Yohana 16
16
1Yesu ekakhwa echeri yo ekuba, Nimubaie to kalo kudarisha kaghu musikuro. 2Vagiru va minda ja kusahea Vayahudi tevekamudumuije kuboi nyamalo kaghu ata, kahali madamo elitie hu vemugaa kune venetoti ite vekuboi to vetamnyamarikia Kiumbi. 3Ka vahe veneboi to kwaite tevemuilie Aba neri teveniilie ani. 4Mira nimubaie to kalo ka madamo ekurahe muhulha ite namubaiyaa.
Nyamalo ya Saa wa Kiumbi
Simubaie ya mburi kuli azeto, kwaite neecheri aha hawe na kune. 5Mira iji nitaso hehu enisughae, naho tehelo neri muwe enilhasu Uso le? 6Swaho kaghu jaabuwe ni vuhuye kwaite naamubaiya ka mburi. 7Ukweri ni ite, inekhwa kikulho he kune ani nikuso, kwaite kai sikaso, Mzalhaari tekalita hakaghu. Mira kai nineso, nnemsugha hakaghu. 8Nau ekuralita ka Mzalhaari enevaaija vahe va idi vaile mburi ya makusa kinii, naho enevaaija mburi ya kudumuika kini he Kiumbi na mburi ya kuzamariwa kini. 9Ka mzalhaari enevaaija vahe ite velo makusa kwaite tevenidarishe ani, 10enemuaija ite ani nidumuika he Kiumbi kwato nitaso he Aba, naho temukaniakho kahali, 11kwa mburi ya zamaro, kwaite Shetani emgiru waya idi afi kuzamariwa ni Kiumbi. 12“Nicheri lo makumure yakumubaiya, mira waijiji temukaamuru kuyaila. 13Mira ekuralita ka Saa eaija ukweri wa Kiumbi niu enemukaeti na kumuhinya ukweri mkhabuna, kwaite tekamuhinye mburi kuu salaghe, mira enemuhinya hu makhabuna eyakoia kuli hagho nau enemubaiya mburi jinelijanya kalufunda. 14Ka Saa eaija ukweri wa Kiumbi eneniko ani kikulho kwaite enedoria huvyo niayo naho enemubaiya kune. 15Vigi vikabuna Aba elo navyo ni vigho, niuchiro niba ite ka Saa enedoria mahinyo gho na kumubaia kune.
Vuhuye vutakirii kukhwa mlhamuisho
16“Yesu ekavaba vahina kuu, hemerisie madamo maghere temukaniaho, naho kalufunda kahali muneniakho.” 17Niho vahina kuu vakuwe vekalhasuana vekuba, “Etotie kiakhoni ekuba, hemerisie madamo maghere temukaniaho, naho ekuba madamo maghere kalufunda muneniaho? Naho ekuba, kwaite nitaso he Aba?” 18Vekacheri velhasuana, etotie kiakhoni ekuba, hemerisie madamo maghere? Tetuila ite eyo kiakhoni. 19Yesu ekaila ite vedumu vamlhasu mburi ya ka viome, kwato ekavaba, “He mutalhasuana hu mburi niyoiye, hemerisie madamo maghere temukaniaho, naho hekunetaho madamo maghere muneniaho? 20Nitamuabai ukweri, kune munezo malima nakuhuyeti mira idi linelhamuiwa. Munehuyeti mira kuhuyeti kaghu kunekirii kulhamuiwa. 21Mlage ekusa muinyi etalhaishishwa kwaite madamo kuu yakuakho yaahe, mira ekufiriti kuakho muinyi tehulha kahali kuhiri, kwa mburi ya kulhamuiwa ite aamgera muhe muhali he idi. 22Iji kune mwaahiri swaho, mira ninemuakho kahali, munelhamuiwa he swaho kaghu, tehelo muhe enelakha mlhamuisho kaghu. 23Heka muaze ukunehe neri temulo kiome munenilhasu. Nitamubaiya kweri, kira kigi munemlhawa Aba kwa ugiru gho enemuo. 24Sari waijiji temunalhawa kigi kwa ugiru gho. Lhawani na kune muneowe kalo kulhamuiwa kaghu kufuru.
Yesu aalimuru idi
25“Nimubaiye ka mburi kwa mitotire. Mira madamo elitie sikayo kwa mitotire kahali, mira ninemubaiya ka mburi jakwe Aba neri kumatu. 26Muaze ka munemlhawa Aba kwa ugiru gho, naho sikamubaiye ite ninemlhawa Aba kwa mburi kaghu, 27kwaite Aba salaghe eramudumu kune, kwaite kune muranidumu ani naho mwaadarisha ite nilie he Kiumbi. 28Ani neelie hakwe Aba nikalita he idi, iji nitahali he idi, nitaso hakwe Aba.” 29Niho vahina kuu vekamba, “Waijiji uyo neri kumatu, neri tuyo kwa mitotire. 30Kwato twaaile ite ari uilie mburi khabuna naho tetukakulhasu kahali. Kwaya mburi tudarisha ite ari weelie he Kiumbi.” 31Yesu ekavaba, “Ho waijiji munidarisha? 32Kwato madamo elitie, kahali afi kuhe, kune vakhabuna muneparaa munegale kira muwe hakuu, ani ninerowa salaghe. Mira ani siaha salaghe, kwaite Aba eaha hawe na ani. 33Nimubaiye ya mburi, kalo mukhwa na nhunguru. Heya idi muneakho kharo, mira kuoni swaho, kwaite ani nalimuru idi.”
လက္ရွိေရြးခ်ယ္ထားမွု
Yohana 16: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.