11 ALIKƆ̍RĪNTI 9
9
Ɔjā ode tū ɔ̍nyīnū wɔbɔ̄
1Lɛlā ɔjā ode tɛ̄rɔ̄ ge̍ tū āchɛ yī Ɔwɔ la Ijudi̍ya wɔbɔ̄ ma̍, o̍ i̍ ngma̍ nīi n ge̍ gba̍a ta̍ īpū wu̍chē ɔla̍ā tɛ̄rɔ̄ hu ala̍ gɛ ni̍. 2Wu̍chē oji̍ nɛ, n jo̍ōkū hīka ala̍ chikpo̍ ge̍ē twɔ̄bɔ̄. N bī ala̍ gbogū de āchɛ yī Imɛsɛdo̍niya i̍ngɔ̍ɔ wa̍a̍ mɛ̍. N ē de wa̍ hīka, “Aɛ̍nɛ̍ yī alɔ yī ɔcha yī Igri̍isi ma̍ tībi̍īyē ge̍ē twɔ̄bɔ̄ bū lɛ̍ɛla̍nū mɛ̍.” Ɔla̍ā nīi ala̍ chikpo̍ lēchi̍ lēchi̍ ge̍ē twɔ̄bɔ̄ i̍ngɔ̍ɔ ma̍ ya̍ nīi ūkpɔ̄tū yī āchɛ yɛ̄mɛ̄mɛ̄ nyɔ̄ yararɛ. 3N de aɛ̍nɛ̍ yī alɔ nūma̍ tɛ̄rɔ̄ yɛ abɔ̍ɔ yewā mɛ̍, hɛ̄ɛbɛ nīi lɛlā nīi alɔ ē bī gbogū ma̍ ge̍ e̍e de pīya a̍ji yī lɛlā ni̍. Ɔjā nīi ala̍ de twɔ̄bɔ̄ ma̍ ge̍ lɔ̄lā abɔ̍ɔ i̍ngɔ̍ɔ ke̍e̍ lɔkɔ nīi n ka ma̍. 4Nɛ̄ni̍, Alimɛsɛdo̍niya ge̍ wā ba̍la ami ge̍ ma̍ hīka ala̍ ɔ̍lɔ i̍ tībi̍īyē we̍ ni̍, o̍ ge̍ē liwēyī iwēyī de alɔ kpa̍a! Wu̍chē oji̍ nɛ, n de ɔtū che ala̍ ɔ̄kɔ̄kū. Liwēyī yī ala̍ ma̍, n i̍ chī ge̍ē kɔ̄ka ē gɛ ni̍. 5Wu̍chē yī ɔla̍ā nīi n ra̍ābɔ̄ de aɛ̍nɛ̍ yī alɔ nūma̍ hīka e̍ ge̍ yɔbū de u īcha wā dikpo̍ba̍ ala̍ a̍nɛ; hɛ̄ɛbɛ nīi e̍ ge̍ tu̍ ɔjā nīi ala̍ choko̍o ge̍ē de ē twɔ̄bɔ̄ ma̍ tu̍chɛ̄ lɔ̄lā; hɛ̄ɛbɛ nīi o̍ ge̍ lɔ̄lā abɔ̍ɔ yɛ̄grāa nīi n ge̍ē wā ma̍. Ɔla̍ā ge̍ē chabɔ̄ hīka ala̍ ɛlɛjā chikpo̍ ge̍ē de a̍nɛ; i̍ ɔ̄chɛ ku̍ ala̍ wɔhu̍ wɔhu̍ a̍ni̍.
6Ala̍ ma̍ gɛ ko̍ō! A ge̍ nyi ɔjā pi̍nyɛ̍, a ē nāa ɛjāyɛ̄rɔ̄ pi̍nyɛ̍. A ge̍ chī nyi mwɛbɛ, a ē nāa ɛjāyɛ̄rɔ̄ mwɛbɛ. 7Ɔ̄chɛmɔ̄chɛ ge̍ de ɔjā twɔ̄bɔ̄ lɔkɔ nīi o̍ gbɛri̍ya̍ ge̍ē de ke̍e̍ ma̍. I̍ ode chōo̍chē hi̍je̍mā, kɛ̄ɛ oku̍ wɔhu̍ wɔhu̍ ni̍. Ɔwɔ ē yɔ̍ɔhɔtū yī ɔ̄chɛ nīi de ɔjā la ūkpɔ̄tū ɔyaya ma̍. 8Ɔwɔ ɔlɔjā lwɔhu̍ ge̍ē de ɛjā kɔ̄ de ala̍ mwɛbɛ ke̍ke̍ni̍ gla onīi ku̍ ala̍ ɔkɔ ma̍ ē ta̍. Bū la ɛbɛ ɔla̍ā, ala̍ ge̍ē lɛ ɛjā ē jɛ̄ ala̍ lɛmiyɛ ē hōhī. Ala̍ ge̍ē lɛ ē glɛbɛ ē ta̍ la obī yɛ̍ɛ̄lā ɔnɛ̄ɛhɛhi. 9Ɔla̍ā lɛ lɔkɔ nīi Īpū yī Ɔwɔ ka ma̍:
“Ɔwɔ lɛ abɔ̄ yaya la ɔjā ɔkɔ̄kɔ̄ de alyeklo̍.
Ɔlɛyaya yī nū hɔ̄ kpɛɛ ku yɛ̄grāa ɔha̍lɔha̍.”
10Ɔwɔ ē de ɛjā onyōnyi ē de āchɛ, gba̍a ē de ojōre̍ ē de āchɛ a̍nɛ. O̍ ge̍ē de ɔjā onyōnyi nīi ku̍ ala̍ ɔkɔ ma̍ ē de ala̍. O̍ ge̍ē gba̍a ē ya̍ nīi e̍ ē jɛ̄ hwɔhi hwɔhi, hɛ̄ɛbɛ nīi ala̍ ē lɛ ɛjā ɛla̍ā mwɛbɛ ke̍ke̍ni̍ bū la abɔ̄ yaya yī ala̍. 11O̍ ge̍ē ya̍ nīi ala̍ ē gbwɔdu chɔ̍kɔ̄chɔkɔ̄ myɛ̄grāa-myɛ̄grāa, hɛ̄ɛbɛ nīi ala̍ ē lɛ abɔ̄ yaya yɛ̄grāa ɔha̍lɔha̍. Bū la ɔla̍ā, āchɛ yɛ̄mɛ̄mɛ̄ ge̍ē ka Ɔwɔ ɔkɔ̄kā wu̍chē yī ɔjā nīi ala̍ de nīi e̍ nāa la abɔ̄ yī alɔ ma̍. 12Lɛhi nūma̍ nīi ala̍ yɛ ē ya̍ ma̍, i̍ wɔbɔ̄ otōtū yī āchɛ yī Ɔwɔ ke̍e̍ nīi o̍ ba̍ la anu̍ a̍ni̍. O̍ gba̍a ya̍ nīi o̍be u̍ku̍rɔ̍ ɔda Ɔwɔ ɔdɔ̄da ge̍ē lɔ̄kū gāa iyɔ̄bū iyɔ̄bū. 13Bū la ochi̍chi̍ yī lɛlā nīi bīyɛchɛ la u̍ku̍rɔ̍ yī lɛhi ɔyɔ̍ɔ̄ya̍ yī ala̍ nūma̍ ma̍, āchɛ yɛ̄mɛ̄mɛ̄ ge̍ē kā Ɔwɔ ɔkɔ̄kā. Wu̍chē oji̍ nɛ, o̍ i̍ ba̍ la Wɔ̄kā Ɔlwɔnyɛ yī Ikra̍yisi nīi ala̍ yɛ ē koko̍o de āchɛ ma̍ ke̍e̍ ni̍, ala̍ gba̍a yɛ ē pɔ̍ɔkɔ yī nū, yɛ ē kɔ̄ ɔjā nīi ala̍ lɛ ma̍ ē de aa̍ ba̍la āchɛ ɛha̍ bāa ɔpu̍pupu̍ ma̍. 14Bū la ɛbɛ ɔla̍ā, e̍ ge̍ē jɔhā de ala̍, ē gbɛri̍ya̍ ē tāa ala̍ gba̍a̍ wu̍chē yī uhwa ɔnɛ̄ɛhɛhi ɔlɛbɛ̍bi̍ gba̍a̍ nīi Ɔwɔ de chabɔ̄ hu̍ ala̍ ma̍. 15Alɔ ā da Ɔwɔ o̍be wu̍chē yī ɔjā ɔkɔ̄kɔ̄ yī nū ɔla̍ā nīi ɔ̄chɛ i̍ ē kɔ̄ka la oko̍o ē mɛ̍ ni̍ ma̍!
လက္ရွိေရြးခ်ယ္ထားမွု
11 ALIKƆ̍RĪNTI 9: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)