کاریا رسول‌یا 15
15
شورا اورشلیم
1وَ اما قَری دِ وِلاتِ یهودیَه اُومایینی وِ اَنطاکیَه وَ وِ بِرارُو تعلیم مِی‌دَن کِه: «اَر طبقِ آیینِ موسی ختنَه نوئیت، نَتُونیت نجات پیا بَکیت.» 2اوسِه هِه کِه پولُس وَ برنابا سخت وِ تیشک وُ دَم‌رِگَه واشُو وِریسان، قِرار وِ یَه بی کِه او دو، واردِ قَری دِ ایمُوداریا رُوئَن وِ اورشلیم وَ ایی مسئِلَه نِه وا رسول‌یا وَ مشایخ بَنیئَن دِ مینَه. 3پس کلیسا وِنُو نِه بدرِقَه کِرد، وَ وِنُو دِ سَرِ رَه‌شُو دِ شهریا فینیقیَه وُ سامِرَه، خَوَرِ ایمُو اُوِردِه‌نِ غیرِیهودیُو نِه وا جزئیات تعریف کِردِن وَ ایی خَوَر، گِردِ بِرارُو نِه خیلی خُشال کِرد. 4هِه کِه رَسِسِن وِ اورشلیم، کلیسا وَ رسول‌یا وَ مشایخ رَتِن وا نِهاشُو. پولُس وَ برنابا هَر چیئی کِه خدا وِ واسطَه وِنُو کِردی، سیشُو تعریف کِردِن. 5اما قَری دِ فِرقَه فَریسی‌یا کِه ایمُو اُوِردینی، وِریسان، گُتِن: «بایِس ایی غیرِیهودیُو نِه ختنَه کِرد وَ وِشُو هُد کِرد کِه شریعتِ موسی نِه نِئَه دارَن.»
6رسول‌یا وَ مشایخ وا یَک جمع بییِن تا وِ ایی مسئِلَه بَرَسَن. 7دِما گَپ‌وُگُفتِ زیاد، آخِرسَر پِطرُس وِریسا وَ وِشُو گُت: «بِرارُو شِما دُونیت کِه دِ روزیا اول، دِ مینِ شِما خدا مِه نِه جِگا کِرد تا غیرِیهودیُو دِ زِوُونِ مِه پِیغُومِ انجیلِ نِه بَشنُوئَن وَ ایمُو بیارَن. 8وَ خدائی کِه دِ دِل‌یا خَوَر دارَه، وا دِئِه‌نِ روح‌القدس وِ غیرِیهودیُو دِ بارَه وِنُو گَواه دَه، دُرِس هِه چِنُو کِه وِ اِیما گَواه دَه. 9او مابِینِ اِیما وَ وِنُو هیچ دوچَشکی نَکِرد، بَلکِم وِ سُنَه ایمُو، دِل‌یاشُو نِه پاک کِرد. 10ایسِه سی چی خدا نِه اِمتحُو می‌کیت وَ سیمکَه مُونیت وِ مِلِ شاگردیا کِه نَه اِیما وَ نَه اَجدادِ اِیما نَتُونیم وَه نِه کول‌کَش بَکیم. 11سی یَکِه اِیما ایمُو داریم کِه وِ فیضِ خداوند عیسی اَ کِه نجات پیا می‌کیم، هِه چِنُو کِه وِنُو هَم.»
12اوسِه جِماعتی کِه دوچِه بییِن گِردِشُو بی‌کِش مَنِن وَ وِ برنابا وَ پولُس گوش دَن. وِنُو نِشُونَه‌یا وَ معجزَه‌یائی نِه کِه خدا وِ دَسِشُو دِ مینِ غیرِیهودیُو کِردی، تعریف کِردِن. 13هِه یَکِه قِصَه‌یاشُو خِلاص بی، یعقوب گُت: «بِرارُو، وِ مِه گوش بِئیت! 14شَمعون تعریف کِرد کِه چطور خدا سی گِلِ اول، غیرِیهودیُو نِه موردِ لطفِ خُوش قِرار دِئَه، دِ مینِ وِنُو قُومی سی خُوش جِگا کِردَه. 15یَه هِه طبقِ قِصَه‌یا انبیا اَ، چِنُو کِه دِ کِتُوِ عاموسِ نبی اُومایَه کِه:
16«”دِما یَه، وِرمی‌گَردِم
وَ دُووارِ داوودِ پاتشا نِه کِه رِمِسَه، دِ سَر بَرپاش می‌کِم؛
کَلگَه‌یاشِه، گِلی هَنی بِنا می‌کِم،
وَ وَه نِه دُوارَه بَرپا می‌کِم،
17تا باقی‌مَنَه نسلِ بشر هَم گِردِشُو دِ مِنی خداوند بان،
وَ گِردِ غیرِیهودیُونی کِه نُومِ مِه ها وِ ریشُو.
خداوند یَه نِه مُوئَه،
18خداوندی کِه ایی چیا نِه دِ زی دیاری می‌کَه.“
19«پس نظرِ مِه وِ یِنَه‌آ کِه وِنُو نِه کِه دِ غیرِیهودیُو والا خدا وِرمی‌گَردَن، وِ زَمَت نُونیم. 20اما بایِس سیشُو بَنیسیم کِه دِ خوراکِ قُرُونی سی بُت‌یا، بی‌عفتی، گوشتِ حِیوُونیا تاسَنَه، وَ خی، پرهیز بَکَن. 21سی یَکِه دِ نسل‌یا قدیم موسی دِ هَر شهری کَسُونی نِه داشتَه کِه وِش موعظَه بَکَن، هِه چِنُو کِه هَر روزِ شَبات نیسَنَه‌یا او نِه دِ کنیسَه‌یا مُوحُونَن.
نُومَه شورا وِ ایمُوداریا غیرِیهودی
22پس رسول‌یا وُ مشایخ واردِ گِردِ کلیسا صِلا دیئِن دِ مینِ خُوشُو پیایائی جِگا بَکَن وَ وِنُو نِه واردِ پولُس وَ برنابا کِل بَکَن وِ اَنطاکیَه. پس یهودا معروف وِ بَرسابا وَ سیلاسِ نِه کِه دِ مینِ بِرارُو مقامِ رهبری داشتِن، جِگا کِردِن. 23اوسِه نُومِه‌ای وِ دَسِشُو کِل کِردِن، دِ ایی قِرار کِه:
«دِ لا بِرارُو، هَم رسول‌یا وَ هَم مشایخ،
وِ بِرارُونِ غیرِیهودی کِه دِ اَنطاکیَه، سوریَه وَ کیلیکیَه‌آن،
سِلام!
24دوچِه کِه اِشنَفتیمَه کِه قَری دِ مینِمُو، بی‌یَکِه هُدی دِ اِیما داشتوئَن، اُومانَه وا گُتَه‌یاشُو سَر وِتُو شیوَنِنَه، فکرِتُو نِه پَریشُو کِردِنَه. 25پس اِیما یِه دِل چِنی صِلا دیئیم کِه پیایائی جِگا بَکیم وَ وِنُو نِه واردِ عزیزُونِمُو، برنابا وَ پولُس، وِ تِه شِما کِل بَکیم، 26کِه وِ سُنَه نُومِ خداوندِ اِیما عیسی مسیح، دِ جُونِشُو دَس کَشینَه. 27پس یهودا وَ سیلاسِ نِه کِل کِردیم تا خُوشُو ایی چیا نِه زِوُونی وِتُو بُوئَن. 28روح‌القدس وَ اِیما چِنی صِلا دیئیم کِه باری نُونیم وِ ری شُونِتُو، غیرِ ایی چیا ضروری کِه: 29"دِ خوراکِ قُرُونی سی بُت‌یا وَ خین وُ گوشتِ مُردار وَ بی‌عفتی پرهیز بَکیت."اَر یِنُو نِه وِجا بیاریت، کارِتُو دُرِس اَ. وِ سِلامت.»
30پس وِنُو اُفتان وِ رَه، رَتِن وِ اَنطاکیَه وَ دِ اوچِه کلیسا نِه جمع کِردِن وِ دورِ یَک، نُومَه نِه دَن وِشُو. 31هِه کِه نُومَه نِه حَنِن، وِنُو دِ دِل‌گُوی‌ای کِه دِ ایی پِیغُوم بی، شایی کِردِن. 32پس یهودا وَ سیلاس هَم کِه نبی بییِن، وا حرف‌یا زیادی، بِرارُو نِه تشویق کِردِن وَ قُوَه‌شُو دَن. 33اوسِه مدتی مَنِن دِ اوچِه، وَ بِرارُو وِنُو نِه وِ سِلامت رائی کِردِن تا وِ تِه وِنُو کِه رِشُو کِردینی وِرگَردَن. 34اما پولُس وَ برنابا مَنِن دِ اَنطاکیَه، 35وَ واردِ بُری هَنی دِ معلم‌یا، دَس وِ کارِ تعلیم وَ بشارتِ کلُومِ خداوند بییِن.
اختلاف مابِینِ پولُس وَ برنابا
36دِما چَنی، پولُس وِ برنابا گُت: «بیا وِرگَردیم وِ شهریائی کِه کلُومِ خداوندِ نِه دِشُو اِعلُوم کِردیم، وَ سَری بَزِنیم وِ بِرارُونِمُو تا بِئینیم دِ چِه حالی اَن.» 37برنابا حاس یوحنا معروف وِ مَرقُس هَم واردِشُو بیا، 38اما پولُس صِلا نِئی کَسی نِه کِه دِ پامفیلیَه وِنُو نِه تَنیا نِئایَه وَ تا آخِر نَمَنَه واشُو، وا خُوش بُورَه. 39چِنُو اختلافِ سختی اُفتا دِ مینِشُو کِه دِ یَک سَوا بییِن. برنابا، مَرقُسِ نِه وِرداشت وَ دِ رَه دریا رائی قبرس بی؛ 40اما پولُس، سیلاسِ نِه انتخاب کِرد وَ رائی سفر بییِن وَ بِرارُو وِنُو نِه سِپُردِن وِ فیضِ خداوند. 41پولُس دِ سَرِ رَه دِ سوریَه وُ کیلیکیَه، وِ کلیسایا قُوَه مِی‌دَه.
လက္ရွိေရြးခ်ယ္ထားမွု
کاریا رسول‌یا 15: NLB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company