کاریا رسول‌یا 17
17
پولُس وَ سیلاس دِ تِسالُونیکی
1پولُس وَ سیلاس دِ آمفیپولیس وَ آپولُونیا رَد بییِن وَ اُومان وِ تِسالُونیکی، کِه دوچِه یهودیُو کنیسَه داشتِن. 2پولُس دِ ری عادت رَت وِ کنیسَه، دِ سِه شَباتِ پُشتِ یَک دِ کِتُویا مقدس واشُو گَپ‌وُگُفت می‌کِرد، 3وَ سیشُو خو جا مِی‌وَن وَ دَلیل می‌اُوِرد کِه لازم بی مسیح عَذُو بَکَشَه وَ دِ مُردَه‌یا زِنَه با. او می‌گُت: «ایی عیسی کِه ها وَه نِه سیتُو اِعلُوم می‌کِم، هِه او مسیحِ موعود اَ.» 4قَری دِشُو قانِع بییِن وَ رَتِن وِ جُرگَه پولُس وَ سیلاس، وَ هَم بُری‌وُشُری دِ یونانی‌یا خداپِرَس وَ دَسَه گَپی دِ زَنُونِ سَرشناس هَم بییِن.
5اما یهودیُو حَسیدی کِردِن وَ قَری اوباشِ نِه دِ بازار جمع کِردِن، دَسِه‌ای وَنِن وِ رَه وَ بِلبِشوئی دِ شهر وِ پا کِردِن. وِنُو دِ مِنی پولُس وَ سیلاس، رِمال بُردِن وِ حُونَه یاسون تا وِنُو نِه بَکَشَن وِ دَر، بیارَنشُو وِ مینِ مردِم. 6اما هِه کِه وِنُو نِه پیا نَکِردِن، یاسون وَ قَری هَنی دِ بِرارُو نِه کَشَنِن وِ تِه مقاماتِ شهر وَ می‌قارَنِن کِه «ایی پیایا کِه گِردِ دنیا نِه رِختِنَه دِ یَک، ایسِه اُومانَه وِ ایچِه 7وَ یاسون وِنُو نِه بُردَه وِ حُونَه‌ش. یِنُو گِردِشُو دِ هُدیا قیصرِ روم سَر واز می‌کَن وَ مُدعی اَن کِه شائی هَنی هی وِ نُومِ عیسی.» 8هِه کِه مردِم وَ مقاماتِ شهر یِنُو نِه اِشنَفتِن، اُفتان وِ تَلواسَه. 9اوسِه دِ یاسون وَ باقیشُو پیلی سی ضمانت گِرِتِن وَ آزادشُو کِردِن.
پولُس وَ سیلاس دِ شهرِ بیریَه
10بِرارُو جَلدی دِ تاریکی شُو، پولُس وَ سیلاس نِه رِ کِردِن وِ شهرِ بیریَه. وِنُو هِه کِه رَسِسِن ووچِه، رَتِن وِ کنیسَه یهود. 11یهودیُونِ اوچِه دِ یهودیُونِ تِسالُونیکی نَجیم‌تِر بییِن. وِنُو کلُومِ نِه وا شوق قبول کِردِن وَ هَر رو کِتُویا مقدسِ نِه خو می‌حَنِن تا دُرِسی حرف‌یا پولُسِ نِه دِرارَن. 12وِ ایی صورت، قَری دِ یهودیُو وَ هَم بُری‌وُشُری دِ زَنُو وَ پیایا سَرشناسِ یونانی ایمُو اُوِردِن.
13اما هِه کِه یهودیُو تِسالُونیکی فَمِسِن کِه پولُس دِ بیریَه هَم کلُومِ خدا نِه تعلیم مِی‌ئَه، رَتِن وِ بیریَه وَ مردِمِ نِه آنتریک کِردِن، شهرِ نِه رِختِن دِ یَک. 14بِرارُو جَلدی پولُسِ نِه رِ کِردِن والا ساحل، اما سیلاس وَ تیموتائوس مَنِن دِ بیریَه. 15وِنُو کِه پولُسِ نِه هُمرائی می‌کِردِن، تا شهرِ آتِن واردِش رَتِن وَ دِما یَکِه سی سیلاس وَ تیموتائوس هُد گِرِتِن کِه وِشُو بُوئَن هَر چی زیتِر رُوئَن والا پولُس، دِ پولُس جِگا بییِن وَ وِرگَشتِن.
پولُس دِ شهرِ آتِن
16هِه چِنُو کِه پولُس دِ آتِن چَش وِ رَه او دو بی، دِ یَکِه شهرِ نِه چِنی پُر دِ بُت مِئی، شُوگارِش لِرِس. 17زوتا، هَم دِ کنیسَه وا یهودیُو وَ یونانی‌یا دیندار وَ دِ بازار هَم هَر رو وا مردِمی کِه اوچِه بییِن وا دَلیل وُ بُرهان گَپ‌وُگفت می‌کِرد. 18قَری دِ فیلسوف‌یا مکتبِ اِپیکوری وَ رِواقی هَم وا او نِئان وِ بحث کِردِه. قَری دِشُو می‌گُتِن: «ایی چِنَه مُف‌زِه چی می‌حا بُوئَه؟» باقی می‌گُتِن: «مَری تبلیغِ خدایا بیگُونَه نِه می‌کَه.» سی یَکِه پولُس، عیسی وَ زِنَه‌‌بی‌یِه‌نِ مُردَه‌یا نِه وِشُو اِعلُوم می‌کِرد. 19وِنُو پولُسِ نِه وِرداشتِن، بُردِن وِ تپَه «آریوپاگوس» جائی کِه مردِم دِش جمع مِویئِن وَ دِ اوچِه وِش گُتِن: «موئَه دُونِسوئیم کِه ایی تعلیمِ جدید کِه تو مِئی، چینَه؟ 20حرف‌یات وِ گوشِ اِیما بِلاجی میا پس می‌حایم معنیشُو نِه دُونِسوئیم.» 21گِردِ مردِمِ آتِن وَ غَریوَه‌یائی کِه دِ اوچِه زِنِه‌ئی می‌کِردِن، هیچ کاری نائاشتِن غیرِ یَکه بَنشینَن وَ وَختِ خُوشُو نِه وِ گَپ‌وُگفت دِبارَه عقیدَه‌یا تازَه سَر بَکَن.
22پس پولُس دِ مینجا «آریوپاگوس» وِریسا وَ گُت: «پیایا آتِن، مِه شِما نِه دِ هَر بابَت خیلی دیندار دیمَه. 23سی یَکِه هِه کِه دِ شهر می‌گَشتِم وَ او چیائی کِه شِما می‌پِرَسیت سِیل می‌کِردِم، مذبحی پیا کِردِم کِه وِ ری وَه نیسَنَه بیئی:”تقدیم وِ خدای نَشناختَه“. ایمدال، او چیئی کِه شِما وِ عنوانِ نَشناختَه می‌پِرَسیت، مِه ایی خدا نِه وِ شِما اِعلُوم می‌کِم.
24«خدائی کِه جاهان وَ هَر چیئی کِه ها دِ وَه نِه آفَری، خداوندِ آسمُو وَ زِمی، کِه دِ معبدیا ساختَه وِ دَسِ بشر، زِنِه‌ئی نِمی‌کَه. 25هُوجَه‌ش وِ چیئی نی کِه آیِم وا دَس‌یا خُوش سیش دُرِس بَکَه، سی یَکِه خدا خُوش نَفَس وَ حیات وَ همَه چیایِ هَنی وِ گِردِ آیِم‌یا بَخشَنَه. 26او گِردِ ملت‌یا بشری نِه دِ یِه آیِم وِ وجود اُوِرد تا دِ سَرتاسَرِ زِمی زِنِه‌ئی بَکَن؛ وَ سیشُو زِمُونی تعیین کِرد وُ سَر حَدی نِئا سی جا زِنِه‌ئیشُو. 27قَصتِش دِ گِردِ ایی کاریا یِنَه‌آ کِه مردِم دِ فِتِراقِ خدا بان، گاس او نِه پیا بَکَن، هَر چَن او دِ هیچ کُوم دِ اِیما دیر نی. 28سی یَکِه دِ مینِ اونَه کِه اِیما زِنِه‌ئی وَ حرکت وَ هستی داریم؛ چِنُوکِه حتی قَری دِ شاعریا خُوتُو هَم گُتِنَه کِه اِیما حقیقتا دِ بُنچینَه اونیم.
29«پس ایسِه کِه دِ بُنچینَه خدائیم، نَبایِس چِنی فکر بَکیم کِه وجودِ خدا هِه چی طِلا وُ نُقرَه وَ بَردِ قیمَتی اَ، هِه چی چیئی کِه وا هنر وُ خیال‌یا آیِم وِ شکلِ تِمثالی تِراشیَه با. 30دِ قدیم، خدا دِ چِنی جهالتی چَشپوشی می‌کِرد. اما ایسِه وِ گِردِ مردِمُو دِ هَر جا کِه بان هُد می‌کَه کِه توبَه بَکَن. 31سی یَکِه خدا روزی نِه نِئایَه کِه دِ مینِ وَه وِ واسطَه پیائی کِه تعیین کِردَه، دنیا نِه وا عدالت داوَری می‌کَه، وَ وا زِنَه کِردِه‌نِش دِ مُردَه‌یا، خیالِ همَه نِه دِ ایی بابت راحت کِردَه.»
32هِه کِه دِبارَه زِنَه‌بی‌یِه دِ مُردَه‌یا اِشنَفتِن، قَری دِشُو نیشخَنی زَن، اما قَری گُتِن: «اِیما دِ ایی بارَه هَنی هَم دِت می‌شنُوئیم» 33پس پولُس دِ اوچِه کِرد وِ دَر. 34اما چَن نفر رَتِن والاش، ایمُو اُوِردِن. دیونیسیوس، یَکی دِ آیِم‌یا «آریوپاگوس»، زنی وِ نُومِ داماریس، وَ هَم قَری هَنی، دِشُو بییِن.
လက္ရွိေရြးခ်ယ္ထားမွု
کاریا رسول‌یا 17: NLB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company