ALIGALE̍SIYA 4
4
1Ala̍ gba̍a ma̍ gɛ ko̍ō! Ɔyi̍ ɔnɔ̄ngrɔ̄ɔ nīi ge̍ē ru̍gū yī a̍dā yī nū ma̍, e̍ ē ya̍ ɔ̄ bāa ɔfiyɛ ma̍ yɛ̄grāa nīi o̍ e̍e lɛ pi̍nyɛ̍ we̍ ma̍. Tublāa ni̍, anu̍ chī lɛ ɔjāha̍ ɔjāha̍ wa̍a̍ a̍nɛ. 2O̍ e̍e lɛ pi̍nyɛ̍ ɔla̍ā ma̍, āchɛ ɛha̍ hɔ̄ abɔ̍ɔ nīi ē deyīrɛ anu̍ ɔlɔjā ba̍la ɛjā u̍gū ɛla̍ā wa̍a̍ ma̍. Āchɛ ɛla̍ā ge̍ē ya̍ i̍ngɔ̍ɔ kpɛɛ gbo̍ ɔ̄chī nīi a̍dā yī nū de lā ma̍. 3Gala ɔgɔgu ɔla̍ā, alɔ titi - afiyɛ yī uhu ɛha̍ nīi ē deyīrɛ yɛchɛ ma̍ o̍bū nɛ, kpɛɛ nīi alɔ wā ge̍ de jɛ̄ angrɔ̄ɔ gala ɔpɔ̄pū yī uhu. 4Yɛ̄grāa kpakpa wā ge̍ gbajɛ bɛ̍ɛ̄nɛ̄ ma̍, Ɔwɔ de Ɔyi̍ yī nū tɛ̄rɔ̄ wā. Ɔyi̍ yī nū ɔla̍ā wā bāa ɔyi̍ yī ɔ̄chɛ̄ɛchɛ ɔlamu ma̍ gala abɔ̄ yī ɔnyā. O̍ wā ge̍ tū la ihi̍yajɛ yī Lihɔ yī Iju̍u. 5O̍ ya̍ i̍ngɔ̍ɔ hɛ̄ɛbɛ ge̍ē jɔ̍ɔkɔ ē de āchɛ nīi tū la ihi̍yajɛ yī Lihɔ yī Iju̍u ma̍ ē hīya lɛfiyɛ, hɛ̄ɛbɛ nīi e̍ ge̍ē de ē pīya ayi̍ yī Ɔwɔ.
6Ɔya̍ hɛ̄ɛbɛ ge̍ chabɔ̄ hīka ala̍ ɔ̍lɔ - ayi̍ yī anu̍ nɛ, Ɔwɔ de Uhu yī Ɔyi̍ yī nū tɛ̄rɔ̄ wā ge̍ tū la ūkpɔ̄tū yī ala̍. Uhu ɔla̍ā, anu̍ ē drɛ̄ɛgba ē de ala̍ hīka, “Ādā, A̍dā yī u be̍e,” a̍nɛ. 7Bū la ɛbɛ ɔla̍ā, ala̍ i̍ afiyɛ gɛ ni̍; ala̍ - ayi̍ nīi o̍ mɔ̄ma bɛ̍ɛ̄nɛ̄ nɛ. Wu̍chē lɔkɔ nīi ala̍ - ɔyi̍ yī Ɔwɔ bɛ̍ɛ̄nɛ̄ nɛ ma̍, Ɔwɔ ge̍ē de ɔjā wa̍a̍ nīi o̍ de lā de ayi̍ yī nū ma̍ ē de ala̍.
Ɛri̍ya̍ nīi Ipɔ̍ɔli lɛ pīyeyīta̍ Aligale̍siya ma̍
8I̍chɔ̍lɔ ma̍, ala̍ i̍ je̍ Ɔwɔ ni̍; anu̍ - ohu̍ nīi ala̍ wɛ afiyɛ yī uhu ɛha̍ ɛla̍ā nīi i̍ ɔwɔ ni̍ ma̍ a̍nɛ. 9U̍ma̍ama nūma̍ nīi ala̍ je̍ Ɔwɔ, kɛ̄ɛ i̍ngɔ̍ɔ ni̍ nīi Ɔwɔ ɔlɔjā de ala̍ je̍ bɛ̍ɛ̄nɛ̄ ma̍, oji̍ - ohu̍ nīi ala̍ chikpo̍ yī oku̍chē dikpo̍ ē ba̍ uhu ɛlɛkwīkwī ɛla̍ā nīi i̍ ē ya̍ ɔjɔ̄jā mɛ ni̍ ma̍? Oji̍ - ohu̍ nīi ala̍ gba̍a chikpo̍ ge̍ē de ē pīya afiyɛ yī wā ma̍. 10Ɔ̄chī ɛha̍, ɔwīyā ɛha̍, yɛ̄grāa ɛha̍ lipu̍ yī lɛ̍yi̍, ba̍la lɛ̍yi̍ ɛha̍ ji, ala̍ ē nāa aa̍ bāa ɔ̄chī ɛlamu ɛlamu ka̍ka̍ ma̍. 11O̍ lɛ um uhuhwi kpɛ̍ɛji de ala̍! O̍ re̍ka u̍ku̍rɔ̍ yī u wa̍a̍ nīi n ya̍ de ala̍ ma̍ - a̍ji nɛ?
12Ala̍ chu̍chu̍u aɛ̍nɛ̍ yī u! Ala̍ ā lɛ bāa ami ma̍ gɛ! Ami ma̍, n chī lɛ bāa ala̍ ma̍. Ala̍ i̍ chī ya̍ u dwɔ̄bi̍ je̍ ni̍. 13Je̍ka aa̍ ala̍ je̍ ɔjā nīi - hu̍ nīi n kā Wɔ̄kā Ɔlwɔnyɛ nūma̍ de ala̍ la ɔrāarāa ma̍? Wu̍chē yī iyē nīi ku̍ u ma̍ nɛ. 14Ibi̍īyē ɔngmu̍wɔnɔ yī u lɔ̄lɛ bāa otu̍tū de ala̍ nyaa ma̍, ala̍ i̍ chī chi̍hi̍ya̍ yī u kɛ̄ɛ hi̍hi̍yo̍ yī u ni̍ kpɔ̍ɔ̍. Ɔkɔkɔ ɔla̍ā, ala̍ chōo̍chē nāa ami i̍ngɔ̍ɔ ke̍e̍ bɔ̄ɔkɔ nīi ala̍ ge̍ē nāa ɔyɛ̍ɛ̄chɛ̄rɔ̄ yī Ɔwɔ ma̍. Ala̍ u̍tu nāa ami bɔ̄ɔkɔ nīi ala̍ ge̍ē nāa Ikra̍yisi Iji̍sɔ̄ɔsi ɔlɔjā ma̍. 15Ala̍ lɛ ɔwɔ̄wīyā kpɛ̍ɛji yɛ̄grāa ɔla̍ā. O̍ chī - oji̍ nɛ̄ gɛ? Ami ɔlɔjā ge̍ē bī ala̍ gbogū mɛ hīka, o̍ ge̍ re̍ka ala̍ ge̍ē wu̍ īkprī yī ala̍ mɛ nɛ, ala̍ ke̍ ge̍ de wu̍ kɔ̄ de u. 16U̍ma̍ama bɛ̍ɛ̄nɛ̄ ma̍, o̍ re̍ka n de pīya oluji yī ala̍ bū la lɛlā olēchi̍ lēchi̍ ɔkɔ̄ka de ala̍?
17Āchɛ ɛla̍nū ma̍ yɛ ē gbɛri̍ya̍ ē tū ala̍ gba̍a̍. Ɔjā nīi e̍ chī chikpo̍ ge̍ē ya̍ ma̍ i̍ hwɔhi ni̍. Ode ala̍ hwōta̍ hī u hɛ̄ɛbɛ nīi ala̍ ge̍ gbɛri̍ya̍ tū wā lɔkɔ nīi aa̍ yɛ ē gbo ē tū ala̍ ma̍, anu̍ ē hla̍ āā a̍nɛ. 18O̍ hwɔhi ngma̍ nīi ɔ̄chɛ ē gbɛri̍ya̍ ē tū ɔ̄chɛ i̍ngɔ̍ɔ gba̍a̍ wu̍chē yī ɔnɛ̄ɛhɛhi yī ɔ̄chɛ. Lēchi̍, i̍ngɔ̍ɔ myɛ̄grāa-myɛ̄grāa nɛ; i̍ iyī yɛ̄gɛ̄grāa nīi n hɔ̄ abɔ̍ɔ tāa ala̍ ke̍e̍ ma̍ ni̍. 19Ayi̍ yī u lēchi̍ lēchi̍! Lɔkɔ nīi wɔnɔ ē hɔ̄ de ɔnyā nīi yɛ ē lwɔ̄ɔma yī ɔyi̍ ma̍, i̍ngi̍ngɔ̍ɔ nīi wɔnɔ ɔla̍ā hɔ̄ de u u̍ma̍ama wu̍chē yī ala̍ a̍nɛ. Wɔnɔ ɔla̍ā chī ge̍ē hɔ̄ de u i̍ngɔ̍ɔ kpɛ̍ɛ nīi ala̍ ge̍ē de lɛ ke̍e̍ bāa Ikra̍yisi ɔlɔjā ma̍ o̍bū. 20Ɔ̄chɛ pīya ka n hɔ̄ abɔ̍ɔ u̍ma̍ama ba̍la ala̍, hɛ̄ɛbɛ nīi n jɔ̍ɔkɔ ya̍ abɔ̄lɛ̄lā ɔha̍ lɛ̍kɛ̍kɔ̍ tāa ala̍. N de hi̍yɛ̄ngura gba̍a̍ wu̍chē yī ala̍ mɛ̍.
Igbla yī lɛlā yī Iha̍ga ba̍la Isa̍ra
21Ala̍ āchɛ nīi chikpo̍ nīi Lihɔ yī Imo̍sīisi ge̍ē bī wɔhu̍ yī ala̍ ma̍, n ge̍ē che ala̍ ikpo̍ yī lɛlā ɔha̍: Ala̍ po̍ ɔjā nīi Lihɔ yī Imo̍sīisi ka ma̍ ni̍ oo? 22O̍ ka A̍brahāam ɔ̍lɔ ma ayi̍ anāngrɔ̄ɔ āchɛ ɛpa. Ɔha̍, ɔfiyɛ ɔnɔ̄nyā ɔha̍ ɔ̍lɔ ma a̍nɛ. Ɔha̍ ɔnyā nīi - ɔ̍lɔ ɔywɔ̍lɛ̍ ma̍ ɔ̍lɔ ma a̍nɛ. 23Ɔyi̍ yī nū ɔla̍ā nīi ɔfiyɛ ma ma̍, e̍ ma ɔ̍ gala ɔgɔgu lɔkɔ nīi āchɛ ē ma ayi̍ ma̍. Onīi ɔywɔ̍lɛ̍ ma ma̍, e̍ ma ɔ̍ wu̍chē yī oko̍o ochōche yī Ɔwɔ. 24Ala̍ ā nāa lɛlā nūma̍ bāa igbla yī lɛlā ma̍ gɛ: Anyā āchɛ ɛpa nūma̍ lɛ bāa yɛka nīi Ɔwɔ gwa̍ ba̍la āchɛ yī nū ma̍. Iyī Iha̍ga, onīi bū la Yɛwu yī Isa̍yi̍nāyi ma̍ nɛ. Anu̍ nīi e̍ ma ayi̍ yī nū afiyɛ a̍nɛ. 25Iha̍ga nūma̍ re̍ka Yɛwu yī Isa̍yi̍nāyi nīi hɔ̄ la Are̍biya ma̍ a̍nɛ. Anu̍ - igbla yī ipwo̍gra yī Ijɛru̍sālɛm nīi hɔ̄ aa̍ u̍ma̍ama ma̍ a̍nɛ. Ipwo̍gra nūma̍ - ɔfiyɛ tūla āchɛ nīi gblāa abɔ̍ɔ la anu̍ ma̍ nɛ. 26Ijɛru̍sālɛm nīi chī hɔ̄ la ichō ma̍, anu̍ i̍ tū lɛfiyɛ ɔha̍lɔha̍ ni̍ lachi̍lachi̍; anu̍ re̍ka ɛ̍nɛ̍ yī alɔ nūma̍ a̍nɛ. 27Wu̍chē oji̍ nɛ, Īpū yī Ɔwɔ ka hīka,
“Ɔnyā ɔdwɔma be̍e!
Wɔ̄wīyā gba̍a̍ gɛ,
awɔ nīi i̍ ma ɔyi̍ ɔha̍lɔha̍ je̍ ni̍ ma̍!
Chūukwa yī ɔwɔ̄wīyā gba̍a̍ gɛ,
awɔ nīi i̍ lwɔ̄ɔma yī ɔyi̍ je̍ ni̍ ma̍!
Wu̍chē oji̍ nɛ, anu̍ ɔnyā ɔla̍ā nīi e̍ pīya hī ɔ̄ ta̍lā ji ma̍,
anu̍ ge̍ē ma̍ ayi̍ yɛ̄mɛ̄mɛ̄ pɛtɛpɛtɛ ē hi̍
anu̍ ɔnyā nīi hɔ̄ abɔ̍ɔ tāa ɔbu̍ūnū ma̍ a̍nɛ.”
28Ala̍ ma̍ gɛ ko̍ō, aɛ̍nɛ̍ yī u! Ala̍ ma̍ - ayi̍ yī Ɔwɔ wu̍chē yī oko̍o ochōche nīi Ɔwɔ che ma̍ nɛ. Iyī ala̍ lɛ ke̍e̍ bāa iyī A̍yi̍sāaki ma̍. 29Yɛ̄grāa ɔla̍ā, ɔyi̍ nīi e̍ ma gala ɔgɔgu lɔkɔ nīi āchɛ ē ma ayi̍ ji ma̍ ya̍ onīi e̍ ma wu̍chē yī Uhu yī Ɔwɔ ma̍ ichi̍. I̍ngi̍ngɔ̍ɔ nīi o̍ gba̍a lɛ u̍ma̍ama a̍nɛ. 30Ma̍, kana̍ nīi Īpū yī Ɔwɔ chī ka ma̍? O̍ hīka, “Tu̍labɔ̄ hī ɔnyā ɔla̍ā nīi - ɔfiyɛ ma̍ ba̍la ɔyi̍ nū ta̍anū. Wu̍chē oji̍ nɛ, ɔyi̍ yī ɔnyā ɔla̍ā nīi - ɔfiyɛ ma̍ i̍ ge̍ē bɔ̍ɔ̄ba̍ ē ru̍gū ba̍la ɔyi̍ yī ɔnyā nīi - ɔywɔ̍lɛ̍ ma̍ ni̍.” 31Bū la ɛbɛ ɔla̍ā, aɛ̍nɛ̍ yī u, alɔ ma̍ i̍ ayi̍ yī ɔnyā ɔla̍ā nīi - ɔfiyɛ ma̍ ni̍; alɔ - ayi̍ yī ɔnyā nīi - ɔywɔ̍lɛ̍ ma̍ nɛ.
လက္ရွိေရြးခ်ယ္ထားမွု
ALIGALE̍SIYA 4: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)