Yohana 21
21
Yesu etavalijanyia vahina saba
1Areatakho ka, Yesu ekavalijanyia vahina kuu khakhera he iziwa lisewa Tiberia. Eevalijanyie to, 2nee vahina vakuwe veebungurue hawe, Simoni Petro ne Tomasi eekusewa Pacha ne Natanaeli eekudi are Kana Galilaya, vamilo vanu vakwe Zebedayo na vahina kuu vahali vanu, veaha hawe vakhabuna. 3Simoni Petro, eevabae, “Nitaso kuvulula samaki.” Navo veembae, “Nne tuneso hawe na ari.” Kwato veelie, vekakutu he mashua, mira heka kiama teveakhoe kigi neri. 4Harealholhoshi kulhe, Yesu ekauma khakhera he iziwa, mira vahina tevemurue kuila ite niu. 5Niho Yesu ekavalhasu, “Vasaho gho, temuakhoe neri kigi?” Navo vekamba, “Ee” Tetuakhoe neri kigi. 6Yesu ekavaba, “Bibini nyavu mlha wa sughano wa mashua muneakho samaki.” Vekabibi nyavu heka mlha, vekadara samaki kumure, sari vekakwasiwa kukaa hu nyavu jilo samaki na kubutu ka samaki he mashua. 7Hu mhina eekudumuishwa ni Yesu ekamba Petro, “Ni Dilao!” Simoni Petro areako ite ni Dilao ekaoro gomae kuu, kwaite teeoroe, nau ekapuru ekabuu za he mai. 8Mira vahina vahali vekama makasia vaichii mashu he idi lisilo mai ilai vekhuru hu nyavu jeehue samaki sari khakhera ya iziwa, kwaite veaha uda wa meta igana iwe bi sari he idi lisilo mai. 9Vareahe hodi hesilo mai vekaakho mwalha wa makale ukha na ata he makale ana heekeiwe samaki na mikate. 10Yesu ekavaba, “Gerani samaki jakuwe jo muvulule waijiji.” 11Simoni Petro ekakutu he mashua, ekakhuru hu lwavu luhuye samaki giru jirahe igana iwe mikhado mikoi na kai, sari hodi hesilo mai. Hawe na ite samaki nee kumure mira lwavu teupaae. 12Yesu ekavaba “ Litani tua viaghu.” Tehelo neri muwe egalie kumlhasu, “Ari uji?” kwaite vaaila ite ni Dilao. 13Yesu ekalita, ekadori mkate, ekavao, na wato oto ekavao nahu samaki. 14Nee kagi ka kakai Yesu kuvalijanyia vahina kuu kuli to areka kuli he kigame.
Yesu etayo ne Petro
15Varefiriti kua, Yesu ekamlhasu Simoni Petro “Simoni, muinyi wakwe Yohana!, unidumue ani kuro ya vahali?” Nau ekaba, “Dilao, ureile ite ani nikudumu.” Yesu ekamba, “Pasi maalu gho. 16Ekambaia ka kanu, Simoni muinyi wakwe Yohana! unidumu?” Petro ekamba, “Dilao, ureila ite nikudumu.” Yesu ekamba, “Wesiisha maalu gho.” 17Ekamlhasu ka kakai, “Simoni muinyi wakwe Yohana! unidumu?” Petro ekahiri swaho kwaite Yesu emlhasue ka kai ekuba ite, “Unidumu?” Petro ekamba “Dilao ari ureila makhabuna, ari ureila ite nikudumu.” Yesu ekamba, “Zeu maalu gho. 18Nitakubaia ukweri, madamo hu wee mburatu weekuraoro msipi hasi hasi he msa nakuso hodi ho udumu. Mira ukukhwa muhe mzimesha muhe mhali enekuoro msipi hasi he msa kechi akutii hodi usidumu kuhaso.” 19Yesu eyoe viome ya kuaija ite ni kigame mina cho enega kalo kumgimbika Kiumbi. Niho ekamba “Niliaha.”
Yesu nahu mhina mhali
20Petro ekawesia mzungure ekamuakho hu mhina mhali eekudumuishwa ni Yesu, ekuvaliaha. Ya mhina nihu eezokhodie sina ne Yesu madamo ya viaghu vya chamagheri emlhasue Yesu ekuba, “Dilao niji enekukirii?” 21Petro aremuakho ka mhina, ekamlhasu Yesu, “Dilao, naya ni kigi mina chinemliiya?” 22Yesu ekamba, “Kai nidumu afufu sari nikurakhwaa, ka mburi teikulhaari. Ari niliaha ani.” 23Kwato ka mburi ikaparaa he vabakhu ite hu mhina tekaga. Mira Yesu tebae ite ka mhina tekaga. U eyoe bi ite “Kai nidumu afufu sari nikuhwaa ka mburi teikulhuaari” 24Ka mhina niu eakhoe ya mburi etubaiya naho niu ejigondie ya mburi. Naho nne tureile ite mburi khabuna etubaiya nija kweri.
Kufiriti
25Helo mburi kumure Yesu eboie, kai ka mburi jitegondwa khabuna, teheseekhwa na minda ya kukeiya ka vitabu vigondiwe ka mburi.
လက္ရွိေရြးခ်ယ္ထားမွု
Yohana 21: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.