انجیلِ یوحنا 16
16
1«ایی چیا نِه وِ شِما گُتِم تا دِ ایمُو نِفتیت. 2شِما نِه دِ کنیسَه‌یا مُونَن وِ دَر وَ حتی زِمُونی مِی‌رَسَه کِه هَر کَه شِما نِه بَکُشَه، گِمُو می‌کَه کِه خدا نِه خدمت کِردَه. 3ایی کاریا نِه می‌کَن، سی یَکِه نَه بُوَه نِه می‌شناسَن، نَه مِه نِه. 4یِنُو نِه وِ شِما گُتِم تا هِه کِه یِنُو وِ سَرِتُو میا، بیاریت وِ ویر کِه شِما نِه واخَوَر کِردیمی. وِنُو نِه دِ اول وِ شِما نَگُتِم، سی یَکِه خُوم وا شِما بیئِم.
روحِ خدا چی می‌کَه
5«ایسِه مِی‌رِم وِ تِه وَه کِه مِه نِه کِل کِردَه، وَ هیچ کُوم نِمی‌پُرسیت، ”کجا مِی‌ری؟“ 6اما وِ سُنَه ایی چیا کِه وِتُو گُتِم، دِلِ شِما غَم‌دِبار بی‌یَه. 7وا ایی حال، مِه وِ شِما راس مُوئِم کِه رَتِه‌نِم وِ نفعِ شِمانَه. سی یَکِه اَر نَرُوئِم، او یاوَر وِ تِه شِما نِمیا؛ اما اَر رُوئِم او نِه وِ تِه شِما کِل می‌کِم. 8هِه کِه او بیا، دنیا نِه دِ بارَه یَکِه گُنَه وَ صالح‌بی‌یِه وَ داوَری چینَن، قانع می‌کَه کِه تصقیرکار اَ. 9دِ بارَه گُنَه، سی یَکِه وِ مِه ایمُو نِمیارَن. 10دِ بارَه صالح‌بی‌یِه، سی یَکِه مِی‌رِم وِ تِه بُوَه، وَ دَ مِه نِه نِمِئینیت. 11وَ دِ بارَه داوَری، سی یَکِه حاکمِ ایی دنیا محکوم بی‌یَه.
12«خیلی چیا هَنی دارِم کِه وِتُو بُوئِم، اما ایسِه نَتُونیت بَفَمیت. 13اما هِه کِه روحِ حقیقت بیا، شِما نِه وِ تمُومیِ حقیقت، رهبری می‌کَه؛ سی یَکِه او دِ لا خُوش قِصَه نِمی‌کَه، بَلکم او چیئی کِه می‌شنُوئَه، مُوئَه، وَ دِ او چیائی کِه دِ پیش اَ وا شِما قِصَه می‌کَه. 14او مِه نِه جِلال مِی‌ئَه، سی یَکِه دِ او چیئی کِه هینِ مِه‌نَه، مِئی‌رَه، وِ شِما اِعلُوم می‌کَه. 15هَر چیئی کِه سی بُوَه‌آ، سی مِه‌نَه. زوتا گُتِم او چیئی کِه هینِ مِه‌نَه مِئی‌رَه، وِ شِما اِعلُوم می‌کَه.
عیسی شاگردیا نِه دِل‌گُوی مِی‌ئَه
16«دِما مدتِ کمی، دَ مِه نِه نِمِئینیت وَ دِما مدتِ کمی هَنی، دُوارَه مِه نِه مِئی‌نیت.» 17اوسِه قَری دِ شاگردیاش وِ یَکتِری گُتِن: «قَصتِ او دِ ایی قِصَه چینَه کِه، ” دِما مدتِ کمی دَ مِه نِه نِمِئینیت، وَ دِما مدتِ کمی هَنی، دُوارَه مِه نِه مِئی‌نیت“، یا دِ یَکه مُوئَه ” سی یَکه وِ تِه بُوَه مِی‌رِم“؟» 18پس وِ یَکتِری می‌گُتِن: «ایی” مدتِ کمی“ کِه مُوئَه، چینَه؟ قَصتِ او نِه نِمی‌فَمیم؟» 19اما عیسی کِه دُونِس می‌حان دِش سؤال بَکَن؛ وِشُو گُت: «یعنی دِ ایی بارَه دِ یَکتِری سوال می‌کیت کِه گُتِم، ”دِما مدتِ کمی، دَ مِه نِه نِمِئینیت، وَ دِما مدتِ کمی هَنی، دُوارَه مِه نِه مِئی‌نیت“؟ 20وِ راسی، وِ شِما مُوئِم، شِما گِریوَه‌رو وَ وِوِ می‌کیت، اما دنیا شایی می‌کَه؛ شِما غَم‌دِبار موئیت، اما غَمِ شِما وِ شایی وِرمی‌گَردَه. 21زَ دِ موقَع زائاسِه، ژُ می‌کَشَه، سی یَکِه ساعتِ او رَسِسَه؛ اما هِه کِه بچَه‌ش اُوما وِ دی، ژُ خُوشِه دَ نِمیارَه وِ ویر، سی یَکه خُشال اَ کِه انسانی اُومایَه وِ دی. 22هِه وِ چِنی، شِما هَم ایسِه غَم‌دِباریت؛ اما دُوارَه شِما نِه مِئی‌نِم وَ دِلِ شِما شای موئَه وَ هیشکَه نَتُونَه او شایی نِه دِ شِما بَسُونَه. 23دِ او روز، دَ چیئی دِ مِه نِمی‌حایت. وِ راسی، وِ شِما مُوئِم، هَر چیئی وِ نُومِ مِه دِ بُوَه باحایت، وَه نِه مِی‌ئَه وِتُو. 24تا ایسِه وِ نُومِ مِه چیئی ناحاسیتَه؛ باحایت تا پیا بَکیت وَ شاییتُو کامل با.
25«یِنُو نِه وا مَثَل وِ شِما گُتِم؛ اما زِمُونی مِی‌رَسَه کِه دَ چِنی وا شِما قِصَه نِمی‌کِم، بَلکم آشکارا دِ بارَه بُوَه وِ شِما مُوئِم. 26دِ او روز، وِ نُومِ مِه می‌حایت. وَ وِ شِما نِمُوئِم کِه مِه دِ لا شِما دِ بُوَه می‌حام، 27سی یَکه بُوَه خُوش شِما نِه دوس دارَه، سی یَکِه شِما مِه نِه دوس داریت وَ ایمُو اُوِردیتَه کِه دِ تِه خدا اُومامَه. 28مِه دِ تِه بُوَه اُومامَه وَ اُومامَه وِ مینِ ایی دنیا؛ وَ ایسِه ایی دنیا نِه ترک می‌کِم وَ مِی‌رِم وِ تِه بُوَه.»
29اوسِه شاگردیاش گُتِن: «ایسِه آشکارا قِصَه می‌کی، نَه وا مَثَل‌یا. 30ایسِه دَ دُونیم کِه دِ همَه چی خَوَر داری وَ حتی هُوجَه ناری کسی دِت بَپُرسَه. زوتا، باوَر داریم کِه دِ تِه خدا اُماییَه.» 31عیسی وِشُو گُت: «یعنی ایسِه باوَر داریت؟ 32ایمدال زِمُونی مِی‌رَسَه، وَ وِ راستی کِه هِه ایسِه رَسِسَه، کِه تَرفِه‌تین موئیت وَ هَر کُومِتُو مِی‌ریت وِ حُونَه خُوتُو، وَ مِه نِه تَنیا مِئی‌لیت؛ اما مِه تَنیا نیسِم، بُوَه ها وا مِه. 33یِنُو نِه وِ شِما گُتِم تا دِ مِه صُول‌وُسِلامتی داشتوئیت. دِ دنیا سی شِما زَمَت هی؛ اما دِل داشتوئیت، سی یَکِه مِه وِ دنیا غالُو بیمَه.»
လက္ရွိေရြးခ်ယ္ထားမွု
انجیلِ یوحنا 16: NLB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company