کاریا رسول‌یا 16
16
تیموتائوس رَت وِ جُرگَه پولُس وَ سیلاس
1پولُس رَت وِ دِربَه وَ دِما وَه اُوما وِ لِسترَه. دِ اوچِه شاگردی وِ نُومِ تیموتائوس زِنِه‌ئی می‌کِرد کِه داآش یهودی وَ ایمُودار بی، اما بُوَه‌ش یونانی بی. 2بِرارُو دِ لِسترَه وَ قونیَه دِش وِ خوئی یای می‌کِردِن. 3پولُس سی یَکِه می‌حاس او دِ سفر واردِش با، وِ سُنَه یهودیُونی کِه دِ او منطقَه زِنِه‌ئی می‌کِردِن، او نِه ختنَه کِرد، سی یَکِه همَه دُونِسِن بُوَه‌ش یونانی اَ. 4هِه کِه وِنُو دِ شهری وِ شهرِ هَنی مِی‌رَتِن، اصولی نِه کِه رسول‌یا وَ مشایخ دِ اورشلیم نِئایینی، مِی‌دَن وِ مردِم تا وِنُو نِه رعایت بَکَن. 5پس، کلیسایا دِ ایمُو جُو می‌گِرِتِن وَ هَر رو قَری وِشُو اضافَه مِئی.
رُویا پولُس دِ بارَه پیا مقدونی
6اوسِه، سَرتاسَرِ دیارِ فریجیَه وَ غَلاطیَه نِه نِئان زیر پا، سی یَکِه روح‌القدس مِناشُو کِردی کِه پِیغُومِ کلُومِ خدا نِه وِ منطقَه آسیا نُورَن. 7هِه یَکِه رَسِسِن وِ سَرحدِ میسیَه، می‌حاسِن رُوئَن وِ بیطینیَه، اما روحِ عیسی وِشُو اِجازَه نَدَه. 8زوتا، دِ میسیَه رَد بییِن وُ رَتِن وِ تروآس. 9دِ شُوگار، پولُس دِ رُویا دی کِه پیائی مقدونی اِیسایَه دِ ری‌وِریش، وِش می‌لالکَه کِه «بیا وِ مقدونیَه وَ مَهَتمُو بِه.» 10هِه یَکِه ایی رُویا نِه دی، آزِعی عازمِ مقدونیَه بیئیم، سی یَکِه خاطرجمع بیئیمُو کِه خدا اِیما نِه حاسَه تا ایی خَوَرِ خُوشِ انجیلِ نِه بِئیم وِشُو.
ایمُو اُوِردِه‌نِ لیدیَه دِ فیلیپی
11پس، دِ تروآس وا کَشتی یِه راس رَتیم وِ ساموتراکی، وَ وا صُوش رَسِسیم وِ نیاپولیس. 12دِ اوچِه رائی فیلیپی بیئیم کِه مستمرَه روم وَ یَکی دِ شهریا مهمِ او منطقَه دِ وِلاتِ مقدونیَه بی، وَ چَن رو مَنیم دِ او شهر.
13روزِ شَبات دِ شهر کِردیم وِ دَر وُ رَتیم وِ لُوءِ گِلال، وا ایی گِمُو کِه دوچِه جائی سی دعا کِردِه هی. پس نِشِسیم وَ وا زَنُونی کِه دُورِ یَک جمع بیئینی، چَک‌چِنَه کِردیم. 14دِ مینِشُو زِئنَه خداپِرَسی بی، دِ مردِمُونِ شهرِ تیاتیرا کِه وِ قِصَه‌یا اِیما گوش مِی‌دَه. او لیدیَه نُوم داشت وَ فروشندَه پارچَه‌یا گِرُو قیمتِ اَرغُونی بی. خداوند قلبِشِه گُشَن تا وِ قِصَه‌یا پولُس خو گوش بِئیرَه. 15هِه یَکِه او وا هوزِحَضِراتِ حُونَه‌ش تعمید گِرِت، وِ زور جُرِس وِمُو گُت: «اَر خاطرجمع‌ایت کِه وِ خداوند ایمُو اُوِردِمَه، بیایت وَ بِسیت دِ حُونَه مِه.» آخِر سَر تیخِش وِمُو بُرِس.
پولُس وَ سیلاس دِ هُلِفدُو
16یِه گِل کِه مِی‌رَتیم وِ جاکَه کِه دِش دعا می‌کِردیم، بَرحَردیم وِ کنیزی کِه روحِ غِیوگوئی داشت وَ دِ رَه طالع‌بینی سودِ زیادی نِصیوِ ارباب‌یاش می‌کِرد. 17او مِفتا دِ دُمِ پولُس وُ اِیما، وَ می‌قیرَن می‌گُت: «ایی پیایا، پاکاریا او خدای متعال اَن وَ رَه نجاتِ نِه وِتُو نِشُو مِی‌ئَن.» 18او چَن رو هِه چِنی می‌کِرد. آخِر سَر طاقَتِ پولُس طاق بی وَ وِرگَشت وِ او روح گُت: «وِ نُومِ عیسی مسیح وِت هُد می‌کِم کِه دِ ایی دختِر بَکی وِ دَر!» دَرجا، روح دِش کِرد وِ دَر.
19اما ارباب‌یا او کنیز هِه کِه دیئِن دَ اُمیدی وِ کاسُوویشُو نی، پولُس وُ سیلاسِ نِه گِرِتِن وَ تُرکَش بُردِنِشُو وِ بازار وِ تِه گَپُونِ شهر. 20وِنُو نِه اُوِردِن وِ تِه قاضی‌یا شهر وُ گُتِن: «ایی پیایا یهودی اَن وُ بِلبِشو وَنِنَه دِ شهرِمُو. 21آیین‌دایینی نِه یای مِی‌ئَن کِه قبول کِردِه وَ وِجا اُوِردِه‌نِشُو سی اِیما رومی‌یا جایز نی.»
22مردِم هَم وِ تیشکِ پولُس وَ سیلاس واردِ وِنُو دَس وِ یَکی بییِن. قاضی‌یا هَم هُد کِردِن جُومَه‌یا او دو نِه دِ وَرِشُو بِئَرَن وُ وا چو دِئَنِشُو. 23هِه کِه خو وا چو سیرکوشُو کِردِن، وَنِنشُو وِ هُلِفدُو وَ وِ دُورساق هُد کِردِن سخت مُتَجیشُو با. 24دُورساق هِه کِه چِنی هُد گِرِت، وِنُو نِه وَن وِ سیاچال وَ پایاشُو نِه نِئا دِ کُندَه وَ زالِنَه‌شُو کِرد.
25نِزیکی‌یا نِصمِه‌‌شُو، پولُس وَ سیلاس نِئائینی وِ دعا کِردِه وَ سی خدا سِرو می‌حَنِن، وَ باقی زِندُونی‌یا هَم وِشُو گوش مِی‌دَن. 26کِه یِه گِلی بی وِ زِمی‌لَرزَه گَپی، چِنُو کِه پِی هُلِفدُو دِراُوما وِ تَکُو وَ گِردِ دَروازَه‌یا هُلِفدُو دَرجا گُشِس وَ زالِنَه‌یا دِ گِردِشُو وا بی، اُفتا وِ هار. 27دُورساق بیار بی، وَ هِه کِه دی دَریا هُلِفدُو گُشِسَه، کَشی وا شِمشیر تا خُوشِه بَکُشَه، سی یَکِه گِمُو می‌کِرد زِندُونی‌یا جیستِنَه. 28اما پولُس وا دَنگِ بُلِن قارَن گُت: «خُوتِه دالِه‌دِر نَکُو، اِیما هایم ویچِه!» 29دُورساق پی سُوزیا نِه حاس وَ هِراسُو رَت وِ مینِ هُلِفدُو وَ هِه چِنُو کِه دِ زَلَه می‌رِکِس اُفتا وِ پا پولُس وُ سیلاس. 30اوسِه، اُوِردِشُو وِ دَر وُ پُرسی: «اِ آقایا، چی بَکِم تا نجات پیا بَکِم؟»
31جُئُو دَن: «وِ خداوند عیسی ایمُو بیار کِه تو وَ هوزِحَضِراتِت نجات پیا می‌کیت.» 32اوسِه کلُومِ خداوندِ نِه سی او وَ وِنُو کِه دِ حُونَه‌ش بییِن، اِعلُوم کِردِن. 33هِه دِ او ساعتِ شُو، دُورساق وِنُو نِه وِرداشت، زَم‌یاشُو نِه شُشت، وَ جَلدی او وَ هوزِحَضِراتِش تعمید گِرِتِن. 34او وِنُو نِه بُرد وِ حُونَه خُوش وَ سیشُو سفرِه‌ای وِلَه کِرد. او وَ گِردِ هوزِحَضِراتِش دِ یَکِه وِ خداوند ایمُو اُوِردِنَه خُشال بییِن.
35هِه یَکِه بی وِ روز، قاضی‌یا مأموریائی وِ تِه دُورساق کِل کِردِن، گُتِن: «بِئیل او پیایا رُوئَن!» 36دُورساق پولُسِ نِه دِ ایی پِیغُوم واخَوَر کِرد وَ گُت: «قاضی‌یا هُد دَنَه کِه شِما نِه آزاد بَکِم. پس ایسِه بیایت وِ دَر وَ وِ سِلامت رِیت.»
37اما پولُس دِ جُئُو گُت: «اِیما نِه کِه تَبَعَه روم هِسیم، بی محاکمَه دِ وَرِ همَه وا چو رِمِمُو نِه اُوِردِنَه وُ وَنِنمُونَه وِ هُلِفدُو. ایسِه مِی‌‌حان بی‌کِشکی آزادمُو بَکَن؟ نَه خیرَم! بلکِم خُوشُو بیایَن وَ اِیما نِه دیچِه بیارَن وِ دَر.»
38مأموریا یَه نِه وِ قاضی‌یا گُتِن، وَ وِنُو هِه یَکِه اِشنَفتِن کِه پولُس وُ سیلاس تَبَعَه روم اَن، سخت اُفتان وِ تَلواسَه. 39وَ اُومان، دِشُو عُذرحائی کِردِن وَ تا وِ دَر دِ هُلِفدُو هُمرائیشُو کِردِن، وَ خواهِشت‌تَمَنا کِردِن کِه دِ او شهر بَکَن وِ دَر. 40وِنُو دِما یَکِه دِ هُلِفدُو اُومان وِ دَر، رَتِن وِ حُونَه لیدیَه. دوچِه سَری وِ بِرارُو زَن، دِل‌گُویشُو دَن. اوسِه دوچِه رَتِن.
လက္ရွိေရြးခ်ယ္ထားမွု
کاریا رسول‌یا 16: NLB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company