔ́ ta ɔ́g ká timbili ewúné udɔ́ŋɔnɔ́ e? 8Nsɛ́b maál ididɔ́ŋɔ́ saáŋ gá gɛsɛgɛl gá bide, ányá ugagúnúbɛ́dábɔ́n gá ɛnuanuá e? 9Anaány banuá sɔ́n nunyá: Númágála moóny ɔmɔ́ band diɔ́bɔ́nɔ́, nanyá band abaány nyá bágúsɔ́ŋɔ́n ubú nuɔyɔnɔ́ bɔ́ e? Nugagúgála agá gudɔ. 10Megélídié nyɛ giod agá gus, mɔ́mɔ́ gidigid mɔ́guɔ́yɔ moóny ɔmɔ́ band bágálaná mɔ́ ɔ́bɔnɔ́. 11Mmaál ndisɔ́ŋɔ́ná bugélídié ubú mɔnd gálaná gám, mɔnd uwaány nyɛ eŋenyi, yaŋuá sɔ́n inyɛ anyɛ eŋenyi agág góbusió. 12Anaány banuá sɔ́n nunyá: Anyɛ́ nubílénené manda giod ɔmɔ́ Ɛsámb yá Mefúny éŋené, ánuambá mɔ́ gudúmbídenyi. Buanda búmoom nyɛ ká, manda amaány ɔmɔ́ nuambaná dúgúne beédéb ká bágɔ́nɛ́n agá guádáb. 13Buád buanda, mɔnd úgálaná manamanyá má megélídié biananá ká úbísógólonyi ká úbia bugaga bá gúbúlúne buanda ubú wɔyɔnɔ ká band ɔ́bɔɔ́n. 14Gágual ká gigúl ɛgɛ́ mbísógólonyó na manamanyá má megélídié, ɔdɛm wám gúbísógólonyi, nsiŋi yám gɔg dɛguála buól.
15Ány gɔg yaál nanyá e? Ngobísógólonyi na ɔdɛm wám, yond mbísógólonyi na nsiŋi yám. Ngɔdɔ́ŋɔ́ sɔ́n ɛsag na ɔdɛm wám yond ndɔ́ŋɔ sɔ́n ɛsag na nsiŋi yám. 16Búnyɛ́ ká, gɛsɛgɛl ɛgɛ́ éŋené Gɔdányá giod gá bese na ɔdɛm wɔ́w, band bányá gadágadá wanɔ diɔ́bɔɔ́n, nanyá bɔ́gɔgúnuɔ́yɛd ká: «Anaány» Gɔ́w gá mbísógóli yá guéŋin giod gá bese, bámaál bɔ́diɔ́bɔɔ́n buanda ubú ɔ́mɔ́nuɔ́yɔ́ e? 17Ta mbísógól yɔ́w bá bese anɛ giág, idigaguál ká bóbógo agá guádáb. 18Nguéŋen Gɔdányá giod gá bese anɛ ngálaná manamanyá má gugál agá edény ɔwɔ́ Ɛsámb yá Mefúny ámfánaná gunúdɔ́mb banuá gidigid. 19Ta bubá anaány, gigúl beédéb ménulumén, bunyɛ bese ká ngálɛ́d moóny mátaán ɔmɔ́ band ɔ́bɔnɔ́ ká mfúnyifunyi bɔ́ na mɔ́, gɔdɔ́mb ká ngálɛ́d moóny dɔns duát na manamanyá má gugál band diálɛnsáná.
20Belimen nudibianán mbɛ́dágɛ́dɛ́n anɛ sá bábayɔ; ánubá bábayɔ agá giáy gɛlɛ́ŋaná guala bɛfal. Ánubá gɔ́g bágɔ́nágɔn agán gá ɛmbɛ́dágɛ́dɛn. 21Anaány búnyá buɔ́ŋɔ́n agá bisele ká: Ɔgúnɔ́ guɔ́yɔ ká: Ugaal nɛnama nɛ́nyá ká, band bá Ísalayɛ́l ɔ́b ubú wɔyɔnɔ́ bɔ́ agá niíd ná benyi, ugagála gɔ́b na gugál gá benyi, ta anaány, bɔ́digɔbídɔ́lɛ́gɛn wɔ́. 22Kányɛ gúnyá ká, gugála manamanyá má gugál ɔmɔ́ band diálɛnsáná nyɛ bulinsi ubú Gɔdányá díyenyé ebe bányá bɛndiádábá saá beédéb. Gá ebe bágálaná agá ɔfɛ́n wá Gɔdányá, gugála agá ɔfɛ́n wá Gɔdányá uguány nyɛ bulinsi góbusió bá ebe bádábaná, saá gá bɛndiádábá. 23Búmánɛ́g ká giɔ́b gá beédéb sabɛ́gɔ́sa, buúl ká banuá bem nugúgála manamanyá má megélídié, bɛndiádábá ta ɔ́g ká band bádiálɛ́nsáná manda amaány másiám kɔ́, bɔ́digɔgúnúgɔ́l anyɛ bɔduɔ́duɔ e? 24Búmoól ká banuá bem nugúbuse moóny agá ɔfɛ́n wá Gɔdányá, gindiádábá ta ɔ́g ká mɔnd udiálɛnsáná manda amaány másiám kɔ́, úmédénd wɔ́b moóny amaány, ugagúbián ká unyɛ afal. Moóny ɔmɔ́ umɔ́nuɔ́b gegúbísíd wɔ́ agá ɔdɛm. 25Niɔs nínyá agág gá ɔdɛm gagúdambɔg; ugúns enú egegus, úgúmenyi Gɔdányá, wɔyɔ ká Gɔdányá nyɛ meliŋítas agán gá gadágadá.
Gibueŋidie dɛ́bá agá manda má Gɔdányá
26Belimen, diál nanyá gɔg e? Gɛsɛgɛl nusaágubɛ́gɔ́sɛ́gan, mɔnd omoom agán gá ɔlɔŋ nyɛ wɔgudɔ́ŋɛ́d asag, ondodió fúnyifunyi band, sɔ́gɔ́ ondodió buse moóny agá ɔfɛ́n wá Gɔdányá, sɔ́gɔ́ ondodi gála manamanyá má gugál ɔmɔ́ band diálɛnsáná, omodió búlunén band gú. Manda amaány gúbianan ká médúgúne beédéb ká bóbógo agá guádáb. 27Búmoófoón ká band gála manamanyá má gugál ɔmɔ́ band diálɛnsáná, nsɛ́ band bándɛ, ɔ́gɔ ká bádadɔ gálagal, omoom omoómó, mɔnd búlúnén band gugál uguány. 28Mɔnd wegubúlúne gugál uguány maál udɛbá, nsɛ́ abaány lúŋ uguány agá giɔ́b gá beédéb. Nsɛ́ úgála gá Gɔdányá, na agág gá ɔdɛm. 29Gá giáy gɛ́lɛ́ŋaná gubuse moóny agá ɔfɛ́n wá Gɔdányá, nsɛ́ band bándɛ ta ɔ́gɔ ká bádadɔ gɔ́l gugál, bɔsɔ́gɔ́ bóndodi bɛ́dɔ́lɛ́gɔɔn bese ká baán ɔ́gɔ gúnyɛ́ meliŋítas ta ɔ́gɔ ká gɛsɔbɔ. 30Búmánɛ́g ká mɔnd nyɛ ány uwɔ́ Gɔdányá ménúdiyé wɔ́ buanda kɔ́ na kɔ́, nsɛ́ sɔ́gɔ́ ugálaná lúŋ. 31Bánuá gidigid nunyɛ bégúbuse moóny agá ɔfɛ́n wá Gɔdányá omoom omoómó ká sig mɔnd a fɔ́nɔfɔn wónd ubiá makányá. 32Bubús digúbianán ká búmányɛ́ganɛn ibús, 33gágual ká Gɔdányá dɛ́bá Gɔdányá wa gibueŋidie; unyɛ Gɔdányá wa bumbén. Nugúbianan ká nuála anyɛ́ biɔ́b bá beédéb gidigid álaná, 34gigúl béménulumén, bagánd gúbianan ká bélúŋ, bɔ́dɛ́gɔ́l gugál. Bágúbianan ká bábá bebísélény gɔɔ́gɔ́ anɛ́ bisele ɔ́yɔnɔ́. 35Bámamba guófún buanda, nsɛ́ bófoón gá bánɛm bɔ́b agá nuyá. Búdɛ́bá bese ká agánd gɔ́l gugál agá giɔ́b gá beédéb. 36Gugál gá Gɔdányá móolín aganuá e? Ta ɔ́g ká, bánuá béŋényé numɔ́ɔb gú e? 37Mɔnd mábɛ́dágá ká unyɛ na bugaga bá Ɛsámb yá Mefúny, ɔ́g ká unyɛ ibús, nsɛ́ úlɛ́ns ká, ubú nnuɔ́ŋɔnɔ́ ebue nyɛ gisele gá Ɔgúnɔ́. 38Úmeén gubídɔ́lɛ́gɛn ubú yɔ́ŋɔnɔ́, Ɔgúnɔ́ sɔ́n digɔbɛ́dɔ́lɛ́gɛn mɔnd uwaány. 39Belimen, búnyá, ánuág ɔdɛm gá gúbuse moóny agá ɔfɛ́n wá Gɔdányá; nudilege band ká bágála manamanyá má megélídié ɔmɔ́ band diálɛnsáná. 40Manda amaány gúbianan ká mábiála anɛ́ buófonó, saá agá gibueŋidie.
လက္ရွိေရြးခ်ယ္ထားမွု
1 Kɔlɛntiɛ́ŋ 14: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ