انجیلِ یوحنا 17
17
دعا عیسی
1دِما ایی قِصَه‌یا، عیسی سِیل کِرد وِ آسمُو وَ گُت: «بُوَه، او ساعت رَسِسَه. کُرِتِه جِلال بِه تا کُرِت هَم تو نِه جِلال بِئَه. 2سی یَکِه تو اقتدارِ گِردِ بشرِ نِه دِئیَه وِ او، تا وِ گِردِ وِنُونی کِه دِئیَه وِش، حیاتِ ابدی بِئَه. 3وَ یِنَه‌آ حیاتِ ابدی کِه تو نِه، تَنیا خدای حقیقی، وَ عیسی مسیحِ نِه کِه کِل کِردیَه، بَشناسَن. 4مِه کاری نِه کِه وِ مِه سپردی، وِ آخِر رَسَنِم، وَ وِ چِنی تو نِه وِ ری زِمی جِلال دَم. 5پس ایسِه اِ بُوَه، تو هَم مِه نِه دِ حضورِ خُوت جِلال بِه، هِه وِ او جِلالی کِه وِرَز یَکِه دنیا وِ وجود بیا، دِ تِه تو داشتِم.
6«مِه نُومِ تو نِه وِ مردِمی کِه دِ دنیا وِ مِه دِئی، دیاری کِردِم. هینِ تو بییِن وَ تو وِنُو نِه دِئی وِ مِه، وَ کلُومِ تو نِه نِئَه داشتِن. 7ایسِه فَمِسِنَه کِه هَر چی کِه دِئیَه وِ مِه، وِ راسی دِ لا تونَه. 8سی یَکِه کلُومی نِه کِه وِ مِه دِئی، دَم وِشُو، وَ وِنُو وَه نِه قبول کِردِن وَ دُونِسِن کِه دِ تِه تو اُومامَه، وَ باوَر کِردِن کِه تو مِه نِه کِل کِردیَه. 9دعا مِه سی وِنُونَه؛ مِه نَه سی دنیا بَلکم سی وِنُونی دعا می‌کِم کِه تو وِ مِه دِئیَه، سی یَکه هینِ تونَن. 10هَر چیئی کِه هینِ مِه‌نَه، هینِ تونَه وَ هَر چیئی کِه هینِ تونَه، هینِ مِه‌نَه؛ وَ دِ وِنُو جِلال پیا کِردِمَه. 11بیشتِر دِ یَه نِمی‌‌مُونِم دِ دنیا، اما وِنُو هَنی هان دِ دنیا؛ مِه میام وِ تِه تو. اِ بُوَه قدوس، وِنُو نِه وِ قدرتِ نُومِ خُوت کِه وِ مِه دِئیَه، حفاظت کُو، تا یَک بان، هِه چِنُو کِه اِیما یَک هیسیم. 12مِه وِنُو نِه تا زِمُونی کِه واشُو بیئِم، حفاظت کِردِم، وَ دِ وِنُو وِ قدرتِ نُومِ تو کِه وِ مِه دِئیَه، حفاظت کِردِم. هیچ کُوم دِ وِنُو هِلاک نِوی، غیرِ کُرِ هِلاکت، تا نیسَنَه مقدس اَنجُوم با. 13اما ایسِه میام وِ تِه تو، وَ ایی قِصَه‌یا نِه زِمُونی مُوئِم کِه هَنی هام دِ دنیا، تا دِ شایی مِه لُوبَریز بان. 14مِه کلُومِ تو نِه دَم وِشُو، اما دنیا بَیئِش دِشُو مِی‌ما، سی یَکِه هینِ دنیا نیسِن، هِه چِنُو کِه مِه هینِ دنیا نیسِم. 15مِه نِمی‌حام کِه وِنُو نِه دِ ایی دنیا بُوری، بَلکم می‌حام دِ او شَریر حفاظتشُو بَکی. 16وِنُو هینِ ایی دنیا نیسِن، چِنُو کِه مِه هَم هینِ ایی دنیا نیسِم. 17وِنُو نِه وَخمِ حقیقت کُو، کلُومِ تو حقیقت اَ. 18هِه چِنُو کِه تو مِه نِه کِل کِردی وِ دنیا، مِه هَم وِنُو نِه کِل می‌کِم وِ دنیا. 19مِه خُومِه وِ سُنَه وِنُو وَخم می‌کِم، تا وِنُو هَم وَخمِ حقیقت بان.
20«مِه تَنیا سی وِنُو نِمی‌حام، بَلکم هِه چِنی سی کَسُونی می‌حام کِه وِ واسطَه کلُومِ وِنُو وِ مِه ایمُو میارَن، 21تا همَه یَک بان، هِه چِنُو کِه تو، اِ بُوَه، های دِ مِه وَ مِه هام دِ تو. چِنُو کُو کِه وِنُو هَم دِ اِیما بان، تا دنیا باوَر بَکَه کِه تو مِه نِه کِل کِردیَه. 22وَ مِه جِلالی نِه کِه وِ مِه دِئی، دَم وِشُو تا یَک بان، چِنُو کِه اِیما یَک هیسیم؛ 23مِه دِ وِنُو وَ تو دِ مِه. چِنُو کُو کِه وِنُو هَم وِ طورِ کامل یَک بان، تا دنیا دُونِسوئَه کِه تو مِه نِه کِل کِردیَه، وَ وِنُو نِه هِه چِنُو دوس داشتی کِه مِه نِه دوس داشتی. 24اِ بُوَه، می‌حام وِنُونی کِه دِئی وِ مِه، وا مِه بان، هِه اوچِه کِه مِه هیسِم، تا جِلالِ مِه نِه سِیل بَکَن، جِلالی کِه تو وِ مِه دِئیَه؛ سی یَکِه وِرَز شروع دنیا مِه نِه دوس داشتی.
25«اِ بُوَه عادل، دنیا تو نِه نِمی‌شناسَه، اما مِه تو نِه می‌شناسِم، وَ یِنُو فَمِسِنَه کِه تو مِه نِه کِل کِردیَه. 26مِه نُومِ تو نِه وِ وِنُو شِناسَنِم وَ می‌شناسُونِم، تا محبتی کِه تو وِ مِه داشتیَه، دِ وِنُو هَم بوئَه وَ مِه هَم دِ وِنُو بام.»
လက္ရွိေရြးခ်ယ္ထားမွု
انجیلِ یوحنا 17: NLB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company