Matayo 4
4
Yesu etagaliwe
Mariko 1:12,13; Luka 4:1-13
1Saa wa Kiumbi ekamkaeti Yesu kuso he ilangwa kalo aregaliwe ni Shetani. 2Yesu ekafufu miaze mikado mihai chakhakho na naama, neri teae kigi, niho ekako kela. 3Ata Shetani ekamlitiya, ekamba, “Kai ari u Muinyi wakwe Kiumbi yaba ya masaheru yakhwa mikate.” 4Mira Yesu ekamba, “He magondo ya Kiumbi hegondiwe ite, mhe tekazokho kwa kua viaghu bi, mira enezokho he kira kiome chili he Kiumbi.” 5Niho Shetani ekamkaeti Yesu sari Yerusalemu, he muang'a wa Kiumbi ekamboi auma ana he kigango cha minda ya Kiumbi. 6Niho ekamba, “Kai ari u Muinyi wakwe Kiumbi kubibi sari twai di. Kwaite hegondiwe ite,
‘Kiumbi enekusughaya vazasughawa va are ana kuu, navo
Venekusamata he miharegha kini kalo
Usirekuma kusame kechi he isaheru.’ ”
7Yesu ekamkiritia kiome ekamba, “Naho he magondo ya Kiumbi hegondiwe ite,
‘Usimgali Dilao Kiumbi kechi.’ ”
8Kahali Shetani ekamkaeti sari ana he lubwa lugiru, ekam'aija dilao khabuna ja idi na vigi vikhabuna vikulho vya idi, 9ekamba, “Ya vikhabuna ninekuo kai ukunimaia mamuro ilai kunidudukuia na kuniaresi.” 10Niho Yesu ekamba, “Haka ii Shetani. Magondo ya Kiumbi yegondiwe ite,
Unemuaresi Dilao Kiumbi kechi na
Kumboia nyamalo uye salaghe.”
11Niho Shetani ekamro Yesu, naho vazasughawa va are ana he Kiumbi vekalita kumlhaari Yesu.
Yesu etalholhoshi kubirikira are Galilaya
Mariko 1:14,15; Luka 4:14,15
12Yesu areako ite Yohana aorowe he igereza, ekaso Galilaya. 13Ekahali Nazareti, ekaso Kafaranaumu muang'a uaha sina na iziwa lisewa Genesareti ilhe ihali ni iziwa Galilaya he mihake ya idi la Zabuloni na Naftali, ekazokho are, 14kalo hu uroto wakwe Isaya mroto wa Kiumbi ufuru, sakigi ebae, 15“Lahonhani kune vahe va idi la Zabuloni na idi la Naftali nahe madi eaha he kwalhi iso he iziwa mlha wa muharaza wa Yoridani lahonhani kune vahe va Galilaya he idi la vahe vesi Vayahudi, 16ka vahe vezokho he idi lilo kidughu vaakho luatame lugiru naka vezokho he makusa, vaakho luatame.” 17Kuli heka madamo, Yesu ekalholhoshi kubirikira ekuba, “Mkiriieni Kiumbi muro makusa kaghu, kwaite Udilao wa Kiumbi waahe sina.”
Yesu etavase vahina kuu vabosi
Mariko 1:16-20; Luka 5:1-11
18Ata Yesu ekudaha kakera he iziwa la Galilaya, ekavaakho vabakhu vanu, Simoni esewa Petro ne Andrea mbakhu kuu, velo nyavu kini vekuvula samaki. 19Niho Yesu ekavaba, “Litani, niliahani ninemuboi kune muvagere vahe hagho sakigi mweekuvula samaki nakujigera ang'a.” 20Wato oto vekaro nyavu kini naho vekamliaha. 21Areazemeri hagitutu, ekavaakho vabakhu vahali vanu, Yakobo ne Yohana vainyi vakwe Zebedayo veeaha za he mashua hawe ne aba kini Zebedayo, vekujiboi nyavu kini. Niho Yesu ekavase, 22navo vekamroia aba mkini mashua nahu nyavu kini, vekamliaha Yesu.
Yesu etahinya vahe na kuvauti varukhao
Luka 6:17-19
23Yesu ekatakho kira hodi he idi la Galilaya, ekuhinya he minda jo vesahea Vayahudi na kubirikira Mburi Kulho jiyoya Udilao wa Kiumbi, nakuvauti vahe marukho kini. 24Kwato mburi kuu jikailika bwa khabuna ja idi la Siria. Varukhao vakhabuna vekagerawe heu naho velo mapepo naho velhu kifafa nahu veholoje vakhabuna ekavauti. 25Maifyo ya vahe vakumure kuli idi la Galilaya nahe muang'a wa Dekapoli nahe muang'a wa Yerusalemu nahe idi la Yudea na mlha wa kanu wa muharaza Yoridani vekamliaha.
လက္ရွိေရြးခ်ယ္ထားမွု
Matayo 4: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.