1 Kɔlɛntiɛ́ŋ 12
12
Bugaga ubú Ɛsámb ya Mefúny éŋené band ká bála manda
1Belimen, nsɛ́ dɛɛ́b nɛ́nuán agá manda ɔmɔ́ Ɛsámb yá Mefúny éŋené. Ndigúbíléne ká núnɔ́mɔnɔm meliŋítas gá buóny ubuány. 2Nugúlɛnsaan ká, anɛ́ nunyá gubá numányɛ bɛndiádábá, númabɛ́tɛ́n ká bagɔdányá bá gus bádiágáláná, bɔ́núbɛ́gɔ́gɔɔn. 3Buád buanda yambaná gunúlínsi ká: Mɔnd mágálá na gidúgune gá Ɛsámb yá Mefúny, udɛbá bɔ́guɔyɛd ká: «Nsí nnyɔmɔ bá na Yésu», ta mɔnd udɛbá bɔ́guɔyɛd ká: «Yésu nyɛ Ɔgúnɔ́», Ɛsámb yá Mefúny máal ɛ́dɛ́bá naga. 4Ɛsámb yá Méfúny nyɛ ímoom, íguéŋen gɔg buanda bágual anama anama. 5Ɔgúnɔ́ nyɛ omoom, masɔ́m gɔg ɔmɔ́ Ɔgúnɔ́ éŋené band ká bála nyɛ anama anama sɔ́n. 6Nŋili ɛsɛ́ band álaná buól nyɛ́ anama anama, Gɔdányá wád omoom wéŋene band bugaga. 7Mɔnd gidigid gúdáŋába buanda bágual ká údíye bugaga bá Ɛsámb yá Mefúny gá bese wá basuá bem. 8Aga ewe mɔnd, Ɛsámb yá Mefúny iyaány éŋin wɔ́ nsiŋi yá gugál, aga ewúné, ídámbɔnaan wɔ́ manda yónd yéŋin wɔ́ bugaga bɔ́guɔyɔ mɔ́ taás taás. 9Aga mɔnd ondodi, Ɛsámb yá Mefúny yaád ímoóm gúníni wɔ́ agá guádáb, aga sɔ́gɔ́ ondodi, yéŋin wɔ́ bugaga bá guéŋúgenyi band; 10Íguéŋen sɔ́gɔ́ ondodi sɔ́n bugaga báguala bisey, aga ondodi sɔ́n, yéŋin wɔ́ bugaga bágúgála agá ɔfɛ́n wá Gɔdányá. Agá sɔ́gɔ́ ondodi, yéŋin wɔ́ bugaga bágúlɛns buanda búleniné agá biád bá biliíndié, na buanda búleniné agá Ɛsámb yá Mefúny, aga sɔ́gɔ́ ondodi sɔ́n, yéŋin wɔ́ bugaga bágúgála megélídié ɔmɔ́ bámányá bádɛ́fɔ́nɔfɔ́n tá ɔ́gɔ ká ubú bádiásɔ́ŋɔ́náná, agá sɔ́gɔ́ ondodi sɔ́n, yéŋin wɔ́ bugaga bá guanɔnan bɔ́sɔ́gɔ bóndodi gugal uguány. 11Ɛsámb yá Mefúny iyaány íyɛ́ eŋényé yálaná manda amaány gidigid. Íguéŋen mɔnd gidigid bág buanda saáŋál gɔɔ́gɔ anɛ́ íbílénené.
Giɔ́b gá beédéb bá Gɔdányá nyɛ́ anɛ nuɔ́l ná mɔnd
12Digúlɛnsaan ká nuɔ́l ná mɔnd nyɛ táŋ númoom, núbianan maláŋ giod. Ta anɛ́ maláŋ amaány nyá giod, mányɛ gɔɔ́gɔ agá nuɔ́l númoom. Anaány Kilíse nyá sɔ́n. 13Agá gɛsɛgɛl ɛgɛ́ diméebíduú, basuá bem idiond nuɔ́l númoom. Ɛsámb yá Mefúny íyɛ́ eŋenyé ímáalá buanda ubuány gidigid. Basuá bem, ta Beyúdɛn, ta ebe bádiábá Beyúdɛn, ta biɔ́l, ta ebe bádiábá biɔ́l, Ɛsámb yá Mefúny yád iyaány dɛmáabiá, idiabúwá yɛ́.
14Nuɔ́l dɛ́bá na buláŋ búmoom gusúg, núnyɛ́ na maláŋ giod. 15Gigɔnd mɔ́yɛd ká: «Ndɛbá ɔ́mbɔ́g buád buanda ndiábá buláŋ bá nuɔ́l», búdiguámba guɔyɛd ká gídigand gubá buláŋ bá nuɔ́l. 16Ta odú ɔ́yɛd ká: «Ndɛbá niís buád buanda ndiábá buláŋ bá nuɔ́l», búdiguámba guɔyɛd ká nídigand gubá buláŋ bá nuɔ́l. 17Nuɔ́l mábá núnɔ́ gidigid niís, band ála nanyá ká bɔ́bɔɔn e? Númábá núnɔ́ gidigid odú, band ála nanyá ká bɔ́bɔɔn ɔlɔ́f e? 18Agá meliŋítas, Gɔdányá malɔŋá nuɔ́l, uwaágaan maláŋ anɛ́ uméebílén. 19Nuɔ́l gidigid bá buláŋ búmoom gési núdɛ́bá ɔfɛ́n ká nuɔ́l.
20Kánɛ gɔ́g maláŋ nyá giod agá nuɔ́l númoom. 21Niís dɛbá bágual gá ɔmbɔ́g ká: «Ndɛbá gɔ́w», ta ɔduɔ́ údɛ́bá bágual gá bɛgɔnd ká: «Ndɛbá gán.» 22Búdɛ́bá bágúbiál nɔ́, maláŋ má nuɔ́l málɛ́ŋanɛná alaá mádɛ́bá na magɛ́nda, mɔ́mɔ́ eé mégúdúgúne, 23eme málɛ́ŋanɛná kand mfí, mɔ́mɔ́ diéŋené mɔ́ mfí giod. Mádiálɛ́ŋánɛ́ná, mɔ́mɔ́ digɔ́lɔnɔ́ gɛsɛgɛl na mɔ́ ta bɔ́guɔyɔ, 24eme málɛ́ŋanɛná, diguófoon ká dígɔ́lɔɔn gɛsɛgɛl na mɔ́. Ta anaány, Gɔdányá máal nuɔ́l uwéŋin mfí giod gá maláŋ má kand mfí, 25umáal anaány gágual ká, maláŋ má nuɔ́l ná mɔnd dɛnuánán mɔ́mɔ́ na mɔ́mɔ́, na sɔ́n ká, maláŋ gidigid dúgúnenin mɔ́mɔ́ na mɔ́mɔ́. 26Buláŋ bá nuɔ́l búmoom mɔ́bɛ́gɔɔn, maláŋ mómodió gidigid guɔ́bɛ́gɔn, búmábá gɔg ká digúgúmenyi bulaŋ búndodió agá nuɔ́l, na buláŋ ubuány na bɔsɔ́g maláŋ gidigid gúyayaba ɔlɔŋ. 27Banuá gɔg, nunyɛ nuɔ́l ná Kilíse, mɔnd gidigid nyɛ buláŋ bá nuɔ́l unuány. 28Gɔdányá medényígenenyí band anama anama agá giɔ́b gá beédéb, bóbusió bányá bedúmeb, báládaná mubús, band béfúnyifunyé ládaan, ebe bálaná bisey ládaan; agá gélem gá abaány, band béŋúgenyé band bánɔ́mana; band bédúgúnené bɔsɔ́gɔ́ na ebe béndenyé bɔsɔ́gɔ́ sɛládaán, gá guamaná, band bágálaná manamanyá má megélídié band diálɛnsáná. 29Bem nyɛ bedúmeb e? Bem nyɛ mubús e? Bem gúfúnyifunyi e? Bem guála bisey e? 30Bem nyɛ na bugaga béguéŋúgenyi e? Bem bágálaná manamanyá má megélídié band diálɛ́nsáná e? Ta ɔ́gɔ ká bem bébúlúnené manamanyá má megélídié e? 31Ánuakɛ́n guambɛd ká Ɛsámb yá Mefúny nuéŋin ubú búnyá budaámb. Ínúdíye nɛ́nuán nŋili idɔ́mbaná buanda gidigid.
လက္ရွိေရြးခ်ယ္ထားမွု
1 Kɔlɛntiɛ́ŋ 12: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ