Maluko 15
15
Yesu khokenkhwa khwa Mwami Pilato
Mateo 27:1-2,11-14; Luka 23:1-5; Yohana 18:28-38
1Makingilima, vapumya matambekho valaala ne vakhombi va Izilaeli ne valaangi va njaanga ja Musa, alevigombya, vamotunge Yesu ngosa, vamosola no khomokenkha khwa Mwami Pilato. 2Pilato amowolya Yesu, “Mbi, ogwegwe amwene mwami wa Vayahudi?” Yesu amowelaa, “Egoo khopaala ogwegwe.” 3Vapumya matambekho valaala vamositacha Yesu kho mpola nyinki, 4Kho gechoo, Pilato amowolya khanke Yesu, “Mbi, otokhola la khopaala? Kunaa vantu ewa va khokositacha kho mpola jiinga.” 5Ila Yesu aleakhapala mpola, ninga Pilato aleakhumya.
Yesu khotengemekhwa khofwa
Mateo 27:15-26; Luka 23:13-25; Yohana 18:39-19:16
6Kela panaa wenga wa Pasakha panaa yapikha, Vayahudi aleavadigolelaga motungwa yomwi yunaa vantu alevamotogagwa, angile vakhonoja gechoo kela mwakha. 7Ituungo eloo aleapwale muntu yomwi yunaa khwetwa Balaba, yunaa aleatungilwe palomwi ne vayakwe vanaa vagaloki khwa khokenkelya obe wa maulagi. 8Vantu vinki alevamopetela Pilato vamoloomba avanojela kete venaa alekhanojaga. 9Pilato avawolya, “Mbi, mokhopooga mbadigolele Mwami wa Vayahudi?” 10Pilato aleapala gechoo kho nguno aleamanya vapumya matambekho valaala va Matuunda alevamokenkha Yesu khwakwe kho nguno ya wilu wawe.
11Ila vapumya matambekho valaala va Matuunda alevakhosongan'ya vantu vamolombe Pilato amodigolele Balaba. 12Pilato avawolya khanke, “Mbi, mokhopooga nojee kee khwa muntu oyo yunaa mokhomweta Mwami wa Vayahudi?”
13Vantu vensi alevakhojoma no khopaala “Mokhoweleli pa mosalaba!”
14Pilato avawolya vantu.
“Mbi! Anogaja obe kee?” Ila evenee vendelela khojomaa mudogo, “Mokhoweleli pa mosalaba!”
15Pilato aleapooga kholetojwa idale eloo la vantu, apenee amodigolela Balaba khopuma mokhandulunge. Alagelelya masinjala vakwe vamotame Yesu nkome no khomokhowelela pa mosalaba.
Masinjala alevakhomobyeda Yesu
Mateo 27:27-31; Yohana 19:2,3
16Apenee, masinjala vamokenkha Yesu mpakha mokhate ya nyoomba ya Mwami wa Yudea, vakongaanya idale lensi la masinjala.
17Vamolyekha Yesu nkhanzu nkhasuku ya wami, vanogelelyaa nkhofila ya miya no khomolyekha khwiitwe. 18Vandyaa khomolamocha khwa khomokilyaa, “Ole mopanga Mwami wa Vayahudi.” 19Alevamokhowa ne nkhome ya mwanzi khwiitwe no khomotyeela matye, vawa vakhomotungamela kete vakhomokholya ili vamobyeede. 20Panaa alevamalya khomobyeda, vamolyola mwenda nkhanzu yakwe nkhasuku no khomolyekha khanke myenda jakhwe, apenee vamopumya panji ya nyoomba ya wami no khowokhaa nanoyo khopeta khomokhomelela pa mosalaba.
Yesu khokhomelelwa pa mosalaba
Mateo 27:32-44; Luka 23:26-43; Yohana 19:17-27
21Panaa alevapwale monjela, alevitaanga no muntu yomwi yunaa khwetwa Simoni, yunaa khopumela Kulene. Mwenee angile daada yawe Alekizanda no Lufo, no khwiitungo kedo alekhopumela kho mogoonda. Apenee vamowela akepule mosalaba wa Yesu. 22Apenee vamokenkha Yesu mpakha lwande panaa pakhwetwa Goligota, emaana yakwe, “Lwande ya ibanka la itwe”. 23Vamopela divai yenaa isalinkine ne oganga wa ipeke la manemane, ila Yesu aleasitaa khoyen'gweela. 24Apenee, vamokhomelela pa mosalaba. Vigawan'ya myenda jakwe khokowela osaguli ili khowona ananuu alapata mwenda kee. 25Ituungo lenaa alevamokhomelela Yesu pa mosalaba, angile ituungo la saa jetato melaawo.
26Pachanya ya mosalaba gwakwe alevandekha, “Mwami wa Vayahudi.” 27Yesu aleakhomelelwa pa mosalaba, palomwi ne vasuki vawele, yomwi aleapwale lwande ya molyelo ne yoonge lwande ya mukege. 28Epoo apenee alegadugama Maandekho ga Matuunda ganaa gakhopaala, “Aleasolelwa kete muntu yunaa atite mabe.”
29Vantu vanaa alevakhokela epoo, alevatokha no vakhoyongan'ya mitwe jawe no khopaala khwa lolii ikolo, “Aliii! Ogwegwe yunaa alewapaala olabomola nyoomba ya Matuunda no khojeenga kho nsiko jetato, 30seji, telemokha pa mosalaba, wipon'ye gwegwee.”
31Nanevo vapumya matambekho valaala va Matuunda palomwi ne valaangi va njaanga ja Musa alevakhomobyeeda no khopaala, “Omwene aleavapon'ya vaange, ila omwene akhonyaga khwipon'ya. 32Lekhaa khomowone Kilisto oyoo, Mwami wa Izilaeli, seji atelemokhe khopuma pachanya pa mosalaba, naswi kholamogomba.”
Ne vantu evoo vawele vanaa ninga nanevo alevakhomelelwa pa mosalaba alevamotokha.
Yesu khofwaa pa Mosalaba
Mateo 27:45-56; Luka 23:44-49; Yohana 19:28-30
33Panaa aleyapikha ituungo la saa sita ya lyonse, liwelelo lensi aleyaigubikha kitii mpakha ituungo la saa tisa. 34Kho ituungo la saa tisa, Yesu aleajomaa lolii lokolo, apalaa, “Eloi, Eloi, lema sabakitani?” Emaana yakwe “Matuunda waane, Matuunda waane, kho kee wandekhaga?” 35Vantu vamoonga vanaa aleveemaga pepi, panaa alevategeela gechoo, alevapaala, “Motegeleli, khomwetaa Eliya.” 36Muntu yomwii aleakembelaa lowelo, adobya siponji mo divai yenaa yasasagaa, asopekhaa pachanya ya mwanzi, anyenyolaa no khomopeela Yesu ang'weele oko khopalaa, “Lekhaa khowone mbe Eliya aliija khomotelemola pa mosalaba.”
37Apenee Yesu ajomaa kho lolii nkolo, afwaa.
38Ituungo aleloo, lepazia la nyoomba ya Matuunda, alelademokha vebaande vewele khwandelya pachanya mpakha panse. 39Molaala wa masinjala yunaa aleemagaa epoo paolongolo wa mosalaba wa Yesu, panaa aleategeela oloo lolii lwakwe no khowona venaa khofwaa, apalaa, “Khapanga, muntu oyo angile Mwana wa Matuunda!”
40Alevapwale ne vakhiima vanaa alevakhomokunaa khotale, mo vamoonga vawe aleapwale Malia yunaa khopumaa Magidala no Malia maye yawe Yakhobo mulunaakwe Yose no Salome. 41Vakhiima evoo alevakhomotomekela Yesu panaa aleapwale Galilaya no khomotomekela. Alevapwale ne vakhiima vaange vinki vanaa aleviija palomwi nanuyo Yelusalemu.
Yesu khotulwa mwikhabuli
Mateo 27:57-61; Luka 23:50-56; Yohana 19:38-42
42Panaa aleyapikhaa mesee, kho nguno angile nsiko ya Wiyandaleli kho nguno ya Nsiko ya Khosuupa, 43Yusufu yunaa aleapuma Alimatayo, muntu yunaa aleakoliwa mudogo kho ivaanza la Vayahudi, omwenee nanoyo alekhokunelelya khwija kho wami wa Matuunda. Aleamopetela Pilato patokhola khotungumala no khomolomba agosole movimba gwa Yesu. 44Pilato aleakumya panaa aleategeela kete Yesu afwagaa. Amwetaa oyoo molaala wa masinjala, amowolya kete Yesu aleafwaga. 45Pilato panaa aleawelwa no molaala oyoo wa masinjala kete Yesu aleafwaga, apenee Pilato aleamogombela Yusufu apete agosole movimba gwa Yesu. 46Yusufu nanuyo aleagola shanda ya bei nkolo, awotelemola movimba wa Yesu khopuma pa mosalaba, aupilimilya shanda eyoo. Agotolaa mokhabuli lenaa laponjagwa pa mogamba apenee alibilingitya ibwe ikholo kholemba pa molyango wa khabuli. 47Malia wa khopuma Magidala no Malia maye wakwe Yose alevawona panaa movimba wa Yesu alegwatolagwa.
လက္ရွိေရြးခ်ယ္ထားမွု
Maluko 15: NTKIBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Kimbu @The Word for The World International and Kimbu Language translation, 2025. All rights reserved.