Matayo 5
5
Mahinyo yakwe Yesu are he Lubwa
1Yesu areaakho maifyo ya vahe vekakutu he lubwa, naho areazokhodi, vahina kuu vekamlitia. 2Niho ekalholhoshi kuvahinya ekuba.
Mlhamuisho wa kweri
Luka 6:20-23
3“Venelhamuiwa vahuye va swaho, kwaite Udilao waare ana he Kiumbi ni mkini. 4Venelhamuiwa huvo vebenie ulhamuisho, kwaite venelhamuijwa. 5Venelhamuiwa vahe vetaae kwaite venepala idi. 6Venelhamuiwa velo kela na kasu iye kuboi vyo edumu Kiumbi, kwaite venekhuijwa. 7Venelhamuiwa velo mbalamija he vahali, kwaite Kiumbi enevaakhoiya mbalamija. 8Venelhamuiwa velo swaho isilo makusa, kwaite venemuakho Kiumbi. 9Venelhamuiwa vegera nhunguru he vahe, kwaite venesewa vainyi va Kiumbi. 10Venelhamuiwa vekharotijwa kwa mburi ya kuboi cho Kiumbi edumu, kwaite Udilao wakwe Kiumbi ni mkini.” 11“Venelhamuiwa kune vahe vekune muolhu na kumula vigi kaghu na kumukharotija kwa mburi gho. 12Lhamuiwani hawe nakuma gimbe ja mlhamuisho ake kulhamuwa kaghu ni kugiru are ana he Kiumbi. Kwaite nirewato vevaboiie varoto va Kiumbi veelitie mweesinalita.”
Mnaro na luatame
Mariko 9:50; Luka 14:34-35
13“Kune mumnaro wa idi. Mira mnaro ukulahati unaro kuu unesawemo? Teukaye kigi kahali, mira unebibiwe gahana naho vahe veneudaha. 14Kune mu luatame lwa vahe va idi, muang'a ukwauwe ana he lubwa kira muhe eneuakho. 15Neri vahe tevekati kijari na kuchighubika na khore, mira vechike ana he lushagha kalo chivamurikie vakhabuna veaha he minda. 16Wato oto, na kune chidumuwe luatame kaghu lumurike he vahe, kalo vaakho miboire kaghu mikulho, vamkaari Aba kaghu eaha are ana.
Mahinyo kwa mburi ya miku
17“Msieratoti ite nilitie kukaa miku yakwe Kiumbi emuoe Musa na mahinyo ya varoto va Kiumbi. Silitie kuboi to, mira nilitie kujifuruti nyamalo na mahinyo yo veboi. 18Kweri nimubaya, sari ata ana he Kiumbi na idi vikune takho, tehelo neri kabalo kawe hile hodi ha igondo iwe la miku linekaawe sari makhabuna yafuru. 19Kwato muhe enelhi kuliaha miku we heya miku khabuna na kuvahinija vahali vaboi to, ka enekhwa mgitutusha he Udilao wa are ana he Kiumbi. Mira huye eneliaha miku na kuvahinya vahali sato, ka enekhwa mgiru he Udilao waare ana he Kiumbi. 20Kwato namubao, mnezabuu he Udilao waare ana he Kiumbi kai bi miboire kaghu imuagija Kiumbi ikunetakho miboire ya vahinya va miku yakwe Musa hawe na Mafarisayo.”
Mahinyo yakulhiija malhaha
Luka 12:57-59
21“Mwaakoo cho vahe va azeto veebaiwe ite, ‘Usigaa, muhe enegaa, edumuwa azamariwe.’ 22Mira ani nimuba, muhe emsanuiya mbakhu kuu, chidumuwe ezamariwe. Naho enemfwa mbakhu kuu enetiiwe he ibaraza la Vayahudi. Kahali enemse mbakhu kuu ‘Kivile’ chinemye kubuu he mwalha wa bamuza. 23Kwato ukutii kivulu kechi ata he kiringo cha kukeiya kivulu he Minda ya Kiumbi, naho ukahulha ite mukwekwee na mbakhu kechi, 24Ke kivulu kechi sina na ata hakuguiya kivulu, urongeso ureiseko na mbakhu kechi, niho ukirii ugu kivulu kechi.” 25“Mangaiseko na mnkuru kechi mwereaha kwalhi kuso he mahakama. Kai sicho, mnkuru kechi ekunekuotija he hakimu, naka hakimu enekuotija hevaaku naho ari uneorowe he igereza. 26Kweri nikubaya, tukahali neri sari ukhwa waalhanu mawero makhabuna.”
Mahinyo yelhiija udana
27“Mwaako ite vahe veebawe ite, ‘Usidane.’ 28Mira ani namuba, enemuwesia mlage kwa kudumu abodi nau, enekhwa aafiriti kudana nau he swaho kuu. 29Ukuneakho iila kechi la sughano likuboi uboi makusa, ling'ofule urelibibi uda. Ni keba ari kulahati kigi kiwe he msa kechi, kuro msa kechi kubibiwe he mwalha wa bamuza usiga. 30Naho kai muharegha kechi wa sughano ukuboi uboi makusa, ute ureubibi uda. Ni keba kulahati kigi kiwe cha msa kechi kuro kulahati msa kechi mkhabuna kuso he mwalha wa bamuza usiga.”
Magondo ya kuroana
Matayo 19:9; Mariko 10:11-12; Luka 16:18
31“Naho he miku yakwe Musa iba ite, ‘Enemro mlage kuu, chimdumu amgondie magondo ya kumro’. 32Mira ani namubao, kira muagiru enem'o mlage kuu magondo ya kumro, kai sikwa mburi ya kudana, etamboi ka mlage akhwa mzadana, naho muagiru mhali ekumdori ka mlage eoiwe magondo ya kurowe, naka muagiru enekhwa mzadana.”
Mahinyo he mburi ya kuke muo
33“Kahali mwaako ite vahe va azeto vebaiwe ite, ‘Usike muo kechi kwa lame, mira furuti muo ukee hakwe Dilao.’ 34Mira ani nimubao neri muaze muwe musike mio neri, kwa ilhe la are ana he Kiumbi, kwaite ni kikire cha Udilao cha Kiumbi, 35hile msilape kwa ilhe la idi, kwaite ni hodi Kiumbi ekeiya masame, neri Yerusalemu kwaite ni muang'a kuu mgiru wa Kidilao. 36Neri musilape kwa mia kaghu, kwaite temumuru kuboi neri lualhu luwe kukhwa luakhu hile lukuhame. 37Ukuba ‘Ee’, idumuwa ikhwa ‘Ee’, naho ukuba ‘Hai’ idumuwa ikhwa ‘Hai’. Neri kigi kiwe chisaisha ka chili he Shetani.”
Yesu etalhiija mburi ya nkuru
Luka 6:29-30
38Mwaako he miku yakwe Musa heeyoiwe ite, “Muhe ekumhiri m'aro kuu iila, nau enehiriwe iila hile ekumgu m'aro iiki nau eneguwe iiki.” 39Mira ani namuba, “Usihikane na muhe mkusa. Mira kai muhe ekukuma izokhera he iulho kechi la sughano, mkiritie akuma na iulho la hina. 40Kai muhe ekukutii he ibaraza ekudumu kudori nkazu kechi, muro adori na ikoti. 41Kai muhe ekukukungumija kuso naari uuda wa kilomita we, so nau uuda wa kilomita nu. 42Kahali kai muhe ekukulhawa umuo kigi, naho muhe ekudumu kukuambala kigi usimlhiije.”
Kuvadumu vankuru
Luka 6:27-28,32-36
43“Mwaako he miku yakwe Musa heeyowe ite, ‘Mdumu msina kechi, naho msanuie mnkuru kechi.’ 44Mira ani namubao, vadumuni vankuru kaghu naho muvaaresie huvo vemukharoti kune, 45niho mnekhwa vainyi va Aba kaghu eaha are ana. Kwaite u evakatia kaaze kuu vahe vakusa na vakulho, na kuvageria mare vahe vemko na vesimko. 46Ho mneowe kitumurilo mina kwa kuvadumu bi hu vemudumue kune? Tehelo! Kwaite vazadori ushuru navo veraboi wato oto. 47Naho mkuvaholu vabakhu kaghu bi, he, mnekhwa mwaaboi kigi mina kutakho vahali? Kwaite vesimdarisha Kiumbi navo veraboi sato. 48Kwato miboire kaghu ifuru, sahucho Aba kaghu waare ana cho efurue he vigi khabuna.”
လက္ရွိေရြးခ်ယ္ထားမွု
Matayo 5: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.