Yohana 15
15
Yesu niu mzabibu wa kweri
1Yesu ekavaba, Ani niu mzabibu wa kweri, na Aba gho niu mkurume. 2Kira itambi liaha za gho lisisa matunda u etalite, nahu itambi lisa matunda etaliboia kikulho kalo lisa matunda makumure. 3Kune mwaafi kukhwari kikulho na ani kwamburi yahu mahinyo nimuhinyie. 4Zokhoni za gho, na ani nizokho za kaghu. Sahu kigi itambi la mzabibu telimuru kusa matunda wangalo likusekhwa he mzabibu, wato oto kune temumuru kusa matunda mukusezokho za gho. 5Ani ni mkhatu wa mzabibu, nakune mumatambi. Efufu za gho, na ani nikukhwa za hakuu, ka enesa matunda makumure, kwaite nesiaha ani mkhatu wa mzabibu, kune temumuru kuboi kigi. 6Muhe neri muwe ekusaazokho za gho u etoe sa itambi libibiwe gahana na kuhala, matambi yekuhala yetabunguruwe na kubibiwe he mwalha na kulhaha. 7Mukufufu za gho na viome gho vikufufu za kaghu, lhawani kira kigi mudumu na kune munechiowe. 8Kune mukusa matunda makumure, Aba gho enegimbikwa, kwa kwali ya ineaija ite kune muvahina gho. 9Ani nimudumue kune sahu kigi Aba enidumue ani. Zokhoni he ludumuisho gho. 10Kai munedara miku gho, munezokho he ludumuisho gho, sahu kigi ani nidarie miku yakwe Aba gho na kuzokho he ludumuisho kuu. 11Nimubaie ya mburi kalo mulhamuiwe sakigi ani nilhamuiwa, naho kulhamuiwa kaghu kufuru. 12Miku gho niu ya, dumuanani, sa kigi ani nimudumue kune. 13Tehelo ludumusho lugirusha kutakho ya ludumuisho, lwa muhe egu uzime kuu kwa mburi ya vasaho kuu. 14Kune mwaakhwa vasaho gho kai mukuboi vyo nimubaia. 15Kune simuse vanyamalo kahali, kwaite vahaye teila kigi chiboiwa ni dilao kuu. Mira nimusee kune vasaho kwaite namubaia mburi khabuna nijikoie kuli he Aba gho. 16Kune temunilhoije ani, mira niani nimulhoije kune, mukhwa vahina gho, neemulhoje muso muresa matunda, matunda yesionika, kwato kira kigi munemlhawa Aba sacho edumu enemuo. 17Kwato, miku nimuo niu ya, mudumuane.
Vahe va idi vetavasanuia vahina
18Vahe va idi vesinamusanuiwa kune, muhulha ite veelholhoshie kunisanuia ani. 19Kai mwe vahe vaidi, vahe idi vesemudumue kune sacho vevadumu vahe kini. Mira kune temuvahe va idi, kwaite nitemulhoja kune kuli he idi kalo mukhwa vahe gho, niu chiro idi limusanuiwa. 20Hulhani hucho nimubaie, Mnyamalo si mgiru kutakho dilao kuu. Ikukhwa veenikharotije ani, venemukharotija na kune. Kai veedarie mahinyo gho, venedara na mahinyo kaghu. 21Mira venemuboia ka makhabuna kwaite kune muboi hucho niboi, veneboi to kwaite tevemuilie hu enisughae. 22Kai seelitie nikayo navo tevesekhwae na makusa, mira iji tevemuru kukuyoia ite tevelo makusa. 23Muhe enisanuia ani, emsanuia ne Aba gho. 24Kai ani seeboie hakini vimako visiboiwe ni muhe mhali hevo, teveseekhwa na makusa. Mira iji vaakho vyo niboie naho vecheri nisanuia ani ne Aba gho. 25Ya makhabuna yeliijanye kalo Magondo ya Kiumbi yeba, Vaanisanuiwa bule Yafuru. 26Ekuralita ka Mzalhaari nnemsugha he kune kuli hakwe Aba, ka Swaho eajia ukweri wa Kiumbi, u enemubaia yo eailie he ani. 27Na kune munevabaia vahe yo muilie kuli he ani, kwaite mweaha hawe na ani kuli bosi.
လက္ရွိေရြးခ်ယ္ထားမွု
Yohana 15: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.