लूका 7
7
येशूये रोमी कप्तानो नोकरके गेपाक्च
(मत्ती ८:५-१३)
1येशूये भर्मीकोके पट्ट शिक्षाको याहाके भ्यानीसीङ, होस्को कफर्नहुमाङ आन्काङ। 2होलाङ रोमी कप्ताने बेहेरी ज जाक्च काट दास बेहेरी ज छाम सीके ज पामलेया। 3येशूवो बारेयाङ सेनीसीङ होस कप्ताने येशूके, राम्ह मेनो दासके गेपाक्म याहानी टेम बीन्ती जाट्के यहूदी अगुवाकोके होस्कोटुङ बीर्हीना। 4होस यहूदी अगुवाकोइ येशूटुङ राम्ह बिन्ती जाट्म टेया, “इसै रोमी कप्तान नाकुङ सहायता डीहीनके लायकावो ले। 5हीके टेहाङ इस्कोइ कानको यहुदीकोके बेहेरी रोह जाट्लेको हटै इस्कोइ ज कान्के टेम काट यहूदी सभा मुच इम खास्म याहामले।”
6हटै येशू होसोकोर कठा आन्काङ। होसोको इमो खेरेप टाक्के टेनाङ पहिला कप्ताने मेनो लाफाकोके इट टेके बीर्हीना, “प्रभु, दुख नाजाट्नी, हीके टेहाङ नाकोके ङौ इमाङ एट्के लायकावो ङा मालेनाङ। 7ङा र नाकोटुङ राहाके लायकावो मालेनाङ। नाकोइ काट बचन मत्रै ङाक्म याहानी, हटै ङौ दास गेप्ले। 8हीके टेहाङ ङा र ङौ अधिकारीकुङ अधिनाङ मुच भर्मी आले, हटै ङौ अधिकाराङ र सिपाहीको ले। ङै काटके ‘आन्न’ टेलाङ हटै होस आन्ने, आस्काटके ‘राहान’ टेलाङ हटै होस राहाले। होट न ङौ दासके ‘इसै जाटो’ टेनाङ होचे जाट्ले।”
9येशू इसै कुरा सेम छक्क परीस्काङ हटै होस्कोके डुट्च भर्मीकोलाक फनक्क ल्हेस्म टेकाङ, “इलाक सेनीस, इढीन्च कराहाङ्च विश्वास लेच भर्मी ङै इस्राएलाङ घनीङ माडीहीन्मन!”
10होस कप्ताने बीरीन्च लाफाको इमाङ ल्हेस्नाङ होस दासके गेप्म भ्याच डीन्हा।
येशूये काट विधवौ मीजाके जीवाट्काङ
11हटै पीहीनलख येशू नाइन लाङ्घाङ आन्काङ। होस्कोकठा होस्कुङ चेलाको हटै अरु ढलीङ भर्मीको घनीङ आना। 12येशू सहरो गलाम खेरेप टाक्नाङ काट विधवौ काट जा बाबुजा सीया हटै होस मोरोके मलामीकोइ बुम न्हुन्च डीहीन्काङ। होस विधवाकठा ढलीङ भर्मीको घनीङ लेया। 13येशूये होस विधवाके ङोस्म रोम सेम टेकाङ, “माराप्न!” 14हटै येशूये खेरेप आन्म मोरो छुकाङ हटै बुच मलामीको टोङ्हा। येशूये टेकाङ, “ए बाबुजा, ङै नाङ्के टेलाङ, सोन!” 15हटै होस सीच भर्मी सोम ङाक्के ठाला। हटै येशूये होस्के मेनो बोइके जीम्मा याहाकाङ।
16हटै पट्टको बीरीया हटै इट टेम परमेश्वरके महीमा याहा, “पट्ट टेनाङ कराहाङ्च काट अगमवक्ता कानकोटुङ राम्हलेको, हटै परमेश्वर मेनो भर्मीकोके डुस्के राम्हलेको।”
17येशूये होस बाबुजाके जीवाटाक्च बारेयाङ पट्ट यहुदिया भरीयाङ हटै वारलाक-पारलाकावो ठावाङ फैलडीसा।
येशूये बप्तिस्मा याहाच यूहन्नौ बारेयाङ भर्मीकोके टेकाङ
(मत्ती ११:२-१९)
18इस पट्ट कुराको बप्तिस्मा याहाच यूहन्नौ चेलाकोइ यूहन्नाके सेटाका। हटै यूहन्नै मेनो न्हीस चेलाकोके एट्म 19प्रभु येशूटुङ इट टेम खबर बीर्हीना, “अब राहाच ख्रीष्ट नाको ज आलेको की कानकोइ आस्काटके वाङ्के परीस्ले?”
20हटै बप्तिस्मा याहाच यूहन्नौ चेलाको येशूटुङ राहा र गीना, “बप्तिस्मा याहाच यूहन्नै कानकोके नाकोटुङ इट टेम गीन्के बीर्हीना, अब राहाच ख्रीष्ट नाको ज आलेको की कानकोइ आस्काटके वाङ्के परीस्ले?”
21होसै बेला ज येशूये ढलीङ छाच हटै दुष्ट आत्मा लग्डीस्च भर्मीकोके गेपाक्काङ हटै मीमीके माडाङ्च भर्मीकोके मीमीके डाङ्च जाट्काङ। 22येशूये यूहन्नौ चेलाकोके टेकाङ, “आन्नीस हटै इसै नाक्कोइ डाङ्च हटै सेच कुराको यूहन्नाके टेम याहानीस: इट मीमीके माडाङ्चकोइ मीमीके डाङ्मले, लङ्गडाको ह्वामले, कोर्ह्या लग्डीस्चको गेप्मले, हटै मेनेकेपे मासेचकोइ सेके ह्योक्मले, सीचको जीवाले हटै दुखी गरीबकोइ सेहेच समाचार सेके डीहीन्मले। #यशै ३५:५-६; यशै ६१:१ 23हटै ङाके शंङ्का माजाट्चको आशिषित आले।” 24यूहन्नौ चेलाको आन्म भ्यानीसीङ येशूये होलाङ लेच ढलीङ भर्मीकोके यूहन्नौ बारेयाङ टेकाङ, “नाक्कोइ उजाड ठावाङ ही ओस्के नानुङास? नम्सुये होयोक्च नीङ्गलाके? 25नाक्कोइ ही ङोस्के नानुङास? सेहेच बढीन बीहील्च भर्मीके? ङोस्नीस, महँगो बढीन बीहील्चको हटै सुख विलासाङ मुचको च राजाकुङ दरबाराङ छान्ने। 26नाक्को ही ङोस्के नानुङास? अगमवक्ताके? आले, ङै टेलाङ नाक्कोइ अगमवक्ता टेनाङ र कराहाङ्चके नाडाङास। 27बप्तिस्मा याहाच यूहन्नौ बारेयाङ परमेश्वरो बचनाङ इट रीक्मले, ‘ङोस्नी ङै ङौ दूतके नाको टेनाङ अघेर बीर्हीन्नाङ जसे नाकुङ अघेर नाकुङ लाम तयार जाट्ले।’#मला ३:१ 28ङै नाक्कोके टेलाङ, यूहन्ना टेनाङ कराहाङ्च भर्मी कुसै र माफुन्मले। टेहाङ र, परमेश्वरो राज्याङ पट्ट टेनाङ माहार्च चहीन्या यूहन्ना टेनाङ कराहाङ्च आले।”
29पट्ट भर्मीकोइ हटै सेर्मा सोट्चकोइ घनीङ येशूवो कुरा सेम परमेश्वरो लाम ठीक आले टेम मन्डीया, हीके टेहाङ होसोकोइ यूहन्नाटुङ बप्तिस्मा लामलेया। 30बाकी र फरिसीको हटै व्यवस्थौ धर्मगुरुकोइ परमेश्वरे होसोकुङ लागी खास्च योजनाके मामन्डीया हीके टेहाङ होसोकोइ यूहन्नाटुङ बप्तिस्मा माला। #मत्ती २१:३२; लूक ३:१२
31येशूये गीन्काङ, “इस पुस्तौ भर्मीकोके हीकठा तुलना जाटीङ? इसको कुन्च ले? 32होसोको बजाराङ मुम मेक्को-मेक्को इट टेम च्याक्च जजाको लख ले, ‘कानकोइ नाक्कुङ लागी बाँसुरी काङाहास, हटै नाक्को मट्स्याहास। कानकोइ बीरहवो ल्हीङ ल्हीङ्नाङ नाक्को मट्रापास।’ 33हीके टेहाङ बप्तिस्मा याहाच यूहन्ना अरु भर्मीकोइ लख बेस्काङ हटै अंगुरो हान गाम माराहा, बाकी र नाक्कोइ ‘होस्के दुष्ट आत्मा लग्डीस्मले’ नाटेयास। 34भर्मीयो मीजा राहा, हटै होचे ज्या-गा हटै नाक्कोइ, ‘इसै ढलीङ ज्याया हटै गाया, सेर्मा सोट्चकुङ हटै पापीकुङ लाफा नाटेयास।’ 35परमेश्वरो बुद्धि ठीक आले टेम बुद्धिअनुसार ह्वाचकोइ ज प्रमाणीत जाट्ले।”
काट माझै येशूवो मीहील हुर्म याहा
36काट फरिसीये येशूके मेनो इमाङ ज्याके राहाके एटा, हटै होस्को होच्यौ इमाङ आन्म ज्याके मुकाङ। 37होसै सहराङ काट पापी माझा लेया। येशू फरिसीयो इमाङ ज्याके राम्हलेको टेम वार्म होचे काट सिङ्गमरमरो शीशीयाङ आर्म्हुच सीडी राक्म होलाङ राहा। 38होचे येशूवो न्हुनलाक राम्ह राप्म ज होस्कुङ मीहील मीमीक डीये छीमीक्म याहा। हटै मेनो मीछामे सीट्म छोहाक्म होस्कुङ मीहीलके चुम्बन जाटा हटै आर्म्हुच सीडी मोल्म याहा।#मत्ती २६:७; मर्कू १४:३; यूह १२:३ 39येशूके मेनो इमाङ एट्च फरिसीये इसै डाङ्म मेनो मीगीनाङ सोँच्डीया, “इसै भर्मी साँच्चै न अगमवक्ता आला टेहाङ इचे थाहा डीन्होला की इस्के छुच माझा कुस आले, हीके टेहाङ इसै पापीनी आले।”
40येशूये होस फरिसीके टेकाङ, “ए सीमोन, ङै नाङ्के काट कुरा टेके ले।”
सिमोने टेया, “गुरु ज्यू, टेनी न।”
41येशूये टेकाङ, “न्हीस भर्मीको लेया होसोकोइ काट साहुकठा ऋण लामलेया। काटे पाँच सय चाँदीयो सिक्का#7:41 चाँदीयो सिक्का काट चाँदीयो सिक्का काट याको ज्याला छानोला हटै आस्काटे पचास चाँदीयो सिक्का। 42बाकी र होसोकोकठा ऋण तिर्डीके पैसा मालेनीसीङ होसै साहुये होसोकुङ ऋण माफ जाट्म याहा। अब होसोको न्हीसाङ कुच्यै होसै साहुके ढलीङ रोह जाट्ले?”
43सिमोने जवाफ याहा, “ङौ बीचाराङ होस ढलीङ ऋण माफी छान्च चहीन्यै ज ढलीङ रोह जाट्चले।”
येशूये टेकाङ, “नेङे सही नाटेया।” 44हटै येशू होस माझालाक ल्हेस्म सिमोनके टेकाङ, “नेङे इसै माझाके नाडाङा? ङा नोङो इमाङ राहानाङ मीहील हुर्के डी मटयाहा, बाकी र इचे ङौ मीहील मेनो मीमीक डीये हुर्म याहाम मेनो मीछामे सीट्म याहामले। 45नेङे ङाके चुम्बन जाट्म मनीटा मटजाटा, बाकी र इचे ङा राहाठीङ होडा ङौ मीहीलाङ चुम्बन जाट्मले। 46नेङे ङाके मीटालुवाङ सीडी मोल्म मनीटा मटजाटा, बाकी र इचे ङौ मीहीलाङ आर्म्हुच सीडी मोल्म याहा।#7:46 मीहीलाङ आर्म्हुच सीडी मोल्म याहा। होस बेलाङ, यहूदीकुङ चलनाङ पाहुनाकोके मनीटा जाट्च तरिका। 47होट छान्नीसीङ इलाङ सेनीस, होच्यौ ढलीङ पापको क्षमा छान्मले हीके टेहाङ इचे ङाके ढलीङ रोह जाटा। बाकी र इट्टार जा क्षमा छान्चये ङाके होडीक न रोह जाट्ले।”
48हटै येशूये होस माझाके टेकाङ, “नोङो पापको क्षमा छाना।”
49होलाङ ज्याके मुच भर्मीकोइ मेक्कोकठा इट टेके ठाला, “पाप क्षमा जाट्लाङ टेम टेच इसै कुस आले?”
50येशूये होस माझाके टेकाङ, “नोङो विश्वासे नाङ्के बचडीमले, शान्तिकठा आन्न।”
လက္ရွိေရြးခ်ယ္ထားမွု
लूका 7: WMGR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024 (Active), Mother Tongue Translators Society and Wycliffe Bible Translators, Inc. All rights reserved.