1 Kɔlɛntiɛ́ŋ 15
15
Guanyɔg gá Kilíse agá ebeguén
1Belimen, nɛ́nuán, ngúnúbídégesenyi Ndág ya Nsɔ́m iyɛ́ iméenúdúmbínyí, unuagɛ́ndɛ́gɛn, unuond unuabɛgɔ́dɛ́n yɛ́ bese na bese. 2Ndág ya Nsɔ́m iyaány Gɔdányá gonúnúsódi na yɛ́, númábɛ́dɛ́gɛn yɛ́ bese na bese agán gá meéne gɔɔ́gɔ́ anɛ́ iméenúdúmbínyí yɛ́, kand nɔ́, nuguádában gá gilé gilé. 3Buanda bóbusió ubú iméenúdúmbínyí nyɛ Ndág ya Nsɔ́m iyaány, iyɛ́ yaŋuá muát imáabiá. Iguɔ́yɔ ká: Kilíse megú góbusió bá bɛfal bás gɔɔ́gɔ anɛ́ inyɔ́ŋ ɔ́yɔnɔ́. 4Obónyo wɔ́ agá gɛbɛl, uwanyɔg aga ebeguén buɔ́s bá gádadɔ, gɔɔ́gɔ anɛ́ inyɔ́ŋ ɔ́yɔnɔ́ sɔ́n. 5Uwámɛ́n Piéle, agá gélem ány, uwámɛ́n bedúméb bá bát na bándɛ. 6Agá gélem ány, beédéb buanda bá dɔgɔn dútaán abaán wɔ́ gɛsɛgɛl táŋ gímoom, bóndodió saman guguénen, giod mányɛ gídígu. 7Agá gélem ány, uwámɛ́n Sáka, uwond uwámɛ́n bedúmeb gidigid. 8Gá gúsúgúdenyi, uwaŋámɛ́n yaŋuá uwɔ́ béméefémí. 9Gágual ká inyɛ edúmeb wá kand mfí aga bedúmeb, yaŋuá uwɔ́ ndiásɛ́gɛ́mánáná ká bámbílaan ká edúmeb góbusió ká mmegényigényí beédéb. 10Gɔdányá égundíye bese waga ká wúŋíyi ubú inyá. Bese waga uwaány dɛbá gilé gám, ngual buól giod gɔdɔ́mb bɔsɔ́g bedúmeb. Búnyɛ́ nɔ́ ká, saá yaŋuá muát inyá guala buól ubuány anaány, bese wá Gɔdányá uwú únyá gundíye, unyá agamia walaná buól anaány. 11Ta mbá yaŋuá, ta bedúmeb bómodi, búnyɛ́ Ndág ya Nsɔ́m didúmbenyé, iyɛ́ yád numáadáb.
Guanyɔg gá ebeguén
12Dímédúmbenyi gɔg ká Kilíse mányɔ́g aga ebeguén, nanyá gɔg gɛdám gá band agán gá gadágadá nyá bɔ́guɔyɔ ká ebeguén diganyɔgan e? 13Búmábá nɔ́ ká ebeguén diganyɔg, Kilíse sɔ́n dimanyɔg aga ebeguén. 14Kilíse mábá gɔg ká udimanyɔg aga ebeguén, ubú dinúdúmbenyinyé nyɛ gilé, guádáb gán sɔ́n gilé. 15Búmábá anaány, Diguɔ́yɔ bɛsɔbɔ gá ubú búlɛ́ŋaná Gɔdányá gágual ká diguɔ́yɔɔn band ká Gɔdányá menyúgí Kilíse aga ebeguén, búbú é udimenyugi wɔ́. Band máabá ká bádiganyɔgaan aga ebeguén, anaány gúnyá ká Gɔdányá uwɔ́, udimenyugi Kilíse. 16Band mábá ká bádiganyɔgaan aga ebeguén, Kilíse sɔ́n udimanyɔg aga ebeguén. 17Búmábá gɔg ká Kilíse dɛmanyɔg aga ebeguén, guádáb gán nyɛ gɔdɔ, numányɛ agán gá bɛfal. 18Igiány gigúl ta ebe béméeguénén bádábaan Kilíse, bányɛ́ benyímén. 19Ɔ́gɔ dimondí ɛdɛm saás aga Kilíse gá gusɔ́d gá gus egue gusúg, dinyɛ ebe bányá gɔsɔ́g gɔsɔ́ga gɔdɔ́mb band gidigid.
20Búnyɛ gɔg meliŋítas ká Kilíse makɛ́n guányɔg aga ebeguén. Ubuédíye ká, ebeguén ganyɔgaan sɔ́n. 21Nigú móol egegus aga mɔnd omoom, anaány sɔ́n mɔnd omoom méefuún nŋili ká band ányɔgaan aga ebeguén. 22Band gidigid guúlenin agá nɔgɔgɔ ná Ádama, buád buanda béguénené anɛ uwɔ́. Anaány sɔ́n ebe bem bádábaná Kilíse, ganúdáŋáb gusɔ́d, 23na mɔɔ́ná uganyɔg gá ebeguén gá igág gɛsɛgɛl: Kilíse wobusió. Unuál úmosiondo, ebe bányá bág bád guanyɔgaan. 24Agá gélem ány, gúman gá gus ád gusiám, Kilíse fúfi biád bá biliíndié bíbiananá bugaga biónd bɛ́dɛ́mányɛ́ganɛn, úgɔ́l gɔg bufuŋ bág wóndinyi Gɔdányá Sié waga. 25Gágual ká Kilíse gúbianan ká úbá ofuŋ guám agá gɛsɛgɛl ɛgɛ́ Gɔdányá ganúdiá bambɛ́lɛmbɛ́l bág gidigid. 26Ɔmbɛ́lɛmbɛ́l wá gusúgúdenyi uwɔ́ Gɔdányá ganúdiá unyá nigú. 27Gágual ká: «Gɔdányá águág buanda gidigid gúsigúsié wa bɛgɔnd bág.» Anɛ́ Kilíse gɔnuɔ́yɛd gɔg ká: Nɛ́nuán, buand gidigid nyɛ agám gá gubia, anaány gúnyá ká: Gidigid, asiá Gɔdányá. 28Anyɛ́ Kilíse Mɔɔn waga ganúbia bugaga gá buanda gidigid, igiány gigúl, uwɔ́ muát ugenúbiéŋin aga Gɔdányá. Ɔwɔ́ Gɔdányá uméeŋín Kilíse waád buanda gidigid, ká Gɔdányá bá ofuŋ gá buanda gidigid.
29Band bómodi gúbíduenen agá ɛfɛ́n sá ebeguén. Gidúgúne gínúm báganúbia gá bú e? Giág bébíduenené gobusió bá ebeguén gúmábá ká, agá meliŋítas ebeguén dɛganyɔgan e? 30Góbusió bá giág basuá muát dɛbɛ́sɛ́nsɛganá agá muyú bigúl gidigid e? 31Belimen, sig buɔ́siɔ́ nigú nyɛ egúy nam. Búnyɛ́ sɔ́n meliŋítas ká, ngúnuɔ́bɔnɛn bese anɛ́ núnyá baladán na Ɔgúnɔ́ wasɔ Yésu Kilíse. 32Aya Efɛ́s, imanuánán bidul na manyam má ɛyɔ́m. Ímábá ká nɛɛ́m nám mábá gɔɔ́gɔ ná gus egue gusúg, giág ndáŋábaná gá bidul ibiány e? Búmábá meliŋítas ká ebeguén dɛguányɔgan, nsɛ́ diál anɛ́ búnyá buɔ́ŋɔ́n agá mbɔbɔnɔ ká: Nsí dínyánan, dibúwánan gágual ká nŋɔ́guɔ́ digegú. 33Nudibínéŋ banuá muát: Ɔŋɛnd na band bányá na biád bá bielínyélínyé gúdɔ́maan mɔnd ká wála bɔbɛ. 34Ónubídómón, nútɛɛ́n bɛfal! Gágual ká, gɛdam agán gá ɔlɔŋ dɛgɔ́lɛnsan Gɔdányá púm púm. Nguɔ́yɔ nɔ́ gágual ká búnyɛ buanda bá ɔduɔ́ gɔ́nɔ́ gán góbusió.
Nuɔ́l únú dɛ́ganúbianan anɛ́ dɛ́ganuányɔg aga ebeguén
35Ala mɔnd nyɛ wógúbiófún ká, band ganyɔgaan aga ebeguén nanyá e? Na duɔ́l dúnúm e? 36Unyɛ giál umóbiófún anaány! Gigúl agɔ́naná ombu, úguákɛnaan guyɛk, úbád guág ɔmiɔ.
37Ombu uwɔ́ agɔ́naná egegus, ta úbá ámbasa, ta ɔ́g ká buanda búndodi, ansamɔ agɔ́naná gusúg saá gɛdɛɛ́d ta ɔ́g ká gidínidín. 38Agá gélem ány, Gɔdányá ád gugumenyi wɔ́ anɛ́ ubílénené, wond wéŋin sig ansamɔ nág nɛnama ná gɛdɛɛ́d ta ɔ́g ká ná gidínidín. 39Duɔ́l dá manda mélúmené dúdɛgúbɛ́fuáganan. Guádɔ́gan nyɛ kɔ́ na duɔ́l dá band na dá manyam, na duɔ́l dá munoni na dá muɔbɔ. 40Manda nyɛ́ sɔ́n kɔ́ mányá muana na egegus. Bunɔ́g bá manda mányá muana nyɛ́ saáŋal na bunɔ́g bá manda mányá egegus. 41Bunɔg bá ɔɔny dɛbá anɛ bá oól, ánd sɔ́n, bunɔ́g bɔ́b dɛbá anɛ bá muódód. Bunɔ́g bá sig yoódód nyɛ saáŋal na bunɔ́g bá muódód múndodi.
42Anaány búganúbá gá guanyɔg gá ebeguén. Gigúl bómónúnyó nuɔ́l, núgúyɛka; númányɔg agá ebeguén, núdɛgand guyɛk ta buɔ́s. 43Gigúl bómónúnyó nuɔ́l, núdɛ́bá na mfí ta na bugaga, anyɛ́ núganuányɔg aga ebeguén, nugabá nufuógón na magɛ́nda, na nugúm. 44Gigúl bónyonɔnó nú, núnyɛ nuɔ́l ná biko na manɔŋ; gigúl númánuanyɔg aga ebeguén, Ɛsámb yá Mefúny éŋin nú gusɔ́d. Nuɔ́l núnyá na biko na manɔŋ nyɛ́ kɔ́, anaány sɔ́n nuɔ́l núdáŋábaná gusɔ́d gá Ɛsamb ya Mefúny nyá kɔ́. 45Anaány búnyá buɔ́ŋɔ́n ká: Ádama, mɔnd wobúsió Gɔdányá méeŋín wɔ́ gusɔ́d. Ádama wegúsúgúdenyi agá Ɛsamb yá Mefúny guéŋen band gusɔ́d. 46Búdɛ́bá nuɔ́l unú Ɛsamb yá Mefúny éŋene nunyá nóbusió. Nuɔ́l ná biko na manɔŋ núnyá núbúsío, unú Ɛsamb yá Mefúny éŋené súgúdenyi. 47Gɔdányá malɔ́ŋ mɔnd wobusió na nsan. Mɔnd uwaány guúlenin egegus, mɔnd wagandiá uwɔ́, wúlenin muana. 48Ebe bólonino egegus gubɛ́fuáganan mɔnd uwɔ́ bámáalɔŋá wɔ́ na nsan. Ebe bányá bá muana gubɛ́fuáganan ewe umóolín muana. 49Dɛmabɛ́fuág gisiósio mɔnd uwɔ́ bámáalɔ́ŋ na nsan, basuá sɔ́n digelemb gubɛ́fuág mɔnd umóolín muana.
50Belimen, ngúnuɔ́yɔn ká, mɔnd wa imeku na manɔŋ dibá bɔ́gúgɔ́l niaf agá bufuŋ bá Gɔdányá. Nɔnɔ́ sɔ́n, buanda buyɛ́kaná dɛbá bɔ́gúgɔ́l niaf agá gusɔ́d gá kand nɛmanɛ́ná. 51Nnúlínsí niɔs: Basuá gidigid didigegú, anaány basuá gidigid gɔg duɔ́l dás genúnúgi. 52Búgabɛ́dɔ́mb fiaŋ anɛ igeny geny, gigúl nsɛb gɔnúdɔ́ŋɛ́d buɔ́s bégúsúgúdenyi. Anɛ́ igɔnúdɔ́ŋɛ́d, ebeguén ganyɔgaan ká bádáŋáb gusɔ́d gá kandɛ nɛmanɛ́ná, basuá sɔ́n dɛganɔbá dɛmaányɛ bɔgɔ́s, duɔ́l duas genúgi. 53Gaguál ká, ubú búyɛ́kaná gúbianan ká búbínúgí na buanda búdiayɛ́káná; ubúguénené gúbianan ká búbínúgi na ubúdiéguénéné. 54Gigúl ɛgɛ́ buanda búyɛ́kaná genúnúgi gá guɛ́y buanda búdiáyɛ́gána, na ká ubú búguénené núgi, buɛ́y buanda búdiéguénéné. Gugál egue gúnyá guɔ́ŋɔ́n agá ɛmbɔbɔnɔ gobífuógidonyi. Gúguɔ́yɔ ká: Guyág méségínyí nigú, nɛ́dɛ́gábá andɔ! 55Nigú, guyág gɔ́w nyɛ naány e? Nigú, bugaga bɔ́w bɔ́guɔ́nɔnɛn nyɛ naány e? 56Nigú gúgɔ́lɔɔn bugaga bɔ́guɔ́n agá gɛfal, gɛfal gɔ́lɔɔn bugaga bág agá gisele. 57Diguéŋen Gɔdányá giod gá bese anyɛ́ umáadɔ́mbɛ́n aga Ɔgúnɔ́ wasɔ Yésu Kilíse ká basuá dɛ́yág nigú! 58Belimen bám bá ɛlɛ́ga, ánubɛ́nɔ́m mbá ná gubɛ́láma nuond núbá balɔ́ndan, nuguman agá buol bá Ɔgúnɔ́, nɔlɛnsan ká muyú ɔmɔ́ núgɔ́lɔnɔ́, nudɛgaám ɛmbɔ́g gɔdɔ agá Ɔgúnɔ́.
လက္ရွိေရြးခ်ယ္ထားမွု
1 Kɔlɛntiɛ́ŋ 15: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ