انجیلِ مَرقُس 13
13
نِشونِه‌یَلِ آخِرِ ای زمون
1موقِی که عیسی وَ معبدِ خداوند زَه وَدَر، یکی وَ شاگردَلِش وَش گُت: «استاد، سِی! چه بَردَلِ باشکوهی وِ چه ساختِمونَلِ باشکوهی!» 2عیسی وَش فرمایش کِه: «تَمومِ ای ساختِمونَلِ گَپو نَه ایبینی؟ بَردی ری بَردِ دَ نیوِیسِه، بلکم هَمَشون ایرُمبِن.»
3وختی عیسی سَرِ کُو زیتون ریوَری معبدِ خداوند نِشَسَه بی، پطرس وِ یعقوب وِ یوحنا وِ آندریاس مِنِه خَلفَت وَش پُرسییِن: 4«وَ ایما بِگُ کِی ای اتّفاقَل اییُفتِه وِ نِشونۀ نِزِنگ وابی‌یَنِشون چِنِه؟» 5عیسی وَشون فرمایش کِه: «حَواستون بو تا کسی ایشا نَه وَ رَه وِل نَکِنِه. 6خیلی‌یَل وَ نومِ مِ ایان وِ ایگُن، "مِ هَموِّنُم" وِ خیلی‌یَلَه وَ رَه وِل ایکِنِن. 7وختی درموردِ جَنگَل ایشنِفیت وِ خَوَرِ جَنگَل وَ گوشتون ایرَسِه، آشُفتَه نَوابِیت. یِه ایبایِس اتّفاق بییُفتِه، امّا هَنی آخِرِ کار نَرَسییِه. 8مِلتی وَ ضدِ ملتِ دَ وِ مَملِکَتی وَ ضدِ مَملِکَتِ دَ ایوَریسِن. مِنِه جایَلِ جورواجور زَمین‌جِمِشتَل ایایِه وِ قحطی‌یَل ایابو. امّا یِه تِنا مِی شروعِ دردِ زِیمونِه.
9«وِ امّا ایشا حواستون وَ خِتون بو، سی‌یِکِه وَ خاطرِ مِ ایشا نَه اییِن وَ مَحکَمَه‌یَل وِ مِنِه کنیسه‌یَل ایبَندِنِتون وَ فَلک، وِ در حضورِ حاکِمَل وِ پادشایَل ایوِیسیت تا در برابرِ اونگَل شهادت بِئیت. 10بایِس اَوَل ای خَوَرِ خَشِ پادشاییِ خدا وَ تَمومِ مِلَتَل اعلام وابو. 11هر وخت ایشا نَه بِگِرِن وِ بویَرنِتون وَ مَحکَمَه، وَ نَهاتَر هول نَیاشتَه بِیت که چه بِگِیت، بلکم هر چیئی که مِنِه او ساعت وَ ایشا گُتَه وابو، وِه نَه بِگِیت؛ سی‌یِکِه کسی که گَپ ایزَنِه نَه ایشایِیت، بلکم روح‌القدسِه. 12کَکا، کَکا نَه وِ بُو، اولادَ وَ کُشتَن اییِه. اولادَل وَ ضدِ دِی‌بُو ایوَریسِن، اونگَلَه وَ کشتَن اییِن. 13همَه وَ خاطرِ نومِ مو وَ ایشا نفرت ایگِرِن، امّا هرکه تا وَ آخِر طاقت بیارِه، نجات ایجورِه.
14«امّا وختی او "کِفاراتِ نابودگَرَ" مِنِه جِیی که نبایِس، وِیسایَه بِوینیت - کسی که ایخونِه حَواسِش بو - اوسِه اونگَلی که مِنِه وِلاتِ یهودیَه یَن، ایدَرَن وَ کُویَل؛ 15هرکه سَرِ تُو بو، سی وَگِرُتَنِ چیئی، نیایِه دومِن وِ نیرَه مِنِه حونَه؛ 16هرکه سَرِ زمین بو، سی وَگِرُتَنِ قَباش نییَرگَردِه وَ حونَه. 17وای وَ حالِ زَنَلی که مِنِه او روزَل حامِلَه بون یا بَچَه وَ شیرِشون بو! 18دعا کِنیت که ای اتّفاقَل مِنِه زِمِسون نَیُفتِه. 19سی‌یِکِه مِنِه او روزَل مِصیبتی که اتّفاق اییُفتِه مِثلِش وَ اَوَلِ دنیایی که خدا آفَری تا ایسِه اتّفاق نَیُفتایِه وُ وَتَه هَم اتّفاق نییُفتِه. 20وِ اَر خداوند او روزَلَه کوتاه نیکِه، هیچ بشری جونِ سالم وَدَر نیبُرد. امّا وَ خاطرِ برگزیدِه‌یَل، که خُوش اونگَلَه جیا کِردِه، او روزَلَه کوتاه کِردِه. 21مِنِه او زمون، اَر کسی وَ ایشا بِگُ: "سِی کُ، مسیحِ موعود وِیچِنِه"، یا "سِی کُ، وِّ وُچِنِه!" باوَر مَکِنیت. 22سی‌یِکِه عِده‌ای وَ اسم مسیحِ موعود وِ پیغمبَرَلِ وَدِرو ایوَریسِن، نِشونِه‌یَل وِ معجزه‌یَلی ایکِنِن تا اَر وابو، برگزیدِه‌یَلَه وَ رَه وِل کِنِن. 23پَ حَواستون بو، سی‌یِکِه وَ نَهاتَر تَمومِ اینگَلَه وَتون گُتُم.
24«امّا مِنِه او روزَل، بعدَ او مصیبَتَل،
«"اَفتو تاریک ایابو
وِ ماه دَ نور نییِه.
25سِتارِه‌یَل وَ آسمون ایُفتِن دومِن
وِ قُدرَتَلِ آسمون اییُفتِن وَ دَکِسَن."
26اوسِه مردم کِرِ انسانَه ایبینِن که بِی قدرت وِ جلالِ عظیم مِنِه اُورَل ایایِه. 27وِّ فرشته‌یَلَه بِسی ایکِنِه وِ برگزیدِه‌یَلِشَه وَ چار گوشۀ دنیا، وَ ای سَرِ زمین تا او سَرِ آسمون، جَم ایکِنِه دورِه یَک.
28«ایسو، وَ دارِ انجیر ای درسَه یای بِگِریت: هَمیِکِه کِلغِه‌یَلِش تِنجَه ایزَنِه وِ بَلگ اییِه، ایفَمیت که تاوِسون نِزِنگِه. 29هَمیطو هَم، هر وخت بِوینیت که ای چییَل اتّفاق اییُفتِه، بِفَمیت که پادشایی خدا نِزِنگ، بلکم وِیسایِه دَمِ دَر. 30وَراسی، وَ ایشا ایگُم، که تا تَمومِ اینگَل اتّفاق نَیُفته، ای نسل وَ بِین نیرَه. 31آسمون وِ زمین وَ بِین ایرَه، امّا گَپَلِ مِ وَ بِین نیرَه.
بَندیرِ وَرگشتَنِ مسیح
32«امّا وَ او روز وِ او ساعت هیشکَه خَوَر نَیارِه غیرَ بُو آسمونی؛ حتی فرشته‌یَلِ آسمون وِ کُر هَم وَش خَوَر نَیارِن. 33پَ وَ هوش بِیت، دیار بِیت، سی‌یِکِه نُونیت او زمون کی ایرَسِه. 34او زَمون مِی کسی یَه که رَتِه بو وَ سفر وِ موقِی رَتَن، حونَشَه دایَه بو وَ دَسِ خِذمتکارَلِش، وُ وَ نِی هر کویَکی وظیفه‌ای نَهایَه بو وُ وَ دَربون هَم دستور دایَه بو که دیار وِیسِه. 35پَ ایشا هم دیار بِیت، سی‌یِکِه نُونیت صابحونَه کی ایایِه، شُو یا نصفه شُو، موقِی بُنگِ قِروس یا گَکون. 36نَکِنه وِّ یِه دَفَه بیایِه وِ ایشا نَه مِنِه خُو بِوینِه. 37اوچیئی که وَ ایشا ایگُم، وَ هَمَه ایگُم: دیار وِیسیت!»
လက္ရွိေရြးခ်ယ္ထားမွု
انجیلِ مَرقُس 13: SLB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company