Izaiya 50
50
AIzarayeli kohogulihiwa na mwasa wa jotega jiwa
1Yehova unawonga ira: <<Nili waani karta namulannyena miyo mminyu dimutamangihagavo? Kadanvahedile.#50:1 Mazu a Detoronomiyo 24:1 anawonga ira mutu afunaga mulanya muhiyanaye, anvahede karta. Mbwenye akala amutamangihaga kaanvahile karta, ku wonga bandja niwa kanimanle, nihikalawove. Mulugu awongaga ira: Nili waani karta namulannyena miyo mminyu dimutamangihagavo? Kadanvahedile. Ku wonga tamangiha aatamangihile liye aIzarayeli kaali moalanya mbwenye ali moahuwa miru diwa, amala kawelelane. Kodi atu bavi danna miyo mangawa fiyeda daugulihedeni aliwa? Kiliwo. Kaing'anani, nyo muhugulihiwa dowa kala azari na mwasa wa jotega jenyu. Eto mminyu ohotamangihiwa na mwasa ohovwelela wenyu. 2Mwasiwa gwa nni dagazile kadinfwannye mutu? Eto mwasiwa gwa nni dagaitanne kalivo urumenle? Kodi ndanda naga nire kwiva ira dahawande uwombolani? Owu kodi miyo kadanna kopolo douvulumutchani? Kaing'anani, miyo muwari mosumulula waga nnoummiha bara ilukulu. Eto nnosandutcha mihindje ira dikale kokola. Somba diwa nnonuka nrimba nabure mwasiwa mahindje kohomala umma, nnakwa na ntona. 3Nnowariha zulu na mirambo dodiba eto nnowariha zulu na masakwi odiba.>>
Namalaba wa Yehova
4Nabwiya Yehova udivahile nlumi na mutu ofundja ira diwande wonga mazu omulimbiha wenno uli owaheyene. Mabebehi matene unodirurumutcha, unorurumutcha mabaru aga ira kavwege nnga atu ofundja. 5Nabwiya Yehova ohula mabaru aga. Na mwasa wenno miyo kadili mutu ohovwelela eto kadili mutu owelela mundulri. 6Miyo dohovelela mitana daga wa aliba dikoma. Eto dohovelela matama aga wa ale katutumula ndevu daga. Kadatawihile kove yaga wa ale kadipudja eto kaditapela mare. 7Mbwenye Nabwiya Yehova unodikamiheda. Nona dipudja wewa kwaali yengo yodinyaswiha. Na mwasa wenno dihigarateyiha kove yaga nnga nibwe nolimba eto dihiiziwa ira kadiza dikana manyazo. 8Wenno unadikaliha pama uli vakwikwive na miyo. Bani unafuna kangana na miyo? Ndoweni niimeleni hiyo atene. Bani unafuna disumela miyo? Aze adikwivele. 9Kaing'anani, Nabwiya Yehova unadikamiheda miyo. Bani unafuna za dimanga mulandu? Kaing'anani, aliwa atene anoza kanyenyeye nnga yowara ya wanle. Anomala djiwa uswa.
10Bani muwari mwa nyo unamuova Yehova eto unavwelela mazu a namalaba waye? Inafwanela wenno unawenda muisini eto wenno ahanna wareya anyindele nzina na Yehova eto amusamele Mulugu waye. 11Kaing'anani nyo atene munakonda moneya wa Mulugu, nyo hindihaga munlo nyoka, wendagana mendje. Mwafunaga, kawendani no moneya wa munlo wenyu eto muwari mwa mendje datumbanya nyo. Mbwenye inafuna nyo watchela mmandani mwaga tchi ila. Nnouvahani ira mugonati na goyi dohokala da masika.
လက္ရွိေရြးခ်ယ္ထားမွု
Izaiya 50: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral