ALIGALE̍SIYA 6
6
Ala̍ bī iho̍ yī lɛlā yī ɔ̍nyīnū tāa ɔ̍nyīnū
1Aɛ̍nɛ̍ yī u! Ala̍ ge̍ ku̍ ɔ̄chɛ ɔha̍ lɛlā abi̍ ɔyɔ̍ɔ̄ya̍ ita ɔha̍lɔha̍, ala̍ nīi Uhu yī Ɔwɔ hɔ̄ la ala̍ ma̍, ala̍ ā ngū ɔ̄ nīi o̍ ge̍ ya̍ kpakpa. Ala̍ ā ya̍ i̍ngɔ̍ɔ la ɔpɔ̄pū ɔlɛmlɛ̍ɛ̍. Ala̍ ā deyīrɛ iyī ala̍ ɛlɛjā hɛ̄ɛbɛ nīi otu̍tū ge̍ e̍e wā ge̍ hɔ̄ de ala̍ titi ni̍. 2Ala̍ ā twɔ̄bɔ̄ bī iho̍ yī lɛlā yī ɔ̍nyīnū tāa ɔ̍nyīnū. Ala̍ ge̍ ya̍ i̍ngɔ̍ɔ, o̍ re̍ka ala̍ yɛ ē de lihɔ yī Ikra̍yisi ē gbō. 3Ɔ̄chɛ ge̍ gbɛri̍ya̍ ka anɔ̍lɔ ɔ̄chɛ ɔlamu ɔlamu nīi o̍ i̍ chī - ɔjɔ̄jā i̍ngɔ̍ɔ ni̍, o̍ re̍ka ɔlɔjā yɛ ē gwi̍bobo ē tū iyī nū. 4Ɔ̄chɛmɔ̄chɛ ge̍ jiya abɔ̄lɛ̄lā yī anu̍ ɔlɔjā ma̍ de iyī anu̍ ɔlɔjā. O̍ ge̍ hwɔhi hwɔhi, ɔlɔjā ge̍ wɔ̄wīyā wu̍chē yī ɔjā nīi anu̍ ɔlɔjā ya̍ ma̍; o̍ ge̍ e̍e gba̍a nāa kwichi̍ tāa lɛlā nīi ɔ̄chɛ ɔha̍ ya̍ ma̍ gɛ ni̍. 5Wu̍chē oji̍ nɛ, ɔnyɔnyɛ ge̍ē bī iho̍ yī lɛlā yī anu̍ ɔlɔjā.
6Ɔ̄chɛ nīi e̍ yɛ ē ngū ɔ̄ lɛlā yī Ikra̍yisi ma̍ ge̍ kɔ̄ ɛjā ɛnɛ̄ɛhɛhi nīi anu̍ lɛ ma̍ de ɔ̄chɛ nīi yɛ ē ngū ɔ̄ lɛlā ongōngū ma̍.
7Ala̍ e̍e gla̍ iyī ala̍ yɛ̍gra̍ ni̍; ma̍a ɔ̄chɔ̄chɛ i̍ ē gwi̍bobo ē tū Ɔwɔ ē mɛ ni̍. Ɔjā nīi ɔ̄chɛ nyi ke̍e̍ ma̍ nīi o̍ chi̍kri̍wu̍ yī nū a̍nɛ. 8O̍ ge̍ nyi ɔjā la yɛrɔ̄ yī a̍hla̍ yī lɛlā nīi - lɛlā yī ɔchɔ̍ɔwɔ yī anu̍ ɔlɔjā ma̍, ɔpīyaku̍ re̍ka i̍kri̍wu̍ nīi o̍ ge̍ē chiya la anu̍ a̍nɛ. O̍ ge̍ chī nyi ɔjā yī yɛrɔ̄ nīi iyī Uhu yī Ɔwɔ ma̍, ɔhɔ̄leyī i̍mɔ̄mɛni̍ re̍ka i̍kri̍wu̍ nīi o̍ ge̍ē chiya ē bū la abɔ̄ yī Uhu yī Ɔwɔ a̍nɛ. 9Wu̍chē yī ɔla̍ā, lɛlā ɔnɛ̄ɛhɛhi ɔyɔ̍ɔ̄ya̍ ge̍ e̍e de jɛ̄ alɔ la ɔyɔ̍ɔ̄ya̍ īchāha̍ īchāha̍ ni̍. Wu̍chē oji̍ nɛ, alɔ i̍ ge̍ tu̍labɔ̄ hī ɔ̄ ni̍, ɔ̄chī ɔha̍ hɔ̄ abɔ̍ɔ nīi alɔ ge̍ē chi̍kri̍wu̍ yī nū ma̍. 10O̍ lɛ i̍ngɔ̍ɔ ma̍, olo̍ ɔha̍lɔha̍ nīi alɔ ge̍ē lɛ yɛ̄grāa ma̍, alɔ ā lɛ̍ɛhi tāa āchɛmāchɛ wa̍a̍; la ɔgɔ̄ga yī nū wa̍a̍, alɔ ya̍ i̍ngɔ̍ɔ tāa āchɛ nīi tū lɛɛ̍nɛ̍ ba̍la alɔ la ɔtū ode chōche nūma̍ ma̍.
Ɔna yī lɛlā ba̍la ɔma̍kpɔɔ
11Je̍ka aa̍ ala̍ ma̍ ɛbɛ nīi n ta̍ īpū la abɔ̄ yī u tɛ̄rɔ̄ hu ala̍ ma̍ nīi n tɔ̍ɔ̄jā ku̍cha̍ku̍cha̍ bī aa̍! 12Āchɛ nīi chikpo̍ ge̍ē bī iyī aa̍ ɛlɛjā chabɔ̄, ē bī lɛlā yī yɛchɛchɛ yī aa̍ ɛlɛjā gbogū ma̍, aa̍ chikpo̍ ge̍ē ku̍ ala̍ wɔhu̍ wɔhu̍ ē twɔ̍wu̍ a̍nɛ. Ɔla̍ā, e̍ yɛ ē ya̍ i̍ngɔ̍ɔ hɛ̄ɛbɛ nīi āchɛ ɛha̍ i̍ ge̍ē ya̍ wā ichi̍ wu̍chē yī lɛlā yī ɔpīyaku̍ yī Ikra̍yisi la ɔchi̍ ɔhrɛ̍ɛpa ni̍. 13Aa̍ ɛla̍ā nīi ē kwɔgu yī lɛlā yī wɔwu̍ ɔtɔ̍ɔ̄ta̍ ma̍, aa̍ i̍ ē chī de Lihɔ yī Imo̍sīisi ē gbōgbō mɛ ni̍ a̍nɛ. E̍ chikpo̍ nīi ala̍ ge̍ē twɔ̍wu̍ hɛ̄ɛbɛ nīi e̍ ge̍ē jɔ̍ɔkɔ ē bī gbogū hīka ala̍ ɔ̍lɔ de chɛ̄ku lɛlā yī akpa̍ ibi̍īyē ɔlamu nūma̍ mɛ̍. 14Ami ma̍, lɛlā yī ɔpīyaku̍ yī Ādādā yī alɔ, Iji̍sɔ̄ɔsi Ikra̍yisi la ɔchi̍ ɔhrɛ̍ɛpa nīi n ge̍ē bī gbogū ke̍e̍ a̍nɛ. Wu̍chē oji̍ nɛ, bū la ɔpīyaku̍ yī nū la ɔchi̍ ɔhrɛ̍ɛpa, yɛchɛ nūma̍ wa̍a̍ de ya̍ bāa okū ma̍ de u; ami chī de ya̍ bāa okū ma̍ de yɛchɛ titi. 15Ɔjɔ̄jā i̍ ɔka̍ka̍ abɔ̍ɔ lipu̍ yī wɔwu̍ ɔtɔ̍ɔ̄ta̍ kɛ̄ɛ i̍tɔ̍ɔ̄ta̍ ni̍ ni̍. Onīi - ɔka̍ka̍ ma̍, ode pīya ɔ̄chɛ onīpīpɛ̄ nīi Ɔwɔ ē ya̍ ma̍ nɛ. 16Āchɛ nīi yɛ ē kwɔgu yī lɛlā oli̍ngɛ̍ɛ̄nɛ̄ nūma̍ la ɔhɔ̄leyī yī wā ma̍, ogbodɔ̍dɔ̍ ba̍la lɛha̍ ɔmɔ̍ɔ̄ma̍ ge̍ hɔ̄ ba̍la aa̍ wa̍a̍, aa̍ ba̍la āchɛ wa̍a̍ nīi - āchɛ yī Ɔwɔ ma̍.
17Ɔchlɛhu̍ yī lɛlā: Ɔ̄chɔ̄chɛ ge̍ e̍e gba̍a ya̍ um i̍mɛ̄nyɛ̄ ɔha̍lɔha̍ gɛ ni̍; wu̍chē oji̍ nɛ, ukpru nīi che um amu la ibi̍īyē ma̍ chabɔ̄ yī u mɛ̍ hīka amɔ̍lɔ - ɔfiyɛ yī Iji̍sɔ̄ɔsi nɛ.
18Ɔpiyɛ yī Ādādā yī alɔ, Iji̍sɔ̄ɔsi Ikra̍yisi ge̍ hɔ̄ ba̍la ala̍ wa̍a̍, aɛ̍nɛ̍ yī u! O̍ ge̍ lɛ i̍ngɔ̍ɔ.
လက္ရွိေရြးခ်ယ္ထားမွု
ALIGALE̍SIYA 6: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)