लूका 6
6
म्हुङ बाट्च याको प्रभु
(मत्ती १२:१-८; मर्कूस २:२३-२८)
1म्हुङ बाट्च याकाङ येशू अन्न लैडीच गार्हा छान्म आन्काङ। हटै होस्कुङ चेलाकोइ अन्नौ बालाको ढुम्म मीहुटाङ आर्जुम ज्या। #व्यव २३:२५ 2कोही फरिसीकोइ चेलाकोके गीना, “म्हुङ बाट्च याकाङ जाट्के माछान्च कुरा नाक्कोइ हीके नाजाटास?”
3येशूये होसोकोके जवाफ याहाकाङ, “नाक्कोइ परमेश्वरो बचनाङ मापरीस्म नानीस मेन दाऊद र मेनो लाफाको रन्छीनाङ ही जाटा? 4कुट दाऊद परमेश्वरो पालाङ आना हटै होलाङ परमेश्वरके चर्हडीच पुजाहारीकोइ मत्रै ज्याके खाट्च बेस्काङ डोन्म ज्या हटै मेनो लाफाकोके घनीङ याहा।” #लेवी २४:९; १ शमू २१:१-६
5हटै येशूये होसोकोके टेकाङ, “भर्मीयो मीजा म्हुङ बाट्च याको प्रभु आले।”
येशूये छोक्च मीहुट लेच भर्मीके गेपाक्काङ
(मत्ती १२:९-१४; मर्कूस ३:१-६)
6आस्काटच म्हुङ बाट्च याकाङ, येशू सभा मुच इमाङ आन्म पाहाटाक्काङ। होलाङ डोर मीहुट ट छोक्च काट भर्मी लेया। 7फरिसी हटै व्यवस्थौ धर्मगुरुकोइ चहीन्या येशूये म्हुङ बाट्च याकाङ गेपाक्लेकी टेम येशूके डोस लैडीके मौका वाङ्म मुमलेया। 8बाकी र येशूये होसोकोइ ही सोच्डीमले टेम वार्म होसै मीहुट छोक्च भर्मीके टेकाङ, “सोन, हटै माझ्झाङ टोह्ङन।” हटै होस भर्मी सोवा हटै टोह्ङा। 9येशूये होसोकोके टेकाङ, “ङै नाक्कोके गीन्नाङ, म्हुङ बाट्च याकाङ ही जाट्के छान्ने? सेहेच की मासेहेच? जीवाट्के की साट्के?” 10होस्कोइ पट्टकोके ओस्म होस भर्मीके टेकाङ, “नोङो मीहुट पसार्डीयो।” होचे होट ज जाटा, हटै होच्यौ मीहुट आस्काट मीहुट लख ज गेपा।
11बाकी र होसोको बेहेरी ज डाम्छोसा हटै मेको-मेकोकठा येशूके ही जाट्के टेम सल्लाह जाट्के ठाला।
येशूवो १२ प्रेरितको
(मत्ती १०:१-४; मर्कूस ३:१३-१९)
12कयाक येशू डाँडालाक आन्म नभीभर परमेश्वर कठा प्रार्थना जाट्काङ। 13गोराक छान्म भ्यानीसीङ होस्कोइ मेकुङ चेलाकोके हटै होसोकोटुइङ बाह्र जनाके भाक्काङ, होसोको बाह्र जनाकोके प्रेरित म्यारमीन याहाकाङ। 14होसोको बाह्र प्रेरितकुङ म्यारमीन सिमोन, होस्के येशूये पत्रुस म्यारमीन घनीङ याहाकाङ हटै पत्रुसो भया अन्द्रियास। याकूब, यूहन्ना, फिलिप, बारथोलोमाइ, 15मत्ती, थोमा, अल्फयसो मीजा याकूब, देशके रोह जाट्च सिमोन लेया। 16याकूबो मीजा यहूदा, हटै यहूदा इस्करियोत, होचे न न्हुनीङ येशूके धोका याहा।
येशूये ढलीङ भर्मीकोके गेपाक्लेको
(मत्ती ४:२३-२५)
17येशू होसोकोकठा डाँडालाकीङ म्हाकलाक झाल्काङ हटै न्हाम्च ठावाङ टोह्ङकाङ। होलाङ येशूवो चेलाकुङ भीड हटै पट्ट यहुदिया र यरुशलेम लाकीङ हटै समुन्द्रौ खेरेप लेच टुरोस हटै सीदोन सहरीङ ढलीङ भर्मीकुङ काट भीड 18येशूये पाहाटाक्च शिक्षा सेके हटै छाचको मे-मेल्लौ छाच-बीक्च गेप्के राम्हल्या। दुष्ट आत्मै दुख डीहीन्च भर्मीको घनीङ गेपा। 19पट्ट भीडे येशूके छुके पवोला, हीके टेहाङ होस्कोटुइङ शक्ति ख्योवोला हटै पट्टकोके गेपाकोला।
आशीर्वाद हटै धिक्कार
(मत्ती ५:१-१२)
20येशूये मेनो चेलाकोके ङोस्म टेकाङ,
“ए गरीबको, नाक्को आशिषित आले,
हीके टेहाङ नाक्को ज परमेश्वरे राज्य जाट्च भर्मीको आले।
21इन्नाङ रन्छीचको, नाक्को छ आले,
हीके टेहाङ नाक्को न्हुनीङ र्हास्डनीस।
इन्नाङ राप्चको, नाक्को आशिषित आले,
हीके टेहाङ नाक्को रेट्डनीस।”
22“भर्मीयो मीजाके विश्वास जाट्चये भर्मीकोइ नाक्कोके माजाक्नाङ, नाक्कोके होसोकोइ छीक्म याहानाङ हटै नाक्कुङ बेइज्जत जाट्नाङ, हटै नाक्कुङ म्यार्मीनो अपमान जाट्नाङ नाक्को आशिषित छान्डनीस। #१ पत्रु ४:१४ 23होट छान्नाङ नाक्को मराङ्नीस, हटै मराङ्म फोर्झोनीस, हीके टेहाङ नाक्कोके स्वर्गाङ बडाको इनाम ले। हीके टेहाङ होसोकुङ पुर्खाकोइ घनीङ खयाकाँवो अगमवक्ताकोके होट न जाटा।” #२ इति ३६:१६; प्रे ७:५२
24“बाकी र धिक्कार, इन्नाङ धनी लेचकोके,
हीके टेहाङ नाक्कोइ नाक्कुङ सुख डीहीन्म भ्यामनानीस।”
25धिक्कार! इन्नाङ र्हास्चको,
हीके टेहाङ नाक्को रन्छीडनीस।
धिक्कार! इन्नाङ रेट्चको,
हीके टेहाङ नाक्को शोक जाट्डनीस हटै राप्डनीस।
26“धिक्कार! भर्मीको टुइङ प्रशंसा डीहीन्चको हीके टेहाङ होट ज होसोकुङ पुर्खाकोइ झुटा अगमवक्ताकोके प्रशंसा जाटोला।”
शत्रुकोके घनीङ रोह जाट्के
(मत्ती ५:३८-४८; ७:१२)
27“बाकी र ङाके सेचकोके ङै टेलाङ, नाक्कुङ शत्रुके रोह जाट्नीस, नाक्कोके माजाक्चकोके सेहेम जाट्नीस।” 28नाक्कोके ढीचकोके आशिष याहानीस, नाक्कोके मासेहेच जाट्चकोके प्रार्थना जाट्म याहानीस। 29नाक्कोके काट मीगालाङ ङाप्चकोके आस्काट मीगाला घनीङ ठोह्म याहानीस। नाक्कुङ कोट लाम याहाचके, नाक्कुङ कमीज घनीङ लाके याहानीस। 30ङीहीचकोके याहानीस, हटै नाक्कुङ सामानको लाम याहाचकोके सामानको ल्हेट्म माङीहीनीस। 31नाक्कोके फोकोइ कुट जाट्म येहे लख सेले फोकोके घनीङ होट ज जाट्नीस।#मत्ती ७:१२
32“नाक्कोइ नाक्कोके जाक्च भर्मीकोके मात्रै रोह जाटा टेहाङ, नाक्कोके ही स्याबासी छान्ने र? होट च पापीकोइ घनीङ मेकोल्लाके रोह जाट्चकोके रोह जाट्ले। 33हटै नाक्कोइ नाक्कोके सेहेच जाट्च भर्मीकोके मत्रै सेहेच जाटा टेहाङ, नाक्कोके ही स्याबासी छाना र? होट च पापीकोइ घनीङ जाट्ले। 34हटै नाक्कोइ ल्हेट्म डीहीनके टेम ऋण याहाले टेहाङ नाक्कोके ही स्याबासी छाना र? होट च पापीकोइ घनीङ पापीकोके याहाच जति ल्हेट्म डीहीनके टेम ऋण याहाले। 35बाकी र नाक्कुङ शत्रुके घनीङ रोह जाट्नीस, होसोकोके सेहेच जाट्नीस, हटै होसोको टुइङ ल्हेट्म डीहीनके आशा माजाट्म याहानीस, हटै नाक्कोइ बडाको इनाम डीहीन्ने। हटै नाक्को पट्ट टेनाङ कराहाङ्च परमेश्वरो जजाको छान्ने, हीके टेहाङ होस्कोइ बैगुनीकोके हटै पापीकोके घनीङ सेहेच जाट्लेको। 36नाक्कुङ परमेश्वर बाबै दयालु छान्च लख नाक्को घनीङ दयालु छान्नीस।”
फोकोके दोष मायाहानीस
(मत्ती ७:१-५)
37“भर्मीकोके दोष मालैडीनीस, होट न नाक्कोके परमेश्वरे दोष मालैडीलेको। भर्मीकोके दोष मालैडीनीस होट न नाक्कोके भर्मीकोइ दोष मालैडीले। भर्मीकोके क्षमा याहानीस होट न नाक्कोके परमेश्वरे क्षमा याहालेको। 38भर्मीकोके याहानीस हटै परमेश्वरे नाक्कोके याहालेको। सेहेम जाप्म खन्डीम-खन्डीम, होयोक्म-होयोक्म, पीङ्मको पीङ्म हटै यास्ड यास नाक्कुङ मीकुहाङ डाम याहालेको, नाक्कोइ जसो जाप्म याहाडनीस होट ज नाक्कोइ डीहीनढनीस।”
39येशूये होसोकोके काट आहान टेकाङ, “ही काट मीमीक माडाङ्चये आस्काट मीमीक माडाङ्चके डोरडीके ह्योक्ले र?” होसोको न्हीसवान ज खाल्डाङ माखोरोले र?#मत्ती १५:१४ 40चेला मेनो गुरु टेनाङ सेहेच माछान्ले, बाकी र होचे पट्ट पाहाम भ्यानीसीङ होसै मेनो गुरु लख छान्ले।#मत्ती १०:२४-२५; यूह १३:१६; १५:२०
41“मेल्लौ मीमीकावो सीङ माडाङ्चकोइ कुट मेनो लफौ मीमीकावो धुलो डाङ्ढनीस? 42मेल्लौ मीमीकाङ लेच सीङ माडाङ्ढनीस टेहाङ कुट मेल्लौ लफाके टेके ह्योक्ढनीस, ‘लफा ङाके नोङो मीमीकाङ लेच धुलो छीक्के योहो?’ ए झुट ङाक्म स्वाङ पार्डीच भर्मीको! पहीला मेल्लौ मीमीकाङ लेच सीङके डोन्नीस हटै बल्ल मेनो लफौ मीमीकाङ लेच धुलो छीक्के छयाङ्गै डाङ्ढनीस।”
मीमा हटै होच्यौ मीस्या
(मत्ती ७:१६-२०; १२:३३-३५)
43“कुसै र सेहेच मीमै मासेहेच मीस्या मास्याटाक्ले न ट मासेहेच मीमै सेहेच मीस्या स्याटाक्ले। 44पट्ट न मीमाको मेनो मीस्यै चीन्डीस्ले। हीके टेहाङ जुवो झ्याङीङ कुच्यै र भुटुक माढुम्ले न अंगुर झुरुम्ले।#मत्ती १२:३३ 45सेहेच भर्मीये मेनो मीगीनो भण्डारीङ सेहेच कुरा छीक्ले, हटै मासेहेच भर्मीये मेनो मीगीनो भण्डारीङ मासेहेच कुरा छीक्ले। हीके टेहाङ भर्मीयो मीगीनाङ ही ले होसै कुराको न होचे ङाक्ले।” #मत्ती १२:३४
न्हीस खालावो इम
(मत्ती ७:२४-२७)
46“ङै टेच कुराको माजाट्के आले टेहाङ नाक्कोइ ङाके हीके ‘प्रभु, प्रभु’ टेढनीस? 47ङाटुङ राम्ह ङै टेच कुराको सेम ङै टेच मन्डीच भर्मी कुन्च छान्ने, ङै नाक्कोके टेलाङ। 48होस इम खास्च भर्मी लख आले, जसे लुप्म कोहोम इमो जग चट्टान टकनी खासा। हटै बेहेरी नमस राहा हटै भल राम्ह होसै इमाङ ठोहाका बाकी र हीड ज माछाना, हीके टेहाङ होस इमो जग सेहेम खास्मलेया। 49बाकी र ङै टेच कुराको सेनीसीङ ड माडीहीच भर्मी बलीयो जग माखास्म बालुवाङ इम खास्च भर्मी लख आले। बेहेरी नमस राहानाङ भले होसै इमके ठोहाका हटै होस इम हुला, हटै पट्ट विनाश छाना।”
လက္ရွိေရြးခ်ယ္ထားမွု
लूका 6: WMGR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024 (Active), Mother Tongue Translators Society and Wycliffe Bible Translators, Inc. All rights reserved.