Zwz Nduq 38
38
Yaeuhdaq Daj Tazmax
1Zwz naeh, Yaeuhdaq ni le bihnongx zaiz dix, mwz daj goanz zaiz puj Yaqduqlanh ux zaemh ndowj, goanz naeh rongx hoak Cizlaz. 2Yaeuhdaq yuq dih naeh mex goanz nyingz ux. Goanz nyingz naeh zawh lug nyingz Suzyaq goanz puj Zaznanh naeh, yaq dix zoq raep dix, daj dix zaemhnoanz. 3Yah naeh mizndang, zowngx goanz lug zaiz ux. Yaeuhdaq saeh dix nyaek minxzwh hoak Ex. 4Daeklaeng yah naeh daeuq mizndang zowngx goanz lug zaiz daih ngih, saeh dix nyaek minxzwh hoak Owhnanh. 5Daeklaeng dix daeuq mizndang, zowngx goanz lug zaiz daih sam, saeh dix nyaek minxzwh hoak Sowqlaz. Zwz dix zowngx Sowqlaz naeh, Yaeuhdaq yuq ndaw Jizcih.#38:5 Sw Dij Sen mbangj bwnz goj hax: Sowqlaz zawh yuq ndaw Jizcih zowngx.
6Lug zaiz Yaeuhdaq baenz puj dwx yaq, dix saeh maeng lug zaiz to dix Ex raep goanz nyingz ux minxzwh hoak Tazmax hoak mez. 7Ex goanz lug zaiz to Yaeuhdaq naeh, Yez'hoahhuah lez maz zawh puj mbowq, Yez'hoahhuah zoq aeu aen mingh dix. 8Yaq Yaeuhdaq daj zaiz daih ngih dix Owhnanh hax: "Mawz bae daj bihnangz mawz zaemhnoanz, hoak gaenq mawz hoj hoak naeh, saeh goz mawz sup yaiz."#38:8 Dih naeh, puj zaiz jixzawh zwz dix tai naeh, dix haeuz baenzrownz yaq, gaj dix naengz mboq miz lug, sowh puj bihnongx ndiang dix naeh hoj daeuq raep mijmez dix, yaq sowh lug paenqdix rungj naeh suanq hoak lug goanz tai yaq naeh. 9Gaj Owhnanh ruxndeq daengz miz lug goj mboq suanq zawh lug gaenq dix. Dix mbaed rawz daj bihnangz dix zaemhnoanz, dix goj hawj naemx dix bae dihndin, hoakzaqnaeh zoq mboq saeh goz dix zowngx lug. 10Sowh gaenq dix hoak naeh, Yez'hoahhuah lez maz zawh gaenq mbowq, Yez'hoahhuah goj aeu aen mingh dix. 11Yaeuhdaq mbu zaiz daih sam dix Sowqlaz rux tai daj song goanz goz dix dungzlumj. Yaq Yaeuhdaq zoq daj mijloz dix Tazmax hax: "Mawz dauh mwz rownz daiq mawz ndeh, taj lug zaiz gux Sowqlaz baenz puj dwx goanq daeuq mwz raep mawz." Yaq Tazmax dauh mwz rownz daiq dix.
12Gvaq ndaej jij bi ux, mijmez Yaeuhdaq, zoq zawh goanz lug nyingz Suzyaq naeh tai. Gvaq zwz cauq yaq, Yaeuhdaq daj dungzbownh dix Cizlaz goanz puj Yaqduqlanh naeh zaemh mwz Tinhnah. Boangx lugriangz Yaeuhdaq yuq Tinhnah saeh dix daet koan dij mbej. 13Miz dij goanz haxdoq Tazmax hax: "Laux buq mawz Yaeuhdaq mwz Tinhnah daet koan dij mbej." 14Tazmax ruxndeq Sowqlaz maeng lug Yaeuhdaq naeh haeuz baenz puj dwx, gaj goj naengz mboq maz raep dix hoak mez. Tazmax zoq tod gongzsowj hawj daenh ruxndeq po dix haeuz tai yaq naeh, yaq nungh sowj yowngh ndai. Dix naengh yuq baegdu long ndaw chaenh Yiznahyinq. Mwz Tinhnah gvaq zoah aen chaenh Yiznahyinq. Dix aeu kvaix paeng ux yaz naj. 15Dix aeu kvaix paeng ux hoakzaqnaeh yaz naj, baenznaeh gau Yaeuhdaq leztaen dix naeh, faeklaih dix zawh puj kaindang. 16Yaeuhdaq zoq daeq bae doq dix, hax: "Maz, gux daj mawz zaemhnoanz." Yaeuhdaq mboq ruxndeq goanz nyingz naeh zoq zawh mijloz dix. Tazmax hax: "Mawz daj gux zaemhnoanz, mawz aeu gaeng hawj gux mux?" 17Dix yaeng: "Mawz daj gux zaemhnoanz yaq, gux zoq mwz dih dij mbej gux yuq naeh, aeu do dij mbej ex ux soangq hawj mawz." Tazmax hax: "Awh, gaj gannaeh mawz naengz mboq aeu dij mbej daeuj hawj gux, mawz aeu gaeng dix nyaengxtaj mux?" 18Yaeuhdaq cham: "Mawz daz hawj gux aeu gaeng dix mux?" Tazmax yaeng: "Mawz aeu yinqzangz mawz daj sai dix, daj laenj maexdaeux mawz." Yaq Yaeuhdaq zoq aeu suq za'hoq naeh hawj Tazmax, daj dix zaemhnoanz, Tazmax zoq mizndang. 19Tazmax ni dih naeh, aeu kvaix paeng yaz naj dix naeh ni, daeuq nungh gongzsowj hawj daenh ruxndeq po dix haeuz tai yaq naeh.
20 Yaeuhdaq hawj dungzbownh dix Cizlaz goanz dij goanz puj Yaqduqlanh naeh saeh dix soangq do mbej ex ux bae hawj goanz nyingz naeh, aeu gaenq za'hoq dix aeu hawj goanz nyingz naeh dauh maz. Gaj Cizlaz cha mboq mex goanz nyingz naeh. 21Cizlaz cham dij goanz Yiznahyinq: "Goanz nyingz yuq ndaw myeuq kai ndang naeh, goanz naengh haenz loh Yiznahyinq naeh yuq rawz ah?" Paenqdix yaeng: "Inxnaeh mboq miz sowh dij goanz naeh mah." 22Cizlaz dauh mwz dih Yaeuhdaq naeh, daj dix hax: "Gux cha mboq taen dix. Dij goanz dih naeh goj hax dih paenqdix mboq sanz miz sowh dij goanz naeh naeuj." 23Yaeuhdaq hax: "Suq za'hoq gaeng naeh hawj dix ndae mah, yaj hawj daenh kosaemj raeuz tem. Gaenq gux haeuz soangq dij mbej bae hawj dix, gaj mawz cha mboq mex dix."
Tazmax Zowngx Lugsoah
24Gvaq ndaej zaekgaj teq sam ndown ux naeh, miz dij goanz haxdoq Yaeuhdaq: "Mijloz mawz Tazmax hoak puj kaindang, yaq gannaeh haeuz bazlug." Yaeuhdaq hax: "Laeg dix og daeuj, aeu faez pyaeu dix tai!" 25Sowh gau Tazmax zoah laeg og daeuj naeh, Tazmax hawj daenh saeh dix haxdoq laux buq dix Yaeuhdaq: "Suq za'hoq naeh zawh gaenq gawz, zoq zawh gawz hawj gux mizndang. Mawz lez aen yinqzangz naeh daj sai dix, yaq laenj maexdaeux naeh, suq za'hoq naeh zawh gaenq gawz." 26Yaeuhdaq ruxndeq suq za'hoq naeh zawh gaenqdix, dix zoq hax: "Dix hoak hoj nyeuz gux mbyah. Unj, gux mboq hawj lug zaiz gux Sowqlaz raep dix hoak mez." Gvaq mbaed saeh naeh mwz yaq, doiq dix zoq mboq zaemhnoanz tem.
27Taeng zwz Tazmax ced, Tazmax zux ruxndeq zawh lugsoah. 28Gau dix ced naeh, lug dix miz maeng ux ed mungz daeuj, goanz saeh dix zowngx naeh zoq jenj mungz maeng lug dix, aeu laenj mae ndiang ux qiat. Goanz saeh dix zowngx naeh faeklaih maeng naeh zoq zawh maeng zowngx daeuj daekgoanq. 29Gaj maeng naeh ej daeuq aeu mungz dix hoat dauh mwz, maeng ndai zoq zowngx daeuj daekgoanq. Yaq goanz saeh Tazmax zowngx naeh zoq daj maeng zowngx daeuj daekgoanq naeh hax: "Mawz zawh hoakzaqnaeh longx daeuj daekgoanq!" Yaq minxzwh maeng naeh zoq nyaek hoak Fahlowhswz. Fahlowhswz zoq zawh hax: "Longx daeuj daekgoanq." 30Yaq gau maeng zowngx daeuj daeklaeng naeh, ndaw mungz dix qiat mae ndiang, zoq nyaek minxzwh hoak Ceqlaz. Ceqlaz zoq zawh hax: "Gaenq ndiang."
လက္ရွိေရြးခ်ယ္ထားမွု
Zwz Nduq 38: ZHN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023, Peace Publishing Co. All rights reserved.