Zwz Nduq 40
40
Yezsowh Saeh Puj Kaenglauz Hax Gaenq Paen'hwnz Paenqdix Hax Gaeng
1Gvaq le gaenqnaeh yaq, miz song goanz puj saeq dwx hoak loang zaeuj paenqdix laux hongz Aizjih. Goanz ux zawh saeh laux hongz zawx laeuj, goanz ux zawh saeh laux hongz gvanx gaenqjin. 2Laux hongz zoq rik dwk song laux saeq naeh, zoq zawh rik dwk laux saeh dix zawx laeuj naeh daj laux saeh dix gvanx gaenqjin naeh. 3Dix zoq aeu doiqnaeh kaeng bae dih aen lauz Yezsowh kaeng naeh. Aen lauz naeh zawh goanz hoak saeq dwx gvanx bin rownz hongz naeh gvanx. 4Goanz gvanx bin rownz hongz naeh zoq hawj Yezsowh kvej song goanz naeh. Doiqdix zoah kaeng ndauj ux yaq, 5goanz mbaednduq saeh laux hongz zawx laeuj naeh daj goanz mbaednduq saeh laux hongz gvanx gaenqjin naeh, zoq zawh song goanz yuq ndaw lauz kaeng naeh, doiqdix yuq haemh ndeu paen'hwnz, goanz ux paen baenz yowngh ux. 6Taeng zangnaw zaeux, Yezsowh ndonj mwz dih doiq dix naeh, leztaen daengz song goanz dix yuq mboq vangq mboq dangh. 7Dix zoq cham song goanz puj saeq laux hongz naeh, zoq zawh song goanz daj dix zaemh kaeng ndaw lauz rownz zaeuj dix naeh, hax: "Gaenqsu miz gaeng saeh ix? Rawz gaj goanz gaj najkawq baenz nah?" 8Doiq naeh yaeng: "Doiq piu gaj goanz gaj paen'hwnz, goanz ux paen baenz yowngh ux. Gaj mboq miz gawz ruxndeq hax gaeng." Yezsowh daj paenqdix hax: "Mizgaj dij Sen ruxndeq gaenq paen'hwnz dij goanz naeh zawh hax gaeng. Gaenqsu paen'hwnz gaeng su laemh dwk gux, gux saeh su cham dij Sen." 9Goanz saeh laux hongz zawx laeuj naeh zoq haxdoq Yezsowh dix paen'hwnz gaeng, dix hax: "Gux paen'hwnz taen baihnaj gux miz go maex maegkaeu'it ux, 10go maex maegkaeu'it naeh miz sam ngah, gaj ngah gaj sowd nyit, yaq og ndog, yaq sowh maegkaeu'it niangz dix naeh baenzjin nauq. 11Aen zung laux hongz yuq ndaw mungz gux, gux neb naemx maegkaeu'it bae aen zung laux hongz. Yaq aeu aen zung yenh mwz ndaw mungz laux hongz." 12Yezsowh haxdoq dix: "Gaenq paen'hwnz mawz zawh hoakzaqnaeh hax, sam ngah maex zawh hax sam vaenz. 13Sam vaenz zawjraeuz, laux hongz hawj mawz daeuq dauh bae hoak gaenq gaeuq, hawj mawz daeuq yaeuj to ndaej. Mawz naengz daeuq ndaej daj koax daekgoanq dungzlumj saeh laux hongz zawx laeuj. 14Gaj mawz hoak gaeng goj nowngzzaw zwzrawz, vanz mawz nyen ndaej gux, saeh daengz gux ndoij. Haxdoq laux hongz miz goanz ux baenzzaqnaeh, jeuq gaenqgux daeq ndaw lauz og bae. 15Gux zoah daenh puk, kai daeq dih dij goanz puj Cizboahlaiz naeh maz, yuq inxnaeh, gux goj mboq hoak gaeng loang, mboq hoj aeu gux maz kaeng."
16Goanz saeh laux hongz gvanx gaenqjin naeh taen Yezsowh hax gaenq paen'hwnz goanz saeh laux hongz zawx laeuj naeh hax ndaej chung yawz, dix goj daj Yezsowh hax: "Gux goj paen'hwnz, paen'hwnz taen gux yaeuj sam aen kod nyaengx niangz to gux, sam aen kod naeh miz binx kau, 17aen kod baihnow daengzle naeh, miz sowh gaenqjin aeu hawj laux hongz naeh sowh gaenqjin aeu kaux naeh lai yowngh taeuq, gaj miz dij noag mbin maz jin kaeujpyaek ndaw kod now to gux naeh." 18Yezsowh haxdoq dix: "Gaenq paen'hwnz mawz zawh hoakzaqnaeh hax, sam aen kod zoq zawh hax sam vaenz, 19sam vaenz zawjraeuz, laux hongz daet hoz mawz, aeu ndang mawz nyaengx baihnog, nyaengx niangz saeu, yaq miz dij noag mbin maz jin nowx mawz."
20Taeng vaenz daih sam, zawh vaenz gaeuq laux hongz zowngx naeh, laux hongz qingj sowh puj saeq baihdawj dix naeh maz zaemh jin. Dix rongx goanz saeh dix zawx laeuj naeh daj goanz saeh dix gvanx gaenqjin naeh daeq ndaw lauz maz, 21hawj goanz saeh dix zawx laeuj naeh daeuq hoak gaenq gaeuq, zawx laeuj hawj dix. 22Gaj laux hongz kaj goanz saeh dix gvanx gaenqjin naeh, aeu dix bae nyaengx niangz saeu. Gaj yowngh gaj daj gaemz Yezsowh hax naeh dungzlumj. 23Gaj goanz saeh laux hongz zawx laeuj naeh nwh mboq ndaej Yezsowh, lumzlowz suq kauq Yezsowh naeh nauq.
လက္ရွိေရြးခ်ယ္ထားမွု
Zwz Nduq 40: ZHN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023, Peace Publishing Co. All rights reserved.