Izaiya 51
51
Mazu oalimbiha murima atu a Siyawu
1Mudivuruwane nyo munahara upama eto munanvenda Yehova. Muing'ane wewo uli nibwe musemiwe nyo eto muing'ane muliha mutimbiwe nyo. 2Muing'ane wa Abarahamu babinyu eto wa Sara wenno aubanleni. Tchoira dimuitanaga, liye ali mutu mmohi bahi. Damuitanile ira dimurelihe eto dimuindjivihe. 3Tchoira Yehova unoalimbiha murima atu a Siyawu eto unolimbiha mamburo matene kali madebe eto unosandutcha isalesale ira ikale nnga Edeni. Liye unosandutcha kokola ira ikale nnga munda wa Yehova. Hagalala no teyela unoza ufwanyeyegemo vamohi no tamalela na mazu a nyumbo.
4Mudibalre miyo nyo atu aga, mureye mabaru wa miyo nyo atu a nlogo naga. Tchoira malamulo anoza kakumelege mwa miyo vano. Nnoza digarateyihe matongelo a ibaribari ira ukale moneya wa atu atene. 5Upama waga uli vakwikwive. Vulusa waga uroma mwadeya. Miyo nnoatonga atu atene na miwono daga. Vilambo dowandamelana bara nnerege dinyindela miyo eto nnerege dediha muwono waga. 6Muvenyihede meswinyu zulu eto muing'ane ilambo ya vati. Tchoira zulu unoza udimele nnga utchi, eto ilambo ya vati inoza imale nnga yowara. Na makalelo amohive ale anakalamo anoza kakwe nnga ngulrisi. Mbwenye vulusa waga unoza ukalewo kala no kala. Eto upama waga kuza umala.
7Mudivuruwane nyo mwatene muiziwile upama, nyo atu okana malamulo aga mmirimani mwenyu, kamuove atu kaupudjagani nne kamurendeye zela joruwana jiwa. 8Tchoira aliwa anagomela djiwa nnga yowara yadjiwaga uswa eto nnga ntondje nadjiwaga anamingu. Mbwenye upama waga unoza ukalewo kala no kala eto vulusa waga unoza ukalewo para atene anabaliwege.
Lobela wa atu a Mulugu
9Kavenyani, kavenyani, Yehova na muwono wenyu wa kopolo. Kavenyani nnga jairile nyo wanle muwari mwa atu a wanle. Kodi kahi nyenne mwamugwadile nangumi#51:9 nangumi: MaBibiliya amohiwa anawonga: Rabeeto amohiwa anawonga Ijipitu. Afwase kawongaga ira Mulugu amugwadile nangumi yano yano, ku wonga Mulugu apazapaza kopolo da aIjipitu tempu yaakumihile liye atwaye. yano yano? Eto kahi nyenne mwamulatile daragawu wa mbara? 10Eto kahi nyenne mwaummihile bara, mahindje odiha? Kahi nyenne mwasakannye ndila muwari mwa bara ira atu owomboliwa kavire? 11Atu owomboliwa a Yehova anoza kawele, kaze Siyawu kaimbaga, kaganna hagalala wohomala mmuruni mwiwa. Anoza kakayena teyela no hagalala. Kumbanya no dumbela unoza umale.
Yehova unaalimbiha atwaye
12Miyo gu miyene unaulimbihani. Kodi nyo muli ani ira mumuovege mutu unafuna za kwa? Munamuovela nni mutu wenno unafuna za vunda nnga malatchi? 13Nyo mumudiwala Yehova Namapandutcha wenyu wenno atandile zulu eto uwandile manga maaliserisi a ilambo ya vati. Mwasiwa gwa nni malambo matene nyo aovaga atu anauzuzumihani anno anafuna joutolotchani? Uwali wa aliba uzuzumihani uli waani?#51:13 Mwasiwa gwa nni malambo matene nyo aovaga atu anauzuzumihani anno anafuna joutolotchani?Muwari moira Mulugu gu mundimuwa kwaranya jatene ja ilambo ya vati, kinafwanela aovaga atu masiki anno anavenda jonitolotcha. Kalaga nnga mazu a Yesu oira: Nyo kamwaovege atu anne anawanda pa maningo eto kahawandaga pa munemba. Mbwenye mmuovege wenne unawanda tolotcha munemba na maningwene motatilela munloni ohokana goma uwa. (Matewuji 10:28) 14Wenno utukuleliwe ilambo imohiwene unoza atapuliwe tchineneva. Liye kanafiyeda kwa, dowa heliwa masiye agalive ilambo yenno itukuleliwe liye. Eto kaza asauwela jodja. 15Tchoira miyo dili Yehova Mulugu wenyu wenno unavenyiha mahindje omanganyeya a bara ira kakukume. Yehova wa Makuru Matene ti nzina naga. 16Dihimala hela mazu aga vamulomoni venyu eto duhukunelani na muriti wa ndanda naga. Muwari moirana eno puzile garatihiwa zulu eto puzile mangiwa maaliserisi a ilambo ya vati eto puzile Siyawu wandeliwa ira: <<Nyo muli atwaga.>>
Mala wa makatamiho a Jeruzalemu
17Karurumuwa, karurumuwa, uimele we Jeruzalemu, we wang'wela mmandani mwa Yehova kopo ya uwali waye. Weyo wohong'wa kopo yatene fiyeda malamo na sokwe diwa dene. Eto wire ng'wa kopo yodederetcha. 18Muwari mwa ahima atene wabanle we, kalivo nne mmohi ira ausogolrelre. Eto muwari mwa ahima atene waulukulihile we, kalivo unauhideda ndanda. 19Amwidani kohotolotcha eto kohononga ilambwinyu. Atu kohokwa na ndala eto amohiwa kohopiwa na supada. Masiki mwagaireliwe jatene ejo, kalivo unafuna za uwendelani tangaranga nne kalivo unafuna za autondole. 20Ahimawo kohomala hileya. Kali gwembelre gwembelre mmakakanoni mwatene nnga nase olanda ntavi. Kohomala zaleliwa uwali wa Yehova no sumulula wa Mulugu wawo.
21Nona kavuruwana we maliba onihiwa goyi ulrezenlre, mbwenye lrezelra uwa kulrezenlre na vinyu. 22Nabwiya Yehova, Mulugu wawo wenno unabarela milandu da atwaye unawonga ira: <<Kaing'anani duhuwaka kopo yodederetcha na kopo ya uwali ira wahang'wegeve. 23Jejo miyo nnahela mmandani mwa ale anauonihani goyi, anno kauwandenleni ira: <Kagonati vati, hiyo niwendege vamitanani vawo.> Aliwa kohosakanya vamitanani vawo ira vikale nnga vonyingala eto nnga rampa ira kaviregevo.>>
လက္ရွိေရြးခ်ယ္ထားမွု
Izaiya 51: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral