Zwz Nduq 41
41
Laux Hongz Paen'hwnz Song Mbaed
1Gvaq ndaej song bi, laux hongzAizjih paen'hwnz, paen'hwnz hoakri dix in yuq haenz dah. 2Miz jiat do moazmeh, daeq ndaw dah kwnj maz, byauz yawz taeuq, yuq haenz dah jin nyaj. 3Gaunaeh, daeuq miz jiat do moazmeh daeq ndaw dah kwnj maz, choj ndaej chunx taeuq, in yuq haenz jiat do mbaednduq naeh. 4Le jiat do moazmeh choj naeh jin daengz jiat do moazmeh byauz naeh nauq. Laux hongzAizjih zoq ruxndownq. 5Gau ux, dix daeuq noanzlaep, daeuq paen'hwnz mbaed mawq, paen'hwnz taen go kaeujmeg ux, kwnj jiat rongz maeg yawz taeuq. 6Yaq daeuq kwnj jiat rongz kaeujmeg, zoah laemz ndaed baeuq, byeb ndaej chunx taeuq. 7Jiat rongz kaeujmeg byeb naeh ndwnj daengz jiat rongz kaeujmeg maeg naeh. Laux hongz zoq ruxndownq, zux ruxndeq zawh paen'hwnz. 8Taeng zangnaw, ndaw zaw laux hongzAizjih yuq mboq vangq, zoq nemz dij goanz bae rongx Aizjih sowh puj rux hoakbang naeh daj sowh puj miz aen gvai naeh maz, maz saeh dix lez sowh gaenq paen'hwnz dix naeh zawh hax gaeng. Laux hongz haxdoq daengzle gaenqdix paen'hwnz gaeng, gaj mboq miz gawz ruxndeq diauq paen'hwnz laux hongz naeh zawh hax gaeng.
Yezsowh Zoah Daenh Zowz Maz Taen Laux Hongz
9Sowh gau naeh goanz saeh laux hongz zawx laeuj naeh laemh dwk laux hongz, hax: "Gannaeh gux zux nwh ndaej gaenq hoakloang gux. 10Koax daekgoanq laux hongz rik dwk le koij, aeu koij daj goanz saeh mawz gvanx gaenqjin naeh bae kaeng aen lauz goanz gvanx bin rownz hongz gvanx naeh. 11Doiq piu daengz song goanz yuq haemh ndeu paen'hwnz, goanz ux lej paen baenz yowngh ux. 12Yuq dih naeh miz goanz mbauq reauh Cizboahlaiz ux. Dix zawh puj koij goanz gvanx bin rownz hongz naeh. Gaenqpiu haxdoq dix gaenqpiu paen'hwnz gaeng, dix zoq haxdoq piu gaenq paen'hwnz piu naeh zawh hax gaeng. 13Doaklaeng, gaj yowngh gaj baenz zaq gaemz dix hax naeh. Gaenqgux daeuq ndaej hoak gaenq gaeuq gux hoak naeh, goanz saeh gaenqmawz gvanx gaenqjin naeh, zoq aeu bae nyaengx niangz saeu."
14Laux hongz Aizjih nemz dij goanz bae rongx Yezsowh. Paenqdix zoq gaj baeuh gaj byeh, zowz Yezsowh daeq ndaw lauz daeuj. Yezsowh ed to, ed mumh, lwh ndangnungh, zoq mwz dih laux hongzAizjih naeh. 15Laux hongz Aizjih daj Yezsowh hax: "Gux paen'hwnz, gaj mboq miz gawz ruxndeq gaenq paen'hwnz gux naeh zawh hax gaeng. Gux ruxnyinz daenh hax, mawz biak gaenq paen'hwnz daenh yaq, mawz zoq ruxndeq gaenq paen'hwnz daenh zawh hax gaeng." 16Yezsowh haxdoq laux hongz Aizjih, hax: "Hoakri gux mboq ruxndeq gaenq paen'hwnz daenh naeh zawh hax gaeng, gaj dij Sen hawj gux rux haxdoq mawz, zaw mawz zoq dingh mboqyaq."
17Laux hongz Aizjih haxdoq Yezsowh: "Gux paen'hwnz taen gaenqgux in yuq haenz dah, 18miz jiat do moazmeh, daeq ndaw dah kwnj maz, byauz yawz taeuq, yuq haenz dah jin nyaj. 19Gau naeh, daeuq miz jiat do moazmeh daeq ndaw dah kwnj maz, oanq'e se, choj ndaej chunx taeuq. Yuq ndaw Aizjih, gux mboq sanz taen saek do moaz chunx baenzzaqnaeh. 20Le do moazmeh choj naeh ndwnj daengz jiat do moazmeh byauz naeh. 21Le do choj naeh jin yaq, goj lez mboq og paenqdix jin le do moaz byauz naeh, naengz daj mbaednduq chunx dungzlumj. Gux zoq ruxndownq.
22"Gvaq gau ux yaq, gux daeuq paen'hwnz taen go kaeujmeg ux, kwnj jiat rongz maeg yawz taeuq. 23Yaq daeuq kwnj jiat rongz kaeujmeg zoah laemz ndaed baeuq, choj ndaej chunx taeuq. 24Jiat rongz kaeujmeg choj naeh ndwnj daengz jiat rongz kaeujmeg maeg naeh. Gux laemh dwk puj hoakbang, gaj mboq miz gawz ruxndeq gaenq paen'hwnz gux naeh zawh hax gaeng."
Yezsowh Hax Gaenq Paen'hwnz Laux Hongz Zawh Hax Gaeng
25 Yezsowh daj laux hongz Aizjih hax: "Gaenq paen'hwnz mawz naeh zawh hax yowngh doag. Dij Sen daz hoak gaeng dix haeuz hawj mawz ruxndeq. 26Jiat do moazmeh byauz naeh zawh hax jiat bi, jiat rongz kaeujmeg maeg naeh goj zawh hax jiat bi. Song gaemz naeh zawh hax yowngh doag, zawh hax jiat bi kaeujpyaek yawz. 27Yaq jiat do moazmeh choj naeh jiat do doaklaeng kwnj maz naeh goj zawh hax jiat bi. Jiat rongz kaeujmeg byeb naeh jiat rongz zoah laemz ndaed baeuq naeh goj zawh hax jiat bi, zawh hax jiat bi yaeg. 28Daj gaunduq gux hax naeh dungzlumj, dij Sen daz hoak gaeng, dix haeuz hawj laux hongz ruxndeq. 29Sipsiq bi baihnaj naeh, jiat bi daekgoanq naeh kaeujpyaek Aizjih yawz taeuq, 30jiat bi daeklaeng naeh kaeujpyaek Aizjih mboq yawz saek'i, hawj dij goanz Aizjih lumz daengz sowh zwz kaeujpyaek yawz naeh nauq, zwzyaeg naeh hawj Aizjih lown nauq mboqyaq. 31Zwzyaeg naeh kaeujpyaek mboq baenz ditrawz, hawj dij goanz Aizjih daengz nwh mboq taeng koax daekgoanq kaeujpyaek yawz. 32Gaj baenzzaqrawz dij Sen hawj laux hongz paen'hwnz yaengh song mbaed, zawh hax dij Sen zaekgaj hoak gaenq gaenqdix hawj mawz ruxndeq naeh. 33Baenzzaqnaeh laux hongz baenz bae cha goanz ux miz aen gvai, miz aen dongx, hawj dix maz gvanx Aizjih. 34Jiat bi kaeujpyaek yawz naeh, laux hongz hoakzaqnaeh hoak zuxbaenz, yuq ndaw Aizjih cha boangx saeq ux, hawj paenqdix aeu kaeujpyaek Aizjih haj gong aeu nyaengx gong ux, aeu leux jiat bi kaeujpyaek mboq yawz naeh. 35Sowh kaeujpyaek aeu nyaengx naeh yuq haenz longq rawz zoq aeu nyaengx longq rawz. Gaj sowh kaeujpyaek aeu nyaengx naeh, daengzle hawj laux hongz gvanx. 36Suq kaeujpyaek naeh aeu dix nyaengxtaj jiat bi kaeujpyaek mboq yawz naeh, hoakzaqnaeh, zwzyaeg naeh zux mboq hawj dij goanz Aizjih lown."
37Laux hongz Aizjih daj puj saeq dix, daengzle gaj goanz gaj hax gaenq Yezsowh hax naeh miz dauqlix. 38Yaq laux hongz Aizjih daj puj baihdawj dix hax: "Baenz zaq sowh dij goanz naeh, miz minghkoan dij Sen yuq ndang dix, gaenqraeuz naengz bae rawz cha taen mah?" 39Laux hongz Aizjih daj Yezsowh hax: "Dij Sen hawj mawz ruxndeq mbaed saeh naeh, zoq mboq miz gawz daj mawz dungzlumj miz aen gvai miz aen dongx baenz naeh, 40hawj mawz saeh gux gvanx rownz gux, hawj dij goanz Aizjih gux gawz goj biak mawz. Mizgaj gaenqgux dwx nyeuz gaenqmawz." 41Laux hongz Aizjih daeuq daj Yezsowh hax: "Mawz lez, gux hawj mawz gvanx daengz Aizjih nauq." 42Hax nauq, laux hongz tod dingqmungz dix, dingq miz yinqzangz dix naeh, aeu bae tw mungz Yezsowh, aeu sowh sowj aeu mae'banq si liak liak hoak naeh nungh hawj dix, aeu taeu jim ux tw mwz goakhoz dix, 43yaq nemz Yezsowh naengh aen chowz rownzhongz aen daihngih naeh, miz dij goanz yuq baihnaj Yezsowh rongx: "Gvih naeuz kvaiq ux!" Hoakzaqnaeh, laux hongz zoq hawj Yezsowh saeh dix gvanx daengz Aizjih nauq. 44Laux hongz daj Yezsowh hax: "Gux zawh laux hongz, gaj yuq ndaw Aizjih, gawz daz hoak gaeng, gawz goj maz cham mawz daekgoanq, mawz hax hawj hoak dix zux ndaej hoak." 45Laux hongz daeuq saeh Yezsowh nyaek minxzwh hoak Saxfahnahtowh-baznoihyaq, daeuq aeu Yaqciznah hawj dix hoak mez. Yaqciznah zawh lug nyingz Boztihfaezlaz. Dez dix Boztihfaezlaz yuq ndaw aen chaenh Anz naeh hoak puj moa. Yezsowh zoq gvanx daengz Aizjih nauq. 46Zwz Yezsowh yuq baihdawj laux hongz hoaksaeq naeh dix ndaej samsip bi. Dix og bae gvanx daengz Aizjih nauq. 47Jiat bi kaeujpyaek yawz naeh, ndaw raeh ndaw naz ndaej kaeujpyaek lai taeuq. 48Jiat bi naeh, Yezsowh aeu kaeujpyaek Aizjih nyaengx, aeu kaeujpyaek maz nyaengx ndaw longq. Kaeujpyaek haenz longq rawz zoq aeu mwz nyaengx longq rawz. 49Yezsowh aeu kaeujpyaek nyaengx ndaej lai yaengh lai, lai daj saiz haenz haij dungzlumj, miz lai gvaq, anq mboq baenz, dix zoq mboq mai.
50Le bi kaeujpyaek naengz yawz naeh, Yaqciznah, goanz mijmez Yezsowh, goanz lug nyingz Boztihfaezlaz laux yuq ndaw aen chaenh Anz hoak puj moa naeh saeh Yezsowh zowngx song goanz lug zaiz. 51Miz maeng daekgoanq naeh Yezsowh hax: "Dij Sen hawj gux lumz aen nanh koax daekgoanq gux naeh nauq, hawj gux mboq daj koax daekgoanq dungzlumj gaj vaenz gaj nwh gaj daengz rownz dez gux." Dix zoq saeh lug zaiz to dix nyaek minxzwh hoak Maxnahciz, Maxnahciz zoq zawh hax: "Hawj gux lumz." 52Miz goanz lug zaiz daih ngih yaq, dix hax: "Gux jinkaem, gaj dij Sen hawj gux yuq dih gux jinkaem naeh yowngh rawz goj miz." Dix zoq saeh goanz lug zaiz daih ngih dix nyaek minxzwh hoak Yixfahleanh. Yixfahleanh zoq zawh hax: "Yowngh rawz goj miz."
Bi Kaeujpyaek Yawz Daj Bi Kaeujpyaek Mboq Yawz
53 Aizjih gvaq jiat bi kaeujpyaek yawz naeh yaq, 54zoq taeng jiat bi kaeujpyaek mboq yawz naeh, gaj yowngh gaj daj gaemz Yezsowh hax naeh dungzlumj. Goh rawz goj kaeujpyaek mboq yawz, yowngh jin mboq miz. Mizgaj Aizjih naengz miz kaeuj. 55Taeng sowh zwz dij goanz Aizjih goj yowngh jin mboq miz naeh, dij goanz Aizjih zoq vanz laux hongz aeu kaeuj hawj paenqdix. Laux hongz daj daengzle hax: "Gaenqsu bae dih Yezsowh naeh, dix nemz su hoak rawz, gaenqsu zoq hoak rawz." 56Zwz naeh, daengz Aizjih dih rawz goj kaeujpyaek mboq yawz, gaj dih gaj miz puj yaeg, Yezsowh zoq aeu kaeuj kai hawj dij goanz Aizjih. 57Dih ndai kaeujpyaek goj zaemh mboq yawz. Dij goanz dih rawz goj maz Aizjih, maz daj Yezsowh swx kaeuj.
လက္ရွိေရြးခ်ယ္ထားမွု
Zwz Nduq 41: ZHN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023, Peace Publishing Co. All rights reserved.