Izaiya 52
52
Mulugu unoza aavuluse akuda Jeruzalemu
1Karurumuwa, karurumuwa we Siyawu. Kawara kopolo dawo. We Jeruzalemu sidadi yotchena kawara jowara jawo joriya. Mwasiwa roma peno kiza kavolowa mwa we aluku na atu otakala.#52:1 aluku anawongiwa ba atu ohokana pandi na yopangana ya Mulugu. Tchoira tempu yenno, mutu wenno avolowa muwari mwa yopangana ya Mulugu, akala ali mulombwana, liye oineliwa. (Jenesesi 17:12-14; Levitiku 12:3) 2Uvipupute tumbulru, uvenye, ugarati vapama viwa we Jeruzalemu. Uvitapule makurenti anakala nkohi mwawo we namwali mwana wa Siyawu uli muzari.
3Tchoira Yehova unawonga ira: <<Nyo muhugulihiwa vasayi eto munowomboliwa vahali kobiri.>> 4Tchoira Nabwiya Yehova unawonga ira: <<Atwaga kohodowa Ijipitu voroma vene ira kakalege wewule. Akuda Asiriya koaoniha goyi vasayi vene. 5Na mwasa wenno dire avi?>> Unawonga gu Yehova ira: <<Atwaga kohokumihiwa mwilamboni muwa kahaapagalrile yengo. Aliba atonga ananla.>> Unawonga gu Yehova ira: <<Malambo matene nzina naga nnakalela petiwave. 6Na mwasa wenno atwaga anoza kaiziwe nzina naga. Nona siku neno anoza kaiziwe ira unawonga gu miyo ira: <Kaing'anani miyo dili vano.> >>
7Oriya ba manyalo a wenno unawenda mmwangoni avweyihaga Muselu Wapama. Wenno unavweyiha muselu wa murendele, unazana muselu oteyela, unavweyiha vulusa eto unawonga na Siyawu ira: <<Mulugu wawo unatonga.>> 8Agwarda awo anakuwa mazu, anavweyiha mazu, anaimba mohagalala tchoira aliwa anoza kamuone na meso ewa Yehova awelelaga Siyawu. 9Nyo madebe a Jeruzalemu imbani mohagalala tchoira Yehova unaalimbiha atwaye murima eto liye uwombola Jeruzalemu. 10Yehova ohooniha muwono waye otchena vamentoni va malogo matene, mmagomelo mwatene mwa ilambo ya vati anoza kaone vulusa wa Mulugu wehu.
11Kakumanimo nyo, kakumanimo nyo, mukumemo muBabiloniya muli nyo mo. Kamusakwinye yengo ili yatene yotakala, mukumemo muwari mwaye, muvitchenihe nyo munatukula fwaramento da Yehova.#52:11 fwaramento da Yehova nnawongiwa va ti fwaramento da Nyumba ya Yehova. Atukula ali anamakuta na aLevi. (Numero 3:25,31,36, 4:25,26,31-32) 12Eto mwavenyagamo kamunavenyamo mobaranya eto kamunavenyamo motawa. Tchoira Yehova unoza ausogolrelreni eto Mulugu wa Izarayeli unokala gwarda wenyu wa mundulri.
Goyi nnafuna onihiwa namalaba wa Mulugu
13Kaing'anani, namalaba waga unoza alabegena zelru. Unoza atukuleliwe vazulu, akale vazulu vazulu. Eto unoza ateteliwe. 14Atu oindjiva kohomuona eto kohorendjeya mwasiwa kove yaye yohomala nongeya nongeya fiyeda haoneyaga nnga mutu. Maningo anna liye tchaaoneya nnga maningo a mutu. 15Sawasawa eto atu a malogo madjindji anoza katikiniheye na liye. Amwene tambe anoza kasauwele yowonga. Mwasiwa jengo jaharomile atu ona malambo a mundulrimu anoza kaone. Jengo jaharomile atu vwa, anoza kaonelremo.
လက္ရွိေရြးခ်ယ္ထားမွု
Izaiya 52: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral