Yohana 20
20
Yesu aaka kuli he kigame
Matayo 28:1-8; Mariko 16:1-8; Luka 24:1-12
1Muaze wa bosi ijuma hachalhenu chalhenu, hecheri lo kidughu, Maria kuli Magidala ekahe he mbira, ekaakho hu isaheru lakaiwa he luhige lwa mbira. 2Niho, ekagugulu nakawe sari he Simoni Petro nahu mhina mhali hu eedumuishwe ni Yesu ekavaba, “Vaakaa msa wakwe Dilao he mbira, naho tetuilie hodi vemtiie.” 3Niho Petro nahu mhina mhali vekali vekaso he mbira. 4Vakhabuna vanu veekugugulu, mira hu mhina mhali egugulu kumtakho Petro, ekakae kuhe he mbira. 5Areahe ekadudukhu ekawesia to za he mbira, ekaakho sanda mira tebuiye za. 6Simoni Petro nau ekahe ekabuu he mbira, ekaheiya sanda bi to za he mbira, 7ekaakho nahu kitambara cho Yesu eeorowe he mua. Ka kitambara techekeiwe hawe naka sanda, mira chefunduwe chikakewa hodi kuu. 8Nahu mhina mhali ekaee kuhe he mbira, nau ekabuu za, ekaakho ekadarisha. 9Kwaite teveenaba kuila ite ya Magondo ya Kiumbi yeba ite chidumuwe Yesu aka kuli he kigame. 10Niho ka vahina vekagale.
Yesu etamlijanyia Maria wa Magidala
Matayo 28:9-10; Mariko 16:9-11
11Mira Maria ekafufu to he mbira gahana ekuzo. Ilai erazo, ekaduduku ekasungirija he mbira, 12ekaakho Vazasughawa vanu va are ana he Kiumbi veoroe gomae jiakhu, vezokodie to hodi msa wakwe Yesu webodijwe, muwe mlha wa mua weeaha mhali mlha wa he masame yeeaha. 13Ka Vazasughawa va are ana he Kiumbi vekamlhasu, “Mlage, uzo ahoni?” Ekavaba, “Vaamkaa Dilao gho, naho siilie hodi vemtiie!” 14Areafiriti kuyo to, ekawesia mzungure ekamuakho Yesu eumae to, mira teilie ite ni Yesu. 15Yesu ekamlhasu, “Mlage, uzo akhoni? Umdaa ji?” Maria, ebae ni muhe eekuumaya he kaseu, ekamba, “Mgiru, kai helo hodi uuchiie ka msa, nibaya hodi umkee, naani nneso kuramdori.” 16Yesu ekase ekaba, “Maria!” Maria nau ekamkheriia Yesu, ekambaiya kwa Kieburania, “Raboni” nikuba “Mhinya” 17Yesu ekamba, “Usinidare, sinaba kuso ana hakwe Aba. Mira so he vabakhu gho urevaba, nitaso ana hakwe Aba gho naho ni Aba kaghu, Kiumbi gho, naho ni Kiumbi kaghu.” 18Niho Maria kuli Magidala ekaso hehu ekavabiya ite “Naamuaho Dilao” Naho ekavasimoreja mburi jo ebaiwe ni Yesu ambaia to.
Yesu etavalianyija vahina kuu
Matayo 28:16-20; Mariko 16:14-18; Luka 24:36-49
19Hareahe hachamagheri heka muaze wa bosi wa ijuma, vahina veesahee hawe za he minda. Navo veelhatie maluhige kwaite veekuvabughenu vagiru va Vayahudi. Yesu ekalijanya ekauma hehu vahina evaba “Nhunguru ikhwa na kune.” 20Areafi kuyo to, ekavaaija miharegha na lunabo kuu. Vahina kuu vekalhamuishishwa kumuakho Dilao. 21Yesu ekavaba kahali, “Nhunguru ikhwa na kune! Sakigi Aba enisughae ani, na ani nitamusugha kune.” 22Areafi kuyo to, ekavaufuia saa ekavaba, “Doriani Saa wa Kiumbi.” 23Mukumkaaiya muhe neri makusa kuu, ka muhe enekaaiwa ni Kiumbi, naho mukusemkaaiya muhe neri makusa kuu, tekakaaiwe makusa kuu ni Kiumbi.
Yesu ne etamliiya Tomasi
24Tomasi, muwe wa hu vahina ikado na vanu, naho esewa Pacha, teeaha hawe nahu vahina madamo hu Yesu arevaliijanya. 25Kwato hu vahina vahali vekamba “Twamuakho Dilao.” Mira Tomasi ekavaba, “Kai sikaakho mabalo ya misumari imawe he miharegha kuu nikubutu kisatu gho heka mabalo, nikusaabutu mharegha gho he lunabo kuu, sikadarishe ite niu.” 26Miaze mnane iretakho ka vahina veaha hawe za hehu minda, Tomasi nau ereaha hawe navo. Neri ite maluhige yeelhatiwe, mira Yesu ekaliijanya ekauma hasihasi hevo, ekavaba, “Nhunguru ikhwa na kune.” 27Ekamba Tomasi “Lita ubutu kisatu kechi ii he miharegha gho gera muharegha kechi uubutu he lunabo gho. Ro bughu, mira udarishe!” 28Tomasi ekamba, “Dilao gho naho ni Kiumbi gho.” 29Yesu ekamlhasu, “Waadarisha kwaite waniakho? Vaaboiiwa makhulho hu vesiniakhoe mira vaanidarisha.”
Chiroe ya kitabu chikagondwa
30Yesu eboie lhaa haliwa kumure vahina kuu vekajiakho mira tevigondiwe heya kitabu. 31Mira ya lhaa jigondiwe kalo mumuru kudarisha ite Yesu niu Masia, Muinyi wa Kiumbi, mukudarisha to munekhwa na uzime wa maaze khabuna.
လက္ရွိေရြးခ်ယ္ထားမွု
Yohana 20: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.