Maluko 16
16
Yesu khofufokhaa
Mateo 28:1-8; Luka 24:1-12; Yohana 20:1-10
1Panaa aleyakela Nsiko ya Khosuupa, Malia wa khopuma Magidala no Salome no Malia maye wakwe Yakhobo alevagola makhuta ga khotokela ili vaopake movimba gwa Yesu. 2Makingilima, nsiko ya khwandya ya wiki, alevapeta kho khabuli panaa aleatolagwa Yesu panaa lyonse aleladolaga. 3Panaa alevapwale mo njela, alevakhwiwolya venee kho veene, “Ananuu yunaa khatowokelya ibwe pa molyango gwa khabuli?” 4Ila panaa alevapikha, alevawona ibwe ikolo lawochagwa khopuma epoo pa molyango wa khabuli.
5Panaa alevingela mo khabuli, alevamowona molomyana yunaa alyalaga mwenda mwelo ikhalagaa kho lwande lwa molyelo, alevatungumala. 6Ila molomyana oyoo aleavawelaa, “Mokhatungumale! Mokhomopooga Yesu Mnazaleti, yunaa aleakhomelwe pa mosalaba. Afufokhaga! Epa atapoya, kunagi panaa alevamotulaga. 7Ila mopete momowele Petulo palomwi ne vahemba vakwe vaange, mbe, ‘Khovalongolaa khopeta Galilaya. Okhoo molamowona kete venaa aleavawelagaa.’ ”
8Gechoo, vapuma lowelo mo ipinga, okhoo vakhotetema no khokumya alevakhamowela muntu yeyensi kento chechensi, kho nguno alevatungumala.
Yesu khomopomelaa Malia wa khopuma Magidala
Mateo 28:9-10; Yohana 20:11-18
9Yesu panaa aleafufokha nsiko ya khwandya ya wiki melaawo, aleamopemela Malia wa khopuma Magidala, yunaa Yesu aleamopumya mademi saba. 10Malia nanoyo aleapetaa khovawela evoo vanaa alevapwale palomwi no Yesu, panaa aleakhale khofwa, ne ituungo eloo lenaa alevakhombolelya no khokoota. 11Ila panaa alevategeela kete Yesu a mopanga, no Malia wa khopuma Magidala aleamowonagaa, alevakhagomba.
Yesu khovapumelaa vahemba vakwe vawele
Luka 24:13-35
12Panaa alegakela egoo, Yesu aleavapumela vahemba vawele oko atite mwigelo woonge. Vahemba evoo alevakhopeta kho mogoonda. 13Nanevo panaa alevamotembola, alevatuuwa khokhaye ili vawawele vayawe. Ila ninga venee alevakhavagombela.
Yesu khovapumela vahemba ikomi no yomwi
Mateo 28:16-20; Luka 24:36-49; Yohana 20:19-23; Manoji 1:6-8
14Panaa, Yesu avapumela vahemba vakwe evoo ikomi no yomwi, panaa alevakholya endya. Avakhakela modugo kho nguno ya khokonya khogoomba khwawe, no khokonya khovagombela evoo vanaa alevamowonaga panaa aleafufokhagaa. 15Apenee avawela, “Petagi kho liwelelo jensi moteenge Mpola Nsoga khwa kela kiumbe. 16Muntu yeyensi yunaa khogombaa no khobatijwa alanokholwa. Ila muntu yeyensi yunaa akhakhogomba alatengemekhwa. 17Lomekho eje jelanojwa ne vanaa vakhogoomba, khwa lina laane valapumya mademi no khopaala khwa melombelo mepyaa, 18valawamba njokha kho mekhono jawe, ninga mbe valang'weela kenaa kekhowulaga, khotopo vafwee, valawatola mekhono yawe khwa valwile, nanevo valapona.”
Yesu khosolwa kopeta kho pachanya pa Matuunda
Luka 24:50-53; Manoji 1:9-11
19Odaada Yesu panaa aleamalya khopaala nanevo, aleasolwaa no khokenkhwa pachanya pa Matuunda, no khwikhala kho mokhono wa molelyo wa Matuunda. 20Apenee vahemba vakwe alevapeta khoteenga kela lwande. Nanoyo Odaada anogajaa molemo palomwi nanevo no kholageela mpola yakwe khwa lomekho jenaa alejelondan'ya nanelo.
လက္ရွိေရြးခ်ယ္ထားမွု
Maluko 16: NTKIBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Kimbu @The Word for The World International and Kimbu Language translation, 2025. All rights reserved.