1 Kɔlɛntiɛ́ŋ 11
11
1Énumbígédi anɛ́ yaŋuá mbígédenyé Yésu Kilíse.
Na agánd na anɔ́mandɔ ogóbusió bá Ɔgúnɔ́
2Ngúnúkánya gágual ká nugúmbɛ́dágá, nuond nuládaan manda mem ɔmɔ́ mméenúfúnyifúnyí. 3Nguámba gɔg ká nulɛ́ns ká, Kilíse nyɛ ɔduɔ́ wá anɔ́mandɔ gidigid, anɔ́mandɔ ɔduɔ́ wá agánd, Gɔdányá ɔduɔ́ wá Kilíse. 4Anɔ́mandɔ gidigid ubísógólonyó ɔ́gɔ ká udúmbenyé nsɔ́m yíleniné aga Gɔdányá ɔduɔ́ efúgén gúsɛ́gɛ́na sɔ́gɔ́ unyá ɔduɔ́ wág. 5Agánd móbísógólonyi ɔ́g ká ugúdúmbenyi nsɔ́m yíleniné agá Gɔdányá kand giéns gá gɛla agá ɔduɔ́, ugúsɛ́gɛ́na sɔ́gɔ́ unyá ɔduɔ́ wág, gágual ká unyɛ́ anɛ usabɛ́muanan. 6Agánd másáŋɔ́n gufúg ɔduɔ́ wág, nsɛ́ ubɛ́mua! Búmábá ɔduɔ́ gɔnɔ́ gɔg ká agánd bɛ́mua, tá ɔ́g ká úbɛ́sɔ́mb iŋíde ság, ugúbianan gɔg ká úfúg ɔduɔ́ wág! 7Anɔ́mandɔ dɛgúbianan ká úfúg ɔduɔ́ wág gágual ká unyɛ mfuóny, ɔwɔ́ sɔ́n nugúm ná Gɔdányá; agánd, ɔwɔ́ unyɛ nugúm ná anɔ́mandɔ. 8Gágual ká Gɔdányá dɛmɔgɔ́l buanda agá nuɔ́l ná agánd ká úlɔ́ŋ anɔ́mandɔ na bú, umɔgɔ́l gɔ́g buanda agá nuɔ́l ná anɔ́mandɔ ká úlɔ́ŋ agánd ná bú. 9Gɔdányá dɛmalɔŋ anɔ́mandɔ góbusió bá agánd, umalɔ́ŋ agánd góbusió bá anɔ́mandɔ.
10Buád buanda agánd biananá ká úfúge ɔduɔ́ wág ogóbusió bá ɛngɛlɛs sá Gɔdányá ká údíye buanda Gɔdányá méedényígényí. 11Basuá dinyá agá nɛlad na Ɔgúnɔ́, agánd dɛ́bá buanda kand anɔ́mandɔ, anɔ́mandɔ dɛbá sɔ́n buanda kand agánd. 12Gágual ká ɔ́gɔ Gɔdányá mɔgɔ́l buanda agá nuɔ́l ná anɔ́mandɔ ká úlɔ́ŋ agánd ná bú, agánd ubiénené sɔ́n anɔ́mandɔ. Buanda gidigid guúlenin aga Gɔdányá. 13Banuá muát ánuanɔ́ná bú ká nuán ɔ́gɔ búnyɛ́ bese ká agánd bisógólonyi Gɔdányá ɔduɔ́ kand gufúge. 14Dɛ́málɛ́ŋa edény uwɔ́ Gɔdányá máalá manda, búnyɛ́ ɔduɔ́ gɔ́nɔ́ ká anɔ́mandɔ bá na iŋíde guya. 15Agánd mábianan iŋíde guya, búnyɛ́ nugúm nág. Gágual ká, Gɔdányá méeŋín wɔ́ iŋíde guyá ká sífúge ɔduɔ́ wág anyɛ giéns gá gɛla. 16Mɔnd mébíléne sɔ́n nsuŋie gá buóny ubuány, nsɛ́ úlɛ́ns ká, nasɔ na biɔ́b bá beédéb bá Gɔdányá, anaány dialaná.
Manyán má Ɔgúnɔ́
17Anyɛ́ ubuány mánɔ́maná, buóny ndiánɔ́kányáná gá bɔ́ nyɛ ká, bilumen bán ɛbɛ́ nuálaná dɛguála ká nuóbógo, bígúnuóndonyi na gélem. 18Buanda bá busió bɔ́ŋɔyɔnɔ́ nyɛ ká, gigúl nualaná bilumen, dusalasala guánɛ́gaan agán gá gadágadá, búgúlɛ́ŋanɛn anɛ búnyɛ́ meliŋítas. 19Búguófoon muát ká dusalasala bá agán gá gadágadá, ká ebe bányá meliŋítas na nuládád ánɛ́g. 20Gigúl núlumenené, saá manyán má Ɔgúnɔ́ núnyánaná. 21Gágual ká anɛ́ númánúbanyɛ́g gunyánan, na mɔɔ́ná ugúgagad gagad gá guɔ́gɔ́l manyán mág má bɛ́muát, nɛnama nɛ́nyá ká, nsana nɔ́má ewe aya, ewúné guénen magɛ́b éné. 22Nudɛbá na bians bágual ká núnyánan nuónd nufuánan kɔ́ e? Búnyɛ́ anyɛ, nugúsɛ́gɛ́na giɔ́b gá beédéb bá Gɔdányá, nuond nuamba guéŋéen ebe bádiábá na buanda ɔduɔ́ gɔnɔ́ e? Yɔ́yɛd ká giág e? Nnúkánya e? Ágó, ndɛbá bágúnúkányɛd agá edény uwaány! 23Gufúnyifunyi ugú Ɔgúnɔ́ máamfá iyenúdúmbínyi guɔ́yɔ ká: Ɔgúnɔ́ Yésu, budug bámáandɛ́n wɔ́ ɛdɔg, uwɔgɔ́l gɛnyɔka, 24umáal úméŋin Gɔdányá giod gá bese, uwaáns gɛ́ uganyɛ ká: «Nuɔ́l nám enue iménuéŋín gán góbusió, nual nuala nɔ́ numbɛ́dága.» 25Nɛnama nímoom umáal na endeŋe anyɛ́ bámáaman gúnyánan, uganyɛ ká: «Endeŋe ewe nyɛ gɛŋɛ́lɛŋɔ́siɔ gá nɛlad agám gá manɔŋ; nual nuala nɔ́ ká númbɛ́dága, gɛsɛgɛl gidigid nuganúbúwánan mɔ́.» 26Gigúl gidigid gɔg nunyánaná gɛnyɔga egie nuond nubúwánan endeŋe ewe#11.26 Anányɛ guámba guɔyɛd ká gɛsɛgɛl gidigid nuganúbúwá buanda búnyá agá endeŋe ewe., nuguɔ́yɔ nigú ná Ɔgúnɔ́ gutɔ guám anɛ́ ugenuúl. 27Buád buanda mɔnd gidigid unyánaná gɛnyɔga wond ubúwánan endeŋe wá Ɔgúnɔ́ anyɛ́ búdiófónó, mɔnd uwaány nyɛ na gɛgua, anaány gúnyá ká ugúsɛ́gɛ́nan nuɔ́l na manɔŋ má Ɔgúnɔ́. 28Nsí gɔ́g mɔnd gidigid ál gubiánɔn uganyɛ ká unyá gɛnyɔka wónd úbúwá endeŋe. 29Gágual ká mɔnd gidigid unyánaná gɛnyɔka wond ubúwánan endeŋe kand gugɔ́l nuɔ́l ná Ɔgúnɔ́ giant gá buanda, uguála bɔbɛ, uwɔ́ muát ubígɔ́gɔnɔ́ ilób yá Gɔdányá. 30Buád buanda band giod agán gá gadágadá guananá gunɔ́ma, ebe dibiánan magɛ́nda, bómodió giod saman guguénen. 31Dímábiánɔna basuá muát, Gɔdányá digedígélenyi. 32Ta anaány Ɔgúnɔ́ gúdígélenyi ká údɛ́fá nusésídény ká dɛdɛguá agá gifudie anyɛ band bá gus. 33Belimen, gigúl nulumenené ká núnyánan, énubídényínyí. 34Nsana mánɔ́ma mɔnd, wal gúnyá agagá nɛnama nɛ́nyá ká gɛsɛgɛl nuganúbɛ́gɔ́sɛ́ganan, Gɔdányá dinúgélényí. Moóló móndo, ngadábɔ́na mɔ́ anɛ́ nganúsiám aganuá.
လက္ရွိေရြးခ်ယ္ထားမွု
1 Kɔlɛntiɛ́ŋ 11: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ