ALIGALE̍SIYA 5
5
Ikra̍yisi de alɔ hīya lɛfiyɛ mɛ̍
1Ala̍ i̍ hɔ̄ lɛfiyɛ yī ɔ̄chɔ̄chɛ gɛ ni̍ ke̍e̍ mɛ̍! Ikra̍yisi de alɔ hīya lɛfiyɛ mɛ̍! Ala̍ ā yarɛ brii bāa āchɛ nīi i̍ hɔ̄ lɛfiyɛ gɛ ni̍ ma̍ gɛ. Ala̍ ā ya̍ i̍ngɔ̍ɔ hɛ̄ɛbɛ nīi ala̍ ge̍ e̍e gba̍a tu̍ hī iyī ala̍ tū lɛfiyɛ ɔha̍lɔha̍ gɛ ni̍.
2Ala̍ ma̍ ko̍ō! Ami Ipɔ̍ɔli yɛ ma̍ ge̍ē ka i̍ngɔ̍ɔ a̍nɛ: Ala̍ ge̍ pi̍ye̍mā nīi e̍ ta̍ ala̍ wɔwu̍, ɔ̍lɔma̍ o̍ re̍ka Ikra̍yisi i̍ ɔjɔ̄jā de ala̍ ni̍ lachi̍lachi̍. 3N ge̍ē gba̍a ta̍ ala̍ ɔna: Ɔ̄chɛ nīi ge̍ pi̍ye̍mā hī iyī nū nīi e̍ de ɔlɔjā twɔ̍wu̍, ɔ̍lɔma̍ ɔlɔjā ge̍ gbō Lihɔ yī Imo̍sīisi wa̍a̍ bɛ̍ɛ̄nɛ̄. 4Ala̍ āchɛ ɛla̍ā nīi ē chikpo̍ yī ode lɛ kpakpa ba̍la Ɔwɔ bū la Lihɔ yī Imo̍sīisi ode gbōgbō ma̍, ala̍ ā de iyī ala̍ hɛ̍ hī Ikra̍yisi mɛ̍. Ala̍ rɛ hwɛɛ hī uhwa ɔnɛ̄ɛhɛhi yī Ɔwɔ mɛ̍. 5Alɔ ma̍ deyīche hīka alɔ ge̍ē de ē lɛ kpakpa ba̍la Ɔwɔ bū la wɔhu̍ yī Uhu yī Ɔwɔ nīi yɛ ē ya̍ u̍ku̍rɔ̍ gala ɔtū ode chōche yī alɔ ma̍. Ɔjā nīi alɔ yɛ ē gbēyī ma̍ bī āā a̍nɛ. 6Wu̍chē oji̍ nɛ, otū ngmo̍tu̍chɛ̄ ba̍la Ikra̍yisi Iji̍sɔ̄ɔsi nīi alɔ tū ma̍, wɔwu̍ ɔtɔ̍ɔ̄ta̍ kɛ̄ɛ i̍tɔ̍ɔ̄ta̍ ni̍, ɔjɔ̄jā i̍ hɔ̄ɔ̄hɔ̄ lɛ̍kɛ̍kɔ̍ ni̍. Ɔjā nīi - ɔka̍a̍ka̍ ma̍, ɔtū ode che Ɔwɔ nīi ē ya̍ u̍ku̍rɔ̍ ē gala ɔhɔtū ma̍ nɛ.
7Je̍ka aa̍ ala̍ yɛ ē ya̍ yɛ̍yɛ̍ o̍bū? Oji̍ chī ohu̍ nīi ala̍ pi̍ye̍mā la ɔya̍ ɔgulɛ̄lā olēchi̍ lēchi̍ ma̍? Kana̍ kpɛ̍ɛ nīi ɔlɔjā ba̍ ala̍ tū mɛ ma̍? 8O̍ i̍ chī i̍ Ɔwɔ nīi hī ala̍ ɛra̍ ma̍ ya̍ a̍ni̍ mɛ̍ɛ̍. 9E̍ ka hīka ɔjā obī ibrɛ̍ɛdi nōnū ɔ̍lɔ ge̍ lɔ̄lɛ bāa opi̍nyɛ̍ ma̍, ɔ̍lɔ ē ya̍ nīi ɔjā nīi ɛ̍lɛ de ti̍yatū ge̍ē ya̍ ibrɛ̍ɛdi ma̍ ɔ̍lɔ ē nū pu̍tu̍u̍ dɛdɛ? 10N chī yɛ amu ē de ūkpɔ̄tū che ala̍ kpɔ̍ɔ̍ we̍. Ongmo̍tu̍chɛ̄ yī alɔ ba̍la Ādā Iji̍sɔ̄ɔsi hu̍ nīi n de ɔtū che hwɔhi hwɔhi hīka ala̍ i̍ ge̍ē myɛ̍ma̍ ē gāa oo̍ha̍ lɛ̍kɛ̍kɔ̍ ni̍. Ɔ̄chɛ nīi chī yɛ ē ti̍ya ala̍ ē tū ma̍, o̍ ge̍ ro̍ōre̍ka ɔ̄chɛmɔ̄chɛ, Ɔwɔ ge̍ē de ichi̍ ɔnɔ̄kɔ̄kū de ɔlɔjā.
11Aɛ̍nɛ̍ yī u! Ami ma̍, oji̍ ohu̍ nīi āchɛ gba̍a ē ya̍ um ichi̍ dwɔ̄bi̍ dwɔ̄bi̍ ma̍, nīi o̍ ge̍ re̍ka n e̍e yɛ amu ē ka hīka o̍ ngma̍ nīi āchɛ ge̍ twɔ̍wu̍ nɛ ma̍? O̍ ge̍ re̍ka i̍ngɔ̍ɔ ichɛ̄ɛhi nɛ, ɔ̍lɔma̍ lɛlā yī ɔpīyaku̍ la ɔchi̍ ɔhrɛ̍ɛpa yī Ikra̍yisi nīi n ka ma̍ i̍ ge̍ tū lɛlā ogbōgbo ni̍. 12Āchɛ ɛla̍ā nīi ē ti̍ya ala̍ ē tū ma̍ ge̍ īcha lɛlā yī wā ɔla̍ā gɛ! E̍ ge̍ u̍tu de iyī wā bwo̍ochi kpɛ̍ɛ gɛ!
13Aɛ̍nɛ̍ yī u! Ala̍ ma̍, Ɔwɔ hī ala̍ ɛra̍ wā nīi ala̍ i̍ ge̍ē tū lɛfiyɛ ē gɛ ni̍ mɛ̍. Ala̍ e̍e chī chɛ̄ nīi lɛfiyɛ i̍tōtū ni̍ yī ala̍ nūma̍ ge̍ ma̍ ɛbɛ de ala̍ pīya afiyɛ yī a̍hla̍ yī ibi̍īyē yī ala̍ ɛlɛjā ni̍. Ɔkɔkɔ ɔla̍ā, ɔhɔtū ge̍ ya̍ nīi ala̍ ge̍ chrāa ɔ̍nyīnū ɛrɔ̄. 14Wu̍chē oji̍ nɛ, Lihɔ yī Imo̍sīisi wa̍a̍ de lɛhu̍ che lɛlā ūkpo̍he kpo̍kpo̍: “Yɔ̍ɔhɔtū yī ɔ̍nyīmɔ̄chɛ yī wɔ bāa awɔ ɔlɔjā ma̍.” 15Ala̍ ge̍ chī yɛ ē yɛ̍ɛ̄lā bāa ɛbɛ̍ ma̍, yɛ ē ya̍ ɔ̍nyīnū ɔjā, ɔ̍lɔma̍ ala̍ ā gbeyīchi̍i̍ gɛ; nɛ̄ni̍, ode ɔ̍nyīnū chāajɛ tɛri̍tɛri̍ bī aa̍ a̍nɛ.
Uhu ba̍la ɔchɔ̍ɔwɔ yī ɔ̄chɛ̄ɛchɛ
16I̍ngɛ̍ɛ̄nɛ̄ nīi n yɛ ē ka a̍nɛ. Ala̍ kɔ̄pɛ̄ ta̍ hɛ̄ɛbɛ nīi Uhu yī Ɔwɔ ge̍ bī ala̍ ya̍ ɛlāha̍ ɛlāha̍ wa̍a̍ la ɔhɔ̄leyī yī ala̍. Ala̍ e̍e ya̍ ɔjā nīi ɔchɔ̍ɔwɔ yī ala̍ ɛlɛjā chikpo̍ ma̍ ni̍. 17Wu̍chē oji̍ nɛ, ɔjā nīi ɔchɔ̍ɔwɔ yī alɔ āchɛ̄ɛchɛ ē chikpo̍ ma̍, Uhu yī Ɔwɔ i̍ chikpo̍ ni̍. Ɔjā nīi Uhu yī Ɔwɔ chī chikpo̍ ma̍, ɔchɔ̍ɔwɔ yī alɔ āchɛ̄ɛchɛ i̍ chikpo̍ yī nū ni̍. Ɛjā ɛpɛpa nūma̍ - ɛchɛlɛwu̍ gba̍a̍ nɛ. Ɔla̍ā re̍ka awɔ ɔ̄chɛ̄ɛchɛ i̍ ge̍ē ya̍ ɔjā nīi a chikpo̍ ge̍ē ya̍ ma̍ ē mɛ ni̍. 18O̍ ge̍ re̍ka Uhu yī Ɔwɔ yɛ ē bī wɔ ē ya̍ ɔjā nīi a yɛ ē ya̍ ma̍ a̍nɛ, ɔ̍lɔma̍ a i̍ gblɛfiyɛ yī Lihɔ yī Imo̍sīisi gɛ ni̍.
19Ɔjā nīi ɔchɔ̍ɔwɔ yī ɔ̄chɛ̄ɛchɛ ē ya̍ ma̍ lā nyaa. O̍ ē chabɔ̄ iyī nū la ya̍chi yī lɛlā ɔyɔ̍ɔ̄ya̍, lɛlā oli̍hi̍hi̍ya̍ ɔyɔ̍ɔ̄ya̍ ba̍la a̍kpla yī lɛlā ɔyɔ̍ɔ̄ya̍. 20O̍ ē chabɔ̄ iyī nū la ɛchi̍yɛka nīi āchɛ ē pā ma̍ ba̍la wɔhɛ. Āchɛ ē de ē pīya ɛchɛlɛwu̍ yī ɔ̍nyīnū; e̍ ē ya̍ ɔtū ngurangura, e̍ ē nyiya lɛlā ɔnɔ̄kɔ̄kū tāa āchɛ ē de iyī aa̍ ɛlɛjā; e̍ ē de iyī wā yi̍ya mi̍ni̍mi̍ni̍ ē trīibi yɛ̄mɛ̄mɛ̄; 21e̍ ē tū ɔ̍nyīnū uji, e̍ ē gwa̍ ɔjā de ē wɔ̄wīyā, ē ya̍ ɔwɔ̄wīyā ɔdwɔ̄bi̍ ɔdwɔnyɛ ba̍la ita yī lɛlā ɛha̍ eli̍ngɔ̍ɔ ɛla̍ā wa̍a̍. N yɛ ē ta̍ ala̍ ɔna u̍ma̍ama lɔkɔ nīi n ta̍ ala̍ ɔna o̍bū ma̍: Āchɛ nīi ē ya̍ ita yī lɛlā eli̍ngɛ̍ɛ̄nɛ̄ ma̍, e̍ i̍ ge̍ē nāa ɔpiyɛ yī Ɔchwɔ̄lɛ̍ Oro̍ōre̍ yī Ɔwɔ ni̍.
22Ɔjā nīi Uhu yī Ɔwɔ ē ya̍ ma̍: ɔhɔtū, ɔwɔ̄wīyā, ogbodɔ̍dɔ̍, ɔtū ɔmɔ̄mla kpɔ̍ɔ̍, ɔlɛyaya, lɛhi ɔyɔ̍ɔ̄ya̍, ɔtū ode chōche, 23ɔlɛmlɛ̍ɛ̍, ba̍la oku̍ iyī ɔ̄chɛ bī mɛ. Lihɔ ɔha̍lɔha̍ i̍ hɔ̄ pīyeyīta̍ ɛjā eli̍ngɛ̍ɛ̄nɛ̄ nūma̍ ni̍. 24Āchɛ nīi - āchɛ yī Ikra̍yisi Iji̍sɔ̄ɔsi ma̍ de ɔchɔ̍ɔwɔ yī aa̍ ɛlɛjā ngmo̍ mɛ̍. E̍ ngmo̍ ɔ̄ ba̍la lɛlā ɔhɔ̍ɔ̄hla̍ ɔla̍ā wa̍a̍, ba̍la ɔjā nīi ɔchɔ̍ɔwɔ yī ɔ̄chɛ̄ɛchɛ ē chikpo̍ ma̍. 25Uhu yī Ɔwɔ de ɔhɔ̄leyī de alɔ mɛ̍. Anu̍ chī ge̍ē bī orī yī ɔhɔ̄leyī yī alɔ wa̍a̍ bɛ̍ɛ̄nɛ̄ a̍nɛ. 26Alɔ i̍ ge̍ē jɛ̄ ɛba̍achɛ, kɛ̄ɛ ē ya̍ ɔ̍nyīnū ɔtū ngurangura, kɛ̄ɛ ē kpi̍ya̍nya ē tāa ɔ̍nyīnū gɛ ni̍.
လက္ရွိေရြးခ်ယ္ထားမွု
ALIGALE̍SIYA 5: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)