लूका 8
8
येशूके डुस्स माझाको
1होसै न्हुनीङ येशूये परमेश्वरो राज्यौ सेहेच समाचार सेटाक्म सहर-सहर हटै लाङ्घा-लाङ्घा आन्काङ। होस्कोर कठा होस्कुङ बाह्र चेलाको लेया। 2हटै दुष्ट आत्मा र छाच-बीक्चइङ गेप्च अरु माझाको घनीङ लेया। होलाङ लेच माझाकोवाङ सात गोटा दुष्ट आत्माको छीक्च माझा मरियम मग्दलिनी घनीङ लेया। 3हटै हेरोद राजौ दरबाराङ काम जाट्च हाकीम खुजासो माझा योअन्ना, सुसन्ना हटै ढलीङ अरु माझाकोइ मेक्को कठा लेच सम्पत्तिये येशू हटै येशूवो चेलाकोके सेवा जाट्म डुसा। #मत्ती २७:५५-५६; मर्कू १५:४०-४१; लूक २३:४९
छोयोको भेरेस्स काट भर्मीयो आहान
(मत्ती १३:१-९; मर्कूस ४:१-९)
4हटै ढलीङ भर्मीको ढलीङ ठावीङ येशूटुङ राम्ह जम्मा छाना। होसोकोके येशूये इसै आहान टेकाङ।
5“काट भर्मी छोयो भेरेस्के मेनो गार्हाङ आना। छोयो भेरेस्नाङ, कोही छोयो लामाङ झाल्म भर्मीकोइ फेटा, हटै नमाङ भुर्च ग्वाकोइ ज्या। 6हटै कोही छोयोको ल्हुङ्गर्याक झाङ झाला, हटै होसै छोयोको गीट्ढ्याङ र चहीस्च झा हटै डी माडीहीन्म छोक्म आना। 7हटै कोही छोयोको जुवो घारीयाङ झाला, जुको घनीङ गीट्च छोयोकोकठा होरा, बाकी र जुवो घारीये टुम साट्म याहा। 8हटै कोही छोयोको सेहेच झाङ झाल्म सेहेम गीटा र सय गुणा मीस्या स्याटाका।”
येशूये इसै आहान टेम भ्यानीसीङ, भर्मीकोके च्याक्म टेकाङ, “सेके नेकेप लेचकोइ सेहेम सेनीस!”
आहान टेच कारण
(मत्ती १३:१०-१७; मर्कूस ४:१०-१२)
9हटै येशूवो चेलाकोइ इसै आहानो अर्थ ही आले टेम गीना। 10येशूये होसोकोके टेकाङ, “परमेश्वरो राज्यौ भीत्री कुराको नाक्कोइ मात्र थाहा डीहीनके डीहीन्मले, बाकी र अरुको कठा ङा आहानाङ मत्रै ङाक्लाङ। होट छान्नीसीङ होसोकोइ ङोसा टेहाङ र माडाङ्ले, हटै सेया टेहाङ र मावार्ले।” #यशै ६:९-१०
येशूये छोयोको भेरेस्स आहानो बारेयाङ टेच
(मत्ती १३:१८-२३; मर्कूस ४:१३-२०)
11इस आहाने ही टेके पाच आले टेहाङ-छोयोको टेच परमेश्वरो बचन आले 12हटै लामाङ झाल्च छोयोको चहीन्या परमेश्वरो बचन सेचको आले बाकी र होसोको बचन सेनीसीङ र विश्वास माजाट्च हटै उद्धार माडीहीन्चको आले हीके टेहाङ शैतान राम्ह होसोकुङ मनीङ बचन खुस्म नुन्मयाहाले। 13ल्हुङाङ झाल्चको चहीन्या बचन सेम मराङ्म लाचको आले, बाकी र छोयोकुङ म्यार्का मालेच लख होसोकोइ परमेश्वरो बचन सेहेम मनाङ माडाचये होसोकोइ कलापके मत्रै विश्वास जाट्ले हटै दुख-कष्ट राहानाङ परमेश्वरके विश्वास जाट्के डास्ले। 14हटै जुवो घारीयाङ झाल्चको चहीन्या होस भर्मीको आले जसे बचन सेले बाकी र चीन्ता फिक्रीये, धन-सम्पत्तिये हटै जीबनो मोज-मज्जै होसोकोके गाँज्डीले हटै होसोकोइ मीस्या मास्याटाक्ले। 15बाकी र सेहेच झाङ झाल्चको चहीन्या परमेश्वरो बचन सेम मेक्कुङ सेहेच हटै पवित्र मीगीनाङ डाचको आले। होसोको परमेश्वरो बचन सेम बचने टेच लख न जाट्म हटै मीस्या मास्याटार माझोस्म वाङ्चको आले।
ढाच ढेब्रीयो आहान
(मर्कूस ४:२१-२५)
16“कुच्यै र ढेब्री ढाटार गीरीङे माहुपाक्ले, न खाटो म्हाकाङ डाले। बाकी र इमाङ राहाचकोके ट्याङाक्के टेम घाङ्च ठावाङ डाले।#मत्ती ५:१५; लूक ११:३३
17इट न आर्चीहीच पट्ट कुराको परमेश्वरे टन्हाक्म याहालेको, हटै मावार्च पट्ट कुराको परमेश्वरे टन्हाक्म याहालेको।#मत्ती १०:२६; लूक १२:२
18होट छान्नाङ ङौ शिक्षाको सेहेम सेनीस। ङौ शिक्षाको सेहेम वार्चकोके परमेश्वरे अझ ढलीङ ज्ञान याहालेको, बाकी र ङौ शिक्षाको मावार्चकोटुइङ परमेश्वरे होसोकोइ वार्च लख सेच र स्याट्म याहालेको।” #मत्ती २५:२९; लूक १९:२६
येशूवो जहान
(मत्ती १२:४६-५०; मर्कूस ३:३१-३५)
19अब येशूवो बोइ हटै भयाको येशूके डुप्के राहा, बाकी र ढलीङ भर्मीयो भीडे जाट्नाङ होस्कुङ खेरेप आन्के माह्योका। 20होट छान्नीसीङ काट भर्मीये येशूके टेया, “नाकुङ बोइ हटै भयाको नाकोके डुप्के बहीरीङ वाङ्म मुमले।”
21बाकी र येशूये होसोकोके टेकाङ, “परमेश्वरो बचन सेचको हटै बचने टेच लख जाट्चको न ङौ बोइ हटै भयाको आले।”
आँधीये येशूके डीहा
(मत्ती ८:२३-२७; मर्कूस ४:३५-४१)
22कयाक येशू होस्कुङ चेलाकोर कठा डुङ्गाङ काल्हकाङ हटै होसोकोके टेकाङ, “कानको तालो पार्लाक आनीङ।” होट छान्नीसीङ होसोको डुङ्गाङ काल्हम आना। 23होसोको आन्नाङ येशू मीस्के ठाल्काङ। काखीनीङ तालाङ बेहेरी ज हुरी राहा हटै डीयो छाले डुङ्गा पीङ्के ठाल्नीसीङ होसोको तालाङ ठाहाच खतराङ परीसा। 24चेलाको राहा हटै येशूके इट टेम रीन्हीका, “गुरु ज्यू, गुरु ज्यू कानको ठाहाम सीके पा!” होट छान्नीसीङ येशू सोकाङ र नम्सुके हटै घाङ्च छालके नार्काङ। आँधी बाहा हटै छाल घनीङ स्याङ्टै छाना।
25येशूये चेलाकोके गीन्काङ, “हीके नाक्कोइ ङाके भर माजाट्डनीस?”
चेलाको होसै डाङ्म छक्क परीसा हटै बेहेरी बीरीम मेक्को-मेक्कोकठा गीना, “इस येशू कुन्च भर्मी आले? नम्सु हटै तालो छाले र इस्कोइ टेच डीहीले!”
येशूये ढलीङ दुष्ट आत्मा लग्डीस्च भर्मीके गेपाक्च
(मत्ती ८:२८-३४; मर्कूस ५:१-२०)
26येशू हटै होस्कुङ चेलाको गालील तालो पार्लाक गेरासेनस टेच ठावाङ टाराहा। 27येशू हटै चेलाको डुङ्गाइङ ख्योचनीङ सहरीङ दुष्ट आत्माको लग्डीस्च काट भर्मी होसोकोटुङ राहा। होसै भर्मी ढलीङ समयीङ होडा इमाङ ज मामुम बढीन घनीङ माबीहील्म चिहानो क्यापलाक मुवोला। 28येशूके डाङ्नीसीङ होसै भर्मी बेहेरी च्याक्म होस्कुङ मीहीलाङ घोप्टो परीस्म बडाको मीङाकाङ च्याक्म टेया, “पट्ट टेनाङ कराहाङ्च परमेश्वरो मीजा येशू, नाकुङ ङा कठा ही काम? ङाके ढलीङ दुख नायाहानी टेम ङै बिन्ती जाट्ले।” 29हीके टेहाङ येशूये अघेर ज होसै दुष्ट आत्माके ख्योम आन्के आज्ञा याहामलेकाङ। होसै भर्मीके ढलीङ खेप होसै दुष्ट आत्मै दुख याहाम लेया। भर्मीकोइ होच्यौ मीहुट मीहीलाङ साङ्लै छ्याक्म डानाङ र साङ्लाके भराक्म दुष्ट आत्माकोइ उजाड ठावाङ आन्च जाटाला।
30येशूये होस्के गीन्काङ, “नोङो म्यार्मीन ही आले?”
होचे टेया, “फौज।” हीके टेहाङ होस्के ढलीङ दुष्ट आत्मा लग्डीस्मलेया। 31दुष्ट आत्माकोइ “कानकोके दण्ड याहाच ठावाङ माबीर्हीन्नी” टेम येशूके बिन्ती जाटा।
32होसै डाँडौ पाखाङ बडाको वाको हुल स्यास्मज लेया। होट छान्म दुष्ट आत्माकोइ कानकोके होसै वाको हुलाङ आन्के याहानी टेम येशूके बिन्ती जाटा। हटै येशूये आन्के याहाकाङ। 33दुष्ट आत्माको होस भर्मीटुइङ ख्योम आन्नीसीङ वाको हुलाङ पहीसा। हटै होसै वाको हुल पाहाडीङ खेर्म म्हाक्लाक खोर्होम तालाङ ठाहाम सीया।
34वाक आर्छाचकोइ होट छान्च डाङ्च डीक्को ज होसोको खेर्म आन्म सहरलाक हटै वारलाक पार्लाकाँवो लाङ्घालाक पट्ट कुराको होँसा। 35हटै भर्मीको ही छाना टेम ङोस्के होलाङ राहा। भर्मीको येशूटुङ राहानाङ होस दुष्ट-आत्मा लग्डीस्च भर्मी गेप्नीसीङ बढीन बीहील्म येशूवो मीहीलटुङ गेप्च मुच डाङ्म होसोको बीरीया। 36होस घटना डाङ्च भर्मीकोइ अरू राहाच भर्मीकोके घनीङ कुट होसै दुष्ट आत्मा लग्डीस्च भर्मी गेपा टेम होँसा। 37हटै गेरासेनसो पट्ट भर्मीकोइ येशूके होटीङ आन्नी टेम बिन्ती जाटा, हीके टेहाङ होसोको बेहेरी ज बीरीमलेया। होट छान्नीसीङ येशू डुङ्गाङ काल्हम आन्काङ।
38होसै दुष्ट आत्मा लग्डीस्म गेप्च भर्मीये मेन्के येशूकठा आन्के याहानी टेम येशूके बिन्ती जाटा, बाकी र येशूये होस्के इट टेम बीर्हीन्काङ,
39“नोङो इमाङ ल्हेस्म आन्न हटै परमेश्वरे नाङ्के जाट्म याहाच होसै पट्ट कुराको अरु भर्मीकोके होँसो।”
होट छान्नीसीङ होसै भर्मी आना हटै सहर भरीयाङ मेन्के येशूये जाट्म याहाच कुराको सेटाका।
याइरसो नानीजा हटै मीही आन्च माझा
(मत्ती ९:१८-२६; मर्कूस ५:२१-४३)
40गालीलो ढलीङ भर्मीकोइ येशूके वाङ्म मुमलेया, होट छान्नीसीङ होस्को गेरासेनसीङ ल्हेस्म राहानाङ होसोकोइ होस्कोके मनीटा जाटा। 41हटै सभा मुच इमो काट हाकीम येशूटुङ राहा। होच्यौ म्यारमीन याइरस लेया। होचे येशूवो मीहीलाङ घोप्टो परीस्म होस्कोके मेनो इमाङ राम्ह याहानी टेम बिन्ती जाटा। 42हीके टेहाङ होच्यौ काट जा १२ ल्हेसो माझा मीजा बेहेरी छाम सीके पामलेया। होट छान्नीसीङ येशू याइरसकठा आन्काङ।
होस्को आन्नाङ ढलीङ भर्मीकोइ होस्कोलाक ढुस्म ज लेया। 43होसै भीडाङ कुच्यै र गेपाक्के माह्योक्च १२ ल्हेसीङ होडा मीही आन्च ब्यथै छाच काट माझा घनीङ लेया। 44होसै माझा थाहा मायाम्ह न्हुन्लाकीङ राम्ह येशूवो बढीनो धरीयाङ छुच डीक्को मीही आन्के बाहा। 45हटै येशूये, “ङाके कुचे छुवा?” टेम गीन्काङ।
हटै पट्टकोइ ङै माआले टेम टेनाङ पत्रुसे टेया, “गुरु ज्यू, ढलीङ भर्मीकोइ नाकोके घेर्डीम ढुस्म ज ले।”
46बाकी र येशूये टेकाङ, “ङाके वार्-वारो ज कुचे आला छुच ज आले, हीके टेहाङ ङौ मीज्यानीङ गेपाक्के शक्ति ख्योम आन्च ङै थाहा डीन्हा।” 47हटै होस माझै मेन आर्चीम्ह मुके माह्योक्च मीबीरीसे काम्डीस्म येशूवो मीहीलाङ घोप्टो परीसा हटै पट्ट भर्मीकुङ अघेर हीके येशूके छुच हटै कुट होस्कोके छुच डीक्को ज मेन पट्ट गेपा टेम याहा। 48येशूये होस माझाके टेकाङ, “ए नानीजा, नेङे ङाके विश्वास जाट्चये नाङ गेप्च आले। सेहेम आन्न, परमेश्वरो शान्ति नाङकठा अटछाने।”
49येशू होस माझाकठा ङाक्मज लेनाङ याइरसो इमीङ काट भर्मी राम्ह याइरसके टेया, “नाकुङ नानीजा सीम भ्या। अब गुरुके दुख मायाहानी।” 50बाकी र येशूये इसै कुरा सेम याइरसके टेकाङ,
“नाबीरीन, विश्वास मत्रै जाटो हटै नोङो नानीजा गेप्ले।” 51याइरसो इमाङ टाक्म येशूये पत्रुस, यूहन्ना, याकूब, हटै होस नानीजौ बोइ-बाबै टेनाङ अरु कुसैके र होस नानीजा लेच ठावाङ आन्के मायाहाकाङ। 52होलाङ भर्मीको राप्म शोक जाट्मज लेया, बाकी र येशूये होसोकोके टेकाङ, “होस मासीमले बाकी र मीस्मले, होट छान्नाङ नाराप्नीस।”
53हटै होस्कुङ कुरा सेम होस्कोइ टेच माडीहीम खीसी जाट्म पट्टको रेट्के ठाला, हीके टेहाङ होसै नानीजा सीया टेम होसोकोइ वार्मलेया। 54बाकी र येशूये होस नानीजौ मीहुट जीम्म इट टेम एट्काङ, “ए नानीजा, सोन।” 55हटै होस नानीजौ मीसास ल्हेस्म राम्ह होसै जुरूक्कै सोनीसीङ मुवा। हटै येशूये, “नानीजाके हीड ज्याके याहानीस” टेम होसोकोके टेकाङ। 56नानीजौ बोइ-बाबैको होसै डाङ्म छक्कै परीसा, बाकी र येशूये होसोकोके इसै कुरा कुस्के र मासेटाक्नीस टेम हुकुम याहाकाङ।
လက္ရွိေရြးခ်ယ္ထားမွု
लूका 8: WMGR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024 (Active), Mother Tongue Translators Society and Wycliffe Bible Translators, Inc. All rights reserved.