Zwz Nduq 37
37
Yezsowh Daj Boangx Bihnongx Dix
1 Yaqgowh yuq ndaw Zaznanh dih koax daekgoanq dez dix ndowj naeh ndowj. 2Baih dawj inxnaeh zawh mai gaenq rownz Yaqgowh.
Zwz Yezsowh naengz ex naeh, dix daj le lug mezlaeng dez dix zaemh yuq, zoq zawh daj lug Pihlaz lug Cihpaq zaemh yuq. Zwz dix ndaej sipjiat bi naeh, dix daj le goz dix zaemh mwz dawz dij mbej. Le goz dix hoak gaeng mboq hoj, Yezsowh zoq bae haxdoq dez dix. 3Yezsowh zawh zwz Yixsowhleh baenz puj jeq naeh zowngx. Baenzzaqnaeh, daengz boangx lug dix, dix nwh Yezsowh nyeuz. Yixsowhleh hoak gongzsowj riz laiz ux hawj Yezsowh. 4Le goz dix leztaen, ruxndeq dez dix nwh Yezsowh nyeuz, zoq hwnq Yezsowh, mboq daj Yezsowh hax kauq ndae.
Yezsowh Paen'hwnz
5 Yezsowh paen mbaed hwnz ux, dix haxdoq le goz dix. Le goz dix biak yaq, zoq gajfa hwnq dix. 6Dix daj le goz dix hoakzaqnaeh hax: "Su biak, gux paen'hwnz gaeng." 7Dix hax: "Boangx raeuz yuq ndaw naz qiat kaeujmeg hoak maet, maet kaeujmeg gux daeh in maz, maet kaeujmeg su yuq haenz maet gux gvih." 8Le goz dix daj dix hax: "Mawz daz hoak hongz piu zaeh max? Daz gvanx piu zaeh max?" Paenqdix cho sowh gaenq paen'hwnz dix naeh daj kauq dix zoq gajfa hwnq dix. 9Doaklaeng Yezsowh daeuq paen'hwnz mbaedmawq, dix goj haxdoq le goz dix. Gaenqdix hax: "Gux daeuq paen'hwnz mbaedmawq, gux paen'hwnz taen tang'vaenz, aen hai daj sip'aet aen ndaundiq gvih maz doq gux." 10Yezsowh daj dez dix daj le goz dix hax. Dez dix zoq hax dix, hax: "Mawz paen gaeng hwnz mux, mawz daz hawj gux daj meh mawz le goz mawz gvih mwz doq mawz zaeh max?" 11Le goz dix gaj goanz gaj ta'ndaem dix. Gaj dez dix loah'ej aeu mbaed saeh naeh nyaengxzaw.
Yezsowh Zoah Bihnongx Dix Aeu Kai Bae Aizjih
12Miz vaenz ux, le goz Yezsowh bae Swqjenq dawz dij mbej dez dix. 13Yixsowhleh daj Yezsowh hax: "Le goz mawz haeuz bae ndaw Swqjenq dawz mbej. Bae ndeh, gux nemz mawz bae dih paenqdix naeh." Yezsowh yaeng: "Awh, Gux bae." 14Dez dix daj dix hax: "Mawz bae lez le goz mawz yuq ndae mbaeuq, dij mbej maj ndae mbaeuq, yaq dauh maz haxdoq gux." Yaq Yezsowh zoq ni dih piang Cizboahlunh bae Swqjenq. 15Miz dij goanz taen Yezsowh yuq ndaw doangh loangloh, cham dix: "Mawz cha gaeng ah?" 16Dix yaeng: "Gux cha le goz gux. Mawz haxdoq gux mbaed ux mah, paenqdix yuq rawz dawz mbej?" 17Goanz naeh hax: "Paenqdix haeuz ni inxnaeh, gux ruxnyinz paenqdix hax, paenqdix bae Doztanz." Yezsowh zoq bae Doztanz cha le goz dix. Daeklaeng dix yuq ndaw Doztanz cha mex le goz dix. 18Paenqdix naengz yuq gvae cinj zoq leztaen dix. Gaenqdix naengz maz mboq taeng, daengzle zoq nwh haiq dix daj kaj dix tai. 19Paenqdix goanz lej hax mwz doq goanz, hax: "Su lez, goanz paen'hwnz naeh maz yah. 20Maz mah, gaenqraeuz kaj dix, yaq aeu dix viangh bae ndaw roangj, zoq hax dix zoah do'bo jin yah. Gaenqraeuz lez gaenq paen'hwnz naeh baenz ndaej mbaeuq gaz." 21Loixbenq ruxnyinz, daz jeuq Yezsowh ni dawj mungz paenqdix. Gaenqdix zoq hax: "Gaenqraeuz mboq baenz aeu aen mingh dix." 22Loixbenq daeuq daj paenqdix hax: "Laek kaj dix, goj laek dup dix, aeu dix bae kaeng ndaw roangj ndae mah." Loixbenq hoakzaqnaeh hax zawh dix daz jeuq dix ni dawj mungz paenqdix, zowz dix dauh mwz dih zawj dez dix naeh. 23Yezsowh mwz taeng dih le goz dix naeh, paenqdix zoq tod gongzsowj riz laiz dix naeh. 24Paenqdix jenj Yezsowh aeu dix bae kaeng ndaw roangj. Ndaw roangj mboq miz naemx.
25Gau paenqdix jin kaeuj naeh, paenqdix taen miz boangx dij goanz Yixswhmaxliq ux daeq Jizleh maz. Paenqdix zawh puj hoak gax, loahtoah paenqdix dah gaenqhom, ruxciang, moahyoah bae Aizjih.#37:25 Ruxciang daj moahyoah aeu daz ndaw ndang, hawj ndaw ndang hom. Le yowngh naeh biangz taeuq. 26Yaeuhdaq daj le bihnongx zaiz dix hax: "Gaenqraeuz daengz kaj nongx zaiz raeuz, mboq hawj daenh ruxndeq, raeuz goj mboq ndaej gaeng mah. 27Gangzmaz gaenqraeuz aeu dix kai hawj dij goanz Yixswhmaxliq. Gaenqdix zawh bihnongx ndiang raeuz, gaenqraeuz laek kaj dix." Daengz boangx bihnongx zoq biak dix. 28Miz boangx puj hoak gax Mixdenq ux gvaq zoah dih naeh.#37:28 Dij goanz Yixswhmaxliq daj dij goanz Mixdenq zawh hax sowh dij goanz ndeu. Le goz Yezsowh zoq laeg Yezsowh kwnj daeq ndaw roangj maz. Paenqdix aeu dix kai hawj dij goanz Yixswhmaxliq, kai ndaej ngihsip ndeaj ngaenz. Dij goanz Yixswhmaxliq zoq zowz Yezsowh bae Aizjih. 29Loixbenq dauh bae aen roangj gaeng naeh, leztaen Yezsowh haeuz mboq yuq ndaw roangj, zoq riag gongzsowj hoakri.#37:29 Dix riag gongzsowj dix zawh hax dix mex zoah sowh saeh mboq ndae naeh, ndaw zaw dix yuqraix taeuq. 30Dix dauh mwz dih le bihnongx zaiz dix naeh hax: "Maeng naeh mboq taen eh. Gaenqgux hoakrawz hoak mux?" 31Daeklaeng, paenqdix kaj taek mbej bo ux, aeu gongzsowj laiz Yezsowh bae yup lowd dij mbej, 32nemz dij goanz aeu gongzsowj laiz naeh mwz hawj dez paenqdix, hax: "Gaenqpiu zaep ndaej gongzsowj riz ux. Mawz lez zawh mboq zawh gongz lug zaiz mawz." 33Gaenqdix ruxnaj gongzsowj laiz naeh, hax: "Zawh gongzsowj lug zaiz gux. Dix zoah do'bo jin zaeh eh, jin nownzcumj eh." 34Yaqgowh zoq riag gongzsowj hoakri dix, koax raengx qiat kvaix paeng banq ux.#37:34 Dih paenqdix, miz puj tai, miz saeh dwx, rux yuqraix taeuq paenqdix zoq aeu kvaix paeng banq ux qiat koaxraengx, hawj daenh ruxndeq paenqdix yuqraix. Yaqgowh cauq Yezsowh yaengh ndauj. 35Lug dix gaj goanz gaj maz byongz dix, gaj dix gawz goj mboq biak. Dix hax: "Gux cauq lug gux taengdiak gux mwz dihndaem, mwz dih lug gux naeh." Dez Yezsowh zoq haej Yezsowh. 36Daeklaeng dij goanz Mixdenq aeu Yezsowh kai bae Aizjih, kai hawj goanz ux yuq baihdawj laux hongz Aizjih hoak saeq, zoq zawh Boztihfah goanz gvanx sowh bin dawz rownz hongz naeh.
လက္ရွိေရြးခ်ယ္ထားမွု
Zwz Nduq 37: ZHN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023, Peace Publishing Co. All rights reserved.